Utupiri 16, 2018 – Aatuaa, Kanata – Inuit ikajuqtuimmata qaujijanginni Gavamakkunninngaaqtunit Katimajiujunik Sila Asijjirningannut katimajiujunik unikkaaliangusimajuq tamaunatuinnaq Silarjuaq Uqquusilirninganni 1 5°C−mi, kisianili uqaqtut tamanna tuavirnarninganni Aivajjuujuq Maligaliuqtijjuarmi unnuulauqtuq silarjuaq uunaqsivallialirninganni, taakkua unikkaat, Kanataullu kamaninganni kinguvaqsimajurjuaraaluk arraagugasaalunnit kamagijaugiaqaqsimaliqtuq.
“Inuit uqaujjigiaqattaqsimajuugaluat silarjuap uunaqsivallialirninganni Silarjuanut Nunalinnut Taimannganialuk Silarjualirinirmit Katimavijjuarngata Riu Tii Janiurumi 1992−mi,” uqalauqtuq Inuit Ukiuqtaqtumiinguqatigiit Katimajingit (Kanata) Angijuqqaanga Maanika Iul-Kanajuq. “Iqqaumajunga uqausiunginnaqattaqpalaurngat qanuq Ukiuqtaqtuq assurulirninginut sila asijjipallianingannut Siipiisiikkunnimiutaulauqsimagama ukiunut 18−nut. Maannali takussalillariliqtuq gavamatuqakkut − katimajiit akiliriittutit pilirijingit − taanna unikkaaq pillarialuk tuavirnaliqtunilu sugiariaqaliqtullu nuqqatittikannirasuarlutit silarjuap uqquusivallianinganni 1. 5°C−mi. ”
Gavamakkunninngaaqtunit Katimajiujunik Sila Asijjirningannukkut maunatuinnaq unikkaalianganni Silarjuaq Uunaqsivallialirninganni 1. 5°C saqqirianngalauqsimajuq Pariismi Silaliritillugit 2015−mi Angiqtaulauqsimajuq Utupirimi 7−nganni nigiani Kuriijami. Asinginillu qaujillutit “Ukiuqtaqtumi Nunaqaqtaaqtuminiillu” titiraqtausimajut “ajjiungittut ulurianaqtumiittutillu”. Ammalu unikkaarmi uqaqsimammijut anginiqsanit immikkuuqtunit attuqtausimajunik silarjuami uunaqsivallialirninganni, piluaqtumit avittuqsimajunik kalaałiit nunaani ammalu Aatlaattikami sikunginni.
“Ukiuqtaqtumi, saqqiqsimaliriiqtut, unikkaat malittugit,” uqalauqtuq Maanika Ial−Kanajuq. “Pillarittualuk isumaalunaqtuq ukiuqtaqtuup sikunga, auppallialiqtutillu quat nunaup ikianganniiqtut ammalu pujurlualuit surunnaqtut asingillu (methane) imavittinnuuqqaqtut, silarjuallu uunaqsivalliallutit, nuqqaqtigunnarunniirattigu surunnaqtunit saqqiitittigunniiraluarutta. Tamakkua qaujijaujut kamananngimmarittut Inunnut. Takunnaqsimalirattigu tamakkua asijjipalliajut avatittinni ukiunit quliuluaqtunik, ammalu Gavamakkunninngaaqtunit Katimajiujunik Sila Asijjirningannukkut malituinnaqtut Inuit qaujimaninginni. ”
Inuit uqariakkanirniaqtut sanngatittikannirlutillu uqausirijanginni Pariismi Sila asijjipallianinganni uqausiqarniaqtillugit, piliriqatiqarlutit gavamakkunni tamanna Silarjuami uunaqsivalliajuq ungataanuuqunagu 1. 5°C−mit Silarjuami Katujjiqatigiit Katimanirjuanganni Sila Asijjipallianingannut Katimatittilaaqtut Katuuismi, Puulanmi Tisipiriuliqqat 2018.
“Tuavirnaqtutaqalirngat taiguusillaringalli aivaniq atungaarialik,” uqalauqtuq Maanika Iul-Kananngaq “Inuit takunnaqsimalirngatali silarjuaq aqtuqtausimaliqtillugu. Uunaqsivallialluni utiqtigassaugunniiqtutillu attuqtauningit Ukiuqtaqtuup nunalinginni.”