ᕖᕝᕗᐊᕆ 15−ᒥ 2018, ᓅᒃ, ᑲᓛᖡᑦ ᓄᓈ – ᐃᓄᐃᑦ ᐃᓕᓐᓂᐊᖅᑐᓕᕆᔨᒻᒪᕇᑦ ᐃᓕᓐᓂᐊᖅᑐᓕᕆᓂᕐᒥᓪᓗ ᐃᖅᑲᓇᐃᔭᖅᑐᑦ ᓯᓚᕐᔪᐊᑉ ᐅᑭᐅᖅᑕᖅᑐᖓᓐᓄ ᑲᑎᒪᔭᖅᑐᓚᐅᖅᓯᒪᔪᑦ ᐅᓪᓗᓄᑦ ᐱᖓᓲᓗᐊᖅᑐᑦ ᐃᓕᓐᓂᐊᖅᑐᓕᕆᓂᕐᒥᑦ ᐅᖃᐅᓯᖃᕆᐊᖅᑐᖅᑐᑎᑦ ᑐᐊᕕᕐᓇᖅᑐᒥᑦ ᐋᖅᑭᔅᓯᒪᒋᐊᓕᒻᒥ ᐃᓕᓐᓂᐊᖅᑐᓕᕆᓂᕐᒥᑦ ᐱᑕᖃᓐᖏᓗᐊᕐᖓᑦ ᓄᓇᓕᓐᓂ ᐊᒻᒪᓗ ᑲᔪᓯᑦᑎᐊᖅᓯᒪᔪᑦ ᐃᓕᓐᓂᐊᖅᑐᓕᕆᔨᒻᒪᕇᑦ ᐅᖃᖃᑎᒌᓕᓚᐅᖅᓯᒪᔪᑦ. ᐱᖃᑕᐅᓪᓗᑎᓪᓗ ᒥᓂᔅᑕᐃᑦ, ᐃᓄᐃᓪᓗ ᓯᕗᓕᖅᑎᑦ ᑲᑎᒪᔨᐅᓂᕐᒥᑦ, ᐃᓅᓱᑦᑐᑦ ᓈᓚᒋᐊᖅᑐᖅᓯᒪᔪᓪᓗ.
ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᓛᖡᑦ ᓄᓈᓂ ᐊᖏᔪᖅᑳᖅ, ᕼᐊᔭᒪᕐ ᑕᓪ, ᑲᑎᒪᔭᖅᑐᖅᑐᓂᑦ ᑐᓐᖓᓱᑦᑎᑦᑎᔨᐅᓚᐅᖅᑐᖅ ᐅᖃᓚᐅᖅᑐᖅ, “ᑐᓴᖃᑦᑕᖅᓯᒪᒐᑦᑕ ᖃᓄᖅ ᐊᔾᔨᒌᓐᖏᓐᓂᕗᑦ ᐃᓕᓐᓂᐊᖅᑐᓕᕆᓂᐅᖃᑦᑕᖅᑐᓂᑦ ᖃᓪᓗᓈᓂᓐᖔᖅᑐᓂᑦ ᐊᖅᑯᑎᕗᓪᓗ ᐱᔪᒪᓂᑦᑎᓐᓂ ᐅᕙᓃᓚᕿᕗᒍᑦ ᐊᔾᔨᒌᓐᖏᑦᑐᓂᑦ ᐃᓕᓐᓂᐊᖅᑐᓕᕆᓂᖃᕐᓂᑎᓐᓄ ᐅᓪᓗᒥᐅᔪᖅ.” ᐅᖃᖅᑐᓂᓗ, “ᑭᓯᐊᓂᓕ ᑲᒪᓇᖅᑐᖅ ᐊᔾᔨᒌᐸᓗᓐᓂᑦ ᐊᔅᓱᕉᑎᖃᖃᑦᑕᓂᑦᑎᓐᓂ ᐊᒻᒪᓗ ᐊᖏᕈᑎᒋᓪᓗᒋᑦ ᐃᓄᓐᓄᑦ ᑕᑯᓐᓇᖔᕐᓗᑕ ᑲᔪᓯᓯᒪᑦᑎᖅᑐᑦ ᐅᓂᒃᑳᕆᔭᐅᔪᑦ ᑐᓴᖃᑦᑕᕋᑦᑎᒍ ᐃᓄᓐᓂᑦ ᑎᓴᒪᓂᒃ ᓄᓇᓕᕐᔪᐊᖑᔪᓂᒃ ᐃᓅᕕᑦᑎᓐᓂ.” ᑕᓪ ᐅᖃᕆᓪᓗᓂ ᖁᕕᐊᑦᑐᖅ ᐊᑐᓕᖁᔭᓯᒪᔪᒥᑦ ᓴᖅᑮᓂᐊᕐᖓᑕ ᓯᓚᕐᔪᐊᑉ ᐅᑭᐅᖅᑕᖅᑐᖓᑕ ᑲᑎᒪᔨᕋᓛᕆᓂᐊᖅᑕᖏᓐᓂ ᑕᒪᒃᑯᓂᖓ ᑲᔪᓯᑐᐃᓐᓇᖁᔨᓪᓗᑎᑦ ᐃᓄᐃᑦ ᐃᖃᖃᑎᒌᖃᑦᑕᕐᓗᑎᑦ ᑕᒪᑐᒥᖓ ᐱᒻᒪᕆᐅᔪᒥᑦ.
“ᐅᖃᓕᒫᒐᑦᑎᓐᓂ ᐃᓕᓐᓂᐊᖅᐸᔪᒐᑦᑕ ᑕᒪᒃᑯᓂᖓ ᑎᒃ, ᔭᐃᓐ, ᐸᑉ, ᓯᐹᑦ ᐊᒻᒪᓗ ᐋᐳᓕᐅᖅᑐ ᓇᐹᖅᑐᓂᑦ ᑕᒪᒃᑯᐊ ᒥᔅᓵᓄᑦ, ᑭᓯᐊᓂᓕ ᐊᐅᓚᑦᑎᖔᓕᕋᑦᑕ ᐃᓕᓐᓂᐊᖅᑐᓕᕆᔨᑦᑎᓐᓂ ᐊᒻᒪᓗ ᑎᑎᕋᖅᐸᓕᖅᑐᒋᑦ ᖃᐅᔨᒪᓂᖏᑦ ᐃᓐᓇᖁᑎᑦᑕ, ᐅᖃᕐᔫᒥᑦᑕᓕᕆᕗᑦ ᑕᒪᒃᑯᐊ ᓈᒪᓐᖏᓗᐊᖅᑐᑦ,” ˙ᔮᓇ ᕼᐊᕐᓯᐊᕋᒃ, ᐃᓄᑉᐱᐊᖅ ᐊᐅᓚᑦᑎᔨ ᐃᓕᓐᓂᐊᖅᑐᓕᕆᔨᒃᑯᓐᓂ ᐊᓛᔅᑲᒥ NSB−ᒥᑦ ᐃᓕᓐᓂᐊᖅᑐᓕᕆᔨᒃᑯᓐᓂ ᐅᖃᓚᐅᕐᒥᔪᖅ, “ᐃᓐᓇᖁᑎᑦᑎᓐᓄᑦ ᐅᖃᐅᔾᔭᐅᓚᐅᖅᑐᒍᑦ ᓲᕐᓗ ᖃᓪᓗᓈᖅᑐᒧᑦ ᒥᖅᓱᕐᓗᒋᑦ ᖃᐅᔨᒪᓂᐅᔪᑦ ᐃᓕᓐᓂᐊᕈᑎᑦᑎᓐᓄᑦ ᐃᓕᓗᒋᑦ.”
ᑲᓇᑕᒥ, ᐊᓗᑭ ᑰᑦᑎᖅ, ᐊᖏᔪᖅᑳᖅ ᓄᓇᕗᑦ ᑐᓐᖓᕕᒃᑯᓐᓄᑦ ᓴᓐᖏᔪᐊᓗᒻᒥ ᐅᓂᒃᑳᓚᐅᕐᒥᔪᖅ ᑕᒪᓐᓇ ᐊᑐᑐᐃᓐᓇᕋᓱᐊᖅᑎᓪᓗᑕ ᐃᓅᓪᓗᑕ ᒪᓕᑦᑎᐊᕋᓱᐊᖅᑐᑕ, ᒫᓐᓇᐅᓕᖅᑐᓕ ᐊᑐᕆᐊᖃᓕᕋᑦᑕ “ᓴᓇᕐᕈᑎᓕᐊᕆᓯᒪᔭᓐᓂᑦ ᓇᒻᒥᓂᖅ ᒐᕙᒪᓕᖅᑎᓪᓗᑕ ᐊᖏᕈᑎᒥᒃ ᐊᑐᓕᖅᑎᓪᓕᒋᑦ ᐃᒥᓐᓂᑦ ᑕᑯᓐᓇᕐᓗᑕ ᐃᓕᓐᓂᐊᖅᑐᓕᕆᔨᒻᒪᕆᓐᓂᑦ, ᑲᒪᒋᔭᖃᕐᓂᐊᖅᑐᓂᑦ ᑕᐃᒪᐃᓪᓗᐊᖅᑎᑕᐅᖃᑦᑕᖅᓯᒪᓐᖏᑦᑐᓂᑦ ᓈᒻᒪᖏᑦᑐᓂᓪᓗ ᐃᓄᓐᓄᑦ ᐊᓯᖏᓐᓄᓪᓗ.” ᐅᖃᖅᑐᓂᓗ ᐃᓄᐃᑦ ᐃᓄᓱᑦᑐᑦ ᐱᐅᔪᓂᑦ ᑕᑯᒋᐊᖃᓕᕐᖓᑕ ᐃᓄᓐᓅᖓᔪᓂᒃ ᐃᓕᓐᓂᐊᕐᕕᑎᓐᓂ, ᐃᓄᒃᑎᑐᓪᓗ ᐃᓕᓐᓂᐊᖅᑎᑕᐅᓗᑎᑦ, ᐊᒻᒪᓗ ᐃᓕᓐᓂᐊᕐᓗᑎᑦ ᐃᓄᐃᑦ ᑐᑦᑕᕐᕕᖃᕐᓗᑎᑦ ᐃᓕᓐᓂᐊᕈᑎᓂᒃ. ᐅᖃᒃᑲᓂᖅᑐᓂᓗ, “ᐃᓄᐃᑦ ᑐᓐᖓᓇᐃᓐᓇᕐᓂᐊᖅᑐᑦ, ᑭᓯᐊᓂᓕ ᑐᓐᖓᓇᐃᓐᓇᖏᓪᓗᑎᑦ ᑕᐃᒪᐃᓪᓗᐊᖅᑎᑦᑎᖃᒃᑕᖅᓯᒪᓐᖏᑦᑐᓄᑦ, ᑐᓐᖓᓇᓐᖏᑐᐃᓐᓇᕐᓗᑎᑦ ᐃᓚᐃᓐᓈᖅᓯᒪᔪᓄᑦ, ᑐᓐᖓᓇᓐᖏᓪᓗᑎᑦ ᐃᓚᓕᐅᔾᔭᐅᓯᒪᓐᖏᑦᑐᓄᑦ.”
ᐱᖃᑕᐅᔪᐃᓐᓇᐅᓚᐅᖅᑐᑦ ᐅᓛᓵᒥᐅᑦ, ᐊᓛᔅᑲ, ᑲᓇᑕᒥ ᐊᒻᒪᓗ ᑲᓛᖡᑦ ᓄᓈᓂᒥᐅᑦ ᐊᖏᖃᑎᒌᑦᑐᑎᑦ ᑲᔪᓯᓐᓂᖅᐹᖑᓂᐊᕐᖓᑕ ᐃᓄᓐᓄᑦ ᑐᕌᖓᔪᓂᒃ ᐃᓕᓐᓂᐊᖅᑐᓕᕆᓂᒻᒪᕆᒻᒥᑦ ᐱᓗᑎᑦ ᐅᖃᐅᓯᖏᑦ ᐊᑐᓕᖅᑎᑕᐅᓗᑎᑦ ᐱᕙᓪᓕᐊᔭᐅᔪᓂᒃ. ᕌᐱ ᐅᐊᑦ ᑲᓇᑕᒥᐅᖅ ᐊᖏᔪᖅᑳᖑᓪᓗᓂᓗ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᐃᓐᖏᓕᖅᑐᓂᓗ ᑲᑎᒪᔭᖅᑐᖅᑐᓄᑦ ᐅᖃᖅᑐᓂᓗ, “ᐃᓕᓐᓂᐊᑎᑦᑎᒍᑎᐅᒻᒥᔪᖅ ᐃᓐᖏᐅᓯᒃᑯᑦ.”
ᒪᐃᔭ ᔭᐃᓴ ᐊᓰ ᓴᒻᓂᑦᔅ ᓄᕋᑉ ᑐᓐᖓᓱᑦᑎᑦᑎᓪᓗᓂ ᑲᑎᒪᔭᖅᑐᖅᑐᓂᒃ ᑐᒻᒧᓂᖃᕕᒻᒧᑦ ᓯᕐᒥᓲᕐᒧᑦ. ᐅᖃᖅᑐᓂᓗ, ᐃᓅᓯᕐᒥᑦ ᐅᓪᓗᒥᓕᓴᕐᓂᑦ ᓇᓗᓚᐅᓐᖏᑦᑐᖅ ᑕᒻᒪᖅᓯᒪᔪᖅᑕᖃᕐᖓᑦ, “ᐃᑉᐱᕆᔭᖃᓚᐅᖅᑐᖅ ᓲᕐᓗ ᑭᓱᑕᖃᓐᖏᑦᑐᖅ, ᐊᓪᓛᓗ ᐃᓯᖅᑕᐅᓯᒪᔪᑦ ᑐᑭᖃᕆᓐᖏᑦᑐᓂᐅᓪᓗ.” ᓱᓕ, ᐅᐱᒋᔭᖃᖅᑐᓂ ᑲᓛᖡᑦ ᓄᓈᑕ ᐃᓄᓱᑦᑐᖏᓐᓂ, ᐅᖃᐅᓯᖃᖅᑐᓂᓗ ᑲᔪᓯᓐᓂᕆᖃᑦᑕᖅᓯᒪᔭᖏᓐᓂ ᐅᑭᐅᖅᑕᖅᑐᒥ ᐱᓐᖑᐊᕕᔾᔪᐊᕐᓂᐅᓚᐅᖅᑐᑦ, ᐊᓯᖏᓐᓂᓪᓗ ᑲᔪᖏᖅᓴᐃᑲᓐᓂᓚᐅᖅᑐᖅ ᐃᓄᓐᓂᑦ ᐃᓕᓐᓂᐊᖅᑐᓕᕆᔨᓃᑦᑐᓂᒃ ᐅᑉᐱᒋᓂᐊᖅᑕᒥᓂᒃ ᓴᓇᓗᑎᑦ ᐃᑲᔪᕐᓂᐅᓂᐊᖅᑐᓂᑦ ᑐᑭᖃᖅᑎᐊᖅᑐᓂ ᐃᓄᓐᓂᑦ ᑕᑯᓐᓈᖅᑐᓂᑦ ᐃᓕᓐᓂᐊᖅᑐᓕᕆᓂᒻᒪᕆᒻᒥᑦ ᐱᓗᑎᑦ ᐅᓪᓗᒥᓕᓴᐅᔪᕐᓗ ᐃᓕᓐᓂᐊᖅᑐᓕᕆᓂᒻᒪᕆᐅᔪᑦ ᐊᑑᑎᖃᕈᓐᓇᕐᖓᑕ. “ᐃᓅᓱᑦᑐᖁᑎᕗᑦ − ᐃᓕᓐᓂᐊᖅᑐᓕᕆᔨᑦᑎᒍᑦ − ᑎᒍᓯᒍᓐᓇᕐᓗᑎᑦ ᐊᑕᖏᓪᓗᒋᓪᓗ ᐊᓯᔾᔨᕐᓗᒋᑦ,” ᐅᖃᖅᑐᓂ.
ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖅ ᐅᑲᓕᖅ ᐃᔨᑦᑎᐊᖅ ᐃᓱᓕᑦᑎᓪᓗᒍ ᐅᓪᓗᐃᑦ ᐱᖓᔪᐊᓐᓂ ᑲᑎᒪᑎᓪᓗᒋᑦ ᐅᖃᓕᓚᐅᕐᒥᔪᖅ. “ᑲᑎᒪᓂᕐᔪᐊᖅ ᐊᑑᑎᖃᓪᓚᕆᑦᑐᖅ ᐅᑉᐱᕆᓇᕐᓂᓪᓗ ᓇᓗᓇᐃᖅᓯᑲᓐᓂᖅᑐᓂ ᐃᓄᐃᑦ ᓯᕗᓪᓕᐅᔾᔭᐅᒋᐊᖃᕐᓂᖏᓐᓂ ᓇᒻᒥᓂᖅ ᐃᓕᓐᓂᐊᖅᑐᓕᕆᓂᕐᒥᑦ, ᓱᓇᒃᑯᑖᖃᖅᑐᑕᓗ ᐋᖅᑭᔅᓱᐃᔾᔪᑎᒋᒍᓐᓇᖅᑕᑎᓐᓂ. ᐱᒻᒪᕆᐅᒻᒪᑦ ᑕᒪᓐᓇ ᐱᒋᐊᖅᐸᓪᓕᐊᓂᖅ ᒪᒥᑉᐸᓪᓕᐊᒐᓱᐊᕐᓂᓪᓗ ᓴᓐᖏᓂᖅᑖᖅᐸᓪᓕᐊᓂᕐᓗ, ᐃᓕᓐᓂᐊᖅᑐᓕᕆᓂᖅ ᓴᓇᕐᕈᑎᒋᓗᒍ.”
ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᓯᕗᓕᖅᑎᖏᑦᑕ ᑲᑎᒪᔨᖏᑦ ᐊᖏᕐᕋᐅᔾᔨᓂᐊᖅᑐᑦ ᐅᓂᒃᑲᒥᓂᕐᓂᑦ ᐱᓕᕆᐊᖑᔭᕆᐊᖃᖅᑐᓂᓪᓗ ᕿᒥᕐᕈᔭᐅᓚᕐᖓᑕ ᐃᓄᓐᓄᑦ ᐃᓕᓐᓂᐊᖅᑐᓕᕆᔨᓄᑦ ᓯᕗᓕᖅᑎᓄᓪᓗ ᓄᓇᓕᕐᔪᐊᖏᓐᓂ ᐊᑐᓕᖁᔭᖏᓐᓂᓪᓗ ᑎᑎᕋᕐᓗᑎᑦ ᐃᓄᐃᑦ ᑲᑎᒪᔭᖅᑐᓚᐅᖅᑐᓂᑦ ᔪᓚᐃᖑᓕᖅᑲᑦ ᓴᖅᑭᕐᓗᒋᑦ 2018−ᒥ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᑎᒪᕕᔾᔪᐊᓕᖅᑲᑕ ᐅᑦᕿᐊᕕᒻᒥ, ᐊᓛᔅᑲ.