ᐋᒡᒌᓯ 7, 2015 – ᕼᐅᐋᐃ, ᒥᓕᐊᓕᒐᐃᑦ ᓄᓇᖓᑦ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᔪᖏᒃᑲᓐᓂᕈᑎᒋᕚ ᐃᓄᐃᑦ ᐊᙳᑕᖃᖅᐸᑦᑐᑦ ᓇᑦᓯᕐᓂᒃ ᕿᓯᖏᑦ ᓄᓇᕗᒻᒥ ᐱᔪᓐᓇᖅᑎᑕᐅᒍᑕᐅᒻᒪᑦ ᐱᕕᖃᖅᑎᑕᐅᓂᕐᒥᒃ ᑖᒃᓱᒧᖓ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ 2009−ᖑᑎᓪᓗᒍ ᓇᑦᓯᕐᓂᐊᕆᐊᖃᙱᑎᑕᐅᓂᖓ ᓂᐅᕐᕈᑎᒋᓂᐊᕐᓗᒍ ᐊᒻᒪᓗ ᒥᑦᓯᒋᓪᓗᓂᐅᒃ ᑲᓛᖡᑦ ᓄᓈᑕ 2013−ᖑᑎᓪᓗᒍ ᐱᕕᖃᖅᑎᑕᐅᒍᑎᖃᓂᒃ. ᑕᒪᓐᓇ ᒥᑭᔫᒐᓗᐊᖅᑎᓪᓗᒍ ᓵᓚᖃᕈᑕᐅᓂᖅ ᑕᒪᑐᒧᖓ ᐃᓄᓕᒫᓄᑦ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᑦ ᓇᑦᓯᕐᓂᐊᕆᐊᖃᙱᑎᑕᐅᓂᖓ ᐲᖅᑕᐅᒋᐊᓕᒃ. ᓱᓕ ᐃᖅᑲᓇᐃᔮᕆᔭᕆᐊᖃᓪᓚᕆᑉᐳᖅ ᑕᒪᑐᒧᖓ ᓴᐳᑎᓂᐊᕐᓗᒋᑦ ᐱᔪᓐᓇᐅᑎᒋᔭᐅᔪᑦ ᐃᓄᖕᓄᑦ ᐊᔪᐃᓐᓇᕐᓂᖃᕈᑕᐅᒧᑦ ᐊᑐᐊᒐᑦᓴᐃᑦ ᐊᕝᕕᐊᓗᑦᓯᐊᑎᕙᑦᑐᑦ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐊᒻᒪᓗ ᐱᖅᑯᓯᖓᓐᓄᑦ.
ᐅᖃᓕᒪᒍᑎᒋᓪᓗᓂᐅᒃ 2015−ᖑᑎᓪᓗᒍ ᐅᐊᓇᖅᐸᓯᒻᒥ ᑕᕆᐅᑉ ᐊᑭᐊᓂ ᐅᑭᐅᖅᑕᖅᑐᒥ ᑲᑎᒪᓂᕐᒥ ᕼᐅᐋᐃᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐃᒃᓯᕙᐅᑕᖓ, ᐅᑲᓕᖅ ᐃᔨᑦᓯᐊᖅ ᐅᖃᖅᑐᒥᓂᖅ, “ᐱᕕᖃᖅᑎᑦᓯᓂᖅ ᓴᖅᑭᑎᑦᓯᒐᔭᕐᒪᑦ ᕿᓯᓐᓂᒃ ᐊᑐᖅᓱᑎᒃ ᓴᓇᓂᕐᓂᒃ ᐊᙳᑕᕆᔭᒥᓂᐅᔪᓂᒃ ᐃᓄᖕᓄᑦ ᓄᓇᕗᒻᒥᐅᓄᑦ ᓂᐅᕐᕈᑕᐅᓂᐊᖅᑎᓪᓗᒋ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᓐᓄᑦ ᑭᓯᐊᓂᓕ ᑖᓐᓇ ᐱᕕᖃᖅᑎᑦᓯᓂᖅ ᐊᑯᓂᐅᔪᒥᒃ ᐊᖏᕈᑕᐅᒐᓱᐊᖅᓯᒪᕗᖅ ᑕᒪᓐᓇ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᓂᐅᕕᐊᑦᓴᖃᕐᓂᖓ ᓄᖑᓯᒪᓕᕐᒪᑦ ᐊᒃᓱᕈᐊᖃᓗᐊᖅᓯᒪᒐᑎᓪᓗ ᐃᓄᖕᓂᑦ ᐱᓕᕆᖃᑎᖃᕐᓂᕐᒥᒃ ᐱᕙᓪᓕᐊᑎᑦᓯᓗᑎᒃ ᓂᐅᕕᕐᕕᑦᓴᐅᒐᔭᖅᑐᓂᒃ ᓲᕐᓗ ᐊᐃᓴᒥ.”
“ᑖᒃᑯᐊ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᐅᖃᖃᑎᖃᖅᓯᒪᙱᓗᐊᖅᓯᒪᔪᑦ ᐃᓄᖕᓂᑦ ᑐᕋᐃᓐᓇᕐᕕᖃᕐᓗᑎᒃ ᐊᑦᑐᐃᓂᕐᓗᐸᓪᓕᐊᕐᓗᑎᒃ ᐱᖅᑯᓯᑦᑎᓐᓂᑦ ᑭᓇᐅᓂᑦᑎᓂᓪᓗ ᐃᓅᓪᓗᑕ. ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᓇᑦᑎᕋᓱᐊᕆᐊᖃᙱᑎᑕᐅᓂᖓᑦ ᐆᒪᔪᓄᑦ ᐱᔪᓐᓇᐅᑎᒋᔭᖅ ᓵᓚᑦᓯᕐᓂᐅᕗᖅ ᐃᓄᐃᑦ ᐱᔪᓐᓇᐅᑎᖏᑎᒍ ” ᓇᓗᓇᐃᖅᓯᔪᒥᓂᖅ ᑐᐊᐃᓐ ᓯᒥᔅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑲᓇᑕᒥ ᐊᖓᔪᖅᑳᖓᑦ. ᓯᒥᔅ ᓇᓗᓇᐃᖅᓯᔪᒥᓂᖅ ᐃᒫᒃ, “ᐃᓄᐃᑦ ᐃᓚᒋᔭᐅᑎᖃᑦᑕᕋᓱᐊᖅᓯᒪᔪᑦ ᐋᔩᖃᑎᒌᖕᓂᕐᓄᑦ ᑭᓯᐊᓂ ᖃᐅᔨᒋᐊᕐᕕᐅᖃᑦᑕᖅᓯᒪᙱᑐᓪᓘᓐᓃᑦ ᑐᑭᖏᑕ ᐱᔪᓐᓇᖅᑎᑕᐅᓂᐅᑉ ᒥᒃᓵᓄᑦ”.
2009−ᒥᓂᒃ, ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᓄᖅᑲᖅᑎᑦᓯᓯᒪᒻᒪᑕ ᓂᐅᕐᕈᑕᐅᕙᓐᓂᖏᓐᓂᒃ ᕿᓰᑦ ᓴᓇᓯᒪᔪᑦ ᑭᖑᓂᖓᓂ ᐊᔪᐃᓐᓇᖅᓱᑎᒃ ᑭᒃᑯᑐᐃᓐᓇᕐᓄᑦ ᐱᔾᔪᑎᓂᑦ ᐱᒋᐊᕈᑎᖃᓚᐅᖅᑎᓪᓗᒋᑦ ᐊᑭᕋᖅᑐᓂᕐᒥᓐᓂᒃ ᐱᔾᔪᑎᖃᖅᓱᑎᒃ ᑮᓇᐅᔭᓕᐅᕋᓱᐊᕈᑕᐅᓪᓗᑎᒃ ᓇᑦᓯᕋᓱᐊᖃᑦᑕᕐᓂᖅ ᐱᓪᓗᒍ ᐊᔾᔨᒌᖏᑦᑐᓄᑦ ᐊᕙᑎᓕᕆᓂᕐᒧ ᑲᑐᔾᔨᖃᑎᒌᑦᑐᓄᑦ. ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᓄᖅᑲᖓᑎᑦᓯᓂᖓᑦ ᐱᕕᖃᖅᑎᑦᓯᓯᒪᔪᖅ ᐱᔪᓐᓇᖅᑎᑕᐅᓂᕐᒥᒃ ᓂᐅᕐᕈᑎᖃᕐᓂᕐᒧᑦ ᐊᙳᑕᒥᓂᕐᓂᑦ ᐸᐃᑉᐹᖁᑎᓕᓐᓄᑦ ᐊᐅᓚᑕᐅᓪᓗᑎᒃ ᐃᓄᓐᓄᑦ ᑲᓇᑕᒥ ᐊᒻᒪᓗ ᑲᓛᖡᑦ ᓄᓈᓂᑦ. ᑕᒪᓐᓇ ᒧᒥᑎᑕᐅᓐᓂᕐᒪᑦ WTO−ᑯᑦ ᐅᓂᓪᓗᒍᑕᐅᔪᓂᑦ ᕿᒥᕐᕈᔨᖏᑕ ᑎᒥᖁᑎᖓ ᕿᒥᕐᕈᔨᖏᑦ ᖃᐅᔨᔪᒥᓃᑦ ᑖᓐᓇ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᓇᑦᓯᓂᐊᕐᓂᕐᒧᑦ ᓄᖅᑲᖓᑎᑕᐅᓂᖓ “ᐊᑐᕆᐊᖃᓪᓚᕆᖕᒪᑦ ᓴᐳᑎᔭᐅᖁᓪᓗᒋᑦ ᑭᒃᑯᑐᐃᓐᓇᐃᑦ ᐃᓃᓯᖃᐅᑎᖏᑦ ᑎᒥᒃᑯᑦ ᐲᖅᑕᐅᑉᐸᑦ. ᑖᒃᑯᐊ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᐱᕕᖃᖅᑎᑕᒥᓃᑦ ᐆᒃᑐᕝᕙᕈᕋᓱᐊᕐᓂᖓᓂ 2015 ᐋᖅᑭᒋᐊᕆᑯᓪᓗᒋᑦ ᐊᑐᐊᒐᒃᓴᓂᒃ ᒪᓕᒐᕐᓂᒃ ᐲᖅᑕᐅᖃᓯᐅᑎᔭᐅᒍᒪᓂᓕᒃ ᐱᕕᖃᖅᑎᑕᐅᓂᕐᒨᖓᓂᕋᖅᑕᐅᓗᑎᒃ ᐃᓄᐃᑦ ᕿᓰᑦ ᖃᐅᔨᒪᔭᖏᑦ ᑕᒪᓐᓇᓗ ᐋᖅᑭᒋᐊᖅᑕᒥᓂᐅᓪᓗᓂ ᐅᕙᓂ ᐅᓪᓗᒥ ᔪᓚᐃ 30, 2015 ᓄᓇᕗᑦ ᐱᓪᓗᒍ ᐊᒻᒪᓗ ᐄᑉᐳᖑᓕᖅᑎᓪᓗᒍ 2013 ᑲᓛᖡᑦ ᓄᓈᓂᒥᐅᓄᑦ.
ᑲᓛᖡᑦ ᓄᓈᓂᒥᐅᓄᑦ ᑐᖁᑦᓯᑦᓴᐅᑎᒋᔭᖅᑎᐅᓪᓗᑎᒃ ᓂᕐᔪᑎᓂᒃ ᐊᙳᑕᖃᖅᐸᑦᑐᑦ ᒥᑦᓴᐅᑦᑐᓂᒃ 150,000−ᓂᒃ ᓇᑦᑎᕐᓂᖅ ᓂᕿᒋᓂᐊᕐᓗᒍ ᓂᐅᕐᕈᑎᒋᓯᓂᐊᕐᓗᒋᓪᓗ ᕿᓰᑦ ᓂᐅᕐᕈᑎᖃᕐᕕᒋᕙᑦᑕᖓᑦ ᐊᐅᓚᓂᖃᑦᓯᐊᕋᔭᕈᓐᓃᓂᖅᐸᑦ ᐱᔪᑎᒋᔭᐅᓗᓂ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᓇᑦᓯᕐᓂᐊᖅᑎᑕᐅᑦᑕᓕᑎᑕᐅᓂᖓ. ᑭᓪᓕᓯᓂᐊᖅᑏᑦ ᖃᐅᔨᒪᔪᑦ ᐅᖃᖅᓯᒪᔪᖃᕐᒪᑦ ᑲᓛᖡᑦ ᓄᓈᓂ ᓇᑦᓰᑦ ᐊᒥᓲᓂᖏᑦ ᐊᑑᑎᖃᖅᑎᑕᐅᒍᓐᓇᖅᐳᑦ ᐃᒪᓐᓇᒨᖓᔪᓄᑦ 500.000ᐆᒪᔪᓄᑦ. ᔭᒫᓪ ᑖᓪ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑲᓛᖡᑦ ᓄᓈᓂ ᐊᖓᔪᖅᑳᖅ ᐅᖃᖅᑐᒥᓂᖅ, “ᐃᐅᕈᑉᒥᓕ ᓇᑦᓰᑦ ᓄᐊᑕᐅᑐᐃᓐᓇᐸᑦᑐᑦ ᐃᑯᐊᓪᓚᑦᑕᐅᓪᓗᑎᓪᓗ, ᓂᐅᕕᐅᑕᐅᓂᒥᓂᖏᑦ ᒥᖅᑯᖏᑦ ᑎᕆᐊᔭᐃᑦ ᐱᕈᐃᔭᐅᔪᑦ ᓴᐃᒍᓕᓐᓂ ᑕᒪᓐᓇ ᓂᐅᕐᕈᑕᐅᒍᑕᐅᔪᒻᒪᕆᒃ. ᓈᒻᒪᖏᒻᒪᑦ “ᐃᓅᓯᖃᐅᓯᕐᒧᑦ”. ᑲᓛᖡᑦ ᓄᓈᓂᒥᐅᑦ ᐅᐱᒋᕙᖃᓲᙳᕗᑦ ᐊᖑᓇᓱᐊᕈᓐᓇᓂᕐᒥᓐᓂᒃ ᓂᕆᔭᒃᓴᓃᓂᐊᕋᒥᒃ ᐃᓚᔭᒥᓐᓂᑦ ᓇᑦᓯᒥᓂᕐᓗ ᓂᕿᑦᓯᐊᕙᐅᓪᓗᓂ. ᐃᓱᒪᔪᖓᓕ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᑐᑭᓯᑦᓯᐊᕆᐊᖃᕐᒪᑕ ᐃᓄᖕᓂᑦ.”
ᔨᒥ ᓯᑖᑦᔅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐊᓛᔅᑲ ᐊᖓᔪᖅᑳᖓᑦ ᐅᖃᖅᑐᒥᓂᖅ , “ᐱᓕᕆᒋᐊᑦᓯᐊᕆᐊᑲᒃᑲᓐᓂᕋᑦᑕ ᓄᓇᕐᔪᐊᒥᐅᑦ ᑐᑭᓯᑎᑕᐅᖁᓪᓗᒋᑦ ᐃᓅᓇᓱᐊᕐᓂᐅᔪᑦ ᐊᒻᒪᓗ ᐃᖅᑲᒋᔭᖃᕐᓂᖏᑦ ᐃᓄᐃᑦ ᐆᒪᔪᓂᑦ ᖃᐅᑕᒫᑦ ᑕᑎᑐᐊᕆᕙᑦᑕᕗᑦ ᐱᔪᓐᓇᐅᑎᕗᓪᓗ ᓄᓇᖃᖅᑳᖅᓯᒪᔫᓪᓗᑕ. ᐃᓄᐃᑦ ᓂᕿᖓ ᓂᕿᕕᒋᔪᓐᓇᖅᑕᐃᓇᑦᓯᐊᑲᓴᖏᑦ ᓱᓇᑯᑦᓯᖏᑦ ᐊᐅᑦᓯᐊᕆᓐᓇᖅᑐᖅ, ᕙᐃᑕᒪᓐ − C, ᖄᓕᖅᓴᕋᐃᓐᓇᖏᑦᑐᑦ ᐊᒻᒪᓗ ᓂᕿᑐᖅᓯᒪᔭᕆᖃᕐᓂᖅ ᐱᓪᓗᒍ. ᑕᒪᒃᑯᐊ ᐊᙳᑕᐅᕙᑦᑐᑦ ᐃᓅᓯᕆᖃᓯᐅᑎᔭᕗᑦ ᐱᒻᒪᕆᐅᔪᑦ ᓄᓇᓕᑦᑎᓐᓄᑦ, ᐱᖅᑯᓯᖅᑎᓐᓄᑦ ᐊᒻᒪᓗ ᐃᓗᓯᑦᑎᓐᓄᑦ ᑮᓇᐅᔭᖅᑖᕈᑕᐅᕙᑦᑐᓪᓗ ᓂᐅᕕᖅᑕᐅᓂᖏᑎᒍᑦ ᕿᓰᑦ ᑮᓇᐅᔭᒥᒃ ᑎᒍᓯᔾᔪᑕᐅᕙᒻᒪᑕ ᐃᓄᐃᑦ ᓄᓇᖏᓐᓂ ᑮᓇᐅᔭᓕᐅᕈᑎᑦᓴᖓᙱᑦᑐᓄᑦ ᐊᓯᐊᒍᑦ.”
ᐅᓗᕆᐊᓇᖅᑐᒦᑎᑕᐅᓕᕐᓂᖓ ᓯᓚᒧᑦ ᐊᓯᔾᔨᖅᑐᒧᑦ, ᐊᑐᖅᑕᐅᕙᑦᑐᑐᖃᐅᓯᒪᔪᑦ ᑮᓇᐅᔭᓕᐅᕋᓱᐊᕈᑕᐅᓪᓗᑎᒃ ᐊᙳᑕᖃᖃᑦᑕᓃᑦ ᓄᓇᒦᓐᓂᕐᓗ ᐊᓯᔾᔨᖅᓯᒪᓕᕐᒪᑦ ᐊᑐᐃᓐᓂᖃᖅᑐᐃᓐᓇᐃᑦ ᓱᕐᕋᐃᑦᑑᔮᕆᐊᖃᕐᓂᖓᓂᒃ ᐅᑭᐅᖅᑕᖅᑐᒥ ᓂᕐᔪᑎᑦ ᐊᒥᓲᓂᖏᑎᒍᑦ ᐃᓄᐃᓪᓗ ᐱᓕᕆᖃᑎᖃᕐᓗᑎᒃ ᒐᕙᒪᐅᔪᓂᒃ ᐱᐅᖅᓱᐊᓂᕐᒨᖓᔪᓄᓪᓗ ᑎᒥᖁᑎᒋᔭᖑᔪᓂᒃ ᑲᑐᔾᔨᑦᓯᐊ ᕐᓗᑎᒃ ᑕᒪᒃᑯᐊ ᓱᕐᕋᐃᑦᑑᑦᓯᐊᕋᓗᐊᕐᒪᖔᑕ ᐃᓗᓯᖏᑦ ᓂᕐᔪᑏᑦ ᐅᓪᓗᒥ. ᑐᐊᐃᓐ ᓯᒥᔅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑲᓇᑕᒥ ᐊᖓᔪᖅᑳᖓ ᐅᖃᖅᑐᒥᓂᖅ, “ᐃᓄᐃᑦ ᐱᖅᑯᓯᕐᒥᓐᓂᒃ ᖃᐅᔨᒪᓂᖃᑦᓯᐊᕐᒪᑕ ᐃᓗᓯᖏᓐᓂᑦ ᐅᑭᐅᖅᑕᖅᑐᒥ ᓂᕐᔪᑎᒥᓐᓂᒃ ᖃᐅᔨᒪᓂᓖᑦ ᓂᕿᑐᐊᕕᑕᑦᑕᑎᓐᓂᑦ ᐊᓐᓇᐅᒪᔾᔪᑎᑦᑎᓐᓂᑦ. ᐃᓄᐃᑦ ᐊᐅᓚᑦᓯᖃᑦᑕᖅᓯᒪᔪᑦ ᑕᒪᒃᑯᓂᖓ ᐆᒪᔪᓂᑦ ᐊᕐᕌᒎᒐᓴᓐᓂᑦ, ᓯᓚᐅᑉ ᐊᓯᔾᔨᑕᕐᓂᖏᑦ ᒪᓕᑦᓱᒋᑦ ᐊᒻᒪᓗ ᓄᖑᔾᔫᒥᔭᕐᓂᖏᑎᒍᑦ ᒫᓐᓇᖃᕐᓂᐅᔪᕐᓗ ᐊᓯᔾᔨᖅᑐᓄᑦ ᐊᐅᓚᒐᑦᓴᐅᖏᑦᑐᓄᑦ ᓲᕐᓗ ᓯᓚᐅᑉ ᐊᓯᔾᔨᕐᓂᖓ ᒪᓕᑦᓱᒍ. ᐃᓄᐃᑦ ᓱᓕ ᑲᔪᓯᓂᐊᖅᑐᑦ ᖃᐅᔨᒪᓂᕐᒥᓐᓂᒃ ᐊᑐᕐᓗᑎᒃ ᐱᓕᕆᖃᑎᖃᕐᓗᑎᓪᓗ ᑭᓪᓕᓯᓂᐊᖅᑎᓂᑦ ᑕᒪᒃᑯᐊ ᓂᕐᔪᑏᑦ ᐃᓗᓯᖏᑦ ᓱᕐᕋᑦᑕᐅᖁᓇᒋᑦ. “ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐱᓕᕆᖃᑎᖃᕈᒪᔪᑦ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᓐᓂᒃ ᐱᕙᓪᓕᐊᑎᑦᓯᒍᒪᓪᓗᑎᒃ ᓂᐅᕕᐅᑎᖃᖃᑦᑕᓂᕐᒥᒃ ᑕᕝᕘᓇ ᐅᖓᑖᓄᓪᓗ ᑕᕆᐅᑉ ᐊᑭᐊᓂ ᑲᑐᔾᔨᖃᑎᒌᒃᑯᑦ ᐱᓇᓱᐊᕐᓂᖓᑕ ᕿᓰᑦ ᓴᓇᔭᐅᖃᑦᑕᕐᓂᖏᑎᒍᑦ ᐃᓘᓐᓇᐃᓃᖔᕐᓗᓂ ᐃᓄᐃᑦ ᓄᓇᖏᓐᓂᑦ ᐃᓕᑕᕆᔭᐅᓗᓂᓗ ᐋᓐᓇᐅᒪᓇᓱᐊᕐᓂᕐᒧᑦ ᐃᓅᓯᖃᓂᖓ ᐊᒻᒪᓗ ᓱᕐᕋᐃᑦᑐᓂᖓ ᐊᖑᓇᓱᐊᕈᓯᖓᑦ ᓄᓇᖃᖅᑳᖅᓯᒪᔪᓄᑦ ᐱᔪᓐᓇᐅᑦ,” ᓄᖅᑲᐅᓯᕈᑎᒋᓪᓗᒍ ᐅᖃᐅᓯᖓ ᐃᒃᓯᕙᐅᑕᐅᑉ, ᐅᑲᓕᖅ ᐃᔨᑦᓯᐊᑉ.