ᔪᓚᐃ 10, 2018 – ᐃᖃᓗᐃᑦ, ᓄᓇᕗᑦ – ᐃᔅᓯᕙᐅᑕᖓ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ, ᐅᑲᓕᒃ ᐃᔨᑦᓯᐊᖅ ᓇᓪᓕᒍᓱᓐᓂᕋᓚᐅᖅᑐᖅ ᑐᓴᕋᒥ ᐃᓅᒍᓐᓃᖅᑐᒥᓂᐅᓂᖓᓐᓂ ᐊᖏᔪᖅᑲᖑᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᕼᐊᓐᔅ ᐸᕕᐊ ᕉᓯ ᑲᓛᖡᑦ ᓄᓈᓂ. ᐊᖏᔪᖅᑳᖑᓚᐅᖅᓯᒪᔪᖅ ᐃᓄᐃᑦ ᐅᑭᐅᖅᑕᖅᑐᒦᖁᖓᑎᒌᑦ ᑲᑎᒪᔨᖏᓐᓄᑦ 1980−ᒥ – 1986−ᒧᑦ ᑲᑐᔾᔨᖃᖅᑎᒌᑦ ᐋᖅᑭᐸᓪᓕᐊᓕᖅᑎᓪᓗᒋᑦ.
“ᔭᒐᐃᒐᑦᑕ ᑐᓐᖓᕕᒋᔭᑦᑎᓐᓂ ᐃᓚᑦᑎᓐᓂ ᐃᓄᓐᓂᑦ.” ᐅᖃᖅᑐᓂ ᐃᔨᑦᓯᐊᖅ. “ᕼᐊᓐᔅ ᐸᕕᐊᑉ ᑕᑯᓐᓇᓚᐅᖅᑕᖓ ᐃᑲᔪᕐᓂᖃᓪᓚᕆᓚᐅᖅᑐᖅ ᐱᒋᐊᖅᑎᑕᐅᑎᓪᓗᒍ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐅᓪᓗᒥᐅᓕᖅᑐᖅ ᑕᐃᒪᐃᑦᑑᓕᕐᓂᖓᓐᓄᑦ. ᑲᑎᒪᔨᐅᓂᕆᓚᐅᖅᑕᖏᑦ ᑲᒪᓇᑦᑎᐊᓚᐅᖅᑐᑦ, ᑲᑐᔾᔨᖃᑎᒌᑐᒨᓐᖏᑦᑑᒐᓗᐊᖅ, ᑭᓯᐊᓂᓕ ᐃᓄᓐᓄᑦ ᑲᓛᖡᑦ ᓄᓈᓂᒥᐅᑕᕐᓄᑦ ᐱᓕᕆᖃᑕᐅᑦᑎᐊᓚᐅᕐᖓᑦ ᒐᕙᒪᒃᑯᓐᓂ ᐊᕐᕌᒍᓄᑦ ᖁᓕᐅᓗᐊᖅᑐᓂᒃ ᐊᖏᔪᖅᑳᖑᓕᖅᑎᓪᓗᒍ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ.”
ᕼᐊᓐᔅ ᐸᕕᐊ ᕉᓯ ᐃᓅᓚᐅᖅᓯᒪᔪᖅ ᔫᓂ 22, 1948−ᒥ. ᐅᑭᐅᖃᓚᐅᖅᓯᒪᔪᖅ 70−ᓂᑦ ᐃᓅᒍᓐᓃᕐᖓᑦ. ᐃᓕᓴᕆᔭᐅᖃᑦᑕᖅᓯᒪᔪᐊᓘᓚᐅᕐᖓᑦ ᐊᒥᓱᓄᑦ ᑐᓂᔭᐅᓯᒪᓪᓗᓂ ᑲᓛᖡᑦ ᓄᓈᓂᑦ ᖁᑦᑎᓂᖅᐹᒥᑦ ᐃᓕᓴᕆᔭᐅᔾᔪᑎᑖᓚᐅᖅᓯᒪᔪᖅ 1985−ᒥ. ᒪᕐᕈᐊᖅᑎ ᐃᓕᓯᒪᓪᓗᓂ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐊᖏᔪᖅᑲᖑᓂᕐᒧᑦ 1980−ᖏᓐᓂ ᐃᓚᒋᔭᐅᓚᐅᖅᓯᒪᔪᖅ ᑲᓛᖡᑦ ᓄᓈᓂ ᓯᐅᒧᑯᓐᓂ ᓂᕈᐊᖅᑕᐅᓚᐅᖅᓯᒪᓪᓗᓂᓗ ᑲᓛᖡᑦ ᓄᓈᓂᑦ ᒪᓕᒐᓕᐅᕐᕕᔾᔪᐊᖓᓐᓄᑦ 1987−ᒥ. ᒥᓂᔅᑑᓚᐅᖅᓯᒪᓪᓗᓂ ᐱᕙᓪᓕᐊᔪᓕᕆᓂᒧᑦ ᐃᔅᓯᕙᐅᑕᐅᓚᐅᖅᓯᒪᓪᓗᓂᓗ ᑲᑎᒪᔨᖃᓛᓄᑦ ᑲᓛᖡᑦ ᓄᓈᓂ ᒪᓕᒐᓕᕆᓂᕐᒥᑦ.
ᕉᓯᖕ ᓇᒻᒥᓂᓕᕆᓂᕐᒥᑦ ᑲᒪᖃᑦᑕᓚᐅᕐᒥᔪᖅ, ᐊᕙᑎᓕᕆᓂᕐᒥᑦ, ᐱᖅᑯᓯᓕᕆᓂᕐᒥᓪᓗ ᑲᒪᖃᑕᐅᕙᑦᑐᓂ, ᐊᒻᒪᓗ ᐃᓐᖏᖅᑎᐅᓚᐅᕐᒥᔪᖅ ᐱᒋᐊᖅᑎᑦᑎᓚᐅᖅᓯᒪᓪᓗᓂ ᑲᓛᖡᑦ ᓄᓈᓂ ᐃᓐᖏᖅᑎᓂᑦ.
“ᐃᓄᐃᑦ ᐃᓕᓴᖅᓯᓛᖅᑐᑦ ᑖᔅᓱᒥᖓ ᕼᐊᓐᔅ ᐸᕕᐊ ᕉᓯ ᑲᑎᒪᒃᑲᓐᓂᓕᖅᑲᑕ ᐱᓇᓱᐊᕈᓯᒋᓛᖅᑕᑎᓐᓂ ᐅᑦᕿᐊᕕᒃ, ᐊᓚᔅᑲᒥ 13−ᖓᓐᓂ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᑎᒪᕕᔾᔪᐊᑎᓪᓗᒋᑦ. ᐊᐃᖓᐃ.” ᐃᓱᓕᑦᑎᓪᓗᓂ ᐃᓄᐃᑦ ᐅᑭᐅᖅᑕᖅᑐᒦᖁᖓᑎᒌᑦ ᑲᑎᒪᔨᖓᑕ ᐊᖏᔪᖅᑳᖓᓂ ᐅᑲᓕᖅ ᐃᔨᑦᓯᐊᖅ.