ᓚᓐᑕᓐ UK, ᒫᔾᔨ 22, 2024- ᐃᓄᐃᑦ ᐃᑲᔪᖅᑐᐃᔪᑦ ᑎᓕᔭᐅᓯᒪᓂᖏᓐᓂ ᐃᓯᐊᕿᔪᓂᒃ ᐊᐅᓚᑦᑎᒋᐊᖃᕐᓂᖏᓐᓂ ᑲᓇᑕᐅᑉ ᐅᑭᐅᖅᑕᖅᑑᑉ ᐃᒪᖏᓐᓂ, ᐃᑲᔪᖅᑐᐃᔪᖅ ᓯᓚᕐᔪᐊᒥ ᐅᒥᐊᕐᔪᐊᓕᓂᕐᒥᑦ ᓄᓇᓕᓐᓂᑦ ᐊᖏᖅᑕᐅᓯᒪᔪᓂᒃ.
ᐃᓄᐃᑦ ᐱᖃᑕᐅᓗᑎᑦ ᓯᓚᕐᔪᐊᒥ ᐅᒥᐊᕐᔪᐊᒃᑯᑦ ᓄᓇᓕᓐᓂᑦ ᑲᑎᖃᑕᐅᓗᑎᑦ 81−ᖓᓐᓂ ᑲᑎᒪᓂᐅᔪᒥ ᐃᒪᕐᒥᑦ ᐸᖅᑭᑦᑎᓂᕐᒧᑦ ᑲᑎᒪᔨᕋᓛᖏᓐᓂ (MEPC) ᑕᐃᑲᓂ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᑦ (IMO) ᑕᒪᓂ ᐱᓇᓱᐊᕈᓯᕐᒥ ᓚᓐᑕᒥ. ᑲᑎᒪᔾᔪᑎᔅᓴᖏᑦ ᐃᓯᐊᕿᔪᓂᒃ ᒑᓯᓂᒃ (GHG), ᐱᐅᓯᕚᓪᓕᑲᓐᓂᕋᓱᐊᕐᓗᒋᑦ ᐃᒪᕐᒥ ᓂᐱᖃᓗᐊᖅᑕᐃᓕᒪᑎᑦᑎᓇᓱᐊᕐᓂᕐᒧᑦ ᐸᕐᓇᐅᑎᓂᒃ ᐱᒋᐊᕈᑕᐅᓗᑎᑦ, ᐊᒻᒪᓗ ᐃᓄᓐᓄᑦ ᑲᓇᑕᒥᐅᑕᕐᓄᑦ, ᐃᓯᐊᕿᔪᓂᒃ ᐊᐅᓚᑕᐅᔪᓐᓇᕐᓗᑎᑦ (ECA) ᑲᓇᑕᐅᑉ ᐅᑭᐅᖅᑕᖅᑐᖏᑕ ᐃᒪᖓᓐᓂ ᐃᓄᐃᓪᓗ ᓄᓇᖏᓐᓂ.
“ᐊᑕᖏᑦᑐᑎᑦ ᑭᓯᐊᓂ ᐱᖃᑕᐅᓐᖏᑦᑐᖅ ᐃᒪᕕᒻᒥ ᑲᓇᑕᒥ ᐊᑖᓂ 6−ᖏᓐᓃᑦᑐᓂᒃ (degrees) ᐸᖅᑭᔭᐅᓯᒪᔪᑦ ᐃᓯᐊᕿᔪᓂᒃ ᐊᐅᓚᑕᐅᔪᓐᓇᕐᓗᑎᑦ (ECA) 2013−ᒥᓂᑦ. ᑖᓐᓇ ᑐᓐᖓᓱᑦᑎᑕᕗᑦ ᐱᒋᐊᕈᑎᒃ ᑲᓇᑕᒥ ᑕᐃᒪᐃᓪᓗᐊᑎᑦᑎᓪᓗᑎᑦ ᐸᖅᑭᑦᑎᔪᑦ ᐃᓄᖁᑎᑦᑕ ᓄᓇᖓᓐᓂ”, ᐅᖃᓚᐅᖅᑐᖅ ᓖᓴ ᕿᓗᖅᑎ ᖁᐱᕐᕈᐊᓗᒃ, ᐃᓄᐃᑦ ᐅᑭᐅᖅᑕᖅᑐᒧᑦ ᑲᑎᒪᔨᖏᑦ (ICC) ᐃᔅᓯᕙᐅᑕᐅᑉ ᑐᖏᓕᖓ ᐊᒻᒪᓗ ᐊᐅᓚᑦᑎᖃᑕᐅᓪᓗᓂ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓂ (ICC) ᑎᓕᔭᐅᓯᒪᔪᖅ ᑕᐃᑲᓂ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᑦ (IMO). “ᕿᓐᓂᖅᑕᒥᑦ ᐸᐅᕿᔪᓂᒃ ᐃᓯᐊᕿᔪᓂᑦ ᐅᒥᐊᕐᔪᐊᕐᓂᑦ, ᑕᐃᑲᓂ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᑦ (IMO)-ᓇᓗᓇᐃᖅᑕᐅᓯᒪᔪᑦ ᐅᑭᐅᖅᑕᖅᑐᒥ ᐃᒪᕐᒥᑐᐊᖅ, ᒪᕐᕈᐊᖅᑎᓐᖑᐊᓕᖅᑐᓂᑦ ᐱᑕᖃᕐᓂᖅᓴᐅᓯᒪᓕᖅᑐᖅ ᐊᑯᓐᓂᖏᓐᓂ 2015 ᑎᑭᑦᑐᒍ 2021. ᑲᓇᑕ ᐅᐱᒋᔭᐅᒋᐊᓕᑦ ᐊᔅᓱᕈᖃᑦᑕᖅᓯᒪᓂᖏᓐᓄᑦ ᑕᒪᒃᑯᓂᖓ ᓴᖅᑮᑦᑕᐃᓕᒪᓂᖏᓐᓂ ᐊᓯᔾᔨᖅᓯᒪᒻᒪᕆᒻᒪᑕ ᐊᒻᒪᓗ ᒥᑭᓪᓕᕚᓪᓕᑎᑦᑎᓯᒪᓪᓗᑎᑦ ᐃᓯᐊᕿᔪᓂᒃ ᑕᒪᑐᒥᖓ ᐃᓯᐊᕿᔪᓂᒃ ᐊᐅᓚᑕᐅᔪᓐᓇᕐᓗᑎᑦ (ECA) ᑲᓇᑕᐅᑉ ᐅᑭᐅᖅᑕᖅᑐᖏᓐᓂ.”
ᐸᐅᕐᒥᑦ ᑕᒪᒃᑯᐊ ᐸᐅᕐᔫᔮᖅᑐᑦ ᒥᑭᔫᑎᕈᓗᐃᑦ ᐅᒥᐊᕐᔪᐊᑉ ᑐᖅᑐᐊᖓᓃᓐᖔᖅᑐᑦ. ᑕᒪᒃᑯᐊ ᑲᑎᑦᑐᒋᑦ ᐊᑦᑐᐃᓂᖃᕈᓇᕐᖓᑕ ᐊᑯᓂᑲᓪᓚᐅᓕᖅᑎᓪᓗᒋᑦ, ᐱᐅᖏᑦᑐᒥᑦ ᐱᑕᖃᓕᖅᑎᑦᑎᒍᓐᓇᖅᑐᑎᑦ ᐊᓂᖅᑎᕆᔾᔪᑕᐅᔪᓐᓇᓕᖅᑐᑎᑦ ᐆᒻᒪᑎᕐᓗᒍᑕᐅᒍᓐᓇᖅᑐᑎᑦ, ᐋᓐᓂᐊᑖᕈᓐᓇᖅᑐᑎᑦ, ᐃᕐᓂᐊᓪᓗ ᐊᓗᓯᕐᓗᕈᓐᓇᖅᑐᑎᑦ. ᐊᖏᔪᐊᓗᒻᒥᓪᓗ ᐅᖅᑰᓯᕙᓪᓕᐊᔾᔪᑕᐅᒃᑲᓂᖅᑐᓂ ᓄᓇᓕᓐᓂ ᓯᑯᐃᖅᓴᕋᐃᓕᖅᑐᓂᓗ ᐊᐳᑏᔭᖅᓴᕋᐃᓕᖅᑐᓂᓗ, ᑕᐃᒪᐃᓐᓂᖓᓐᓄᑦ ᓯᓚ ᐊᓯᔾᔨᐸᓪᓕᐊᓂᖓᓐᓂ ᓱᒃᑲᓕᓂᖅᓴᒻᒪᕆᐅᓕᖅᑐᖅ ᓇᔪᖅᑕᐃᓪᓗᓂ ᓂᕐᔪᑎᓄᑦ ᐊᔾᔨᒌᓐᖏᑦᑐᓄᑦ ᓄᖑᑉᐸᓪᓕᐊᒍᓐᓇᖅᑐᑎᑦ. ᑕᒪᓐᓇ ᐊᑦᑐᐃᓂᖃᓪᓚᕆᒻᒥᔪᖅ ᐃᓄᐃᑦ ᓂᕿᔅᓴᖃᕈᓐᓇᕐᓂᖏᓐᓂ ᐊᒻᒪᓗ ᐱᖅᑯᓯᖏᓐᓂ ᑎᒍᒥᐊᑦᑎᐊᕋᓱᐊᕐᓂᕐᒥᑦ.
ᐊᒻᒪᓗᒃᑲᓐᓂᖅ ᐃᓯᐊᕿᔪᓂᒃ ᐊᐅᓚᑕᐅᔪᓐᓇᕐᓗᑎᑦ (ECA) ᑐᔅᓯᕋᐅᑎᒥ, ᐃᓄᐃᑦ ᐅᑭᐅᖅᑕᖅᑐᒧᑦ ᑲᑎᒪᔨᖏᑦ (ICC) ᐊᔅᓱᕉᑎᖃᖅᓯᒪᔪᑦ ᐱᖃᑕᐅᒋᐊᖃᕐᓂᖏᓐᓂ ᐊᒻᒪᓗ ᑕᐃᒪᐃᓪᓗᐊᕐᔫᒥᔪᒥᓪᓗ ᐃᖏᕐᕋᓗᑎᑦ ᑕᒪᒃᑯᓂᖓ ᒪᑭᒪᔾᔪᑎᔅᓴᓂᒃ ᐊᔅᓱᕉᑕᐅᔪᓂᒃ ᐱᑕᖃᖁᓇᒋᑦ, ᐊᑦᑐᐃᓂᖃᕈᓐᓇᕐᖓᑕ ᐃᓄᓐᓂᑦ ᓄᓇᓕᓐᓂ ᑕᐃᒪᐃᑎᑦᑎᖏᑦᑐᓂᑦ ᓯᓚᒥ ᐊᓯᔾᔩᔪᓂᒃ ᑭᓯᐊᓂᓕ ᐊᑦᑐᖅᑕᐅᓂᖅᐹᖑᓪᓗᑎᑦ. ᑲᓇᑕᒥ ᐱᓕᕆᖃᑕᐅᓗᓂ ᐃᓄᓐᓂᑦ ᐱᕙᓪᓕᐊᓗᑎᑦ ᐊᑭᑐᓗᐊᓐᖏᑦᑐᒃᑯᑦ ᐸᕐᓇᐅᑎᓕᐅᕐᓗᑎᑦ ᑕᒪᑐᒧᖓ ᐃᓯᐊᕿᔪᓂᒃ ᐊᐅᓚᑕᐅᔪᓐᓇᕐᓗᑎᑦ (ECA) ᑕᐃᒫᒃ ᐃᓄᐃ ᐊᖏᕈᑎᖏᓐᓂ ᑲᑐᔾᔨᖃᑎᒌᓐᓂᒃ ᐃᑲᔪᖅᑐᖅᑕᐅᖁᔭᕗᑦ ᑐᔅᓯᕋᐅᑎᐅᔪᖅ. ᐱᐅᓐᖏᑦᑐᓂᑦ ᒪᑭᒪᔾᔪᑎᔅᓴᓂᑦ ᐊᑦᑐᐃᖁᔨᓇᑕ ᐃᓄᐃᑦ ᓄᓇᓕᖏᓐᓂ ᐱᐅᓂᖅᓴᓂᑦ ᓴᓗᒪᓂᖅᓴᓂᑦ ᐊᑐᕐᓗᑎᑦ ᐃᒪᒃᑯᑦ ᐅᖅᓱᕐᓂᑦ ᐱᑕᖃᓐᖏᓂᖅᓴᐅᓕᖁᓪᓗᒋᑦ ᐃᓯᐊᕿᔪᓂᒃ ᐊᐅᓚᑕᐅᔪᓐᓇᕐᓗᑎᑦ (ECA) ᐱᒻᒪᕆᐅᒻᒪᑦ ᐃᓄᓐᓄᑦ.
ᐃᓄᐃᑦ ᓯᕗᓪᓕᖅᐸᐅᔾᔨᓇᓱᐊᕐᖓᑕ ᐱᓕᕆᖃᑎᖃᕐᓂᕐᒥᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᑦ (IMO) ᐅᐱᓐᓇᕋᓂ ᐅᒥᐊᕐᔪᐊᒃᑯ ᐃᖏᕐᕋᓂᐅᔪᑦ ᐱᒻᒪᕆᐅᒻᒪᑕ ᒪᑭᒪᔾᔪᑎᔅᓴᐅᓪᓗᑎᓪᓗ, ᓱᕈᓐᓇᑐᓪᓗ ᐊᑦᑐᐃᑲᒻᒪᖃᑦᑕᕐᖓᑕ ᐃᒪᕕᑦᑎᓐᓂ, ᐊᒻᒪᓗ ᑲᑎᖅᓱᐸᓪᓕᐊᓪᓗᑎᑦ ᐊᑦᑐᐃᓂᖃᓲᖑᒻᒪᑕ ᐅᑭᐅᖅᑕᖅᑑᖅ ᐃᒪᖏᓐᓂ ᓇᔪᒐᐅᔪᓂᓪᓗ ᓂᕐᔪᑎᓐᓄᑦ, ᐃᓄᖁᑎᑦᑎᓐᓄᑦ, ᐅᖃᐅᓯᑦᑎᓐᓄᑦ, ᐱᖅᑯᓯᑦᑎᓐᓄᑦ ᐃᓅᓯᓕᒫᑦᑎᓐᓄᑦ ᐱᔭᕆᐊᑐᖃᑦᑕᕐᖓᑕ ᐆᒪᔪᓂᒃ ᓇᔪᒐᖏᓐᓂᓪᓗ ᐱᓪᓗᒋᑦ. ᐃᓄᐃᑦ ᐅᑭᐅᖅᑕᖅᑐᒧᑦ ᑲᑎᒪᔨᖏᑦ (ICC) ᑎᓕᔭᐅᓯᒪᔪᖅ ᑕᒫᓂ ᑭᒡᒐᖅᑐᐃᔨᐅᓪᓗᓂ ᐃᓄᐃᑦ ᑲᓛᖦᖡᑦ ᓄᓈᓂᒥᐅᑦ, ᑲᓇᑕᒥ, ᐊᓛᔅᑲᒥ ᐊᒻᒪᓗ ᕼᐊᐃᑦᓱᒃ (Heiltsuk) ᐊᓪᓚᐃᑦ ᑲᑎᒪᔨᖏᓐᓂ, ᐊᓪᓚᐃᑦ ᓄᓇᖃᖅᑳᖅᓯᒪᔪᓪᓗ ᐳᕆᑎᔅ ᑲᓚᒻᐱᐊᒥ, ᑲᓇᑕᒥ. ᐃᔅᓯᕙᐅᑕᐅᑉ ᑐᖏᓕᖓ ᖁᐱᕐᕈᐊᓗᑉ ᐅᖃᓚᐅᖅᑐᖅ, “ᐃᓄᐃᑦ ᐅᑭᐅᖅᑕᖅᑐᒧᑦ ᑲᑎᒪᔨᖏᑦ (ICC) ᖁᕕᐊᓪᓚᕆᑦᑐᑦ ᑎᓕᓯᓯᒪᒻᒪᑕ ᐃᓄᐃᑦ ᐱᖃᑕᐅᓪᓗᑎᑦ ᓇᑭᑐᐃᓐᓈᖅᓯᒪᔪᑦ ᐃᓄᐃᑦ ᓄᓇᖓᓐᓂ, ᐊᒻᒪᓗ ᕼᐊᐃᑦᓱᒃ (Heiltsuk) ᐊᓪᓚᓂᑦ ᑐᓴᖅᑎᑦᑎᑲᓐᓂᕈᓐᓇᕐᖓᑕ ᐱᓕᕆᖃᑎᖃᕐᓗᑎᓪᓗ ᓯᓚᕐᔪᐊᒥ ᐃᓱᒪᓕᐅᖅᑎᓂᒃ ᑐᓴᖅᑕᐅᓗᑎᓪᓗ ᐃᓱᒫᓘᑎᕗᑦ.”
ᐅᓂᒃᑳᕆᔭᕐᓂᑦ, ᕼᐊᐃᑦᓱᒃ (Heiltsuk) ᐊᓪᓚᐃᑦ ᑲᑎᒪᔨᖏᓐᓂ ᐅᓂᒃᑳᓚᐅᕐᖓᑕ ᐃᓚᓕᐅᔾᔭᐅᒋᐊᖃᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᐱᖅᑯᓯᑐᖃᖏᑦ ᖃᓄᐃᑦᑐᑐᐃᓐᓇᑦᑎᐊᖑᒐᓗᐊᖅᑲᑕ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᑦ (IMO) ᐱᓕᕆᐊᖑᓗᑎᑦ ᒪᓕᒐᖅᑎᒍᓪᓗ. ᕼᐊᐃᑦᓱᒃ (Heiltsuk) ᐊᓪᓚᐃᑦ ᑲᑎᒪᔨᖏᓐᓂ ᐊᖏᔪᖅᑳᖓ ᒥᐅᕈᓕᓐ ᓯᓚᑦ ᐅᖃᓚᐅᖅᑐᖅ, “ᐱᖃᑕᐅᑎᒍᒪᔭᓕᒫᕗᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᑦ (IMO) ᐱᒋᐊᖅᑕᐅᖁᓪᓗᒋᑦ ᑕᒪᒃᑯᐊ ᓯᓚᕐᔪᐊᒥ ᒪᓕᒐᐃᑦ ᑲᒪᒋᔭᐅᓕᖅᑭᓪᓗᑎᑦ ᐱᖅᑯᓯᖅᑎᒍᑦ ᐊᑦᑐᖅᑕᐅᓂᐊᕐᓂᖏᓐᓂ ᓄᓇᖃᖅᑳᖅᓯᒪᔪᑦ ᐃᒪᕐᒧᑦ ᑯᕕᔪᖃᕐᓂᖅᑲᑦ ᐅᒥᐊᕐᔪᐊᓪᓗ ᐃᖏᕐᕋᓂᕆᖃᑦᑕᖅᑕᖏᓐᓂ… ᓚᓐᑕᒨᖅᓯᒪᒐᑦᑕ ᑲᓇᑕ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐱᒻᒪᕆᐅᒋᔭᐅᖁᓪᓗᒋᑦ ᐱᓕᕆᖃᑕᐅᑦᑎᐊᖁᓪᓗᒋᑦ ᓯᓚᕐᔪᐊᒥ ᑲᑐᔾᔨᔩᑦ ᓇᓗᓇᐃᖅᑕᐅᓯᒪᓂᖏᓐᓂ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᓯᒪᔪᑦ ᐊᒻᒪᓗ ᑕᑯᑎᓪᓗᒋᑦ ᓯᕗᒃᑲᖅᑕᐃᒋᐊᖃᕐᓂᖏᓐᓂ ᐃᓕᓴᕆᔭᐅᓗᑎᓪᓗ ᐃᔅᓯᕚᖃᑎᖃᕐᓗᑎᑦ ᑖᒃᑯᓂᖓ ᕼᐊᐃᑦᓱᒃ (Heiltsuk) ᐱᖅᑯᓯᑦᑎᓐᓂ ᔭᒐᐃᓕᖅᑕᑎᓐᓂ ᐃᒪᒃᑯᑦ ᐅᒥᐊᕐᔪᐊᖅᑕᖃᖃᑦᑕᕐᓂᖏᑦᑕ ᑯᕕᖃᑦᑕᕐᓂᖏᓐᓂ ᓄᓇᑦᑎᓐᓂ.”
ᐃᓄᐃᑦ ᐅᑭᐅᖅᑕᖅᑐᒧᑦ ᑲᑎᒪᔨᖏᑦ (ICC) ᐃᔅᓯᕙᐅᑕᖓ ᓯᐅᕋ ᐆᓪᔅᕕᒃ ᐅᖃᓚᐅᖅᑐᖅ, “ᑕᐃᒫᔅᓴᐃᓐᓇᖅ ᐃᓱᒫᓘᑎᖃᕋᑦᑕ ᕼᐊᐃᑦᓱᒃ (Heiltsuk) ᐊᓪᓚᖏᑎᑐᑦ ᐊᑕᐅᓯᕐᒥᑦ ᓂᐱᖃᕆᐊᖃᕋᑦᑕ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᑦ (IMO) 2025−ᒥ, ᑐᕌᒐᕗᑦ ᐊᒥᓱᑦ ᓄᓇᖃᖅᑳᖅᓯᒪᔪᑦ ᐱᖃᑕᐅᓗᑎᑦ ᓯᓚᕐᔪᐊᒥ ᐃᒪᓕᕆᓂᕐᒧᑦ ᑲᑐᔾᔨᖃᑎᒌᖏᓐᓄᑦ (IMO) ᐃᓱᒪᓕᐅᖅᑎᓪᓗᒋᑦ,” ᐅᖃᖅᑐᓂᓗ. “ᑕᒪᓐᓇ ᑎᒍᓯᕙᓪᓕᐊᓂᐅᒻᒪᑦ ᓄᓇᖃᖅᑳᖅᓯᒪᔪᓂᒃ ᐃᓚᒋᔭᐅᓗᑎᑦ ᐃᓱᒪᒋᓇᓱᑦᑕᕋᓗᐊᖏᓐᓂ ᐅᖃᐅᓯᖃᖅᑎᓪᓗᒋᑦ ᐊᒻᒪᓗ ᐃᓱᒪᓕᐅᖃᑕᐅᖃᑦᑕᓗᑎᑦ ᓈᕆᓗᑎᓪᓗ ᐃᒪᓕᕆᓂᕐᒧᑦ ᐊᑐᐊᒐᕐᓂᑦ.
-30-
CONTACT:
Sofia Geiler
ICC (Greenland)
299 34 22 25
sofia@inuit.org
Kelly Eningowuk
ICC (Alaska)
(907) 274-9058
kelly@iccalaska.org
Cassandra Elliott
ICC (Canada)
(613) 407-2642
celliott@inuitcircumpolar.com