Aaggiisi 7, 2015 – ᕼuaai, Milialigait Nunangat – Inuit Ukiuqtaqtumiuqatigiit Katimajingit Kajungikkannirutigivaa Inuit anngutaqaqpattut natsirnik qisingit Nunavummi pijunnaqtitaugutaummat piviqaqtitaunirmik taassumunga Tariup Akiani Katujjiqatigiikkut 2009−ngutillugu natsirniariaqanngititauninga niurrutiginiarlugu ammalu mitsigilluniuk Kalaałiit Nunaata 2013−ngutillugu piviqaqtitaugutiqanik. Tamanna mikijuugaluaqtillugu saalaqarutauniq tamatumunga inulimaanut tariup akiani katujjiqatigiit natsirniariaqanngititauninga piiqtaugialik Suli iqqanaijaarijariaqallarippuq tamatumunga saputiniarlugit pijunnautigijaujut inungnut ajuinnarniqarutaumut atuagatsait avvialutsiativattut Inuit pijunnautinginnut ammalu piqqusingannut.
Uqalimagutigilluniuk 2015−ngutillugu Uanaqpasimmi Tariup Akiani Ukiuqtaqtumi Katimanirmi ᕼuaaimi Inuit Ukiuqtaqtumiuqatigiit Katimajingikkut Iksivautanga, Ukaliq Ijitsiaq uqaqtuminiq, “Piviqaqtitsiniq saqqititsigajarmat qisinnik atuqsutik sananirnik anngutarijaminiujunik inungnut Nunavummiunut niurrutauniaqtillugi Tariup Akiani Katujjiqatigiikkunnut kisianili taanna piviqaqtitsiniq akuniujumik angirutaugasuaqsimavuq tamanna tariup akiani katujjiqatigiikkut niuviatsaqarninga nungusimalirmat aksuruaqaluaqsimagatillu inungnit piliriqatiqarnirmik pivalliatitsilutik niuvirvitsaugajaqtunik suurlu Aisami.”
“Taakkua Tariup Akiani Katujjiqatigiikkut uqaqatiqaqsimanngiluaqsimajut inungnit turainnarviqarlutik attuinirlupalliarlutik piqqusittinnit kinaunittinillu inuulluta. Tariup Akiani Katujjiqatigiikkut Nattirasuariaqanngititauningat uumajunut pijunnautigijaq saalatsirniuvuq inuit pijunnautingitigu” nalunaiqsijuminiq Tuain Simis, Inuit Ukiuqtaqtumiuqatigiit Katimajingikkut Kanatami Angajuqqaangat Simis nalunaiqsijuminiq imaak, “Inuit ilagijautiqattarasuaqsimajut aajiiqatigiingnirnut kisiani qaujigiarviuqattaqsimanngitulluunniit tukingita pijunnaqtitauniup miksaanut”.
2009−minik, Tariup Akiani Katujjiqatigiikkut nuqqaqtitsisimammata niurrutauvanninginnik qisiit sanasimajut kinguningani ajuinnaqsutik kikkutuinnarnut pijjutinit pigiarutiqalauqtillugit akiraqtunirminnik pijjutiqaqsutik kiinaujaliurasuarutaullutik natsirasuaqattarniq pillugu ajjigiingittunut avatilirinirmu katujjiqatigiittunut. Tariup Akiani Katujjiqatigiikkut nuqqangatitsiningat piviqaqtitsisimajuq pijunnaqtitaunirmik niurrutiqarnirmut anngutaminirnit paippaaqutilinnut aulataullutik inunnut Kanatami ammalu Kalaałiit Nunaanit. Tamanna mumititaunnirmat WTO−kut Unillugutaujunit Qimirrujingita Timiqutinga Qimirrujingit Qaujijuminiit taanna Tariup Akiani Katujjiqatigiikkut Natsiniarnirmut nuqqangatitauninga “aturiaqallaringmat saputijauqullugit kikkutuinnait iniisiqautingit timikkut piiqtauppat. Taakkua Tariup Akiani Katujjiqatigiikkut piviqaqtitaminiit uuktuvvarurasuarningani 2015 aaqqigiarikullugit atuagaksanik maligarnik piiqtauqasiutijaugumanilik piviqaqtitaunirmuunganiraqtaulutik Inuit qisiit qaujimajangit tamannalu aaqqigiaqtaminiulluni uvani ullumi Julai 30, 2015 Nunavut pillugu ammalu Iippunguliqtillugu 2013 Kalaałiit Nunaanimiunut.
Kalaałiit Nunaanimiunut tuqutsitsautigijaqtiullutik nirjutinik anngutaqaqpattut mitsauttunik 150,000−nik natsirniq niqiginiarlugu niurrutigisiniarlugillu qisiit niurrutiqarvigivattangat aulaniqatsiarajarunniiniqpat pijutigijauluni Tariup Akiani Katujjiqatigiikkut natsirniaqtitauttalititauninga. Killisiniaqtiit Qaujimajut uqaqsimajuqarmat Kalaałiit Nunaani nattiit amisuuningit atuutiqaqtitaugunnaqput imannamuungajunut 500.000 uumajunut. Jamaal Taal, Inuit Ukiuqtaqtumiuqatigiit Katimajingikkut Kalaałiit Nunaani Angajuqqaaq uqaqtuminiq, “Iurupmili natsiit nuatautuinnapattut ikuallattaullutillu, niuviutauniminingit miqqungit tiriajait piruijaujut saigulinni tamanna niurrutaugutaujummarik. Naammangimmat “inuusiqausirmut”. Kalaałiit Nunaanimiut upigivaqasuunnguvut angunasuarunnanirminnik nirijaksaniiniaramik ilajaminnit natsiminirlu niqitsiavaulluni. Isumajungali Tariup Akiani Katujjiqatigiikkut tukisitsiariaqarmata Inungnit.”
Jimi Sitaats, Inuit Ukiuqtaqtumiuqatigiit Katimajingikkut Alaaska Angajuqqaangat uqaqtuminiq, “pilirigiatsiariakakkanniratta nunarjuamiut tukisititauqullugit inuunasuarniujut ammalu iqqagijaqarningit Inuit uumajunit qautamaat tatituarivattavut pijunnautivullu nunaqaqqaaqsimajuulluta Inuit niqinga niqivigijunnaqtainatsiakasangit sunakutsingit autsiarinnaqtuq, vaitaman − C, qaaliqsarainnangittut ammalu niqituqsimajariqarniq pillugu. Tamakkua anngutauvattut inuusiriqasiutijavut pimmariujut nunalittinnut, piqqusiqtinnut ammalu ilusittinnut kiinaujaqtaarutauvattullu niuviqtauningitigut qisiit kiinaujamik tigusijjutauvammata inuit nunanginni kiinaujaliurutitsanganngittunut asiagut.”
Ulurianaqtumiititaulirninga silamut asijjiqtumut, atuqtauvattutuqausimajut kiinaujaliurasuarutaullutik anngutaqaqattaniit nunamiinnirlu asijjiqsimalirmat atuinniqaqtuinnait surraittuujaariaqarninganik Ukiuqtaqtumi nirjutit amisuuningitigut inuillu piliriqatiqarlutik gavamaujunik piuqsuanirmuungajunullu timiqutigijangujunik katujjitsia rlutik tamakkua surraittuutsiaraluarmangaata ilusingit nirjutiit ullumi. Tuain Simis, Inuit Ukiuqtaqtumiuqatigiit Katimajingikkut Kanatami Angajuqqaanga uqaqtuminiq, “Inuit piqqusirminnik qaujimaniqatsiarmata ilusinginnit Ukiuqtaqtumi nirjutiminnik qaujimaniliit niqituavitattatinnit annaumajjutittinnit. Inuit aulatsiqattaqsimajut tamakkuninga uumajunit arraaguugasannit, silaup asijjitarningit malitsugit ammalu nungujjuumijarningitigut maannaqarniujurlu asijjiqtunut aulagatsaungittunut suurlu silaup asijjirninga malitsugu Inuit suli kajusiniaqtut qaujimanirminnik aturlutik piliriqatiqarlutillu killisiniaqtinit tamakkua nirjutiit ilusingit surrattauqunagit. “Inuit Ukiuqtaqtumiuqatigiit Katimajingikkut piliriqatiqarumajut Tariup Akiani Katujjiqatigiikkunnik pivalliatitsigumallutik niuviutiqaqattanirmik tavvuuna ungataanullu Tariup Akiani Katujjiqatigiikkut pinasuarningata qisiit sanajauqattarningitigut iluunnainiingaarluni inuit nunanginnit ilitarijaulunilu aannaumanasuarnirmut Inuusiqaninga ammalu surraittuninga angunasuarusingat nunaqaqqaaqsimajunut pijunnaut,” nuqqausirutigillugu uqausinga Iksivautaup, Ukaliq Ijitsiap.