Mai 21, 2013 – Aatuaaa, Aantiuriju – Inuit Ukiuqtaqtumiuqatigiit Katimajingit uqaqsimajut sitamat arraagut naagaimmata Katimaninga Inuuvimmi katimaniqalaarmata Julai 2014−mi.
Inungnit kiggaqtuijut katimajaqtuqsimajut, nijjausijaqtiit, sanannguaqtiit pinnguaqtiit, ammalu asingit katinniaqtut rasamiinngaaqsimajut, Kalaałiit Nunaanik, Alaaskamik, ammalu Kanatami quviasuutiqarniarlutik atausiuqatigiingninganik Inuit ammalu titirarlugu aqqutigijaugumajuq sivumuagutauniaqtuq timiujumut kajusititauluni arraagunut sitamanut.
Tamanna sivulliqpaangulangajuq taakkunani arraagut 12−nik Kanatamiut Inuit upattausimaninga arraaguit sitamat aniguraimmata Qutsittumiut-Ukiuqtaqtumiut quviasuutiqarninga ammalu piviqarvigilugu atuagaksaliurnirmut. Tuain Simis, Inuit Ukiuqtaqtumiuqatigiit Katimajingita kanatami Angajuqqaanga, uqaqtuminiq, “Kanatamiut Inuit piviksaqatsiaqtitauvut qaujikkatuinnangillugit asingit inuit, kisiani qaujitillugit nunarjuamiut, upattausimagunnanittinnit aulatsigunnanittinnik katimanirmik”.
Inuit Ukiuqtaqtumiuqatigiit Katimajingit Kanata pigiaqsimavut upaluijarutigillugu tamanna atuqtaunisajuq pimmariujuq, kamagijaugajaqtuq nunalingmi katimajaqtuvviusimajumi Inuvialungmiunut Kuapuriisakkunnut. Inuvialungmiunut Kuapuriisakkut Iksivautanga ammalu Angajuqqaangat, Niali Kuanuajai, uqaqtuminiq quviagillaringniraqsugu tamanna piliriarijarianga. “Takunnarattigu inuit ukiuqtaqtumiuqatigiit katimajingit timiuninga atausiuqatigiititsijuq iluunnainik inungnit ammalu iqqanaijaarillugu nunarjuami atuutiqaqtillugu iluunnatinnut nunalimmiungujunut ammalu nunait avittuqtausimaningitigut nunalingnut”. Kuanuajai ilasilluni iqqanaijaaksaqarniaraluarluta kisiani “iqqanaijaarigumajavutq upalungaijautigilugu ammalu takulaarnitinnik sivuniqatsiaqpugut amisunik qaiqujausimajunik quviasuutiqaqatauniaqtunik”.
Niriugijauvuq uqausiqaqtuqarniarninganik, Inuuviup Uqausiriniaqtanganik, saqqiqtitauniarninganik inungnut katimajaqtuqujausimajunut malittauniaqtumut Inuit Ukiuqtaqtumiuqatigiit Katimajinginnut sitamanut−arraagunut tilijaujjutausimajuq nilliatitsilutik kiggaqtuinirmigut Inungnit Ukiuqtaqtumiulimaanik, tamakkiinnut Ukiuqqaqtumi Katimajinut ammalu asinginnit.
Taanna tungiliriliqtanga Inuuviup Katimajaqturviusimaniarningata tamatumunga. Katimajaqturviusimalauqsimammijuq 1992−ngutillugu. “Asijjiqsimaniqsaulirmijuq ukiuqtaqtuq taitsumanimik”, Simis nuqqausiqsuni uqaqtuq, “Nunarjualimaami takunnaqtauliratta qinuviuvaliratta pijumajunut aturunnatattinnit ammalu usikattanirmut aqqutiqutivut”.
Taanna Inuit Ukiuqtaqtumiuqatigiit Katimajingit pigiaqtitaminiq 1977−mi Piurumi, Alaaska ammalu Katimanirivattaminnit Katimaniup iniginiaqtanganik aulatsillutik Allavvinganillu Iksivautaup nunalijjuamik nunalijjuamut arraagut sitamat anigugaimmata.