ᒪᐃ 21, 2013 – ᐋᑐᐋ, ᐋᓐᑎᐅᕆᔪ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐅᖃᖅᓯᒪᔪᑦ ᓯᑕᒪᑦ ᐊᕐᕌᒍᑦ ᓈᒐᐃᒻᒪᑕ ᑲᑎᒪᓂᖓ ᐃᓅᕕᒻᒥ ᑲᑎᒪᓂᖃᓛᕐᒪᑕ ᔪᓚᐃ 2014−ᒥ.
ᐃᓄᖕᓂᑦ ᑭᒡᒐᖅᑐᐃᔪᑦ ᑲᑎᒪᔭᖅᑐᖅᓯᒪᔪᑦ, ᓂᔾᔭᐅᓯᔭᖅᑏᑦ, ᓴᓇᙳᐊᖅᑏᑦ ᐱᙳᐊᖅᑏᑦ, ᐊᒻᒪᓗ ᐊᓯᖏᑦ ᑲᑎᓐᓂᐊᖅᑐᑦ ᕋᓴᒦᙶᖅᓯᒪᔪᑦ, ᑲᓛᖡᑦ ᓄᓈᓂᒃ, ᐊᓛᔅᑲᒥᒃ, ᐊᒻᒪᓗ ᑲᓇᑕᒥ ᖁᕕᐊᓲᑎᖃᕐᓂᐊᕐᓗᑎᒃ ᐊᑕᐅᓯᐅᖃᑎᒌᖕᓂᖓᓂᒃ ᐃᓄᐃᑦ ᐊᒻᒪᓗ ᑎᑎᕋᕐᓗᒍ ᐊᖅᑯᑎᒋᔭᐅᒍᒪᔪᖅ ᓯᕗᒧᐊᒍᑕᐅᓂᐊᖅᑐᖅ ᑎᒥᐅᔪᒧᑦ ᑲᔪᓯᑎᑕᐅᓗᓂ ᐊᕐᕌᒍᓄᑦ ᓯᑕᒪᓄᑦ.
ᑕᒪᓐᓇ ᓯᕗᓪᓕᖅᐹᖑᓚᖓᔪᖅ ᑖᒃᑯᓇᓂ ᐊᕐᕌᒍᑦ 12−ᓂᒃ ᑲᓇᑕᒥᐅᑦ ᐃᓄᐃᑦ ᐅᐸᑦᑕᐅᓯᒪᓂᖓ ᐊᕐᕌᒍᐃᑦ ᓯᑕᒪᑦ ᐊᓂᒍᕋᐃᒻᒪᑕ ᖁᑦᓯᑦᑐᒥᐅᑦ-ᐅᑭᐅᖅᑕᖅᑐᒥᐅᑦ ᖁᕕᐊᓲᑎᖃᕐᓂᖓ ᐊᒻᒪᓗ ᐱᕕᖃᕐᕕᒋᓗᒍ ᐊᑐᐊᒐᒃᓴᓕᐅᕐᓂᕐᒧᑦ. ᑐᐊᐃᓐ ᓯᒥᔅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᓇᑕᒥ ᐊᖓᔪᖅᑳᖓ, ᐅᖃᖅᑐᒥᓂᖅ, “ᑲᓇᑕᒥᐅᑦ ᐃᓄᐃᑦ ᐱᕕᒃᓴᖃᑦᓯᐊᖅᑎᑕᐅᕗᑦ ᖃᐅᔨᒃᑲᑐᐃᓐᓇᖏᓪᓗᒋᑦ ᐊᓯᖏᑦ ᐃᓄᐃᑦ, ᑭᓯᐊᓂ ᖃᐅᔨᑎᓪᓗᒋᑦ ᓄᓇᕐᔪᐊᒥᐅᑦ, ᐅᐸᑦᑕᐅᓯᒪᒍᓐᓇᓂᑦᑎᓐᓂᑦ ᐊᐅᓚᑦᓯᒍᓐᓇᓂᑦᑎᓐᓂᒃ ᑲᑎᒪᓂᕐᒥᒃ”.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕ ᐱᒋᐊᖅᓯᒪᕗᑦ ᐅᐸᓗᐃᔭᕈᑎᒋᓪᓗᒍ ᑕᒪᓐᓇ ᐊᑐᖅᑕᐅᓂᓴᔪᖅ ᐱᒻᒪᕆᐅᔪᖅ, ᑲᒪᒋᔭᐅᒐᔭᖅᑐᖅ ᓄᓇᓕᖕᒥ ᑲᑎᒪᔭᖅᑐᕝᕕᐅᓯᒪᔪᒥ ᐃᓄᕕᐊᓗᖕᒥᐅᓄᑦ ᑯᐊᐳᕇᓴᒃᑯᓐᓄᑦ. ᐃᓄᕕᐊᓗᖕᒥᐅᓄᑦ ᑯᐊᐳᕇᓴᒃᑯᑦ ᐃᒃᓯᕙᐅᑕᖓ ᐊᒻᒪᓗ ᐊᖓᔪᖅᑳᖓᑦ, ᓂᐊᓕ ᑯᐊᓄᐊᔭᐃ, ᐅᖃᖅᑐᒥᓂᖅ ᖁᕕᐊᒋᓪᓚᕆᖕᓂᕋᖅᓱᒍ ᑕᒪᓐᓇ ᐱᓕᕆᐊᕆᔭᕆᐊᖓ. “ᑕᑯᓐᓇᕋᑦᑎᒍ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑎᒥᐅᓂᖓ ᐊᑕᐅᓯᐅᖃᑎᒌᑎᑦᓯᔪᖅ ᐃᓘᓐᓇᐃᓂᒃ ᐃᓄᖕᓂᑦ ᐊᒻᒪᓗ ᐃᖅᑲᓇᐃᔮᕆᓪᓗᒍ ᓄᓇᕐᔪᐊᒥ ᐊᑑᑎᖃᖅᑎᓪᓗᒍ ᐃᓘᓐᓇᑎᓐᓄᑦ ᓄᓇᓕᒻᒥᐅᖑᔪᓄᑦ ᐊᒻᒪᓗ ᓄᓇᐃᑦ ᐊᕕᑦᑐᖅᑕᐅᓯᒪᓂᖏᑎᒍᑦ ᓄᓇᓕᖕᓄᑦ”. ᑯᐊᓄᐊᔭᐃ ᐃᓚᓯᓪᓗᓂ ᐃᖅᑲᓇᐃᔮᒃᓴᖃᕐᓂᐊᕋᓗᐊᕐᓗᑕ ᑭᓯᐊᓂ “ᐃᖅᑲᓇᐃᔮᕆᒍᒪᔭᕗᑦᖅ ᐅᐸᓗᖓᐃᔭᐅᑎᒋᓗᒍ ᐊᒻᒪᓗ ᑕᑯᓛᕐᓂᑎᓐᓂᒃ ᓯᕗᓂᖃᑦᓯᐊᖅᐳᒍᑦ ᐊᒥᓱᓂᒃ ᖃᐃᖁᔭᐅᓯᒪᔪᓂᒃ ᖁᕕᐊᓲᑎᖃᖃᑕᐅᓂᐊᖅᑐᓂᒃ”.
ᓂᕆᐅᒋᔭᐅᕗᖅ ᐅᖃᐅᓯᖃᖅᑐᖃᕐᓂᐊᕐᓂᖓᓂᒃ, ᐃᓅᕕᐅᑉ ᐅᖃᐅᓯᕆᓂᐊᖅᑕᖓᓂᒃ, ᓴᖅᑭᖅᑎᑕᐅᓂᐊᕐᓂᖓᓂᒃ ᐃᓄᖕᓄᑦ ᑲᑎᒪᔭᖅᑐᖁᔭᐅᓯᒪᔪᓄᑦ ᒪᓕᑦᑕᐅᓂᐊᖅᑐᒧᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓄᑦ ᓯᑕᒪᓄᑦ−ᐊᕐᕌᒍᓄᑦ ᑎᓕᔭᐅᔾᔪᑕᐅᓯᒪᔪᖅ ᓂᓪᓕᐊᑎᑦᓯᓗᑎᒃ ᑭᒡᒐᖅᑐᐃᓂᕐᒥᒍᑦ ᐃᓄᖕᓂᑦ ᐅᑭᐅᖅᑕᖅᑐᒥᐅᓕᒫᓂᒃ, ᑕᒪᒃᑮᓐᓄᑦ ᐅᑭᐅᖅᑲᖅᑐᒥ ᑲᑎᒪᔨᓄᑦ ᐊᒻᒪᓗ ᐊᓯᖏᓐᓂᑦ.
ᑖᓐᓇ ᑐᖏᓕᕆᓕᖅᑕᖓ ᐃᓅᕕᐅᑉ ᑲᑎᒪᔭᖅᑐᕐᕕᐅᓯᒪᓂᐊᕐᓂᖓᑕ ᑕᒪᑐᒧᖓ. ᑲᑎᒪᔭᖅᑐᕐᕕᐅᓯᒪᓚᐅᖅᓯᒪᒻᒥᔪᖅ 1992−ᖑᑎᓪᓗᒍ. “ᐊᓯᔾᔨᖅᓯᒪᓂᖅᓴᐅᓕᕐᒥᔪᖅ ᐅᑭᐅᖅᑕᖅᑐᖅ ᑕᐃᑦᓱᒪᓂᒥᒃ”, ᓯᒥᔅ ᓄᖅᑲᐅᓯᖅᓱᓂ ᐅᖃᖅᑐᖅ “ᓄᓇᕐᔪᐊᓕᒫᒥ ᑕᑯᓐᓇᖅᑕᐅᓕᕋᑦᑕ ᕿᓄᕕᐅᕙᓕᕋᑦᑕ ᐱᔪᒪᔪᓄᑦ ᐊᑐᕈᓐᓇᑕᑦᑎᓐᓂᑦ ᐊᒻᒪᓗ ᐅᓯᑲᑦᑕᓂᕐᒧᑦ ᐊᖅᑯᑎᖁᑎᕗᑦ”.
ᑖᓐᓇ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᒋᐊᖅᑎᑕᒥᓂᖅ 1977−ᒥ ᐱᐅᕈᒥ, ᐊᓛᔅᑲ ᐊᒻᒪᓗ ᑲᑎᒪᓂᕆᕙᑦᑕᒥᓐᓂᑦ ᑲᑎᒪᓂᐅᑉ ᐃᓂᒋᓂᐊᖅᑕᖓᓂᒃ ᐊᐅᓚᑦᓯᓪᓗᑎᒃ ᐊᓪᓚᕝᕕᖓᓂᓪᓗ ᐃᒃᓯᕙᐅᑕᐅᑉ ᓄᓇᓕᔾᔪᐊᒥᒃ ᓄᓇᓕᔾᔪᐊᒧᑦ ᐊᕐᕌᒍᑦ ᓯᑕᒪᑦ ᐊᓂᒍᒐᐃᒻᒪᑕ.