ᐅᑐᐱᕆ 16, 2018 – ᐋᑐᐋ, ᑲᓇᑕ – ᐃᓄᐃᑦ ᐃᑲᔪᖅᑐᐃᒻᒪᑕ ᖃᐅᔨᔭᖏᓐᓂ ᒐᕙᒪᒃᑯᓐᓂᓐᖔᖅᑐᓂᑦ ᑲᑎᒪᔨᐅᔪᓂᒃ ᓯᓚ ᐊᓯᔾᔨᕐᓂᖓᓐᓄᑦ ᑲᑎᒪᔨᐅᔪᓂᒃ ᐅᓂᒃᑳᓕᐊᖑᓯᒪᔪᖅ ᑕᒪᐅᓇᑐᐃᓐᓇᖅ ᓯᓚᕐᔪᐊᖅ ᐅᖅᑰᓯᓕᕐᓂᖓᓐᓂ 1.5°C−ᒥ, ᑭᓯᐊᓂᓕ ᐅᖃᖅᑐᑦ ᑕᒪᓐᓇ ᑐᐊᕕᕐᓇᕐᓂᖓᓐᓂ ᐊᐃᕙᔾᔪᐅᔪᖅ ᒪᓕᒐᓕᐅᖅᑎᔾᔪᐊᕐᒥ ᐅᓐᓅᓚᐅᖅᑐᖅ ᓯᓚᕐᔪᐊᖅ ᐆᓇᖅᓯᕙᓪᓕᐊᓕᕐᓂᖓᓐᓂ, ᑖᒃᑯᐊ ᐅᓂᒃᑳᑦ, ᑲᓇᑕᐅᓪᓗ ᑲᒪᓂᖓᓐᓂ ᑭᖑᕙᖅᓯᒪᔪᕐᔪᐊᕌᓗᒃ ᐊᕐᕌᒍᒐᓵᓗᓐᓂᑦ ᑲᒪᒋᔭᐅᒋᐊᖃᖅᓯᒪᓕᖅᑐᖅ.
“ᐃᓄᐃᑦ ᐅᖃᐅᔾᔨᒋᐊᖃᑦᑕᖅᓯᒪᔫᒐᓗᐊᑦ ᓯᓚᕐᔪᐊᑉ ᐆᓇᖅᓯᕙᓪᓕᐊᓕᕐᓂᖓᓐᓂ ᓯᓚᕐᔪᐊᓄᑦ ᓄᓇᓕᓐᓄᑦ ᑕᐃᒪᓐᖓᓂᐊᓗᒃ ᓯᓚᕐᔪᐊᓕᕆᓂᕐᒥᑦ ᑲᑎᒪᕕᔾᔪᐊᕐᖓᑕ ᕆᐅ ᑏ ᔭᓂᐅᕈᒥ 1992−ᒥ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒦᖑᖃᑎᒌᑦ ᑲᑎᒪᔨᖏᑦ (ᑲᓇᑕ) ᐊᖏᔪᖅᑳᖓ ᒫᓂᑲ ᐃᐅᓪ-ᑲᓇᔪᖅ. “ᐃᖅᑲᐅᒪᔪᖓ ᐅᖃᐅᓯᐅᖏᓐᓇᖃᑦᑕᖅᐸᓚᐅᕐᖓᑦ ᖃᓄᖅ ᐅᑭᐅᖅᑕᖅᑐᖅ ᐊᔅᓱᕈᓕᕐᓂᖏᓄᑦ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᓰᐲᓰᒃᑯᓐᓂᒥᐅᑕᐅᓚᐅᖅᓯᒪᒐᒪ ᐅᑭᐅᓄᑦ 18−ᓄᑦ. ᒫᓐᓇᓕ ᑕᑯᔅᓴᓕᓪᓚᕆᓕᖅᑐᖅ ᒐᕙᒪᑐᖃᒃᑯᑦ − ᑲᑎᒪᔩᑦ ᐊᑭᓕᕇᑦᑐᑎᑦ ᐱᓕᕆᔨᖏᑦ − ᑖᓐᓇ ᐅᓂᒃᑳᖅ ᐱᓪᓚᕆᐊᓗᒃ ᑐᐊᕕᕐᓇᓕᖅᑐᓂᓗ ᓱᒋᐊᕆᐊᖃᓕᖅᑐᓪᓗ ᓄᖅᑲᑎᑦᑎᑲᓐᓂᕋᓱᐊᕐᓗᑎᑦ ᓯᓚᕐᔪᐊᑉ ᐅᖅᑰᓯᕙᓪᓕᐊᓂᖓᓐᓂ 1.5°C−ᒥ.”
ᒐᕙᒪᒃᑯᓐᓂᓐᖔᖅᑐᓂᑦ ᑲᑎᒪᔨᐅᔪᓂᒃ ᓯᓚ ᐊᓯᔾᔨᕐᓂᖓᓐᓄᑦ ᑲᑎᒪᔨᐅᔪᓂᒃᑯᑦ ᒪᐅᓇᑐᐃᓐᓇᖅ ᐅᓂᒃᑳᓕᐊᖓᓐᓂ ᓯᓚᕐᔪᐊᖅ ᐆᓇᖅᓯᕙᓪᓕᐊᓕᕐᓂᖓᓐᓂ 1.5°C ᓴᖅᑭᕆᐊᓐᖓᓚᐅᖅᓯᒪᔪᖅ ᐸᕇᔅᒥ ᓯᓚᓕᕆᑎᓪᓗᒋᑦ 2015−ᒥ. ᐊᖏᖅᑕᐅᓚᐅᖅᓯᒪᔪᖅ ᐅᑐᐱᕆᒥ 7−ᖓᓐᓂ ᓂᒋᐊᓂ ᑯᕇᔭᒥ. ᐊᓯᖏᓂᓪᓗ ᖃᐅᔨᓪᓗᑎᑦ “ᐅᑭᐅᖅᑕᖅᑐᒥ ᓄᓇᖃᖅᑖᖅᑐᒥᓃᓪᓗ” ᑎᑎᕋᖅᑕᐅᓯᒪᔪᑦ “ᐊᔾᔨᐅᖏᑦᑐᑦ ᐅᓗᕆᐊᓇᖅᑐᒦᑦᑐᑎᓪᓗ”. ᐊᒻᒪᓗ ᐅᓂᒃᑳᕐᒥ ᐅᖃᖅᓯᒪᒻᒥᔪᑦ ᐊᖏᓂᖅᓴᓂᑦ ᐃᒻᒥᒃᑰᖅᑐᓂᑦ ᐊᑦᑐᖅᑕᐅᓯᒪᔪᓂᒃ ᓯᓚᕐᔪᐊᒥ ᐆᓇᖅᓯᕙᓪᓕᐊᓕᕐᓂᖓᓐᓂ, ᐱᓗᐊᖅᑐᒥᑦ ᐊᕕᑦᑐᖅᓯᒪᔪᓂᒃ ᑲᓛᖡᑦ ᓄᓈᓂ ᐊᒻᒪᓗ ᐋᑦᓛᑦᑎᑲᒥ ᓯᑯᖏᓐᓂ.
“ᐅᑭᐅᖅᑕᖅᑐᒥ, ᓴᖅᑭᖅᓯᒪᓕᕇᖅᑐᑦ, ᐅᓂᒃᑳᑦ ᒪᓕᑦᑐᒋᑦ,” ᐅᖃᓚᐅᖅᑐᖅ ᒫᓂᑲ ᐃᐊᓪ−ᑲᓇᔪᖅ. “ᐱᓪᓚᕆᑦᑐᐊᓗᒃ ᐃᓱᒫᓗᓇᖅᑐᖅ ᐅᑭᐅᖅᑕᖅᑑᑉ ᓯᑯᖓ, ᐊᐅᑉᐸᓪᓕᐊᓕᖅᑐᑎᓪᓗ ᖁᐊᑦ ᓄᓇᐅᑉ ᐃᑭᐊᖓᓐᓃᖅᑐᑦ ᐊᒻᒪᓗ ᐳᔪᕐᓗᐊᓗᐃᑦ ᓱᕈᓐᓇᖅᑐᑦ ᐊᓯᖏᓪᓗ (methane) ᐃᒪᕕᑦᑎᓐᓅᖅᑲᖅᑐᑦ, ᓯᓚᕐᔪᐊᓪᓗ ᐆᓇᖅᓯᕙᓪᓕᐊᓪᓗᑎᑦ, ᓄᖅᑲᖅᑎᒍᓐᓇᕈᓐᓃᕋᑦᑎᒍ ᓱᕈᓐᓇᖅᑐᓂᑦ ᓴᖅᑮᑎᑦᑎᒍᓐᓃᕋᓗᐊᕈᑦᑕ. ᑕᒪᒃᑯᐊ ᖃᐅᔨᔭᐅᔪᑦ ᑲᒪᓇᓐᖏᒻᒪᕆᑦᑐᑦ ᐃᓄᓐᓄᑦ. ᑕᑯᓐᓇᖅᓯᒪᓕᕋᑦᑎᒍ ᑕᒪᒃᑯᐊ ᐊᓯᔾᔨᐸᓪᓕᐊᔪᑦ ᐊᕙᑎᑦᑎᓐᓂ ᐅᑭᐅᓂᑦ ᖁᓕᐅᓗᐊᖅᑐᓂᒃ, ᐊᒻᒪᓗ ᒐᕙᒪᒃᑯᓐᓂᓐᖔᖅᑐᓂᑦ ᑲᑎᒪᔨᐅᔪᓂᒃ ᓯᓚ ᐊᓯᔾᔨᕐᓂᖓᓐᓄᑦ ᑲᑎᒪᔨᐅᔪᓂᒃᑯᑦ ᒪᓕᑐᐃᓐᓇᖅᑐᑦ ᐃᓄᐃᑦ ᖃᐅᔨᒪᓂᖏᓐᓂ.”
ᐃᓄᐃᑦ ᐅᖃᕆᐊᒃᑲᓂᕐᓂᐊᖅᑐᑦ ᓴᓐᖓᑎᑦᑎᑲᓐᓂᕐᓗᑎᓪᓗ ᐅᖃᐅᓯᕆᔭᖏᓐᓂ ᐸᕇᔅᒥ ᓯᓚ ᐊᓯᔾᔨᐸᓪᓕᐊᓂᖓᓐᓂ ᐅᖃᐅᓯᖃᕐᓂᐊᖅᑎᓪᓗᒋᑦ, ᐱᓕᕆᖃᑎᖃᕐᓗᑎᑦ ᒐᕙᒪᒃᑯᓐᓂ ᑕᒪᓐᓇ ᓯᓚᕐᔪᐊᒥ ᐆᓇᖅᓯᕙᓪᓕᐊᔪᖅ ᐅᖓᑖᓅᖁᓇᒍ 1.5°C−ᒥᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᑲᑎᒪᓂᕐᔪᐊᖓᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓄᑦ ᑲᑎᒪᑎᑦᑎᓛᖅᑐᑦ ᑲᑐᐅᐃᔅᒥ, ᐴᓚᓐᒥ ᑎᓯᐱᕆᐅᓕᖅᑲᑦ 2018.
“ᑐᐊᕕᕐᓇᖅᑐᑕᖃᓕᕐᖓᑦ ᑕᐃᒎᓯᓪᓚᕆᖓᓪᓕ ᐊᐃᕙᓂᖅ ᐊᑐᖔᕆᐊᓕᒃ,” ᐅᖃᓚᐅᖅᑐᖅ ᒫᓂᑲ ᐃᐅᓪ-ᑲᓇᙵᖅ. “ᐃᓄᐃᑦ ᑕᑯᓐᓇᖅᓯᒪᓕᕐᖓᑕᓕ ᓯᓚᕐᔪᐊᖅ ᐊᖅᑐᖅᑕᐅᓯᒪᓕᖅᑎᓪᓗᒍ. ᐆᓇᖅᓯᕙᓪᓕᐊᓪᓗᓂ ᐅᑎᖅᑎᒐᔅᓴᐅᒍᓐᓃᖅᑐᑎᓪᓗ ᐊᑦᑐᖅᑕᐅᓂᖏᑦ ᐅᑭᐅᖅᑕᖅᑑᑉ ᓄᓇᓕᖏᓐᓂ.”