Press Releases

Documenting our Progress

Donate to ICC

ICC Alaska

ICC Greenland

ICC Chukotka

ᐅᑭᐅᖅᑕᖅᑐᖅᒥᐅᖃᑎᒌᑦ ᐃᓄᐃᑦ ᐱᔭᕇᓚᐅᖅᑐᑦ 13-ᖓᓐᓂ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᑎᒪᕕᔾᔪᐊᕐᓂᖓᓐᓂ – ᐃᔅᓯᕙᐅᑕᖅᑕᖑᕋᑖᖅᑐᖅ ᓂᕈᐊᖅᑕᖅ: ᑕᓕ ᓵᒻᐳ ᑐᕈ ᐅᑦᑭᕕᐊᕐᒥ ᓇᓗᓇᐃᖅᑕᐅᓯᒪᔪᓂᒃ ᑎᒍᔭᐅᓯᒪᔪᑦ

ᔪᓚᐃ 19, 2018 – ᐅᑦᑭᐊᕕᒃ, ᐊᓚᔅᑲ – ᐃᓄᐃᑦ ᑲᑎᒪᔭᖅᑐᖅᓯᒪᔪᑦ ᐊᓛᔅᑲᒥ (USA), ᑲᓛᖡᑦ ᓄᓈᓂ, ᑲᓇᑕᒥ, ᐊᒻᒪᓗ ᓯᑳᑦᑕᒥ (ᐅᓛᓵ) ᐅᓪᓗᒥ ᐱᔭᕇᓚᐅᖅᑐᑦ 13−ᖓᓐᓂ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᑎᒪᕕᔾᔪᐊᖅᑐᑎᑦ ᑐᕌᒐᖃᓚᐅᖅᑐᑦ “ᐃᓄᐃᑦ – ᐅᑭᐅᖅᑕᖅᑐᖅ ᐱᔪᒪᔭᕗᑦ” ᐅᑦᑭᐊᕕᒻᒥ, ᐊᓛᔅᑲᒥ, ᑲᑎᓯᒪᔪᑦ ᓴᓐᖏᔫᓪᓗᑎᓪᓗ.

ᐅᓪᓗᓄᑦ ᑎᓴᒪᓄᑦ ᑲᑎᒪᑎᓪᓗᒋᑦ 64−ᓂᒃ ᐃᓄᓐᓂᑦ ᑐᓴᓚᐅᖅᑐᒍᑦ ᐅᓂᒃᑳᖅᑐᓂᑦ ᐃᓄᐃᑦ ᐱᓕᕆᔨᒻᒪᕆᖏᑦ ᐊᔾᔨᒌᓐᖏᑦᑐᓂᑦ ᐱᔾᔪᑎᖃᖅᑐᑎᑦ. ᐅᓂᒃᑳᕐᓂᓪᓗ ᓴᖅᑮᓪᓗᑎᑦ ᐱᖓᓱᓂᒃ ᐱᒻᒪᕆᐅᓗᓐᓂᑦ ᑲᑎᒪᓂᐅᓚᐅᖅᓯᒪᔪᓂᒃ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ (ᐅᑭᐅᓄᑦ ᑎᓴᒪᐅᓚᐅᖅᑐᓂᑦ ᐱᕙᓪᓕᐊᔪᓕᕆᓂᕐᒥᑦ, ᓂᕐᔪᑎᓂᑦ ᐊᐅᓚᑦᑎᓂᕐᒥᑦ, ᐅᖃᐅᓯᓕᕆᓂᕐᒥᓪᓗ. ᓇᓗᓇᐃᔭᖅᓯᒪᑦᑎᐊᖅᑐᓂᒃ ᐅᓂᒃᑳᓕᐅᓚᐅᖅᑐᑦ ᐱᑭᐊᓚᓱᕐᓱᐊᖅ ᑎᓕᔭᐅᔾᔪᑎᖏᓐᓂ ᐅᑭᐅᖅᑕᖅᑑᑉ ᐃᒪᖓᓐᓂ ᐊᐅᒃᑲᓐᓂᓕᕐᒥᑦ ᐊᑯᓐᓂᖓᓃᑦᑐᒥᑦ ᑲᓇᑕ ᐊᒻᒪᓗ ᑲᓛᖡᑦ ᓄᓈᓂ ᐅᓂᒃᑳᕆᔭᐅᓚᐅᖅᑐᖅ.

ᑕᐃᒪᓪᓗ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐱᖅᑯᓯᕆᔭᐅᓲᖑᒻᒪᑦ ᐊᓯᐊᓅᖅᑕᐅᒋᐊᖃᕐᓂᖓ ᐃᔅᓯᕙᐅᑕᖅ ᓯᓚᕐᔪᐊᒥ ᑲᑐᔾᔨᖃᑎᒌᓐᓄᑦ ᐊᓛᔅᑲᒨᕐᓂᐊᓕᕐᒥᔪᖅ ᑎᓴᒪᓄᑦ ᐊᕐᕌᒍᓄᑦ. ᑕᓕ ᓴᒻᐳ ᑐᕈ ᐊᖏᖅᑐᐃᓐᓇᐅᓪᓗᑎᑦ ᓂᕈᐊᖅᑕᐅᕋᑖᖅᑐ ᐃᔅᓯᕙᐅᑕᐅᓂᐊᓕᖅᑐᖅ, ᐃᓇᖐᔪᖅ ᑲᓇᑕᒥ ᐅᑲᓕᖅ ᐃᔨᑦᓯᐊᕐᒥᑦ.

“ᐊᑐᓂ ᐃᓄᐃᑦ ᐅᑉᐱᕆᔭᐃᓐᓇᑦᑎᐊᖑᒻᒪᑕ. ᐃᓄᓕᒫᑦ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᓐᓂ. ᐃᓗᐊᓂ,” ᐅᖃᐅᓯᕆᕋᑖᖅᑕᖓ ᑕᓕ ᓵᒻᐳ ᑐᕈ ᐅᓂᒃᑳᓱᖓᐅᑎᓕᖅᑎᓪᓗᒍ. “ᐱᒋᐊᖅᑎᑦᑎᓯᒪᔪᖅ, ᐄᐸᓐ ᕼᐊᑉᔅᓴᓐ, ᑲᑎᑎᑦᑎᒍᒪᓚᐅᖅᓯᒪᒻᒪᑦ ᐅᕙᑦᑎᓐᓂ. ᑕᑯᓚᐅᖅᓯᒪᒻᒪᔾᔪᒃ ᐅᑉᐱᕆᔭᖓ ᐱᓕᕆᖃᑎᒌᓐᓂᒃ, ᑐᑭᒧᐊᖃᑎᒌᓐᓂᖅ ᐱᒋᐊᕈᑎᒋᔭᕆᐊᖃᖅᑐᑎᒍᓪᓗ, ᐊᒻᒪᓗ ᐊᑕᐅᓯᐅᖃᑎᒌᑦᑐᑕ ᓂᐱᖃᕐᓂᑎᓐᓂ ᓯᓚᕐᔪᐊᒥ. ᑕᒪᓐᓇ ᐅᖃᐅᓯᕆᔪᒪᒻᒥᒐᒃᑯ ᑲᑎᒪᓂᖏᑦ, ᐃᒻᒥᒃᑰᖃᑎᒌᒋᐊᖃᕐᓂᖏᑦ ᑕᑯᔅᓴᐅᒻᒪᑕ ᐃᓄᐃᑦ ᐱᔪᓐᓇᐅᑎᖏᑦ. ᓇᓗᓇᐃᖅᓯᓯᒪᓕᕋᑦᑕ ᑲᑎᒪᔨᐅᓂᒃᑯᑦ ᖃᓄᐃᓕᖓᓕᕐᓂᑎᓐᓂ − ᐊᔾᔨᐅᖏᑦᑑᒐᑦᑕ ᐃᓅᓪᓗᑕ, ᐊᔾᔨᐅᖏᑦᑐᓂᑦ ᐱᔪᓐᓇᐅᑎᖃᖅᑐᑕ ᓇᔪᖅᑕᕗᓪᓗ ᐊᔾᔨᐅᖏᑦᑑᒻᒪᑦ ᓯᓚᕐᔪᐊᒥ. ᐅᐱᒍᓱᓪᓚᕆᑦᑐᐊᓘᔪᖓ ᓂᕈᐊᖅᑕᐅᒐᒪ ᓯᕗᒃᑲᑕᕐᓂᐊᖅᑎᓪᓗᖓ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᓐᓂ ᐊᕐᕌᒍᓄᑦ ᑎᓴᒪᐅᓂᐊᖅᑐᓄᑦ.”

ᑲᑎᒪᔭᖅᑐᖅᓯᒪᔪᑦ ᑎᒍᓯᓚᐅᖅᑐᑦ ᐅᑦᑭᐊᕕᒻᒥ ᓇᓗᓇᐃᖅᑕᐅᓯᒪᔪᒥᑦ, ᑕᒪᒃᑮᓐᓂᒃ ᑎᑎᕋᖅᓯᒪᔪᓂᒃ ᑕᕝᕙᓐᖓᑦ ᑲᑎᒪᓂᕐᔪᐊᒥ ᑕᑯᓐᓇᖅᑕᖏᓐᓂᓪᓗ ᐱᓕᕆᐊᖏᓐᓂ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᒪᒋᔭᐅᔪᒫᖅᑐᑦ ᐅᑭᐅᓂᑦ ᑎᓴᒪᐅᓂᐊᖅᑐᓂᒃ. ᐅᑦᑭᐊᕕᒃ ᓇᓗᓇᐃᖅᓯᓚᐅᖅᑐᑦ ᐃᓗᓕᖃᖅᑐᓂ ᖁᓕᓂᑦ ᐊᕕᑦᑐᖅᓯᒪᔪᓂᒃ ᑎᑎᕋᖅᓯᒪᔪᓂᒃ 58−ᓂᓪᓗ ᓇᓗᓇᐃᔭᖅᓯᒪᔪᓂᒃ, ᐊᖅᑭᒋᐊᕆᐊᓕᑦ ᑕᒃᑯᐊ ᑲᑎᒪᓂᕐᔪᐊᒥ ᐃᓱᒪᒌᓐᓇᕐᓗᑎᒍ “ᐃᓄᐃᑦ − ᐅᑭᐅᖅᑕᖅᑐᒥ ᐱᔪᒪᔭᑦᑎᓐᓂ”.

ᐱᔭᕇᔭᓕᖅᑎᓪᓗᒋᑦ ᑲᑎᒪᓂᕐᔪᐊᒥ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᑲᑎᒪᓚᐅᖅᓯᒪᔪᑦ ᓄᑖᑦ ᓂᕈᐊᖅᑕᐅᕋᑖᓪᓗ ᓄᓇᓕᕐᔪᐊᕐᓃᓐᖔᖅᓯᒪᔪᓂᒃ, ᓯᓚᕐᔪᐊᒥᓗ ᐃᔅᓯᕙᐅᑕᖓᓐᓂ. ᓯᕗᓕᖅᑏᑦ ᑲᑎᒪᔨᕋᓛᖏᑦ ᐃᒪᐃᑦᑑᓕᖅᑐᑦ ᐅᑯᐊ:

ᐃᔅᓯᕙᐅᑕᖅ: ᑕᓕ ᓵᒻᐳ ᑕᕈ
ᐊᓛᔅᑲ: ᐊᖏᔪᖅᑲᖅ: ᔨᒥ ᓯᑳᑦᔅ; ᐊᖏᔪᖅᑲᑉ ᑐᖏᓕᖓ: ᕕᐅᕋ ᒪᒃᑳᓪᑉ
ᑲᓇᑕ: ᐊᖏᔪᖅᑳᖅ: ᒫᓂᑲ ᐃᐅᓪ-ᑲᓇᔪᖅ; ᐊᖏᔪᖅᑲᑉ ᑐᖏᓕᖓ: ᓖᓴ ᖁᐱᕐᕈᐊᓗᒃ
ᓯᑳᑦᑲ: ᐊᖏᔪᖅᑲᖅ: ᓘᐳᐃ ᑕᐃᐊᓐ; ᐊᖏᔪᖅᑲᑉ ᑐᖏᓕᖓ: ᐃᓚᐃᓇ ᑲᒥᓐᔅᑲᔭ
ᑲᓛᖡᑦ ᓄᓈᑦ: ᐊᖏᔪᖅᑲᖅ: Hᐊᔭᓪᒪ ᑕᓪ; ᐊᖏᔪᖅᑲᑉ ᑐᖏᓕᖓ: ᓄᑲ ᑯᓖᒪᓐ

ᐱᐅᓪ ᐃᐊᑦᒪ ᐃᓕᓴᕆᔭᐅᔾᔪᑎᖓ ᓴᖅᑭᖅᑕᐅᓚᐅᖅᓯᒪᔪᖅ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᐅᐱᒋᔭᐅᖁᓪᓗᒋᑦ ᐃᒻᒥᒃᑰᖅᑐᑦ ᓇᒻᒥᓂᖅ ᐃᑲᔪᓚᐅᖅᓯᒪᔪᓂᒃ ᓴᖅᑭᔮᖅᑎᑦᑎᓪᓗᑎᑦ ᐃᓄᐃᑦ ᐱᔪᓇᐅᑎᖏᓐᓂ ᐱᔪᒪᔭᖏᓐᓂᓪᓗ, ᐱᓗᐊᖅᑐᒥᑦ ᑕᑯᓐᓇᖅᑕᐅᔪᑦ ᓯᓚᕐᔪᐊᓕᒫᒥᑦ ᐱᓇᓱᐊᖅᓯᒪᔪᓂᒃ, ᐃᓕᓴᕆᔭᐅᔾᔪᑏᑦ ᑲᔪᓰᓐᓇᕐᓂᖏᓐᓄᑦ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᓯᑳᑦᑲ ᐊᖏᔪᖅᑳᖓᓐᓄᑦ ᑕᑎᐊᓇ ᐊᑦᓯᕐᔩᓇᒥᑦ.

ᑭᖑᓕᕐᒥ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ ᑲᑎᒪᕕᔾᔪᐊᕈᒫᖅᑐᑦ ᐃᓗᓕᔅᓴᒥ, ᑲᓛᖡᑦ ᓄᓈᓕ 2022.

The Inuit Circumpolar Council (ICC) is an Indigenous Peoples’ Organization (IPO), founded in 1977 to promote and celebrate the unity of 180,000 Inuit from Alaska (USA), Canada, Greenland, and Chukotka (Russia). ICC works to promote Inuit rights, safeguard the Arctic environment, and protect and promote the Inuit way of life. In regard to climate change, we believe that it is crucial for world leaders and governments to recognize, respect and fully implement the human rights of Inuit and all other Indigenous peoples across the globe.