ᓰᑏᑉᐱᕆ 10, 2019 – ᑲᖏᖅᖠᓂᖅ, ᓄᓇᕗᑦ – ᓄᑖᕐᓂᑦ ᒐᕙᒪᑐᖃᒃᑯᑦ ᐱᖁᔭᓕᐅᕈᒪᒻᒪᑕ ᐃᓄᓐᓄᑦ ᐊᓯᖏᓐᓄᓪᓗ ᓄᓇᖃᖅᑳᖅᑐᒥᓂᕐᓄᑦ ᓯᓚᕐᔪᐊᑉ ᐅᑭᐅᑦᑕᖅᑐᖓᓐᓄᑦ, ᑕᐃᒫᒃ ᐅᖃᓚᐅᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑲᖅ ᒫᓂᑲ ᐃᐅᓪ−ᑲᓇᔪᖅ.
“ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᐱᓕᕆᖃᑎᖃᓚᐅᖅᑐᖅ ᓯᓚᕐᔪᐊᒥ ᐱᓕᕆᔪᓂᒃ ᑲᓇᑕᒥ ᑕᒪᒃᑯᐊ ᐃᓱᒪᒋᔭᐅᔪᑦ ᓯᓚᔪᐊᒥ ᒐᕙᒪᒃᑯᓐᓄᑦ ᐅᑭᐅᖅᑕᖅᑐᒥ ᐱᖁᔭᓕᕆᖃᑦᑕᖅᑐᓄᓪᓗ ᐃᓄᐃᑦ ᐅᑉᐱᕆᔭᖏᓐᓂ ᐱᔪᓐᓇᐅᑎᑦᑎᓂᓪᓗ ᓇᒻᒥᓂᖅ ᐱᓇᓱᐊᕐᓂᑎᓐᓂ ᑎᑎᕋᖅᓯᒪᑦᑎᐊᖁᓪᓗᒋᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᑦᑕ ᓇᓗᓇᐃᖅᓯᔾᔪᑎᖏᓐᓂ ᑕᒪᑐᒥᖓ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ, ᑲᓇᑕᓗ ᐊᑎᓕᐅᖃᑕᐅᓯᒪᓪᓗᓂ,” ᐃᐅᓪ−ᑲᓇᔪᖅ ᐅᖃᓚᐅᖅᑐᖅ.
“ᑕᒪᓐᓇ ᐱᒻᒪᕆᐊᓘᒻᒪᑦ ᐱᒋᐊᖅᐸᓪᓕᐊᓗᓂ ᐱᕙᓪᓕᐊᓇᓱᐊᒃᑲᓐᓂᓕᕐᓗᑎᑦ ᐊᐃᑉᐸᖓᓐᓃᑦᑐᒥᑦ – ᐋᖅᑭᔅᓱᐃᓗᑎᑦ ᒪᓕᒐᔅᓴᓂᒃ ᖃᐅᔨᓴᕐᓂᒧᓪᓗ ᐸᕐᓇᐅᑎᐅᒐᔭᖅᑐᓂᒃ,” ᐅᖃᖅᑐᓂ. “ᖁᕕᐊᑦᑐᖅ ᓯᓚᕐᔪᐊᒥ ᐱᓕᕆᔪᑦ ᑲᓇᑕᒥ ᐱᖁᔭᓕᐅᕐᓂᕐᒥᑦ ᐱᕙᓪᓕᐊᓂᐊᓕᕐᖓᑦ. ᑕᒪᓐᓇ ᓄᑖᕐᒥᑦ ᐅᑭᐅᖅᑕᖅᑐᒥ ᐱᐅᔭᐅᓗᓂ ᑕᑯᔅᓴᐅᑎᑦᑎᔪᖅ ᓯᓚᕐᔪᐊᒧᑦ ᑲᓇᑕ ᓯᕗᒃᑲᖅᑕᐃᒍᓐᓇᕐᖓᑦ.”
ᓯᓚᕐᔪᐊᒥ ᐃᓱᒪᒋᔭᐅᔪᑦ ᑕᒪᑐᒥᖓ ᐊᖏᓂᖅᓴᒥ ᐱᖁᔭᓕᐅᕐᓗᑎᑦ ᐱᒻᒪᕆᐅᔪᓂᒃ ᐃᓚᖃᕐᓗᓂ ᐃᓄᐃᑦ ᓄᓇᖓᓐᓂ, ᐃᓄᐃᑦ ᐊᖏᕐᕋᖏᓐᓂ ᑲᓇᑕᒥ. ᑎᑎᕋᖅᑕᐅᓚᐅᖅᑐᑦ ᑭᒡᒐᖅᑐᐃᔨᖃᖅᑐᑎᑦ ᐃᓄᓕᒫᓐᓂᒃ ᐊᒻᒪᓗ ᑐᓐᖓᕕᓕᐅᖅᑐᑎᑦ ᐅᖃᐅᓯᖏᓐᓂ ᒪᓕᑦᑐᑎᑦ ᐊᑐᓕᖁᔭᐅᓪᓗᑎᑦ ᐱᖁᔭᕐᓂᑦ, ᓂᕆᐅᒋᔭᐅᓪᓗᓂ ᐱᕙᓪᓕᐊᓂᐊᕐᓂᖓᓐᓂ ᒐᕙᒪᑐᖃᒃᑯᑦ ᓂᕈᐊᖅᑎᑦᑎᓚᐅᖅᑎᓪᓗᒋᑦ. ᑲᓇᑕ ᑎᒍᓯᓂᖓ ᑎᒍᒥᐊᖅᑎᐅᓗᑎᑦ ᓄᓇᒥᑦ ᓯᕗᓕᖅᑎᐅᓪᓗᑎᓪᓗ ᐅᑭᐅᖅᑕᖅᑐᒥ ᐱᓕᕆᖃᑎᖃᖅᑐᓂ ᐱᒋᐊᖅᐸᓪᓕᐊᓚᐅᖅᓯᒪᔪᖅ ᐃᓄᓐᓂᑦ ᓇᓗᓇᕈᓐᓃᖅᑐᑎᓪᓗ ᐅᖃᐅᓯᐅᔪᑦ 2009−ᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᓯᓚᕐᔪᐊᑉ ᐅᑭᐅᖅᑕᖅᑐᒥ ᐃᓄᐃᑦ ᓇᓗᓇᐃᖅᑕᐅᓯᒪᓂᖏᑦ ᑎᒍᒥᐊᖅᑎᐅᓂᖏᓐᓂ ᐅᑭᐅᖅᑕᖅᑐᒥ.
“ᑲᓇᑕᒥ ᓯᓚᕐᔪᐊᒥ ᒪᑭᑕᓂᖓᓂ ᐱᔪᓐᓇᕐᓂᖏᓐᓂᓪᓗ ᐊᑦᑕᓇᐃᖅᓯᒪᒋᐊᖃᕐᓂᖓᓐᓄᑦ ᑎᒍᒥᐊᕐᓂᖓᓐᓂ ᐅᑭᐅᖅᑕᖅᑐᒥ ᒪᓕᑦᑐᖅ ᐊᑐᓕᖅᑎᑕᐅᔪᐃᓐᓇᐅᓂᖓᓐᓂ ᐋᖅᑭᓱᖅᑕᐅᓯᒪᔪᑦ ᐃᓄᓐᓄᑦ, ᐊᒻᒪᓗ ᓴᓐᖏᓂᖏᓐᓄᑦ ᐃᓅᓇᓱᐊᑦᑎᐊᕐᓂᖏᓐᓂᓐᓗ ᐃᓄᐃᑦ. ᐊᖏᓪᓕᑎᑦᑎᓗᑎᑦ ᐃᓅᓇᓱᐊᑦᑎᐊᕐᓂᒥᓪᓗ ᑲᓇᑕᒥ ᐅᑭᐅᖅᑕᖅᑑᑉ ᓄᓇᓕᖏᓐᓂ ᐃᑲᔫᑎᖃᓪᓚᕆᒃᑲᔭᖅᑐᑦ ᑲᓇᑕᒥ ᐊᒻᒪᓗ ᓯᓚᕐᔪᐊᑉ ᐃᓱᒪᒋᔭᖏᓐᓂ ᑲᓇᑕ ᐃᓗᐃᑦᑑᓂᖓᓐᓂ”, ᐅᖃᓚᐅᖅᑐᖅ ᐃᐅᓪ−ᑲᓇᔪᖅ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓇᑕᒥ ᐊᖏᔪᖅᑳᖅ ᐅᖃᓚᐅᖅᑐᖅ ᐱᓕᕆᔭᕆᐊᖃᕐᓂᖏᓐᓂ ᓯᓚᕐᔪᐊᒥ ᐃᓱᒪᒋᔭᐅᓂᖏᑦ ᑲᓇᑕᒥ ᐊᖏᓪᓕᕚᓪᓕᑎᑦᑎᑲᓐᓂᕋᔭᖅᑐᖅ ᐱᓕᕆᖃᑎᖃᑦᑎᐊᕐᓗᑎᑦ ᐊᓯᖏᓐᓂ ᐱᒋᐊᕈᑎᐅᔪᓂᒃ, ᐊᑐᓕᖅᑎᑕᐅᓗᑎᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᓇᓗᓇᐃᖅᓯᓯᒪᓂᖓᓐᓂ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ ᐃᓄᖏᓐᓂ, ᐊᒻᒪᓗ ᓯᕗᕙᖅᑎᑲᓐᓂᕐᓗᒋᑦ ᐱᔪᓐᓇᐅᑎᖏᑦ ᑕᒪᒃᑯᐊ ᓯᓚᕐᔪᐊᒥ ᖃᓄᐃᓕᖓᓂᖓᓂ.
“ᐱᓕᕆᖃᑎᖃᕈᒪᑦᑎᐊᕋᑦᑕ ᓯᓚᕐᔪᐊᒥ ᐱᓕᕆᔨᓂᒃ ᑲᓇᑕᒥ ᐊᓯᖏᓐᓂᓪᓗ ᒐᕙᒪᐅᔪᓂᒃ ᐊᑐᑎᓕᖅᑎᓪᓗᒋᑦ ᓯᓚᕐᔪᐊᒥ ᑲᒪᒋᔭᐅᓂᐊᕐᓂᕋᖅᓯᒪᔭᑦ,” ᐃᐅᓪ−ᑲᓇᔪᖅ ᐅᖃᖅᑐᓂᓗ. ᐃᓚᖏᑦ ᓇᓗᓇᐃᖅᓯᒪᔪᑦ ᐱᓕᕆᐊᖑᓂᐊᕐᓂᕋᖅᓯᒪᔪᑦ 2019−ᒥ ᒐᕙᒪᑐᖃᒃᑯᑦ ᑮᓇᐅᔭᖅᑐᕈᑎᔅᓴᖏᑦ ᐱᖃᓯᐅᔾᔨᓪᓗᑎᑦ “ᐊᖏᓂᖅᓴᓂᑦ ᐊᑐᐃᓐᓇᐅᑎᑦᑎᓗᑎᑦ, ᑐᑭᒧᐊᑦᑎᑦᑎᓗᑎᑦ ᑮᓇᐅᔭᓂᓪᓗ ᓴᓂᕐᕙᐃᓗᑎᑦ ᐊᖏᓪᓕᕙᓪᓕᐊᖏᓐᓇᖁᓪᓗᒋᑦ” ᐃᓄᐃᑦ ᐊᓯᖏᓪᓗ ᐅᑭᐅᖅᑕᖅᑐᒥ ᓄᓇᖃᖅᑳᖅᑐᒥᓂᕐᓄᑦ ᐱᓕᕆᐊᖑᔪᔅᓴᑦ ᐱᓯᐅᕚᓪᓕᑎᑎᓇᓱᐊᕐᓂᕐᒧᑦ ᐅᑭᐅᖅᑕᖅᑐᒥ ᑲᑎᒪᔨᖏᑦᑕ ᐱᓕᕆᐊᖏᓐᓂ.
ᐊᓯᖏᓐᓂᑦᑕᐅ ᐱᓕᕆᓂᐊᕐᓂᕋᖅᓯᒪᔪᑦ ᓯᓚᕐᔪᐊᒥ ᑕᑯᓐᓇᖅᑕᖏᓐᓂ ᐅᑯᐊᖑᓪᓗᑎᑦ ᐃᓚᖏᑦ:
• ᐃᑲᔪᖅᑐᐃᓗᑎᑦ ᐱᐅᓯᕚᓪᓕᑎᑦᑎᓗᑎᓪᓗ ᑭᒡᒐᖅᑐᖅᑕᐅᓂᖏᓐᓂ ᐅᑭᐅᖅᑕᖅᑐᒥ ᐅᑭᐅᖅᑕᖅᑐᒥᓗ ᓄᓇᖃᖅᑳᖅᑐᒦᑦ ᓈᒻᒪᔾᔫᒥᔪᓂᒃ ᓯᓚᕐᔪᐊᒥ ᑲᑎᒪᑎᑦᑎᖃᑦᑕᕐᓂᖏᑦ, ᑎᒍᒥᐊᖅᑎᐅᖃᑕᐅᔪᓪᓗ ᖃᓄᐃᓘᖅᑎᑦᑎᓂᖏᓐᓂ, ᐊᖏᕈᑏᓪᓗ ᐊᐃᕙᔾᔪᑕᐅᓗᑎᑦ;
• ᐱᓕᕆᖃᑎᖃᒃᑲᓂᕐᓂᖅᓴᐅᓗᑎᑦ ᓯᓚᕐᔪᐊᒥ ᐅᑭᐅᖅᑕᖅᑐᒧᑦ ᐱᖁᔭᕐᓂᑦ ᐱᒋᐊᕐᖓᕐᓂᖓᓂ ᐊᒻᒪᓗ ᐱᐅᓯᕙᓪᓕᐊᖏᓐᓇᕐᓗᑎᑦ ᓄᓇᖃᖅᑳᖅᑐᒥᓂᕐᓂᑦ ᐱᓕᕆᖃᑎᖃᕐᓂᖏᓐᓂ ᐊᓯᖏᓐᓂᓪᓗ;
• ᓄᓇᖃᖅᑳᖅᑐᒥᓃᑦ ᓄᓇᓕᖏᑦ ᐃᓕᑦᑐᖅᓯᒪᒐᓗᐊᕐᒪᖔᑕ ᖃᐅᔨᓴᕐᓗᒋᑦ ᐃᓅᑦᑎᐊᕐᒪᖔᑕᓗ, ᐊᓯᖏᓐᓂᓪᓗ ᓄᖑᑎᒃᑲᓂᕐᓗᒋᑦ ᑳᓐᓂᐅᔪᑦ, ᐃᒻᒥᓃᖃᑦᑕᖅᑐᑦ, ᐃᓕᓐᓂᐊᖅᓯᒪᑦᑎᐊᓐᖏᓗᐊᖅᑐᖅ ᓴᓐᖏᔫᑎᒃᑲᓐᓂᕋᓱᐊᕐᓗᒋᑦ ᓄᓇᖃᖅᑳᖅᑐᒥᓃᑦ ᐱᖅᑯᓯᖏᑎᒍᑦ ᐊᒻᒪᓗ ᐃᓚᖏᑎᒍᑦ ᐊᑦᑐᐊᑦᑎᐊᖃᑎᖃᕐᓗᑎᑦ ᓯᓚᕐᔪᐊᒥ ᑭᓪᓕᖏᓐᓂ, ᐃᓚᐃᓐᓇᖏᑦ ᐅᖃᐅᓯᕆᓗᒋᑦ; ᐊᒻᒪᓗ
• ᐃᑲᔪᖅᑐᕐᓗᒋᑦ ᓄᓇᖃᖅᑳᖅᑐᒥᓃᑦ ᓯᓚᕐᔪᐊᒥ ᐱᒋᐊᕈᑎᒋᔭᖏᓐᓂ ᓯᓚ ᐊᓯᔾᔨᐸᓪᓕᐊᓂᖓᓐᓂ ᐃᓗᐊᓂ ᒪᓕᓪᓗᑎᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᑦᑕ ᐱᓕᕆᓂᖏᓐᓂ ᑲᑎᒪᕕᔾᔪᐊᖃᑦᑕᖅᑐᑦ ᓯᓚ ᐊᓯᔾᔨᐸᓪᓕᐊᓂᖓᓐᓄ ᑐᑭᖃᕐᔫᒥᔪᒥᓪᓗ ᐱᖃᑕᐅᑎᑦᑎᐊᕐᓗᒋᑦ ᓄᓇᖃᖅᑳᖅᑐᒥᓃᑦ ᐃᓅᓱᑦᑐᑦ.
ᑕᒪᓐᓇ ᐅᖃᐅᓯᖃᕐᒥᔪᖅ ᑕᒪᑐᒥᖓ ᐱᑕᖃᒃᑲᓐᓂᕆᐊᖃᕐᓂᖓᓐᓂ ᐅᑭᐅᖅᑕᖅᑐᒥ ᖃᐅᔨᓴᕐᓂᕐᒥᑦ ᐃᓕᓴᕆᔭᐅᓗᑎᓪᓗ ᐱᒻᒪᕆᐅᓂᖏᓐᓂ ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᓐᓂ ᐊᑐᐊᖅᓯᔾᔪᑕᐅᓗᑎᑦ ᐃᓱᒪᓕᐅᕐᓂᐊᖅᑎᓪᓗᒋᑦ.