ᐅᑐᐱᕆ 5, 2017 – ᐋᑐᐋ, ᐊᓐᑎᐅᕆᔪ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᑭᐊᓚᓱᕐᓱᐊᖅ ᑲᒥᓴᓇᖏᑦ ᐅᖓᕙᕆᐊᖅᑎᑦᑎᖁᔨᕗᑦ ᑲᓇᑕᐅᑉ ᒐᕙᒪᒃᑯᖏᓐᓂ ᐊᒻᒪᓗ ᑕᓐᒫᒃᑯᓐᓂ ᐅᖓᕙᕆᐊᖅᑕᐅᖁᓪᓗᒋᑦ ᐅᓛᓵᒥ ᖁᒻᒧᐊᖅᑎᑕᐅᓯᒪᔪᒧᑦ ᐊᓂᕐᓂᖃᕐᓇᖏᑦᑐᒧᑦ ᖁᒻᒧᐊᖅᑎᑕᐅᖁᔭᒥᑦ ᑕᕆᐅᑉ ᐊᑭᐊᓂ ᖁᒻᒧᐊᑎᑦᑎᕙᑦᑐᓄᑦ ᐊᓂᕐᓂᖃᕐᓇᖏᑦᑐᒧᑦ ᖃᖓᖅᑕᖅᑎᑕᐅᔪᒫᖅᑐᒧᑦ ᐅᑐᐱᕆ 13−ᒥ ᓂᕈᐊᖔᕐᓗᑎᑦ, ᓱᕈᓐᓇᖏᑦᑐᒥᓪᓗ ᖁᒻᒧᐊᑎᑦᑎᖔᖁᔨᓪᓗᑎᒃ.
ᐅᓛᓵᒃᑯᑦ ᐊᑐᖃᑦᑕᖅᓯᒪᔪᑦ ᓱᓕ ᒫᓐᓇ ᐊᑐᖃᑦᑕᖅᑐᑦ SS-19 ᓯᓚᕐᔪᐊᒥ ᖁᒻᒧᐊᔫᑎᑦ ᐅᓇᑕᖅᑏᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᑐᖅᑐᑎᑦ. ᑕᒪᒃᑯᐊ ᐸᕐᓇᑕᐅᓯᒪᑦᑎᐊᖅᑐᑦ ᓇᒧᓐᖓᕐᓂᐊᕐᒪᖔᑕᓗ ᑭᖑᓂᖓᓐᓂ, ᐃᓚᖏᓪᓗ ᖁᒻᒧᐊᑦᑎᑕᒥᓂᑦ ᑭᓱᓂ ᐃᓚᖃᕐᒪᖔᑕ ᖃᐅᔨᒪᔭᐅᓇᑎᑦ ᐊᒻᒪᓗ ᐊᒥᐊᒃᑯᓪᓗᑯᕐᓂᑦ ᐅᖅᓱᐊᓗᓐᓂᑦ ᑕᐃᑯᖓ ᐱᑭᐊᓚᓱᕐᓱᐊᒧᑦ ᐅᕝᕙᓘᓐᓂᑦ ᐊᐅᒃᑲᓐᓂᓕᕐᒨᖅᐸᑦᑐᓄᑦ. ᐊᕙᑎᓄᑦ ᑎᒥᕗᓪᓗ ᐊᑦᑐᖅᑕᐅᓱᖑᒻᒪᑕ ᑕᐃᒪᐃᑦᑐᓄᑦ ᓱᓕ ᑕᒪᓐᓇ ᖃᐅᔨᓴᖅᑕᐅᓚᐅᖅᓯᒪᓐᖏᑦᑐᖅ ᖃᓄᑎᒋ ᐃᒪᕐᒥ ᐊᑦᑐᐃᓂᖃᕐᒪᖔᖅ ᐱᓗᐊᖅᑐᒥᑦ ᐅᑭᐅᖅᑕᖅᑐᒥ. ᓇᒦᓐᓂᖓ ᐅᓗᕆᐊᓇᕐᖓᑦ ᐅᖅᓱᐊᓗᖏᑦ ᑲᑕᕝᕕᔅᓴᖃᖅᑐᓂᓗ ᐅᑐᐱᕆ 13−ᒥ ᐅᑭᐅᖅᑕᖅᑐᒧ ᐊᐅᒃᑲᓐᓂᓕᖓᓐᓄᑦ, ᐱᕈᖅᑐᑕᓕᐋᓗᒻᒧᑦ ᓯᑯᒍᓐᓇᖏᑦᑐᒧᑦ ᓇᔪᖅᑕᐅᔪᖅ ᐊᓯᕙᕐᕕᐅᕙᑦᑐᓂᓗ ᐃᓄᓐᓄᑦ ᑲᓇᑕᒥᐅᓄᑦ ᑲᓛᖡᑦ ᓄᓈᓂᒥᐅᑕᕐᓄᓪᓗ.
“ᐱᑭᐊᓚᓱᕐᓱᐊᖅ ᑲᒥᓴᓇᐃᑦ ᑕᖅᑭᓂᑦ 16-ᓄᑦ ᓇᓚᖃᑦᑕᖅᓯᒪᓕᖅᑐᑦ ᐃᓄᓐᓂᑦ ᑕᐃᑲᓂᒥᐅᑕᕐᓂᑦ ᐊᒻᒪᓗ ᖃᓄ ᐊᑦᑐᐃᓂᖃᕐᓂᖓᓐᓂ ᐅᑭᐅᖅᑕᖅᑑᑉ ᐃᒪᖏᓐᓂ ᑐᓴᖅᑐᑎᓪᓗ ᐃᓄᐃᑦ ᑕᐃᒪᐃᑦᑐᓂᑦ ᐱᔪᒪᓐᖏᒻᒪᑕ ᐊᒻᒪᓗ ᐊᑦᑐᐃᓂᖃᕐᓂᐊᕐᓂᖓᓐᓄᑦ ᑕᒪᓐᓇ ᖃᓄᐃᓘᕐᓂᐅᔪᖅ ᐱᑭᐊᓚᓱᕐᓱᐊᖅ. ᐅᓂᒃᑳᕐᒥᑦ ᓴᖅᑭᖅᑕᐅᓛᓕᖅᑐᒥᑦ “ᐃᓄᐃᑦ ᓯᑯᓕᒻᒥᐅᑕᐃᑦ: ᓯᕗᓂᑦᑎᓐᓂ ᐱᑭᐊᓚᓱᕐᓱᐊᖅ”, ᒐᕙᒪᒃᑯᓐᓂ ᑲᓇᑕᒥ, ᑲᓛᖡᑦ ᓄᓈᓂ ᐊᒻᒪᓗ ᑕᓐᒫᒃᒥ ᐃᑲᔪᖅᑐᐃᔪᑦ ᑕᐃᒪᐃᑦᑐᒥᑦ, ᐃᓄᓐᓄᑦ ᐊᓚᑕᐅᒍᒪᔪᓂᒃ ᒪᓕᒐᕐᓂᑦ. ᑕᒪᒃᑯᐊ ᐊᓂᕐᓂᖃᕐᓇᖏᑦᑐᒥᑦ ᑲᒪᕙᑦᑐᑦ ᐊᑐᖃᑦᑕᕐᖓᑕ ᐱᑭᐊᓚᓱᕐᓱᐊᖅ/ᐅᑭᐅᖅᑕᖅᑑᑉ ᐃᒪᖓᓐᓂ ᓱᕈᓐᓇᖅᑐᓂ ᐃᒋᑦᑎᕕᐅᖃᑦᑕᕆᐊᖃᓐᖏᑦᑐᖅ ᓄᓇᓕᓐᓂ ᐊᐅᓚᑕᐅᔪᒪᔪᖅ ᐊᑦᑕᓇᕐᓂᖏᓐᓄ ᐱᕈᖅᑐᐃᑦ. ᑕᒪᒃᑯᐊ ᐃᒪᐃᑦ ᓂᕿᖃᕐᕕᒋᒐᑦᑎᒍ,” ᐅᖃᖅᑐᓂ ᓇᓐᓯ ᖃᕆᑕᖅ-ᓕᓐᑎᐊ, ᓯᓚᕐᔪᐊᒥ ᑎᓕᔭᐅᔾᔪᑎᒋᓯᒪᔭᖏᓐᓂ ᐊᒻᒪᓗ ᐃᔅᓯᕙᐅᑕᐅᑲᐃᓐᓇᖅᑐᓂᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ (ICC).
“ᑕᒪᒃᑯᐊ ᐃᓄᐃᑦ ᑲᑎᖃᖃᑦᑕᕐᖓᑕ ᐃᒪᕐᒥᐅᑕᕐᓂᑦ ᓂᕐᔪᑎᓂᑦ ᓂᕿᒋᒻᒪᒋᑦ ᐊᒻᒪᓗ ᐅᓗᕆᐊᓇᕐᖓ ᖁᒻᒧᐊᑦᑎᑕᐅᓯᒪᔪᖅ ᐅᖅᓱᐊᓗᖃᕐᓂᖓᓐᓄᑦ ᓴᓂᐊᓗᐃᓪᓗ ᐃᒋᔭᐅᒐᔭᖅᑐᑦ ᑕᐃᑯᖓ ᐱᑭᐊᓚᓱᕐᓱᐊᒧᑦ ᓈᒻᒪᖏᓪᓚᕆᒻᒪᑦ”, ᐅᖃᖅᑐᓂ ᑰᐱᒃ ᑲᓚᐃᔅᑦ, ᑲᓛᖡᑦ ᓄᓈᓄᑦ ᑲᒥᓴᓇ. ᐄᕙ ᐋᕆᐊᒃ, ᑲᓇᑕᒥ ᑲᒥᓴᓇ, ᐅᖃᓚᐅᖅᑐᖅ “ᑕᒪᓐᓇ ᐅᖃᐅᓯᕆᓚᐅᖅᑕᕗᑦ ᐊᕐᕌᓂ ᖃᐅᔨᒪᓇᑕ ᖃᓄᖅ ᐊᑦᑐᐃᓂᖃᕐᓂᐊᕐᒪᖔᖅ ᖁᒻᒧᐊᑦᑎᑕᖅ ᐃᓱᒫᓗᒋᔭᐅᓪᓚᕆᒻᒪᑦ ᐃᓄᓐᓄᑦ.”
ᑲᓚᐃᔅ ᓇᓗᓇᐃᖅᓯᓚᐅᖅᑐᖅ ᑲᒥᓴᓇᐅᑉ ᐱᓕᕆᐊᕆᔭᕆᐊᓕᖏᑦ ᐅᖃᖅᑐᓂᓗ, “ᒐᕙᒪᒃᑯᑦ ᒪᓕᒐᕐᓂᑦ ᒪᓕᖁᔨᕗᑦ ᑕᒪᑐᒥᖓ ᐊᒻᒪᓗ ᐱᑕᖃᕐᓂᖏᑉᐊᑦ ᐋᓐᓂᐊᖅᑕᐃᓕᒪᓂᕐᒧᑦ ᐊᕙᑎᑦᑎᓐᓄ ᐅᓗᕆᐊᓇᕐᓂᖓᓐᓄᑦ ᓴᖅᑭᖅᑐᖃᕆᐊᓕᒃ ᐅᖅᓱᐊᓗᒥᓂᕐᓂᑦ ᓴᕕᕋᔭᒥᓂᕐᓂᓪᓗ ᑲᑕᒐᖅᑐᖃᖅᑦ ᐃᒪᕐᒧᑦ, ᖁᒻᒧᐊᑦᑎᑕᐅᒋᐊᖃᓂᖏᑦᑐᖅ. ᖃᐅᔨᓴᖅᑎᒻᒪᕇᑦ ᑎᑎᕋᖅᓯᒪᔪᑦ ᐅᓗᕆᐊᓇᖅᑐᐊᓘᓂᖓᓐᓂ ᑲᔭᔅᑕᓐ ᐊᒻᒪᓗ ᐅᓛᓵᓄᑦ ᑕᐃᒪᐃᓕᖓᑎᑕᐅᑐᐃᓐᓇᕆᐊᖃᓐᖏᑦᑐᖅ.”
ᐋᕆᐊᖅ ᐅᖃᖅᑐᓂ, “ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᔭᕆᐊᖃᕐᖓᑕ ᐸᖅᑭᑦᑎᓗᑎᑦ ᐃᓄᓐᓂᑦ ᐊᒻᒪᓗ ᐊᕙᑎᑦᑎᓐᓂ ᐅᓗᕆᐊᓇᖅᑐᒦᑦᑐᓂᑦ ᓱᕈᓐᓇᖅᑐᓂᒃ ᓲᕐᓗ ᐊᑦᑕᓇᖅᑐᓂᑦ ᐃᓚᔅᓴᓐᓂᑦ ᐊᒻᒪᓗ ᐃᓱᒪᒋᔭᖏᓐᓂ ᐊᑐᕆᐊᖃᓪᓚᕆᑦᑐᑦ ᐊᑦᑕᖅᑐᑦ ᓱᕈᓐᓇᖅᑐᑦ ᓇᒧᑐᐃᓐᓇᑦᑎᐊᖅ ᐃᒋᑕᐅᒋᐊᖃᓐᖏᒻᒪᑕ ᓄᓇᒧᑦ, ᐅᒥᐊᕐᔪᐊᒃᑯᑦ ᓯᓚᒃᑯᓪᓗ ᐊᔾᔨᐅᖏᒻᒪᑦ ᐊᑦᑕᓇᖅᑐᒦᒪᑕᓗ ᐱᕈᖅᑐᑦ. ᓯᓚᕐᔪᐊᒥ ᑲᑎᒪᑎᑦᑎᖃᑦᑕᕐᖓᑕ ᐸᖅᑭᑦᑎᓂᕐᒧᑦ ᐃᒪᕐᓂᑦ ᐊᒻᒪᓗ ᐸᖅᑭᔭᐅᒋᐊᖃᕐᓂᖏᓐᓂ ᐃᓄᐃᑦ ᐊᕙᑎᕗᓪᓗ ᐊᓂᕐᓂᖃᕐᓇᖏᑦᑐᒥᑦ ᑲᑕᑦᑐᖃᖃᑦᑕᖏᓪᓗᓂ ᓴᓂᕐᓂᑦ.”
“ᖃᓄᐃᑦᑐᓂᑦ ᐸᕐᓇᒻᒪᑕ ᐅᓛᓵᒃᑯᑦ ᑕᕆᐅᓪᓗ ᐊᑭᐊᓂᒥᐅᑦ ᐊᓂᕐᓂᖃᕐᓇᖏᑦᑐᓂᑦ ᐱᓕᕆᕙᑦᑐᑦ ᖁᒻᒧᐊᑎᑦᑎᒍᒪᒻᒪᑕ ᖃᖓᑦᑕᖅᑎᑕᐅᓯᒪᕙᑦᑐᓂᒃ ᑲᑕᑦᑎᑕᐅᓗᓂ ᐅᖅᓱᐊᓗᖃᐅᑎᖓ ᖁᒻᒧᖓᔫᑦ ᐅᑭᐅᖅᑕᖅᑐᑉ ᐃᒪᖓᓐᓄ ᐊᑯᓐᓂᖏᓐᓂ ᑲᓛᖡᑦ ᓄᓈᓂ ᐊᒻᒪᓗ ᐊᐅᓱᐃᑦᑐᕐᒥᐅᑦ ᕿᑭᖅᑕᖓᓂ ᑲᓇᑕᒥ ᑕᒪᓐᓇ ᑲᑉᐱᐊᓇᓪᓚᕆᑦᑐᐊᓘᒻᒪᑦ. ᐃᓄᑐᐃᓐᓇᐅᓐᖏᑦᑐᓄᑦ ᑭᓯᐊᓂ ᐃᒪᕐᒥᐅᑕᕐᓄᑦ ᓂᕐᔪᑎᑕᖃᐅᕐᖓᑦ ᑕᒪᓐᓇ, ᑭᓯᐊᓂᓕ ᐅᖓᓯᒌᒃ ᑖᒃᑯᐊ ᓄᓇᓕᕐᔪᐊᖅ ᒥᑭᔪᕈᓘᒻᒪᑕᑎᒃ ᓄᓇᓕᕐᔪᐊᖏᑦ. ᖃᓂᓐᓂᖅᐹᖑᖃᑕᐅᔫᒃ ᑕᐃᒃᑯᐊ ᒪᕐᕉᒃ ᕿᑭᖅᑖᒃ 32−ᑭᓚᒦᑕᒥᑦ. ᖃᐅᔨᓴᑦᑎᐊᖏᒻᒪᑕ ᖃᓂᑦᑐᐊᓘᒻᒨᒍᓐᓇᑦᑎᐊᕐᖓᑦ ᓱᕋᔅᓯᒪᔪᐊᓗᐃᑦ ᓄᓇᓕᒋᔭᐅᔪᒧᑦ. ᑐᖁᒍᑦᑕᓕᑭᐊᖅ?” ᑕᐃᒫᒃ ᐅᖃᓚᐅᖅᑐᖅ ᓕᐅᕆ ᐊᐅᓪᓚᓗᒃ, ᐃᓄᒃ ᐊᓯᕙᖅᑎ ᐊᐅᓱᐃᑦᑐᕐᒥᐅᖅ.
“ᐊᕐᕌᒍᒐᓴᕐᔪᐊᕌᓗᓐᓄᑦ ᒥᓕᐊᓃᑦᑐᓄᑦ, ᐃᓄᐃᑦ ᑲᑎᑲᐃᓐᓇᖃᑦᑕᕐᖓᑕ ᖃᓄᐃᓐᖏᑦᑎᐊᖅᑐᓂᑦ ᐃᒪᕐᒥᐅᑕᕐᓂᑦ ᐊᑑᑎᖃᐃᓐᓇᖅᑐᓂᑦ ᐱᖅᑯᓯᖏᓐᓄᑦ, ᓄᓇᓕᖏᓐᓄᓪᓗ, ᑎᒥᕗᓪᓗ ᖃᓄᐃᖁᓇᑎᒍ ᐃᓅᓇᓱᐊᑦᑎᐊᕐᓂᒧᓪᓗ. ᑭᓇᓕ ᑕᐃᒪᐃᑦᑐᒥᑦ ᐱᐅᓐᖏᑦᑐᒥᑦ ᖃᓄᐃᔅᓴᖏᑦᑐᒋᑦᑎᒻᒪ?” ᖃᕆᑕᖅ-ᓕᓐᑎᐅᓪ ᐅᖃᖅᑐᓂ.