Viivvuari 15−mi 2018, Nuuk, Kalaałiit Nunaa – Inuit ilinniaqtulirijimmariit ilinniaqtulirinirmillu iqqanaijaqtut silarjuap ukiuqtaqtungannu katimajaqtulauqsimajut ullunut pingasuuluaqtut ilinniaqtulirinirmit uqausiqariaqtuqtutit tuavirnaqtumit aaqqissimagialimmi ilinniaqtulirinirmit pitaqanngiluarngat nunalinni ammalu kajusittiaqsimajut ilinniaqtulirijimmariit uqaqatigiililauqsimajut Piqataullutillu ministait, Inuillu sivuliqtit katimajiunirmit, inuusuttut naalagiaqtuqsimajullu.
Inuit Ukiuqtaqtumiinguqatigiit Katimajingit Kalaałiit Nunaani Angijuqqaaq, ᕼajamar Tal, katimajaqtuqtunit tunngasuttittijiulauqtuq uqalauqtuq, “tusaqattaqsimagatta qanuq ajjigiinnginnivut ilinniaqtuliriniuqattaqtunit qallunaaninngaaqtunit aqqutivullu pijumanittinni uvaniilaqivugut ajjigiinngittunit ilinniaqtuliriniqarnitinnu ullumiujuq.” uqaqtunilu, “kisianili kamanaqtuq ajjigiipalunnit assuruutiqaqattanittinni ammalu angirutigillugit inunnut takunnangaarluta kajusisimattiqtut unikkaarijaujut tusaqattarattigu Inunnit tisamanik nunalirjuangujunik inuuvittinni.” Tal uqarilluni quviattuq atuliqujasimajumit saqqiiniarngata silarjuap ukiuqtaqtungata katimajiralaariniaqtanginni tamakkuninga kajusituinnaqujillutit Inuit iqaqatigiiqattarlutit tamatuminga pimmariujumit.
“Uqalimaagattinni ilinniaqpajugatta tamakkuninga Tik, Jain, Pap, Sipaat ammalu aapuliuqtu napaaqtunit tamakkua missaanut, kisianili aulattingaaliratta ilinniaqtulirijittinni ammalu titiraqpaliqtugit qaujimaningit innaqutitta, uqarjuumittalirivut tamakkua naamanngiluaqtut,” Jaana ᕼarsiarak, Inuppiaq Aulattiji Ilinniaqtulirijikkunni Alaaskami NSB−mit Ilinniaqtulirijikkunni Uqalaurmijuq, “Innaqutittinnut uqaujjaulauqtugut suurlu qallunaaqtumut miqsurlugit qaujimaniujut ilinniarutittinnut ililugit.”
Kanatami, Aluki Kuuttiq, Angijuqqaaq Nunavut Tunngavikkunnut Sanngijualummi unikkaalaurmijuq tamanna atutuinnarasuaqtilluta Inuulluta malittiarasuaqtuta, maannauliqtuli aturiaqaliratta “sanarrutiliarisimajannit namminiq gavamaliqtilluta angirutimik atuliqtilligit iminnit takunnarluta ilinniaqtulirijimmarinnit, kamagijaqarniaqtunit taimailluaqtitauqattaqsimanngittunit naammangittunillu inunnut asinginnullu. ” uqaqtunilu Inuit inusuttut piujunit takugiaqalirngata inunnuungajunik ilinniarvitinni, Inuktitullu ilinniaqtitaulutit, ammalu ilinniarlutit Inuit tuttarviqarlutit ilinniarutinik Uqakkaniqtunilu, “Inuit tunnganainnarniaqtut, kisianili tunnganainnangillutit taimailluaqtittiqaktaqsimanngittunut, tunngananngituinnarlutit ilainnaaqsimajunut, tunngananngillutit ilaliujjausimanngittunut.”
Piqataujuinnaulauqtut Ulaasaamiut, Alaaska, Kanatami ammalu Kalaałiit Nunaanimiut angiqatigiittutit kajusinniqpaanguniarngata Inunnut turaangajunik ilinniaqtulirinimmarimmit pilutit uqausingit atuliqtitaulutit pivalliajaujunik. Raapi Uat Kanatamiuq angijuqqaangullunilu Kativik Ilisarnilirinirmut inngiliqtunilu katimajaqtuqtunut uqaqtunilu, “ilinniatittigutiummijuq inngiusikkut. ”
Maija Jaisa Asii Samnits Nurap Tunngasuttittilluni Katimajaqtuqtunik Tummuniqavimmut Sirmisuurmut Uqaqtunilu, Inuusirmit ullumilisarnit nalulaunngittuq tammaqsimajuqtaqarngat, “Ippirijaqalauqtuq suurlu kisutaqanngittuq, allaalu isiqtausimajut tukiqarinngittuniullu.” Suli, upigijaqaqtuni Kalaałiit Nunaata Inusuttunginni, Uqausiqaqtunilu Kajusinniriqattaqsimajanginni Ukiuqtaqtumi Pinnguavijjuarniulauqtut, asinginnillu kajungiqsaikannilauqtuq inunnit ilinniaqtulirijiniittunik uppiginiaqtaminik sanalutit ikajurniuniaqtunit tukiqaqtiaqtuni Inunnit takunnaaqtunit ilinniaqtulirinimmarimmit pilutit ullumilisaujurlu ilinniaqtulirinimmariujut atuutiqarunnarngata. “Inuusuttuqutivut − ilinniaqtulirijittigut − tigusigunnarlutit atangillugillu asijjirlugit,” uqaqtuni.
Inuit Ukiuqtaqtumiinguqatigiit Katimajingit Issivautaq Ukaliq Ijittiaq isulittillugu ulluit pingajuanni katimatillugit uqalilaurmijuq, “katimanirjuaq atuutiqallarittuq uppirinarnillu nalunaiqsikanniqtuni Inuit sivulliujjaugiaqarninginni namminiq ilinniaqtulirinirmit, sunakkutaaqaqtutalu aaqqissuijjutigigunnaqtatinni. Pimmariummat tamanna pigiaqpallianiq mamippalliagasuarnillu sannginiqtaaqpallianirlu, ilinniaqtuliriniq sanarrutigilugu.”
Inuit Ukiuqtaqtumiinguqatigiit Katimajingit sivuliqtingitta katimajingit angirraujjiniaqtut unikkaminirnit piliriangujariaqaqtunillu qimirrujaularngata Inunnut ilinniaqtulirijinut sivuliqtinullu nunalirjuanginni atuliqujanginnillu titirarlutit inuit katimajaqtulauqtunit Julainguliqqat saqqirlugit 2018−mi Inuit Ukiuqtaqtumiinguqatigiit Katimajingit Katimavijjualiqqata Utqiavimmi, Alaaska.