ᔪᓚᐃ 24, 2014, ᐃᓅᕕᒃ, ᓄᓇᑦᓯᐊᕗᑦ– ᑖᓐᓇ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᑎᒪᓂᕆᕙᑦᑕᖓ, ᐊᕐᕌᒎᑦ ᓯᑕᒪᑦ ᐊᓂᒍᕋᐃᒻᒪᑕ ᑲᑎᑦᓱᑎᒃ ᐃᓄᐃᑦ ᓯᕗᓕᖅᑏᑦ ᑲᓇᑕᒦᖔᖅᑐᑦ, ᑲᓛᖡᑦ ᓄᓈᓂᒃ, ᓱᑯᑦᑕ (ᕋᓴ) ᐊᒻᒪᓗ ᐊᓛᔅᑲ, ᓄᖅᑲᐅᓯᖅᐳᖅ ᐅᓪᓗᒥ ᐊᑎᓕᐅᕕᕈᑕᐅᓪᓗᓂ ᐊᒻᒪᓗ ᐊᑐᓕᖅᑎᑕᐅᓪᓗᓂ ᑖᓐᓇ ᑭᑎᒑᕐᔪᐃᑦ ᓇᓗᓇᐃᖅᓯᒍᑎᖓᑦ. ᑖᓐᓇ ᓇᓗᓇᐃᖅᓯᒍᑦ ᑎᑎᕋᖅᓯᒪᕕᒋᔪᖅ ᐊᑐᐊᒐᒃᓴᓂᒃ ᒪᓕᒐᑦᓴᐅᓗᑎᒃ ᐊᒻᒪᓗ ᐱᓕᕆᐊᖅᓴᖏᓐᓂᑦ ᑖᒃᑯᐊ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑖᒃᑯᓇᓂ ᐊᕐᕌᒍᓂ ᓯᑕᒪᓂᒃ ᐊᑐᕐᓂᐊᖅᑕᒥᓐᓂᑦ ᐊᒻᒪᓗ ᐊᑐᕈᒥᓇᖅᓯᑎᑦᓯᒪᓪᓗᓂᐅᒃ ᑭᑎᒑᕐᔪᒥᐅᑦ, ᐱᖅᑯᓯᑐᖃᕐᒥᑎᒍᑦ ᓱᓕ ᐊᕐᕙᓂᐊᖅᐸᑦᑐᑦ ᓄᓇᓕᖓ ᐊᒻᒪᓗ ᑲᑎᕕᐅᕙᑦᓱᓂ ᖃᓂᒋᔭᖓ ᑐᒃᑑᔮᖅᑑᑉ ᐱᔨᑦᓯᕈᑕᐅᔪᖅ ᑲᑎᑎᑦᓯᓗᓂ ᐊᒻᒪᓗ ᐊᐅᓚᑦᓯᒍᓐᓇᕐᓂᖏᑦ ᐃᓄᐃᑦ – ᐃᖅᑲᐃᑎᑦᓯᒍᑎ ᑲᓱᖅᓯᒪᓂᖏᓐᓂᒃ ᑖᒃᑯᐊ ᐊᑐᖃᑦᑕᖅᓯᒪᔭᐅᔪᑦ, ᐅᓪᓗᒥᐅᓕᖅᑐᖅ ᐊᒻᒪᓗ ᓯᕗᓂᒃᓴᒥ. ᐊᑕᖏᖅᑎᓪᓗᒍ ᓇᓗᓇᐃᖅᑕᐅᓯᒪᔪᖅ ᓇᓂᒐᒃᓴᖅ ᐅᕙᓂ https://www.inuitcircumpolar.com/declaration-2014-kitigaaryuit-english/
ᒪᓕᓪᓗᒍ ᐊᑐᕋᒃᓴᖅ ᑲᑎᒪᔨᓄᑦ: “ᐅᑭᐅᖅᑕ’ᑐᒥ ᕼᐃᕗᓂᑉᑎᖕᓄᑦ – ᐊᑕᐅᓯᖅ ᐅᑭᐅᖅᑕᖅᑐ, ᐊᑕᐅᓯᖅ ᓯᕗᓂᒃᓴᖅ,” ᑖᓐᓇ ᑭᑎᒑᕐᔪᐃᑦ ᓇᓗᓇᐃᖅᓯᒪᔭᖓᑦ ᐃᓗᓕᓕᒃ ᐊᒥᓱᓂᒃ ᐊᒃᓱᕈᕐᓇᕈᓐᓇᖅᑐᓂᒃ ᐊᒻᒪᓗ ᐱᕕᒃᓴᖃᕐᕕᐅᒍᓐᓇᖅᑐᓂᒃ ᐊᒥᖅᑲᐅᑕᐅᔪᓂᒃ ᐃᓄᖕᓄᑦ ᐅᑭᐅᖅᑕᖅᑐᒥᐅᖃᑎᒌᓄᑦ, ᐱᖃᓯᐅᑎᑦᓱᒋᑦ ᐊᕙᑎᐅᑉ ᐊᓯᔾᔨᕐᓂᖏᑦ, ᐱᕙᓪᓕᐊᑎᑕᐅᓂᖓ ᐊᑐᒃᑲᓐᓂᕈᓐᓇᖅᑐᑦ ᐊᒻᒪᓗ ᐊᑐᒃᑲᓐᓂᕈᓐᓇᖏᑦᑐᓄᑦ ᓄᓇᒥ ᐊᑐᕋᑦᓴᑎᒍᑦ, ᓱᕐᕋᐃᑑᑎᓪᓗᒋᑦ ᐆᒪᔪᑦ ᓂᕿᒋᔭᐅᕙᓐᓂᖏᑦ ᐊᑐᖅᑕᐅᒍᓐᓇᕐᓂᖏᑦ, ᑎᒥᐅᑉ ᐃᓗᓯᖓ ᐊᒻᒪᓗ ᖃᓄᐃᖏᓯᐊᕐᓂᖅ, ᓂᕿᒥᒃ ᐊᔪᖅᓴᖏᓐᓂᖅ, ᐃᖅᑲᒌᖃᑦᑕᐅᑎᓂᖓ ᐱᖅᑯᓯᑐᖃᒃᑯᑦ ᖃᐅᔨᒪᓂᖃᕐᓂᖅ, ᐋᖅᑭᒋᐊᒃᑲᓂᕐᓗᒍ ᐅᖃᖃᑎᒌᖃᑦᑕᕐᓂᖅ ᑖᒃᑯᓇᓂ ᐃᓄᖕᓂ ᐅᑭᐅᖅᑕᖅᑐᒥᐅᑕᕐᓂᑦ ᐊᒻᒪᓗ ᐃᓄᐃᑦ ᓇᔫᑎᓂᖓᑦ ᐊᑑᑎᓕᒃ ᐃᓱᒪᓕᐅᕈᑕᐅᔪᖃᖅᑎᓪᓗᒍ−ᑐᑭᑖᕈᑕᐅᓂᐊᖅᑐᒥᒃ ᐊᓯᖏᓪᓗ ᓄᓇᕐᔪᐊᒥ ᑲᑎᒪᖃᑕᐅᕕᒃᓴᐃᑦ ᓲᕐᓗ ᐅᑭᐅᖅᑕᖅᑐᒥ ᑲᑎᒪᔩᑦ.
ᐱᓗᐊᖅᑐᒥ, ᓇᓗᓇᐃᖅᑕᐅᓯᒪᔪᖅ ᐊᖅᑯᓯᐅᕆᖃᓯᐅᑎᒻᒪᑦ ᐸᕐᓇᐃᓂᕐᒧᑦ ᐃᓄᖕᓄᑦ− ᑐᕌᖓᓗᓂ ᑲᑎᒪᓂᕐᓂᒃ ᐱᓪᖢᒍ ᐃᓄᐃᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᐊᒻᒪᓗ ᐆᒪᔪᓂᒃ ᐊᐅᓚᑦᓯᓂᖅ ᐊᒻᒪᓗ ᐸᕐᓇᐅᔾᔨᓂᖅ.
ᐅᖃᕆᐊᖅᑐᖅᓯᒪᔪᑦ ᐊᒻᒪᓗ ᐅᓂᒃᑳᖅᑐᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᑎᒪᓂᖓᓐᓂ ᑕᑯᓐᓇᒐᖃᓲᖑᕗᑦ ᐱᔪᓐᓇᖅᓯᒍᓐᓇᕐᓂᖏᓐᓂᒃ ᐃᓄᐃᑦ ᐱᓂᐊᕐᓂᖃᕐᓗᑎᒃ ᓇᖕᒥᓂᖅ ᑕᑯᓐᓇᙳᐊᕈᑎᒋᔭᒥᓐᓂᒃ ᐅᑭᐅᖅᑕᖅᑐᒥ ᓄᓇᒥᓐᓂ ᐊᒻᒪᓗ ᓄᓇᕐᔪᐊᒥ ᐱᖃᑕᐅᔪᑦ, ᐃᖅᑲᓇᐃᔭᖃᑎᒌᑦᑐᑦ ᐊᒻᒪᓗ ᐃᓕᓐᓂᐊᖃᑎᒌᑦᑐᑦ ᐊᓯᒥ ᐊᑐᖃᑦᑕᖅᓯᒪᔭᖏᑕ ᒥᒃᓵᓐᓄᑦ ᐅᐱᒍᒪᓕᖅᑎᑦᓯᒍᓐᓇᕐᒪᑦ ᐱᖃᑕᐅᒍᒪᓕᕐᓗᑎᒃ ᐃᓄᐃᑦ.
ᑲᓇᑕᒥᐅᑕᖅ ᐅᑲᓕᖅ ᐃᔨᑦᓯᐊᖅ ᐊᖏᖅᓯᒪᔪᖅᑕᐅᖅ ᐃᒃᓯᕙᐅᑕᐅᓂᕐᒧᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ , ᓄᓇᕐᔪᐊᒥ ᑖᒃᑯᓇᓂ ᐊᕐᕌᒍᓂ ᓯᑕᒪᓂᒃ ᐊᒡᒋᖅᑐᓂ. ᔭᐃᒻᔅ ᓯᑖᑦᔅ, ᐊᖓᔪᖅᑳᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐊᓛᔅᑲ, ᑕᑎᐊᓇ ᐋᑦᓱᒋᓇ, ᐊᖓᔪᖅᑳᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᓱᑯᑦᑲ ᐊᒻᒪᓗ ᑐᐊᐃᓐ ᓯᒥᔅ ᐊᖓᔪᖅᑳᖓ, ᐊᖓᔪᖅᑳᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᑲᓇᑕ ᐃᓂᖃᖅᑐᐃᓐᓇᐃᑦ ᑐᒡᓕᐅᓪᓗᑎᒃ−ᐃᒃᓯᕙᐅᑕᐅᔪᓄᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᓄᓇᕐᔪᐊᒥ ᐊᐅᓚᑦᓯᔨᐅᓪᓗᑎᒃ ᑲᑎᒪᔩᑦ. ᔭᓪᒪᕐ ᑖᓪ, ᐊᖓᔪᖅᑳᕈᖅᑐᑦᓴᒫᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐊᖏᖅᓯᒪᔪᖅ ᑐᒡᓕᐅᓂᕐᒧᑦ−ᐃᒃᓯᕙᐅᑕᐅᓂᕐᒧᑦ ᑲᓛᖡᑦ ᓄᓈᓄᑦ. ᐃᓚᓕᐅᑎᑎᓪᓗᒍ, ᐱᖓᓱᑦ ᓄᑖᑦ ᑲᑎᒪᔨᐅᖃᑕᐅᓂᐊᖅᓱᑎᒃ ᓂᕈᐊᖅᑕᐅᖃᓯᐅᑎᔪᒥᓃᑦ ᑲᑎᒪᔨᐅᖃᑕᐅᓂᐊᖅᓱᑎᒃ ᑭᖑᕝᕕᖅᑎᐅᓗᑎᒃ ᐊᑕᔪᑐᖃᐅᓯᒪᔪᓄᑦ ᓄᖅᑲᕐᓂᐅᓴᔪᓄᑦ: ᕼᐆᑉ ᓇᑲᒪᔭᒃ (ᑲᓇᑕ), ᒫᑕ ᐊᐃᐳᓪᓴᓐ (ᑲᓛᖡᑦ ᓄᓈᑦ), ᐊᒻᒪᓗ ᐃᓕᓇ ᑲᒥᓐᓴᑲᔭ (ᓱᑯᑦᑲ, ᕋᓴ).
ᑖᓐᓇ 2014−ᖑᑎᓪᓗᒍ ᑲᑎᒪᓂᖅ ᐃᓄᕕᐊᓗᐃᑦ ᓄᓇᖓᑕ ᑯᐊᐳᕇᓴᒃᑯᖏᓐᓄᑦ ᐃᓄᕕᖕᒥ, ᓄᓇᑦᓯᐊᕗᑦ, 18−ᖑᓪᓗᑎᒃ ᑲᑎᒪᔭᖅᑐᖃᑕᐅᓯᒪᔪᑦ ᑲᓇᑕᒦᙶᖅᓯᒪᔪᑦ, ᑲᓛᖡᑦ ᓄᓈᓂᒃ ᐊᒻᒪᓗ ᐊᓛᔅᑲᒥᒃ ᐊᒻᒪᓗ ᖁᓕᑦ ᑲᑎᒪᔭᖅᑐᖃᑕᐅᓯᒪᔪᑦ ᓱᑯᑦᑲᒦᙶᖅᓯᒪᔪᑦ. ᐱᖃᓯᐅᑎᓪᓗᒋᑦ ᐅᖃᕆᐊᖅᑐᖅᓯᒪᔪᑦ, ᐱᙳᐊᖅᑏᑦ, ᐊᑭᓕᖅᑐᖅᑕᐅᒐᑎᒃ ᐃᑲᔪᖅᑏᑦ ᐊᒻᒪᓗ ᑮᓇᐅᔭᖃᖅᑎᑦᓯᔪᑦ, ᑕᒫᓂ 600−ᖏᓐᓃᑲᓴᑦᓱᑎᒃ ᐃᓄᐃᑦ ᐱᖃᑕᐅᔪᑦ ᑲᑎᒪᓂᕐᒥ. ᑲᑎᒪᓂᖅ ᐊᑑᑎᑎᓪᓗᒍ, ᐃᓅᕕᒃ ᓴᓇᙳᐊᖅᑎᓅᖓᔪᓂᒃ ᐱᓕᕆᕕᐅᓐᓂᕐᒥᔪᖅ ᐊᒻᒪᓗ ᐅᑭᐅᖅᑕᖅᑐᒥ ᐱᙳᐊᕕᔾᔪᐊᓂᕐᒨᖓᔪᓄᑦ ᐱᙳᐊᕆᐊᖅᑐᕐᕕᐅᓯᒪᔪᕕᓂᖅ.
ᑭᖑᓪᓕᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᑎᒪᓂᖓ ᐱᐅᕈᒦᑦᑐᒥᓂᖅ, ᐊᓛᔅᑲᒥ 2018−ᖑᑎᓪᓗᒍ.
ᐅᖃᐅᓯᐅᓯᒪᔪᑦ: ᐅᑲᓕᖅ ᐃᔨᑦᓯᐊᖅ, ᐃᒃᓯᕙᐅᑕᕈᕐᓂᐅᓴᔪᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ: “ᐅᐱᓐᓇᖅᐳᖅ ᐃᖏᓛᕐᓂᕋ ᑕᕝᕗᖓ ᐱᕚᓪᓕᑲᓐᓂᖁᓪᓗᒋᑦ ᐱᔪᒪᔭᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᑦ. ᖃᐅᔨᒪᔪᒍᑦ ᓄᓇᕐᔪᐊᒥ ᑕᑯᓐᓇᖅᑕᐅᕙᓪᓕᐊᓂᖓ ᓄᓇᕗᑦ ᐱᕙᓪᓕᐊᑎᒍᒪᓪᓗᒍ ᐊᑐᒃᑲᓐᓂᕈᓐᓇᖅᑐᑦ ᐊᒻᒪᓗ ᐊᑐᒃᑲᓐᓂᕈᓐᓇᖏᑦᑐᓄᑦ ᓄᓇᒥ ᐊᑐᕋᑦᓴᑎᒍᑦ ᐊᒻᒪᓗ ᐃᓄᐃᑦ ᓵᒦᖃᑕᐅᖃᑦᑕᕆᐊᖃᕐᒪᑕ ᐅᖃᖃᑎᒌᑦᑐᖃᓕᕋᐃᑉᐸᑦ ᐊᒻᒪᓗ ᐃᓱᒪᓕᐅᕈᑎᖃᖅᑐᖃᖅᑎᓪᓗᒍ ᐱᓕᕆᐊᖑᒐᔭᖅᑐᑦ ᒥᒃᓵᓐᓄᑦ ᓄᓇᖁᑎᑦᑎᓐᓂ. ᐃᓄᐃᑦ ᓱᓕ ᐅᑭᐅᖅᑕᖅᑐᒦᓚᖓᒻᒪᑕ ᑭᖑᓪᓕᖅᐹᖅ ᖃᑕᐅᔭᖅ ᐅᖅᓱᖅᑎᕈᑎᑕᓕᒃ ᐊᒻᒪᓗ ᑭᖑᓪᓕᖅᐹᖅ ᐅᔭᕋᐅᔭᖅ ᐱᔭᐅᑎᓪᓗᒍ ᓄᓇᑦᑎᓐᓂ.”
ᔭᐃᒻᔅ ᓯᑕᑦᔅ, ᑐᒡᓕᐊ ᐃᒃᓯᕙᐅᑕᕐᒧᑦ (ᐊᓛᔅᑲ): “ᑕᐃᒪᐃᖏᓐᓇᓲᖑᒻᒪᑦ ᖁᕕᐊᓇᖅᐳᖅ ᑕᑯᒋᐊᒃᓴᖅ ᐱᖃᓐᓇᕆᓇᖅᑐᓂᒃ ᐃᓐᓇᕈᖅᑐᓂᒃ ᐊᒻᒪᓗ ᑲᑎᓯᓂᕐᒥᒃ ᐱᖃᑎᑖᕆᖃᓯᐅᑎᓇᖅᑐᓂᒃ ᐅᖃᖃᑎᒋᓂᐊᕐᓗᒋᑦ ᐊᒥᓱᑦ ᐃᓱᒫᓘᑕᐅᔪᑦ ᐱᒻᒪᕆᐅᔪᑦ ᐃᓄᖕᓄᑦ. ᑭᓯᐊᓂ ᐅᖃᕈᒪᔪᖓ ᖁᔭᒋᓂᖅᐹᕋ ᖁᕕᐊᓲᑎᖃᖃᑕᐅᒍᓐᓇᕋᒪ ᐱᖅᑯᓯᑦᑎᓐᓂᑦ.”
ᔭᒫᕐ ᑖᓪ, ᑐᒡᓕᐊ ᐃᒃᓯᕙᐅᑕᕐᒧᑦ (ᑲᓛᖡᑦ ᓄᓈᑦ): “ᐅᐱᒍᓱᑉᐳᖓ ᓂᕈᐊᖅᑕᒥᓂᐅᒋᐊᒃᓴᖅ ᑐᒡᓕᐊᓄᑦ ᐃᒃᓯᕙᐅᑕᐅᑉ. ᖁᔭᓕᕗᖓ ᑐᓂᐅᓯᐊᕆᐊᑦᓴᖅ ᐃᓕᑕᕆᔭᐅᔾᔪᑎᒥᒃ ᐃᖅᑲᓇᐃᔭᖃᑦᑕᖅᓯᒪᓕᕋᒪ ᓄᓇᕐᔪᐊᒥ ᐊᕐᕌᒍᒐᐃᑦ ᖃᐅᔨᓯᒪᓪᓗᒍᓗ ᑕᑯᑦᓴᐅᓂᖓ ᐃᓄᐃᑦ ᐃᖅᑲᒋᔭᐅᕙᓪᓕᐊᒻᒪᑦ. ᓄᓇᕐᔪᐊᓕᒫᖅ ᑕᐅᑐᒻᒪᑦ ᐅᑭᐅᖅᑕᖅᑐᒥᒃ ᑕᒪᓐᓇᓗ ᐱᔭᒃᓴᖃᕈᑕᐅᒻᒪᕆᖕᓂᐊᕐᒪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᐱᓕᕆᐊᖑᑎᓪᓗᒍ ᐱᔪᓐᓇᐅᑎᖏᑦ ᐃᓄᐃᑦ ᐃᓚᒋᔭᐅᑎᑕᐅᓗᓂ ᐃᓱᒪᓕᐅᕈᑕᐅᔪᓄᑦ ᐱᔾᔪᑎᓕᓐᓂᒃ ᓯᕗᓂᒃᓴᑎᓐᓂᒃ ᓄᓇᕐᔪᐊᒥᐅᑦ ᐃᓕᑕᕆᔭᐅᓂᖏᑎᒍᑦ ᐊᑐᐊᒐᖃᕐᓂᖅ ᐊᑭᖃᖏᓐᓂᖓᓂᒃ, ᓯᕗᕐᖓᓂ ᐊᒻᒪᓗ ᑐᓴᐅᒪᑎᑦᓯᓂᖅ ᖃᐅᔨᒋᐊᕐᕕᖃᖃᑦᑕᕐᓂᖅ ᐱᓕᕆᔾᔪᑕᐅᒍᓐᓇᖃᓯᐅᑎᓂᖓᓂᒃ.”
ᑕᑎᐊᓇ ᐋᑦᓱᒌᓇ, ᑐᒡᓕᖅ ᐃᒃᓯᕙᐅᑕᕐᒧᑦ (ᓱᑯᑦᑕ): “ᐃᓱᒪᒋᔭᕗᑦ ᐃᓄᕕᐊᓗᐃᑦ ᓄᓇᖓ ᓴᐃᒻᒪᖅᑎᑕᐅᓂᖓᓂᒃ. 1992−ᖑᑎᓪᓗᒍ, ᑕᕝᕙᓃᓚᐅᖅᓯᒪᒐᑦᑕ ᐃᓚᐅᓕᖅᑎᓪᓗᑕ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ. ᑲᑎᙵᓕᕋᑦᑕ ᐊᕐᕌᒎᓂᒃ 22−ᓂᒃ ᒫᓐᓇᒧᑦ. ᑖᕝᕘᓇ ICC−ᑯᑦ ᑲᑎᒪᓂᕆᕙᑦᑕᖓᒍᑦ ᔪᒃᐱᒃᒥᐅᑦ ᐃᓄᐃᑦ ᐃᓅᓯᓖᑦ ᓯᔾᔭᖏᓐᓂ ᐱᐅᕆᖕ ᓰ ᖃᓄᖅᑑᕈᑎᖃᕈᓐᓚᓕᖅᓯᒪᒻᒪᑕ ᐋᖅᑭᒍᒪᓪᓗᒋᑦ ᐱᓇᐃᓗᑕᐅᔪᑦ, ᐱᐅᖅᓱᐊᕐᓗᒍ ᐱᖅᑯᓯᖓ ᐊᑐᖅᑎᖏᓐᓇᕐᓗᒍ, ᒐᕙᒪᓕᕆᓂᕐᒦᖃᑕᐅᒍᓐᓇᓕᖅᓯᒪᑦᓱᑎᒃ, ᐃᓕᕝᕕᒋᓯᒪᓪᓗᒍᓗ ᐅᖃᖃᑎᒌᒍᑎᖃᕈᓐᓇᓂᕐᒥᒃ ᐱᔾᔪᑕᐅᔪᓂᒃ ᑲᓇᑕᒥ ᒐᕙᒪᓄᑦ. ᐊᕐᕌᒍᑦ ᓯᑕᒪᓐ ᐊᓂᒍᕋᐃᒻᒪᑕ ᐅᑕᖅᑭᒍᓐᓇᕈᓐᓃᐸᑦᑐᒍᑦ ᖃᐃᖁᔭᐅᓂᐊᕐᓂᕐᒧᑦ ᑲᑎᒪᓂᐅᓂᐊᓕᕐᒥᔪᒧᑦ ᓂᕆᐅᒍᑎᒋᔭᕗᑦ ᑕᐃᒪᙵᓕᒫᖅ ᐃᑲᔪᖅᑕᐅᒍᑎᒋᓪᓗᒋᑦ ᑕᒪᐅᖓᐃᓐᓈᖅᑎᑕᐅᓚᐅᖅᓯᒪᓇᑕᓗ.”
ᑐᐊᐃᓐ ᓯᒥᔅ, ᑐᒡᓕᖅ ᐃᒃᓯᕙᐅᑕᕐᒧᑦ (ᑲᓇᑕ): “ᑲᓇᑕ ᖁᕕᐊᓱᑉᐳᖅ ᑲᑎᒪᑎᑦᓯᓂᐊᕐᓂᕐᒥᓐᓂᒃ 2014−ᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᑎᒪᓂᒃᓴᖓᓂᒃ ᐃᓄᐃᑦ ᐱᕕᒃᓴᖃᕕᒋᑦᓯᐊᖅᑕᖓᓂᒃ ᐅᖃᖃᑎᒌᖃᑕᐅᓗᑎᒃ ᐊᒥᖅᑲᐅᑎᒋᕙᑦᑕᕗᑦ ᐊᑐᖅᓯᒪᔭᑦᑕ ᒥᒃᓵᓄᑦ ᐅᑭᐅᖅᑕᖅᑐᒥ. ᖁᔭᓐᓇᒦᕈᒪᕙᕋ ᐃᓅᖃᑎᖃᕈᓐᓇᓯᐊᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᐃᒃᓯᕙᐅᑕᖓ ᐊᖅᑲᓗᒃ ᓕᖕ ᐊᕐᕌᒎᒐᓴᓐᓂᒃ ᐱᔨᑦᓯᖅᓯᒪᓕᕐᒪᑦ ᐃᓄᖕᓂᑦ ᐊᒻᒪᓗ ᓄᓇᓕᖓᓂᒃ ᐃᓅᕕᐅᑉ ᖁᔭᔨᓪᓗᑎᒃ ᐊᒻᒪᓗ ᑐᙵᓱᑦᑎᑦᓯᓪᓗᑎᒃ ᐃᓂᖃᖅᑎᓯᓯᑦᓯᐊᖅᓱᑎᒃ.”