ᑎᓯᐱᕆ 3, 2015 – ᐅᐊᓯᖕᑕᓐ, ᐊᕕᒃᑐᖅᓯᒪᓂᖓ ᑲᓚᒻᐱᐊ – ᑐᐊᐃᓐ ᓯᒥᔅ, ᐊᖓᔪᖅᑳᖓᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᓇᒥ ᐅᐊᓯᖕᑕᓐᒦᖅᐳᖅ ᐊᕕᒃᑐᖅᓯᒪᓂᖓ ᑲᓚᒻᐱᐊᒥ ᐅᖃᖃᑎᒌᒍᑎᒋᔭᖅᑐᖅᓯᒪᓪᓗᒍ ᓯᕗᓂᒃᓴᖓ ᑲᓇᖕᓇᖅᐸᓯᒻᒥ ᑕᕆᐅᒥ ᐃᑲᓗᓂᕆᓂᐅᑉ ᒥᒃᓵᓄᑦ ᑖᒃᑯᐊ ᑕᓪᓕᒪᑦ ᓄᓇᓕᔾᔪᐊᒦᙶᖅᓯᒪᔪᑦ ᑲᑎᒪᔭᖅᑐᖃᑕᐅᓯᒪᓂᖏᓐᓄᑦ (ᑲᓇᑕ, ᕋᓴ, ᒥᐊᓕᒐᐃᑦ ᓄᓇᖓᓂᑦ, ᑎᐊᖕᒫᒃ ᐊᒻᒪᓗ ᓄᐊᕗᐃ. “ᐃᓄᐃᑦ ᐅᔾᔨᕈᓱᒻᒪᑕ ᓇᐅᑦᓯᑐᖅᓱᑎᓪᓗ ᐅᑭᐅᖅᑕᖅᑑᑉ ᐆᒪᔪᖏᓐᓂᒃ ᐊᒻᒪᓗ ᓯᓚᒥᒃ 1000−ᓄᑦ ᐊᕐᕌᒍᓴᓐᓄᑦ ᑕᒪᓐᓇᓗ ᖃᐅᔨᒪᓂᖅ ᐊᑑᑎᖃᓪᓚᕆᑉᐳᖅ ᐃᑲᔪᖅᓯᒍᑕᐅᓗᓂ ᐃᓱᒪᓕᐅᕈᑕᐅᔪᖃᓕᖅᐸᑦ ᑐᑭᑖᕈᑕᐅᒍᒪᔪᓂᒃ” ᐅᖃᖅᑐᒥᓂᖅ ᓯᒥᔅ.
ᓯᒥᔅ ᖁᕕᐊᒋᔭᓕᒥᓂᖅ ᓯᕗᓕᖅᑎᒥᒃ ᒥᓂᔅᑕ ᑐᕉᑐᒥᒃ ᐅᖃᐅᓯᖏᑦ ᐱᓪᓗᒋᑦ ᒪᑐᐃᖅᓯᒍᒍᑎᖏᑦ ᓯᓚᐅᑉ ᒥᒃᓵᓄᑦ ᐅᖃᖃᑎᒌᒍᑕᐅᓂᐊᖅᑎᓪᓗᒍᒍ ᐱᐅᕆᔅᒥ ᓇᒡᒐᔾᔭᐅᖑᓕᖅᐸᑦ, “…ᐱᖓᔪᐊᑦ, ᐱᒻᒪᕆᐅᓪᓗᓂᓗ, ᐱᓕᕆᐊᕆᓂᐊᕋᑦᑎᒋᑦ ᓄᓇᓕᕐᔪᐊᖁᑎᕗᑦ ᑭᓪᓕᓕᐅᖅᑕᐅᓯᒪᔪᑦ, ᓄᓇᐃᑦ ᐊᕕᑦᑐᖅᑕᐅᓯᒪᔪᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᓯᕗᓕᖅᑏᑦ ᓯᕗᓕᖅᑐᑦ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ. ᓄᓇᕐᔪᐊᒥ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖃᕐᒪᑕ ᐊᕐᕌᒎᒐᓵᓂᑦ ᑲᒪᒋᔭᖃᑦᓯᐊᖅᓱᑎᓪᓗ ᓄᓇᑦᑎᓐᓂ. ᐅᒥᓱᑎᒍᑦ ᓱᓕ ᐃᓕᑦᓴᕆᐊᖃᖅᑕᕗᑦ ᐊᖏᔫᕗᑦ. ᐱᕕᑦᓴᑎᓐᓂᓗ ᐊᑐᖅᑎᑦᓯᒋᐊᖃᓕᖅᑐᒍᑦ.”
ᐊᑦᑐᐃᓂᕐᓗᒍᑕᐅᔪᑦ ᐅᑭᐅᖅᑕᖅᑐᒥ ᐃᖃᓗᓕᕆᓂᕐᒥᒃ ᓯᓚᐅᑉ ᐊᓯᔾᔨᕐᓂᖓᑕ ᐊᑦᑐᐃᓂᕐᓗᓐᓂᖓ ᓇᓗᓇᖏᓚᖅ“ ᓯᒃᑯᖃᑦᑕᕈᓐᓃᕐᓂᑐᐃᓐᓇᐅᖏᑦᑐᖅ ᓂᕈᒥᑦᓯᕙᓪᓕᐊᓂᖓᓄᑦ ᓯᓚᐅᑉ ᑕᒪᔾᔭᐅᕗᑦ ᐅᒥᐊᕐᔪᐊᑦ ᐊᖅᑯᑎᑲᒃᑲᓐᓂᓕᕐᓂᖏᑦ ᕿᑎᖅᐸᓯᐊᒍᑦ ᐅᑭᐅᖅᑕᖅᑐᒥ ᑕᕆᐅᑉ (CAO) ᑭᓯᐊᓂᑦᑕᐅᑦ ᓄᑖᑦ ᐊᔾᔨᒋᔭᐅᙱᑦᑐᑦ ᐃᖃᓗᐃᑦ ᐊᓪᓛᓘᓐᓃᑦ ᐆᒪᔫᓂᑦ ᓂᕿᑐᖅᑐᑦ ᐋᕐᓗᐃᑦ. ᖃᐅᔨᒪᙱᑦᑐᒍᖑᑦ ᐊᑦᑐᐃᓂᕐᓗᒍᑕᐅᔪᓂᑦ ᑕᒪᒃᑯᓄᖓ ᐊᓯᔾᔨᖅᑐᓄᑦ ᐊᑦᑐᓂᕐᓗᑦᑕᐅᔪᑦ ᐅᑭᐅᖅᑕᖅᑐᒥ ᓂᕿᒌᖃᑎᒌᑦ ᓱᓇᐅᒻᒪᖔᑕᓘᓐᓃᑦ ᐊᑦᑐᐃᓂᕐᓗᒍᑕᐅᔪᑦ ᓯᒃᑯᓐᓇᓵᕈᑕᐅᓕᖅᑐᑦ ᑕᒪᒃᑯᓄᖓ ᐊᑦᑕᐊᓂᖃᕐᒪᒋᑦᑐᑦ ᐆᒪᔪᓄᑦ.” ᓯᒥᔅ ᒐᕙᒪᒃᑯᓐᓂᒃ ᐊᑐᖅᑕᐅᖁᔨᕗᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂᒃ ᐃᓱᒪᓕᐅᕈᑕᐅᔪᓕᒫᓂ ᐱᔾᔪᑎᓕᓐᓂᒃ ᐅᑭᐅᖅᑕᖅᑐᒥ ᑐᒃᓯᕋᖅᐳᕐᓗ ᒐᕙᒪᒃᑯᑦ ᐃᓕᑕᖅᓯᖁᓪᓗᒋᑦ ᑭᖒᒪᔭᐅᓂᖓᓂᒃ ᓯᓚᒧᑦ ᐃᓕᖅᑐᕈᑕᐅᓗᑎᒃ ᑮᓇᐅᔭᖃᖅᑎᑦᓯᓂᕐᒥᒃ ᐃᓄᓐᓄᑦ ᐅᖃᐅᓯᒥᓂᕐᓂᒃ ᐃᒃᓯᕚᕐᕕᓕᓐᓄᑦ ᖃᐅᑉᐸᑦ.
“ᖃᓄᐃᖏᓯᐊᖅᑐᑦ ᐊᒥᒐᖏᑐᓪᓗ ᐃᖃᓗᐃᑦ ᐊᑑᑎᖃᓪᓚᕆᒻᒪᑕ ᐱᖅᑯᓯᕐᒧᑦ, ᓂᕿᑦᓯᐊᕙᐅᓂᖏᓐᓄᑦ ᒪᑭᒪᔾᔪᑎᑎᒍᓪᓗ ᑮᓇᐅᔭᓕᐅᕈᑕᐅᑦᓯᐊᕐᓂᖏᑦ ᐃᓅᓯᕆᔭᐅᓪᓗᓂᓗ ᐃᓄᓐᓄᑦ ᓄᓇᓕᖃᐅᖅᑐᓄᑦ ᐃᓄᓐᓄᓪᓗ ᐃᓅᓯᖃᖅᑐᓄᑦ ᑰᑦᑐᑦ ᐊᒻᒪᓗ ᓯᔾᕙᐃᑦ ᒥᒃᓵᓂ” ᐅᖃᖅᑐᒥᓂᖅ ᓯᒥᔅ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐃᓕᑕᖅᓯᓯᒪᔪᑦ ᐊᒥᓱᑦ ᑲᓇᑕᒥ ᑲᑉᐸᓂᐅᔪᑦ ᑕᑯᓐᓇᕐᒪᑕ ᐅᑭᐅᖅᑕᖅᑐᒧᑦ ᐃᖃᓗᓂᒃ ᐊᒥᓱᙳᓴᐃᓂᕐᒧᑦ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑎᓕᐅᕆᕗᑦ ᖃᐅᔨᓴᑦᓯᐊᖁᔨᓪᓗᑎᒃ ᑕᒪᑐᒧᖓᓕᖓᔪᓂᒃ. ᔪᓚᐃ 2015−ᖑᑎᓪᓗᒍ ᑕᓪᓕᒪᑦ ᐅᑭᐅᖅᑕᖅᑐᒥ ᓄᓇᓕᔾᔪᐊᓕᕆᓂᕐᒨᖓᔪᑦ ᐊᖏᖃᑎᒌᑦᑐᒥᓃᑦ ᐊᑎᓕᐅᕐᓂᕐᒧᑦ ᓄᖅᑲᖓᑎᑦᓯᒍᑕᐅᓂᐊᖅᑐᒥᒃ ᑮᓇᐅᔭᓕᐅᕋᓱᐊᕐᓗᓂ ᐃᖃᓗᒐᓱᐊᕐᓂᕐᒥᒃ ᕿᑎᖅᐸᓯᐊᓂ ᐅᑭᐅᖅᑕᖅᑑᑉ ᑕᕆᐅᖓᑕ.
2014−ᖑᑎᓪᓗᒍ, ICC−ᑯᑦ ᑲᑎᒪᓂᕆᒥᓐᓂᒃ ᑲᑎᒪᓂᖃᖅᑐᒥᓃᑦ ᐃᓅᕕᒻᒥ, ᓄᓇᑦᓯᐊᖅ ᑎᓕᔭᒥᓂᐅᓪᓗᑎᓪᓗ ᓂᐱᖃᖅᑎᑕᐅᒍᑕᐅᖁᓪᓗᒍ ᖃᐅᔨᓴᑦᓯᐊᕐᓂᖃᕐᓗᑎᒃ ᐱᕙᓪᓕᐊᑎᑦᓯᓂᐊᖅᐸᑕ ᑮᓇᐅᔭᓕᐅᕋᓱᐊᕈᑎᒋᓗᒍ ᐃᖃᓗᒐᓱᐊᕐᓂᖅ ᓄᓇᕐᔪᐊᒥ ᐃᒪᖏᓐᓂ ᕿᑎᖅᐸᓯᐊᓂ ᐅᑭᐅᖅᑕᖅᑑᑉ ᑕᕆᐅᖓᑕ ᐃᑲᔪᖅᑐᐃᓗᑎᓪᓗ ᓄᖅᑲᖓᑎᑦᓯᒍᑕᐅᔪᒥᒃ ᐃᖃᓗᐃᑦ ᐊᒥᓲᓂᖏᑦ ᖃᐅᔨᓴᖅᑕᐅᑦᓯᐊᓚᐅᖏᓐᓂᖏᓐᓂ ᐊᒻᒪᓗ ᓱᕋᐃᑑᑎᑦᓯᓂᕐᒥᒃ ᐊᐅᓚᑦᓯᒍᑎᖃᓕᖏᓐᓂᖏᓐᓂ ᐱᖃᑕᐅᑎᑦᓯᔪᒥᒃ ᐃᒪᐅᑎᑦᓯᔪᒥᓪᓗ ᐃᓄᖕᓂᑦ.