ᓯᑎᐱᕆ 25, 2019 – ᐋᑐᐋ, ᐊᓐᑎᐅᕆᔪ – ᒐᕙᒪᒃᑯᑦ ᑲᑎᒪᔨᖏᑦ ᓯᓚ ᐊᓯᔾᔨᐸᓪᓕᐊᓕᕐᓂᖏᑦ ᒪᐅᓇᑐᐃᓐᓇᖅ ᐅᓂᒃᑳᓕᐅᓚᐅᕐᓂᖏᑦ ᐃᒪᕕᒻᒥ ᓯᑯᕙᑦᑐᓂᓪᓗ ᐊᓯᔾᔨᐸᓪᓕᐊᓕᕐᓂᖓᓐᓂ ᓯᓚ ᓴᖅᑭᖅᑕᐅᖅᑲᐅᔪᖅ ᐅᓪᓗᒥ ᒫᓇᑯᒥ. ᐅᓂᒃᑳᖅ ᐅᖃᐅᓯᖃᖅᑐᖅ ᖃᓄᐃᒍᑕᓪᓚᕆᐊᓘᓕᖅᑐᓂ ᐅᑭᐅᖅᑕᖅᑐᒥ ᓄᖅᑲᖅᑎᒐᔅᓴᐅᒍᓐᓃᖅᑐᓂᓪᓗ ᐊᓯᔾᔨᐸᓪᓕᐊᓂᖓ ᐃᒪᕕᒃ ᓯᑯᓯᒪᔪᓪᓗ.
ᐃᓄᓕᒫᑦᑎᐊᑦ ᓯᓚᕐᔪᐊᓕᒫᒥ ᑕᑎᖃᖅᐸᒻᒪᑕ ᑕᕝᕙᓂᓪᓛᕆᒃ ᐊᖅᑯᑎᖃᕋᓗᐊᕐᓗᓂᓘᓐᓃᑦ ᐃᒪᕕᒻᒥ ᓯᑯᓯᒪᔪᓂᓪᓗ. ᓯᓚᕐᔪᐊᑉ ᐃᒪᕕᖓ ᑕᒫᓂ ᑕᖅᑭᓯᒪᑦᑎᒻᒪ 71%−ᒥᑦ ᓯᓚᕐᔪᐊᑉ ᖄᖓᓐᓂ ᑕᒪᓐᓇᓗ ᖄᖓ ᐃᒪᖃᖅᑐᓂ 97%−ᒥᑦ ᓯᓚᕐᔪᐊᑉ ᐃᒪᖓᓐᓂ. ᓯᑯᓯᒪᔪ ᒪᑯᐊ ᖁᐊᖑᔪᑦ ᓯᓚᕐᔪᐊᒥ ᐅᖃᐅᓯᓕᒃ. ᑕᒫᓂ 10%−ᖑᓪᓗᑎᑦ ᓯᓚᕐᔪᐊᑉ ᓄᓇᖓ ᓯᕐᒥᓖᓐᓇᐅᓪᓗᓂ ᐅᕝᕙᓘᓐᓃᑦ ᖁᐊᕐᓄᑦ ᑕᕐᕆᓯᒪᔪᖅ.
“ᑖᓐᓇ ᐅᓂᒃᑳᖅ ᓇᓗᓇᐃᖅᓯᓯᒪᔪᖅ ᐃᓄᐃᑦ ᐅᖃᐅᓯᕇᓐᓇᖅᑖᓗᐊᓂ ᐅᑭᐅᓄᑦ ᖁᓕᐅᓕᖅᑐᓄᑦ,” ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᖓ ᒫᓂᑲ ᐃᐅᓪ-ᑲᓇᔪᖅ. “ᑎᓴᐃᖅᐸᓪᓕᐊᓕᕐᖓᑦ ᐃᒪᕕᒃ ᓯᓚᕗᓪᓗ ᓯᑯᓪᓗ ᐊᐅᑉᐸᓪᓕᐊᓕᖅᑐᓂ, ᐃᒪᕐᓗ ᐃᑎᓕᖅᐸᓪᓕᐊᓪᓗᓂ, ᐅᓕᕕᔾᔪᐊᖃᑦᑕᓕᖅᑐᑎᑦ ᓯᔾᔭᒥ ᖃᓂᒋᔭᓖᑦ, ᓄᓇᓪᓗ ᐃᕐᕈᖅᑕᐅᕙᓪᓕᐊᓕᖅᑐᓂ ᓱᕋᐃᔭᓕᖅᑐᓂ ᓯᔾᔭᑦ ᐊᓯᐊᓄᑦ ᐊᐅᓪᓛᕆᐊᖃᖃᑦᑕᓕᖅᑐᑎᑦ ᐃᓪᓗᐊᓗᐃᑦ ᐃᓄᐃᓪᓗ.”
ᑕᒪᓐᓇ ᐱᒻᒪᕆᐊᓘᒻᒪᑦ ᓯᑯ ᐅᑭᐅᖅᑕᖅᑐᒥ ᓄᓇᖃᖅᑳᖅᑐᒥᓂᕐᓄᑦ, ᐊᒻᒪᓗ ᐃᒻᒥᒃᑯᑦ ᐊᐅᓚᒍᓐᓇᕐᓂᕗᑦ ᐅᑭᐅᖅᑕᖅᑐᒥ ᐃᒪᕕᖓᓐᓂ ᓯᑯᓯᒪᔪᓂᓪᓗ ᐊᔅᓱᕉᑕᐅᒃᑲᓐᓂᓕᓚᐅᕐᒥᔪᑦ ᒪᐅᓇᑐᐃᓐᓇᖅ ᐅᓂᒃᑳᓕᐊᖑᓯᒪᔪᒥ. ᓱᓕᒃᑲᓐᓂᖅ, ᐅᓂᒃᑳᖅ ᐅᖃᖅᓯᒪᑦᑎᐊᖅᑐᑦ ᓇᓗᓇᐃᔭᖅᓯᒪᑦᑎᐊᖅᑐᒋᑦ ᐃᒻᒥᒃᑰᕈᓐᓇᕐᓂᖏᑦ ᑕᒪᓐᓇ ᐱᔾᔪᑎᒋᒻᒪᔾᔪᒃ ᐃᓄᐃᑦ ᐊᑐᖃᑦᑕᖅᑕᖏᓐᓂ ᐊᔾᔨᐅᖏᑦᑐᓂᑦ ᐊᔅᓱᕉᑎᖃᕐᖓᑕ ᐊᑦᑐᖅᑕᐅᓪᓚᕆᑦᑐᑎᑦ ᐃᒪᕕᒻᒥ ᓯᑯᖃᑦᑕᖅᑐᓪᓗ ᐊᓯᔾᔨᑎᓪᓗᒋᑦ ᐱᐅᓐᖏᓕᒃᑲᓂᕐᖓᑕ ᓯᓚᒨᖓᓐᖏᑦᑐᓄᑦ ᐃᓅᓇᓱᐊᕐᓂᖏᓐᓄᓪᓗ ᓈᒻᒪᖏᒻᒪᑕ.
ᐅᓂᒃᑳᖅ ᐅᖃᐅᓯᖃᕐᒥᔪᖅ ᐃᓕᑦᑐᖅᓯᒪᓂᑦᑎᓐᓂ ᐊᕙᑎᑦᑎᓐᓂ ᐅᐊᑦᑎᐊᕈᕐᓂᓴᕐᓂᓪᓗ ᐊᖏᕐᕋᑎᓐᓂ ᓴᓐᖏᓂᕗᑦ ᑕᐃᒫᒃ ᑐᑭᓯᔭᐅᒋᐊᓕᒃ ᐃᓕᑦᑐᖃᑦᑕᕈᓐᓇᓂᑦᑎᓐᓂ ᐊᒻᒪᓗ ᐊᐅᓚᑦᑎᒍᓐᓇᓂᑦᑎᓐᓂ ᐊᐅᓚᑦᑎᔾᔪᑎᓂᑦ ᒪᓕᑦᑐᑕ. ᐅᐱᓐᓇᕋᓂ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐃᓕᓴᕆᔭᐅᓚᐅᕐᒥᔪᑦ ᐅᓂᒃᑳᕐᒥ ᐱᓕᕆᓂᖏᓐᓂ ᐱᑭᐊᓚᓱᕐᓱᐊᕐᒥᑦ ᑎᓕᔭᐅᔾᔪᑎᐅᓯᒪᔪᓂᒃ ᓲᕐᓗ ᐃᓄᐃᑦ ᖃᐅᔨᒪᓂᖏᓐᓂ ᐊᒻᒪᓗ ᐃᓄᐃᑦ ᐊᐅᓚᑦᑎᒍᓐᓇᕐᓂᖏᑦ ᑕᒪᒃᑯᓂᖓ ᓯᑯᓯᒪᔪᑦ ᐊᓯᔾᔨᐸᓪᓕᐊᓕᕐᓂᖏᓐᓂ ᐅᑭᐅᖅᑕᖅᑐᒥ ᐃᒪᖏᓐᓂ ᐊᐅᒃᑲᓐᓂᓕᕐᒥᓪᓗ.
ᐃᓚᖓᓐᓂ ᒪᐅᓇᑐᐃᓐᓇᖅ ᐅᓂᒃᑳᓕᐊᕆᓯᒪᔪᒥᑦ ᐅᑭᐅᖅᑕᖅᑐᒥ ᐅᖃᖅᓯᒪᒻᒥᔪᑦ ᐃᒪᐃᑦᑐᓂᑦ:
• ᐅᑭᐅᓂᑦ ᖁᓕᐅᓗᐊᓕᖅᑐᓂᑦ, ᓯᓚᕐᔪᐊᖅ ᐆᓇᖅᓯᕙᓪᓕᐊᓕᕐᖓᑦ ᒥᑭᓪᓕᕙᓪᓕᐊᓕᖅᑐᑎᑦ ᓯᑯᓯᒪᔪᑦ, ᓯᑯᓪᓗ ᓯᕐᒥᓖᓪᓗ ᒥᑭᓪᓕᕙᓪᓕᐊᓕᖅᑐᑎᑦ, ᐊᐱᓐᖏᓂᖅᓴᐅᕙᓕᖅᑐᓂ ᐅᑭᐅᖅᑕᖅᑐᒥᓪᓗ ᓯᑯᖓ ᓵᓐᓂᖅᓴᐅᕙᓕᖅᑐᓂ, ᓄᓇᐅᓪᓗ ᐃᑭᐊᖓ ᐊᐅᑉᐸᓪᓕᐊᓕᖅᑐᓂ.
• ᓯᑯᓯᒪᔪᑦ/ᖁᐊᖅᓯᒪᔪᖅ ᓄᓇ ᐊᓯᔾᔨᐸᓪᓕᐊᓂᖏᑦ ᐊᑦᑐᓂᖃᕐᖓᑕ ᓄᓇᒥᑦ ᐃᒪᕐᒥᓪᓗ ᑕᕆᐅᖑᓐᖏᑦᑐᓂᑦ ᓂᕐᔪᑎᓂᑦ ᐱᕈᖅᑐᓂᓪᓗ ᖁᑦᑎᑦᑐᒥ ᓇᓄᖅᑕᓕᓐᓂᑦ, ᓲᕐᓗ ᑕᑯᔅᓴᐅᓂᖓ ᓯᑯᓯᒪᖃᑦᑕᓚᐅᖅᓯᒪᔫᒐᓗᐊᖅ, ᐊᓯᔾᔨᖅᑐᑦ ᐊᐱᓯᒪᒍᓐᓃᖅᑐᖅ, ᓄᓇᐅᓪᓗ ᐃᑭᐊᖓ ᐊᐅᑉᐸᓪᓕᐊᓪᓗᓂ. ᑕᒪᒃᑯᐊ ᐊᓯᔾᔨᐸᓪᓕᐊᔪᑦ ᓯᓚᒥᑦᑕᐅ ᒪᓕᑦᑐᑎᑦ ᖃᓄᐃᓘᖃᑦᑕᕐᓂᖏᓐᓂ ᐊᓯᔾᔩᒻᒥᔪᖅ, ᐊᒥᓲᓂᖏᓐᓂᓪᓗ ᓂᕐᔪᑏᑦ ᐆᒪᔪᖅᑕᐅᕙᑦᑐᓪᓗ, ᐱᖅᑯᓯᖏᓐᓂᓪᓗ ᒪᑭᒪᔾᔪᑎᔅᓴᓂᓪᓗ ᐱᒻᒪᕆᐅᔪᓂᑦ ᐱᕈᖅᑐᓂᒃ ᓂᕐᔪᑎᓂᓪᓗ, ᒪᓕᒐᖏᓪᓗ ᐸᕝᕕᓴᑦᑕᐅᓪᓗᑎᑦ, ᒪᑭᒪᔾᔪᑎᔅᓴᐃᓪᓗ.
• ᐊᑦᑐᐃᓂᖃᖅᑐᑦ ᓯᓚᒨᖓᔪᓂᑦ ᐊᓱᔾᔨᖅᑐᑦ ᐃᒪᕕᒻᒥ ᐊᒻᒪᓗ ᐅᐊᖅᓯᒪᔪᑦ ᓯᑯᓯᒪᔪᑦ ᐊᔅᓱᕈᓇᖃᑦᑕᓕᖅᑐᑦ ᒫᓐᓇ ᒐᕙᒪᒃᑯᓐᓂ ᐱᕙᓪᓕᐊᑎᑦᑎᒐᓱᓐᓂᖏᓐᓂ ᐊᑐᓕᖅᑎᑦᑎᒐᓱᓐᓂᖏᓐᓂᓪᓗ ᐃᓕᑦᑐᕈᑎᔅᓴᓂᒃ ᓄᓇᓕᓐᓂ ᓯᓚᕐᔪᐊᒥᓗ, ᐊᒻᒪᓗ ᐃᓚᖏᓐᓂ ᐊᔭᐅᒃᑲᓐᓂᕋᔅᓴᐅᖏᑦᑎᐊᖅᑐᑦ ᐃᓱᓕᓐᓂᖏᓐᓄᑦ. ᐃᓄᐃᑦ ᐊᑦᑐᖅᑕᐅᓂᖅᐹᓪᓚᕇᑦ ᐅᓗᕆᐊᓇᕐᓂᖅᐹᒦᑦᑐᑦ ᑲᒪᒋᔭᐅᑦᑕᐅᑎᒋᔪᓐᓇᖏᓐᓂᖅᓴᐅᓪᓚᕆᑦᑐᑎᓪᓗ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᖅ ᐅᖃᓚᐅᕐᒥᔪᖅ ᐊᖏᔪᐊᓗᒻᒥᑦ ᐊᓯᔾᔨᕐᓂᖓ ᐃᓄᐃᑦ ᓄᓇᖓ ᐱᔾᔪᑎᖃᖅᑐᖅ ᓯᓚ ᐊᓯᔾᔨᕐᓂᖓᓐᓄᑦ. ᑕᕝᕙᑦᑕᐅᑎᒋ ᐊᖏᔪᓂᓪᓗ ᑲᒪᒋᔭᐅᑦᑕᐅᑎᒋᔭᕆᐊᖃᓕᖅᑐᖅ ᓯᓚᕐᔪᐊᒥ GHG ᐊᓂᕐᓂᑎᓐᓅᖃᑦᑕᖅᑐᓂᑦ. ᓯᓚᕐᔪᐊᒥ ᓯᕗᓕᖅᑎᐅᕙᑦᑐᑦ ᐱᒋᐊᕆᐊᖃᓪᓚᕆᓕᖅᑐᑦ ᓯᓚ ᐊᔾᔨᕐᓂᖓᓐᓄᑦ COP25 ᑲᑎᒪᓂᐅᓛᖅᑐᒥ ᓴᓐᑎᐊᒍᒥ, ᓯᓕ ᑎᓯᐱᕆᒥ.