Tisipiri 3, 2015 – Uasingtan, Aviktuqsimaninga Kalampia – Tuain Simis, Angajuqqaangat Inuit Ukiuqtaqtumiuqatigiit Katimajingita Kanami Uasingtanmiiqpuq, Aviktuqsimaninga Kalampiami uqaqatigiigutigijaqtuqsimallugu sivuniksanga kanangnaqpasimmi. Tariumi Ikaluniriniup miksaanut taakkua tallimat nunalijjuamiinngaaqsimajut katimajaqtuqatausimaninginnut (Kanata, Rasa, Mialigait Nunanganit, Tiangmaak ammalu Nuavui “Inuit ujjirusummata nautsituqsutillu Ukiuqtaqtuup uumajunginnik ammalu silamik 1000−nut arraagusannut tamannalu qaujimaniq atuutiqallarippuq ikajuqsigutauluni isumaliurutaujuqaliqpat tukitaarutaugumajunik” uqaqtuminiq Simis.
Simis quviagijaliminiq Sivuliqtimik Minista Turuutumik uqausingit pillugit matuiqsigugutingit silaup miksaanut uqaqatigiigutauniaqtillugugu Piurismi Naggajjaunguliqpat, “…Pingajuat, pimmariullunilu, piliriariniarattigit nunalirjuaqutivut killiliuqtausimajut, nunait avittuqtausimajut ammalu Nunaqaqqaaqsimajunut sivuliqtiit sivuliqtut silaup asijjirninga pillugu. Nunarjuami nunaqaqqaaqsimajut qaujimajaqarmata arraaguugasaanit kamagijaqatsiaqsutillu nunattinni. Umisutigut suli ilitsariaqaqtavut angijuuvut. Pivitsatinnilu atuqtitsigiaqaliqtugut.”
Attuinirlugutaujut Ukiuqtaqtumi iqalulirinirmik silaup asijjirningata attuinirlunninga nalunangilaq, “Sikkuqattarunniirnituinnaungittuq nirumitsivallianinganut silaup tamajjauvut umiarjuat aqqutikakkannilirningit Qitiqpasiagut Ukiuqtaqtumi Tariup Kisianittaut nutaat ajjigijaunngittut iqaluit allaaluunniit uumajuunit niqituqtut aarluit. Qaujimanngittugungut attuinirlugutaujunit tamakkununga asijjiqtunut attunirluttaujut Ukiuqtaqtumi niqigiiqatigiit sunaummangaataluunniit attuinirlugutaujut sikkunnasaarutauliqtut tamakkununga attaaniqarmagittut uumajunut.” Simis gavamakkunnik atuqtauqujivuq nunaqaqqaaqsimajut qaujimaninginnik isumaliurutaujulimaani pijjutilinnik Ukiuqtaqtumi tuksiraqpurlu Gavamakkut ilitaqsiqullugit kinguumajauninganik silamut iliqturutaulutik kiinaujaqaqtitsinirmik Inunnut Uqausiminirnik Iksivaarvilinnut qauppat.
“Qanuingisiaqtut amigangitullu iqaluit atuutiqallarimmata piqqusirmut, niqitsiavauninginnut makimajjutitigullu kiinaujaliurutautsiarningit inuusirijaullunilu Inunnut nunaliqauqtunut inunnullu inuusiqaqtunut kuuttut ammalu sijvait miksaani” uqaqtuminiq Simis. Inuit Ukiuqtaqtumiuqatigiit Katimajingikkut ilitaqsisimajut amisut kanatami kappaniujut takunnarmata ukiuqtaqtumut iqalunik amisunngusainirmut ammalu inuit ukiuqtaqtumiuqatigiit katimajingikkut tiliurivut qaujisatsiaqujillutik tamatumungalingajunik. Julai 2015−ngutillugu tallimat Ukiuqtaqtumi nunalijjualirinirmuungajut angiqatigiittuminiit atiliurnirmut nuqqangatitsigutauniaqtumik kiinaujaliurasuarluni iqalugasuarnirmik Qitiqpasiani Ukiuqtaqtuup Tariungata.
2014−ngutillugu, ICC−kut katimaniriminnik katimaniqaqtuminiit Inuuvimmi, Nunatsiaq tilijaminiullutillu nipiqaqtitaugutauqullugu qaujisatsiarniqarlutik pivalliatitsiniaqpata kiinaujaliurasuarutigilugu iqalugasuarniq nunarjuami Imanginni Qitiqpasiani Ukiuqtaqtuup tariungata ikajuqtuilutillu nuqqangatitsigutaujumik Iqaluit amisuuningit qaujisaqtautsialaunginninginni ammalu suraituutitsinirmik aulatsigutiqalinginninginni piqatautitsijumik imautitsijumillu Inungnit.