ᐋᒡᒌᔅᓯ 27, 2019 – ᑕᐅᓴᓐᖏᓂᑦᑐᓂᑦ ᑭᓚᒦᑕᓂᓕᒃ ᓇᐹᖅᑐᓕᐊᓗᒻᒥ ᐃᑭᑦᑐᐊᓘᓕᖅᑎᓪᓗᒍ ᒥᐊᓕᒐᐃᑦ ᐊᑖᓂ, ᐃᓄᐃᑦ ᓯᓚᕐᔪᐊᑉ ᐅᑭᐅᖅᑕᖅᑐᖓᓐᓃᖅᑐᑦ ᐊᓛᔅᑲᒥ, ᑲᓇᑕᒥ, ᓯᑳᑦᑕᒥ ᑲᓛᖡᑦ ᓄᓈᓂ ᑕᐃᒪᐃᓪᓗᐊᖃᑎᖃᕐᓂᕋᖅᑯᑦ ᓄᓇᖃᖅᑳᖅᑐᒥᓂᕐᓂᑦ ᐃᓱᒫᓗᑉᐳᑦ ᐋᒥᓵᒥᐅᑕᕐᓂᑦ ᐃᓱᒫᓘᑎᖏᓪᓗ ᐃᑉᐱᒋᔭᐅᑦᑎᐊᖅᑐᑦ ᐃᑯᐊᓚᔪᐊᓗᒻᒥᒧ ᓯᓚᕐᔪᐊᑉ ᐊᓯᔾᔨᐸᓪᓕᐊᓗᖓᓄᑦ.
7.4-−ᒥᓕᐊᖏᓐᓂ ᓯᒃᑭᑦᑕᑲᓪᓚᓐᓂᑦ ᑭᓚᒦᑕᓂᒃ ᐅᖓᓯᓐᓂᓕᓐᓂᑦ ᐋᒥᓵᓐ ᐊᖏᕐᕋᕆᔭᐅᔪᖅ 1−ᒥᓕᐊᖏᓐᓃᑦᑐᓂᑦ ᓄᓇᖃᖅᑳᖅᑐᒥᓂᕐᓂᑦ, ᐊᒻᒪᓗ 3−ᒥᓕᐊᖏᓐᓂ ᐊᔾᔨᒌᓐᖏᑦᑐᓂᑦ ᐱᕈᖅᑎᖃᐅᖅᑐᓂ ᐆᒪᔪᓂᓪᓗ. ᑕᒪᓐᓇ ᐅᓗᕆᐊᓇᖅᑐᒦᓕᕐᖓᑦ ᒪᓕᒐᓕᐅᕆᐊᖃᓕᕋᑦᑕ ᓯᓚ ᐊᔾᔨᐸᓪᓕᐊᓂᖓᓐᓂ, ᓇᐹᖅᑐᓕᐊᓗᒃ ᒥᓕᐊᖏᓐᓃᑦᑐᓂᑦ ᓱᕈᓐᓇᖅᑐᑖᖅᐸᑦᑐᖅ ᐳᔪᐊᓗᓐᓂ ᐊᕐᕌᒍᑕᒫᑦ. ᐃᑭᑦᑐᐊᓗᓕᖅᑎᓪᓗᒍ, ᓱᕈᓐᓇᖅᑐᑲᓐᓂᕐᓂᑦ ᓇᐹᖅᑐᒨᖅᐸᓪᓕᐊᓪᓗᑎᑦ ᓯᓚᑦᑎᓐᓄᖅᑲᖅᑐᑎᓪᓗ, ᑕᒪᒃᑯᐊ ᓇᐹᖅᑐ ᓱᕈᓐᓇᖅᑐᐊᓗᓐᓂᑦ ᐱᓪᓗᑎᑦ ᐱᐅᔪᓂᒃ ᐊᓂᕐᓂᕐᒨᖅᑲᐃᓲᖑᒐᓗᐊᕐᖓᑕ ᑭᓯᐊᓂᓕ ᑕᐃᒪᐃᒍᓐᓃᖅᑐᖅ ᐃᑭᑦᑐᐊᓗᒻᒪᑕ.
ᑕᒪᒃᑯᐊ ᐃᑭᑦᑐᐊᓘᑎᓪᓗᒋᑦ ᓯᓚᕐᔪᐊᑉ ᕿᑎᖓᓐᓂ, ᐊᑦᑐᖅᑕᐅᓂᖅᐹᖑᖃᑕᐅᒻᒪᑕ ᑭᓪᓕᖏᑎᒎᓐᖏᑦᑐᑦ. ᐊᑦᑐᐃᓂᖃᖅᑐᕐᔪᐊᕌᓗᒃ ᓯᓚᕐᔪᐊᓕᒫᒥ ᓱᕈᓐᓇᖅᑐᓂᑦ ᓴᖅᑭᖅᑐᖃᕐᓂᖅᓴᐅᓂᐊᓕᖅᑐᖅ ᐅᖓᓯᑦᑐᐊᓘᒐᓗᐊᕐᖓᑦ ᐋᒪᔮᓐ, ᐅᑭᐅᖅᑕᖅᑐᒧ ᐃᓚᒋᔭᐅᓗᓂ. ᐆᓇᖅᓯᕙᓪᓕᐊᑐᐃᓐᓇᑎᓪᓗᒍ ᒪᕐᕈᐊᖅᑎᓐᖑᐊᕐᒪᕆᑦᑐᒍ ᓯᓚᕐᔪᐊᒥ, ᐃᓄᐃᑦ ᓄᓇᖓᑦ ᐊᑦᑐᖅᑕᐅᓕᕇᖅᑐᖅ “ᑲᑉᐱᐊᓇᖅᑐᐊᓗᒻᒧ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ”. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᖓ ᒫᓂᑲ ᐃᐅᓪ-ᑲᓇᔪᖅ ᐅᖃᓚᐅᖅᑐᖅ, “ᐊᓯᔾᔨᐸᓪᓕᐊᓂᖓᓂ ᐅᑭᐅᖅᑕᖅᑑᑉ ᓄᓇᖓ, ᐃᓄᐃᓪᓗ ᐃᓅᓯᖏᑦ ᐃᓅᓇᓱᐊᕐᓂᖏᓪᓗ ᐊᑦᑐᐊᓂᖃᑦᑎᐊᕐᖓᑕ ᓄᓇᒧᑦ, ᓱᒃᑲᓕᑦᑎᑲᓐᓂᕋᔭᖅᑐᖅ ᑲᑉᐱᐊᓇᕐᓂᖅᓴᐅᓕᕐᓗᓂᓗ ᓇᐹᖅᑐᐊᓗᐃᑦ ᐃᑭᑦᑐᐊᓘᑎᓪᓗᒋᑦ ᐋᒥᓵᒥ ᑕᒪᓐᓇᓗ ᐅᖅᑰᓯᔾᔪᑎᒋᒃᑲᓂᕐᓂᐊᖅᑐᓂᐅᒃ ᓯᓚᕐᔪᐊᑉ ᐊᒻᒪᓗ ᐊᐅᑉᐸᓪᓕᐊᒃᑲᓂᕐᓗᑎᑦ ᓯᑯᑦ ᓯᕐᒥᓖᓪᓗ. ᓇᒥᑐᐃᓐᓇᖅ ᖃᓄᐃᑦᑐᖃᕐᓂᖅᑲᑦ ᐊᓯᐊᓂᑦᑕᐅ ᐊᑦᑐᖅᑕᐅᓂᐅᓴᑐᐃᓐᓇᖅᑐᒍᑦ ᐊᑕᖏᑦᑎᐊᕐᓗᑕ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᔅᓯᕙᐅᑕᖓ ᑕᓕ ᓵᒻᐳ ᑐᕈ ᐅᖃᓚᐅᖅᑐᖅ, “ᐃᓱᒫᓘᑎᖃᓪᓚᕆᒃᑲᑦᑕ ᐅᓂᒃᑲᕐᓃᑦᑐᓂᑦ ᑐᓴᖃᑦᑕᕋᑦᑕ ᓄᓇᖃᖅᑳᖅᑐᒥᓂᕐᓂᑦ ᓯᕗᓕᖅᑎᓂᑦ ᐳᕆᔨᐅᒥ ᒐᕙᒪᒃᑯᖏᓐᓂ ᔭᐊᐃᓐ ᐸᓪᑐᓄᕈᒥᑦ. ᑐᓴᖅᑐᓂ ᒐᕙᒪᒃᑯᖏᑦ ᐱᑦᑎᐊᖏᑦᑐᕐᔪᐊᕌᓘᓂᖏᓐᓄᑦ ᓄᓇᖃᖅᑳᖅᑐᒥᓂᕐᓂᑦ ᑕᑯᓐᓇᓐᖏᓐᖑᐊᖅᑐᐊᓘᓪᓗᑎᑦ, ᓂᕿᓂᑦ ᐱᕈᖅᓴᐃᔨᓂᒃ, ᐆᒪᔪᕐᓂᑦ ᑎᒍᐊᓕᓐᓂᑦ ᐅᔭᕋᕐᓂᐊᖅᑎᓂᓪᓗ ᐋᒥᓵᒥ ᑕᐃᒪᐃᑎᑦᑎᑐᐃᓐᓇᖅᑐᑦ ᐋᒥᓵᒥ ᐃᑭᑦᑐᐊᓗᓐᓂ ᓇᐹᖅᑐᓕᐊᓗᒻᒥ − ᐊᖏᕐᕋᕆᔭᐅᔪᓂᒃ. ᐊᒥᓱᓪᓗ ᐊᑦᑐᖅᑕᐅᓯᒪᓐᖏᑦᑐᓄᑦ ᖃᓪᓗᓈᑦ ᖃᑦᑎᕆᔨᖃᓐᖏᑦᑐᑦ, ᐃᑭᑦᑐᐊᓗᓐᓂᑦ ᖃᒥᑦᑎᒍᓐᓇᕐᓇᑎᓪᓗ.”
ᓇᓗᓇᐃᖅᓯᓚᐅᖅᑐᑦ ᐅᖓᑖᓅᓗᐊᒻᒪᕆᑦᑐᖅ 77,000 ᐃᑭᑦᑐᐊᓗᐃᑦ ᐳᐊᓯᓪᒥ ᑎᓴᒪᐅᔪᖅᑐᓂᒃ ᑕᖅᑭᓂᑦ ᑕᐃᒪᐃᔅᓯᒪᓚᐅᖅᑐᑦ 2019−ᒥ, ᒪᕐᕈᐊᖅᑎᓐᖑᐊᒻᒪᕆᑦᑐᒍᓕ 40,000−ᓂᑦ ᐃᑭᑦᑐᒥᓂᕐᓂᑦ ᐊᕐᕌᒍᒋᓚᐅᖅᑕᖓᓐᓂ. ᐋᒥᓵᓐ, ᐊᖏᓂᖅᐹᕐᔪᐊᖅ ᓄᓇᓕᖓ ᐳᐊᓯᓪᒥ, ᓇᓗᓇᐃᖅᓯᓚᐅᖅᑐᑦ ᑐᐊᕕᕐᓇᖅᑐᒦᓕᕆᐊᖏᑕ. ᕙᓂᔅᓱᐊᐃᓚ, ᐳᓕᕕᐊ, ᑲᓚᒻᐱᐊ ᐊᒻᒪᓗ ᐳᕉ ᓇᓗᓇᐃᖅᓯᓚᐅᕐᒥᔪᑦ ᑕᐅᓴᖏᓐᓃᑦᑐᓂᑦᑕᐅ ᐃᑯᐊᓚᔪᖃᓕᕐᖓᑦ.
ᐃᑯᐊᓛᓗᐃᑦ ᐳᔪᕐᓗᐊᓗᒻᒥ ᓴᖅᑮᕙᓪᓕᐊᑐᐃᓐᓇᓕᖅᑐᑦ, ᑕᒪᓂᖃᐃ 228 (megatons) ᐊᖏᔪᕐᔪᐊᕌᓗᓐᓂ ᐊᕐᕌᒍᒥ ᑕᒫᓂ ᓴᖅᑮᔪᑦ, ᖁᑦᑎᓂᖅᓴᐅᒻᒥᔪᕐᓕ 2010−ᓕᓴᒥᑦ.
“ᖃᐅᔨᒪᓂᐊᓕᖅᑕᕗᑦ ᑎᑎᕋᖅᑐᑎᒍ ᓯᓚᕐᔪᐊᒥ ᐅᓐᓂᓗᖅᓴᕆᐊᖃᕐᓂᑎᓐᓂ ᐳᐊᔅᓯᓪᒥᐅᑦ ᒐᕙᒪᒃᑯᖏᓐᓄᑦ, ᓲᕐᓗ ᐱᓱᓪᓗᑕ ᓈᒻᒪᓴᓐᖏᓂᑦᑎᓐᓂ ᑕᑯᔅᓴᐅᑎᑦᑎᓗᑕ ᐳᕆᔨᓕᐊᒥᐅᑦ ᐊᓪᓚᕕᖓᓐᓂ ᓯᓚᕐᔪᐊᒥ ᐅᓪᓗᑐᐃᓐᓇᕐᒥᑦ ᐊᒡᒌᔅᓯ 23−ᒥ, ᖃᕋᓴᐅᔭᒃᑯᓪᓗ ᐊᑎᓕᖅᑎᑎᓪᓗᑕ ᐳᐊᓯᓪᒥᐅᑦ ᒐᕙᒪᒃᑯᖏᓐᓄᑦ ᖃᐅᔨᓴᖁᓪᓗᒋᑦ ᓇᐹᖅᑐᑕᖃᕈᓐᓃᑎᑦᑎᕙᓪᓕᐊᒐᓱᐊᕐᓂᕐᒨᖓᔪᓂᒃ, ᐅᖃᓚᐅᖅᑐᖅ ᑕᓕ ᓵᒻᐳ ᑐᕈ. “ᓄᓇᓕᕐᔪᐊᕐᒥᐅᑦ ᖁᔭᓈᖅᓯᔫᔮᕐᖓᑕ ᐱᒻᒪᕆᐅᓂᖏᓐᓂ ᓄᓇᖃᖅᑲᖅᑐᒥᓃᑦ ᐱᔪᓐᓇᐅᑎᖏᓐᓂ ᐊᒻᒪᓗ ᐱᓕᕆᐊᔭᕆᐊᖃᕐᓂᖏᓐᓂ ᐳᐊᓯᓪᒥᐅᑦ ᐊᓯᔾᔨᖅᑐᓂᑦ ᒫᓐᓇ. ᖁᕕᐊᒋᔭᕗᑦ ᐅᐃᕖᑦ ᒐᕙᒪᒃᑯᖏᑦ ᐱᓕᕆᐊᔅᓴᓂᒃ ᓴᖅᑭᑎᑦᑎᓚᐅᕐᖓᑕ G7−ᒥᑦ ᑲᑎᒪᕕᔾᔪᐊᕐᓂᕐᒥᑦ ᐱᐊᕐᕆᑦᔅᒥ, ᓇᓗᓇᐃᖅᓯᓪᓗᑎᑦ ᖁᐊᖅᓵᓇᖅᑐᒦᓕᕐᓂᖏᓐᓂ ᑐᐊᕕᕐᓇᖅᑐᒥ. G7 ᓯᕗᓕᖅᑏᑦ ᓇᓗᓇᐃᖅᓯᓚᐅᖅᑐᑦ $20-ᒥᓕᐊᓂᑦ ᒥᐊᓕᒐᐃᑦ ᑮᓇᐅᔭᖏᑦᑕ ᓴᓐᖏᓂᖏᓐᓂ ᐊᑐᕐᓂᐊᖅᑐᑦ ᖃᑦᑎᕆᓇᓱᐊᕐᓗᑎᑦ, ᐅᐃᕖᒃᑯᑦ ᐅᓇᓕᖁᑎᖏᓐᓂ ᐊᐅᓪᓚᑎᑦᑎᓂᐊᖅᑐᑎᑦ ᐃᑲᔪᕆᐊᖅᑎᓪᓗᓂᒋᑦ. ᑲᓇᑕᓗ $15-ᒥᓕᐊᓂᑦ ᑲᓇᑕᐅᑉ ᑮᓇᐅᔭᖏᑕ ᓴᓐᖏᓂᖏᓐᓂ ᐊᑐᕐᓂᐊᕐᒥᔪᑦ, ᖃᖓᑕᓲᕐᓄᑦ ᐃᒥᖅᑕᖅᑎᓅᖓᓂᐊᖅᑐᓂᒃ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᔅᓯᕙᐅᑕᖓ ᐅᖃᓚᐅᕐᒥᔪᖅ ᐱᒋᐊᕈᑎᖃᕐᓂᐊᕐᒥᒻᒪᑕ ᖃᕋᓴᐅᔭᒃᑯᑦ ᐊᑎᓕᐅᖅᑎᑦᑎᖃᑦᑕᕐᓗᑎᑦ, ᐱᓗᐊᖅᑐᒥ ᑕᕆᐅᑉ ᐊᑭᐊᓂᒥᐅᑕᕐᓂᑦ ᑲᑐᔾᔨᖃᑎᒌᓐᓂᒃ ᐊᒻᒪᓗ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ ᐃᑲᔪᕈᓐᓇᖅᑐᓂᒃ ᐳᐊᓯᓪᒥᐅᑦ ᒐᕙᒪᒃᑯᖏᓐᓂ ᑲᒪᖁᔨᓗᑎᑦ ᐊᑲᐅᓐᖏᓕᐅᕈᑎᐅᔪᓂᒃ ᓇᐹᖅᑐᐃᔭᐃᔭᖁᔨᔪᓂᒃ.
“ᐅᑉᐱᕆᒐᑦᑎᒍ ᐊᓯᖏᑦ ᓄᓇᓕᕐᔪᐊᕐᒥᐅᑦ, ᐱᖃᓯᐅᑎᓪᓗᒍ ᑲᓇᑕ, ᐱᓕᕆᖃᑕᐅᒍᓐᓇᑦᑎᐊᕐᖓᑕ,” ᐅᖃᖅᑐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑲᖅ ᒫᓂᑲ ᐃᐅᓪ−ᑲᓇᔪᖅ. “ᑲᓇᑕ ᓂᓪᓕᐊᒋᐊᖃᕐᖓᑦ ᑕᐃᑲᓂᑐᐃᓐᓇᐅᓐᖏᑐᖅ G7−ᒥ ᑲᑎᒪᓂᕐᔪᐊᒥ, ᑭᓯᐊᓂᓕ ᑕᐃᒃᑯᓄᖓ ᑲᑎᒪᔨᐅᔪᓄᑦ ᐳᕆᔨᐊᒥᐅᓄᑦ, ᐊᒻᒪᓗ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓄᑦ. ᓯᓚᕐᔪᐊᑉ ᑲᑐᔾᔨᖃᑎᒌᖏᑦ ᓯᓚ ᐱᔾᔪᑎᒋᓪᓗᒍ ᐱᒋᐊᕐᓂᐅᓴᓂᕐᒧᑦ ᑲᑎᒪᓂᐅᔪᒥᑦ ᑕᖅᑭᐅᖏᑦᑐᖅ ᑲᑎᒪᓛᓕᕐᖓᑕ ᐊᒻᒪᓗ ᐊᕐᕌᒍᑕᒫᖅᓯᐅᑎᖓᓐᓂ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᑲᑎᒪᓂᐅᔪᒥᑦ ᑎᓯᐱᕆᐅᓚᖅᑐᒥ, ᒫᓐᓇ ᐱᐅᓂᖅᐹᑦᑎᐊᖑᔪᖅ, ᑐᐊᕕᕐᓇᑎᓪᓗᒍ, ᐅᖃᐅᓯᕆᓗᒋᑦ ᓯᓚ ᐱᒋᐊᕆᐊᖃᓕᕋᑦᑕ ᐱᔾᔪᑎᒋᓪᓗᒍ ᓯᓚᕐᔪᐊᓕᒫᒥ. ᖃᐅᔨᒪᒐᑦᑕ ᐱᓕᕆᓪᓚᕆᒋᐊᖃᕐᓂᑎᓐᓂ ᐃᓅᓪᓗᑕ, ᐃᓚᖃᕐᓗᑕ ᓄᓇᖃᖅᑳᖅᑐᒥᓂᕐᓂᑦ ᐃᓚᑦᑎᓐᓂ, ᐊᒻᒪᓗ ᒐᕙᒪᒃᑯᑦ ᐃᑲᔪᖅᑐᖁᓪᓗᑎᒍᓪᓗ ᓄᓇᖃᖅᑳᖅᑐᒥᓂᒥᕐᓂᑦ ᐊᒻᒪᓗ ᑲᒪᓇᓱᐊᕐᓗᑎᑦ ᑐᐊᕕᕐᓇᖅᑐᓂᑦ ᓲᕐᓗ ᒫᓐᓇᐅᔪᖅ.”
ᐅᓂᒃᑳᖅᑕᖃᕐᒥᔪᖅ ᓯᓚ ᐱᒋᐊᕈᑕᐅᓂᐊᓕᖅᑎᓪᓗᒍ ᖃᕋᓴᐅᔭᒃᑯᑦ ᓴᖅᑭᖅᑕᐅᓚᐅᖅᑐᖅ ᐱᓇᓱᐊᕈᓯᕆᓚᐅᖅᑕᑎᓐᓂ ᐊᒥᓱᓂᑦ G7 ᓄᓇᓕᕐᔪᐊᕐᓂᑦ ᒫᓐᓇ ᐱᖁᔭᕐᓂᑦ ᓈᒻᒪᓗᐊᓐᖏᒻᒪᑕ ᓯᓚᕐᔪᐊᖅ ᐆᓇᖅᓯᑲᓐᓂᑎᓪᓗᒍ 1.5 C−ᒥ, ᑕᐃᒫᒃ ᓇᓗᓇᐃᖅᓯᒪᒻᒪᑦ ᐸᕆᔅᒥ ᐊᖏᕈᑎᒥ, ᑭᓯᐊᓂᓕ ᓇᓗᓇᕈᓐᓃᖅᑐᖅ ᐆᓇᖅᓯᒋᐊᕐᓂᖏᓐᓂ ᐅᖓᑖᓄᖓᒻᒪᖔᖅ 4 C−ᒥᑦ ᐊᔾᔨᒋᓐᖏᒻᒪᒋᑦ ᑖᒃᑯᐊ ᓴᓇᕕᐅᔪᓂᑦ ᐆᑦᑐᖅᑕᐅᕙᑦᑐᓂᒃ.