ᔮᓐᓄᐊᓕ 22, 2013 – ᔨᓂᕙ, ᓱᕕᑦᓱᓚᓐ / ᐋᑐᐋ, ᐋᓐᑎᐅᕆᔪ, ᑲᓇᑕ – ᐱᓇᓱᐊᕈᓯᓕᒫᒥᒃ ᐋᔩᖃᑎᒌᖕᓂᖅᑕᖃᓚᐅᖅᑎᓪᓗᒍ ᐊᑯᓂᖁᓪᓗᑎᒃ ᐅᓐᓄᒐᓚᓐᓂᒃ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᖃᑕᐅᔪᑦ ᖁᕕᐊᒋᔭᖃᖅᑐᒥᓃᑦ ᐊᑐᓕᖅᑎᑕᐅᓂᖓᓂᒃ ᓄᓇᕐᔪᐊᒥ ᓴᕕᒃᓴᖅ ᐱᓪᓗᒍ ᐊᖏᖃᑎᒌᒍᑦ, ᖃᐅᔨᒪᔭᐅᔪᖅ ‘ᒥᓇᒥᑕ ᐊᖏᖃᑎᒌᒍᑦ ᓴᕕᒃᓴᖅ ᐱᓪᓗᒍ ᑕᓪᓕᒪᖓᓂᑦ ᒐᕙᒪᐅᖃᑎᒌᑦᑐᑦ ᐋᔩᖃᑎᒌᓐᓂᕐᒧᑦ ᑲᑎᒪᔨᕋᓛᑦ ᑖᒃᑯᓄᖓ ᑲᑐᔾᔨᖃᑎᒌᑦᑐᑦ ᓄᓇᕐᔪᐊᕐᒥᐅᖃᑎᒌᑦ ᐊᕙᑎᓕᕆᓂᕐᒧᑦ ᐱᓕᕆᐊᖅ ᓯᕙᑖᕐᕕᐅᑎᓪᓗᒍ, ᔮᓐᓄᐊᓕ 19−ᖑᑎᓪᓗᒍ 2013, 7−ᒥ ᐅᓪᓛᒃᑯᑦ ᔨᓂᕙᒥ, ᓱᕕᑦᓱᓚᓐ.
ᑖᓐᓇ ᐊᖏᖃᑎᒌᒍᑦ ᐃᓗᓕᓕᒃ ᑲᑎᒪᐅᖅᑐᓂᒃ ᒪᓕᒐᖅᑎᒍᑦ ᐱᔪᓐᓇᖅᑎᑕᐅᓂᕐᒥᒃ ᐊᒻᒪᓗ ᐊᐅᓚᑕᐅᔪᓂᒃ ᑕᒪᓐᓇᓗ ᒪᓕᒐᙳᖅᑎᑕᐅᒐᓱᐊᕐᓂᐊᖅᑐᖅ ᓴᕕᒃᓴᖅ ᐱᓪᓗᒍ (ᐱᖃᓯᐅᑎᓗᒋᑦ ᓴᕕᒃᓴᖅ ᓄᓇᒦᑦᑐᖅ ᓱᐱᖃᑦᑕᕐᓂᖓ ᓯᓚᒧᑦ ᐊᒻᒪᓗ ᐃᒪᕐᒨᐸᓐᓂᖓ ᓄᓇᒧᓪᓗ, ᐅᔭᕋᕐᓂᐊᕕᓐᓂ ᒥᑭᓈᖅᑐᓂᑦ−ᒎᓗᓯᐅᕐᓂᕐᒧᑦ, ᓴᕕᒃᓴᓖᑦ−ᐃᓗᓕᖏᑦ ᐊᑐᖅᑕᐅᕙᑦᑐᑦ ᐊᒻᒪᓗ ᓴᓇᔭᐅᖃᑦᑕᕐᓂᖏᑦ ᓴᕕᒃᓴᒥᒃ ᐊᑐᖅᑐᓄᑦ), ᑕᐅᖅᓰᒍᑎᖃᕐᓂᖅ ᓴᕕᒃᓴᒥᒃ, ᓯᕐᓗᐊᖃᖅᑎᑕᐅᓂᖅ, ᐃᓗᓯᕐᒨᖓᔪᑦ, ᐊᒻᒪᓗ ᐊᔾᔨᒌᖏᑦᑐᑦ ᐃᓱᒫᓘᑕᐅᔪᑦ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑭᒡᒐᖅᑐᖅᑕᐅᓗᑎᒃ ᑕᒪᒃᑮᓐᓄᑦ ᖃᐅᔨᓴᖅᑎᐅᓂᕐᒧᑦ ᐊᒻᒪᓗ ᐃᓚᒋᔭᐅᓪᓗᓂ ᑲᓇᑕᒥ ᑲᑎᒪᔭᖅᑐᖅᓯᒪᔪᓄᑦ, ᖃᐅᔨᒪᒋᐊᑦᓯᐊᕐᓂᐊᕐᒪᑕ ᐃᓄᐃᑦ ᐃᓱᒫᓘᑎᖏᑦ ᓴᕕᒃᓴᖅ ᓱᕈᕐᓇᕐᓂᖓ ᐅᖃᐅᓯᐅᒐᓗᐊᕐᒪᖔᖅ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐃᖅᑲᓇᐃᔭᖃᑎᖃᕐᓂᕐᒥᔪᑦ ᐊᓯᖏᓐᓂᑦ ᓄᓇᖃᖅᑳᖅᓯᒪᔪᓂᒃ ᑲᑐᔾᔨᖃᑎᒌᓂᒃ ᑲᑎᒪᔭᖅᑐᖅᓯᒪᖃᑕᐅᔪᓂᒃ ᑲᑐᔾᔨᓗᑎᒃ ᐱᕈᖅᐸᓪᓕᐊᑎᓪᓗᒍ ᑖᓐᓇ “ᓄᓇᕐᔪᐊᒥ ᓄᓇᖃᖅᑳᖅᓯᒪᔪᓄᑦ ᑲᑐᔾᔨᖃᑎᒌᑦ”, ᐊᐃᕙᒍᑎᖃᖅᑐᒥᓂᐅᓪᓗᑎᒃ ᑕᕝᕙᐅᓂᖏᓐᓂᒃ ᐊᒻᒪᓗ ᐃᓕᑕᕆᔭᐅᓗᑎᒃ ᓄᓇᖃᖅᑳᖅᓯᒪᔪᑦ ᐊᖏᖃᑎᒌᒍᑎᒥ ᑎᑎᕋᖅᓯᒪᔪᒥ. ᓄᓇᖃᖅᑳᖅᓯᒪᔪᑦ ᐃᓄᐃᑦ ᐊᑦᑐᖅᑕᐅᓂᐅᓴᓂᖅᓴᐅᒻᒪᑕ ᐃᓗᓯᖏᑦ ᓴᕕᒃᓴᒧᑦ ᐱᔾᔪᑎᒋᓪᓗᒍ ᐆᒪᔪᓂᒃ ᓂᕿᖃᓲᙳᒻᒪᑕ ᐃᖃᓗᖕᓂᒃ ᐊᒻᒪᓗ/ᐅᕝᕙᓘᓐᓃᑦ ᐳᐃᔨᓂᒃ ᓂᕿᑐᖅᑐᓂᒃ ᓴᕕᒃᓴᖃᑐᐃᓐᓇᕆᐊᓕᖕᓂᒃ.
ᑲᓇᑕ, ᓇᐹᓪ ᐊᒻᒪᓗ ᐃᐅᕈᐱᔭᖕᑯᑦ ᑲᑐᔾᔨᖃᑎᒌᖏᑦ ᐃᐅᕈᐱᔭᖕᑯᑦ ᑲᑐᔾᔨᖃᑎᒌᖏᒃᑯᑦ ᑐᓂᓯᔪᒥᓃᑦ ᑎᑎᕋᖅᓯᒪᔪᒥᒃ ᐃᓚᓕᐅᔾᔭᐅᓯᒪᖁᓪᓗᒍ ᐱᒋᐊᕈᑕᐅᔪᒥ ᑎᑎᕋᖅᓯᒪᔪᒥ ᐊᖏᖃᑎᒌᒍᑎᒥ ᓇᓗᓇᐃᖅᓯᓯᒪᔪᒥᒃ ᓄᓇᖃᖅᑳᖅᓯᒪᔪᑦ ᐃᓱᒫᓘᑎᖏᓐᓂᑦ ᐊᒻᒪᓗ ᑲᓇᑕᒥ ᐊᒻᒪᓗ ᐃᐅᕈᐱᔭᖕᑯᑦ ᑲᑐᔾᔨᖃᑎᒌᖏᑕ ᐃᐅᕈᐱᔭᖕᑯᑦ ᑲᑐᔾᔨᖃᑎᒌᖏᒃᑯᑦ ᑐᒃᓯᕋᐅᑎᖓᓂ ᓇᓗᓇᐃᖅᓯᒍᑕᐅᒃᑲᓂᖅᑐᒥᒃ ᐊᑦᑐᓂᕐᓗᑦᑕᐅᓂᐅᓴᓂᖓᓄᑦ ᐅᑭᐅᖅᑕᖅᑐᖅ. ᑭᓯᐊᓂᓕ, ᑲᓇᑕᐅᑉ ᑎᑎᕋᖅᓯᒪᔪᖁᑎᖓ ᐊᑦᑐᓂᕐᓗᑦᑕᐅᓂᐅᓴᓂᖓᓄᑦ ᐅᑭᐅᖅᑕᖅᑐᖅ “ᓄᓇᖃᖅᑳᖅᓯᒪᔪᑦ ᐃᓄᐃᑦ”ᑐᑦ ᓄᓇᓕᐅᖃᑎᒌᑦ ᐊᖏᕈᑎᖓᓂᒃ ᐱᔪᓐᓇᐅᑎᖃᕐᓂᖏᓐᓄᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ, ᐊᑐᓕᖅᑎᑕᒥᓂᖅ 2007−ᖑᑎᓪᓗᒍ), ᑖᓐᓇ ᐃᐅᕈᐱᔭᖕᑯᑦ ᑲᑐᔾᔨᖃᑎᒌᖏᑦ ᐃᐅᕈᐱᔭᖕᑯᑦ ᑲᑐᔾᔨᖃᑎᒌᖏᑦ ᐃᑲᔪᖅᑐᐃᒍᓐᓇᓂᙱᒻᒪᑦ ᐅᖃᐅᓯᕐᒥᒃ.
ᐃᐅᕈᐱᔭᖕᑯᑦ ᑲᑐᔾᔨᖃᑎᒌᖏᑕ ᑭᒡᒐᑐᖅᑎᖏᑦ ᑲᑎᒪᔭᖅᑐᖅᓯᒪᔪᑦ ᐅᐃᕖᒃᑯᑦ ᓄᓇᖓᓐᓃᙶᖅᓯᒪᔪᑦ ᐊᒻᒪᓗ ᔫᓇᐃᑎᑦ ᑭᖕᑕᒻᒥᒃ ᓇᓗᓇᐃᖅᑐᒥᓃᑦ ᓄᓇᓕᖕᒥᓐᓂ ᒪᓕᒐᖏᑦ ᐊᑎᓕᐅᕈᓐᓇᙱᔾᔪᑎᒋᒋᐊᖏᑦ ᒪᓕᒐᖅᑎᒍᑦ−ᓇᕿᔾᔪᓯᖅᓯᒪᔪᒥᒃ ᐊᖏᖃᑎᒌᒍᑎᒥᒃ ᐱᖃᓯᐅᔾᔨᓯᒪᔪᒦᑦᑐᖅ ᑎᑎᕋᖅᓯᒪᔪᓂ ᐃᓕᑕᖅᓯᓯᒪᔪᓂᒃ ᐆᒥᖓ “ᓄᓇᖃᖅᑳᖅᓯᒪᔪᑦ ᐃᓄᐃᑦ”, ᐃᑲᔪᖅᑐᐃᑐᐃᓐᓇᕋᑎᒃ ᐅᖃᐅᓯᕐᒥᒃ ᓇᓗᓇᐃᖅᑕᐅᓯᒪᔪᒥ “ᓄᓇᖃᖅᑳᖅᓯᒪᔪᑦ ᓄᓇᓕᖏᑦ”. ᑕᒪᓐᓇ ᑕᐃᒪᐃᓕᖓᔪᖅ ᑖᒃᑯᐊ ᑕᒪᒃᑮᒃ ᐅᐃᕕᒃᑯᑦ ᐊᒻᒪᓗ ᔫᓇᐃᑎᑦ ᑭᖕᑕᒻ ᐱᔪᓐᓇᑎᑦᓯᒐᓗᐊᖅᑎᑎᓪᓗᒋᑦ ᑲᑐᔾᔨᖃᑎᒌᑦᑐᑦ ᓄᓇᓖᑦ ᐊᖏᕈᑎᒋᓯᒪᔭᖓᓂᒃ ᐱᔪᓐᓇᐅᑎᖏᓐᓄᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ.
ᐱᒋᐊᕈᑎ ᑲᔪᓯᑎᑕᐅᑎᓪᓗᒍ ᐋᔩᖃᑎᒌ`ᓂᖅᑕᖃᖅᑎᓪᓗᒍ, ᐳᓕᕕᐊᒦᙶᖅᓯᒪᔪᒥᒃ ᓇᓗᓇᐃᖅᓯᔪᖃᖅᑐᒥᓂᖅ ᑎᑎᕋᖅᑕᐅᓯᒪᓂᐊᖅᑐᒥ ᑐᑭᖓ ᐊᒻᒪᓗ ᐅᖃᐅᓯᖅᑕᖓ “ᐃᓄᐃᑦ” ᓄᓇᕐᔪᐊᓕᒫᒥ ᓈᒻᒪᒋᔭᐅᔪᖅ, ᐊᒻᒪᓗ ᐃᓱᒫᓗᓐᓇᓂᖅᓴᐅᒐᔭᕐᓂᖓᓂᒃ ᐊᑐᖅᑕᐅᑉᐸᑦ ᑕᐃᔭᐅᓂᖓ “ᓄᓇᓖᑦ” ᐅᓇᐅᖏᖔᖅᑎᓪᓗᒍ “ᐃᓄᐃᑦ” ᑖᓐᓇ ᐊᑐᖅᑕᐅᒍᓐᓇᓂᖅᓴᐅᒐᔭᕐᒪᑦ ᓯᕗᓂᒃᓴᒥ ᓄᓇᕐᔪᐊᒥ ᐊᖏᖃᑎᒌᒍᑎᓕᐅᖅᑐᖃᓕᕋᐃᑉᐸᑦ.
“ᐊᐃᕙᐅᑎᒋᕙᓚᐅᖅᓱᒍ ᐊᕐᕌᒍᑦ ᐊᕙᑎᑦ ᐅᖓᑖᓄᑦ ᓄᓇᕐᔪᐊᒥ ᑎᒥᖃᕐᓂᕐᒧᑦ ᐱᔪᓐᓇᐅᑎᖃᕐᓂᖅ, ᑖᓐᓇ ᐅᒡᒍᓇᓪᓚᕆᑦᑐᖅ” ᐅᖃᖅᑐᒥᓂᖅ ᑐᐊᐃᓐ ᓯᒥᔅ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑕ ᑲᓇᑕᒥ ᐊᖓᔪᖅᑳᖓ. “ᑭᓯᐊᓂ ᑲᔪᙱᖅᓴᖅᑕᐅᕗᒍᑦ ᐃᓕᑕᕆᔭᐅᓯᒪᒍᓐᓴᕐᒪᑦ ᐃᒪᓐᓇ ‘ᓄᓇᖃᖅᑳᖅᓯᒪᔪᑦ ᐃᓄᐃᑦ’ ᐋᔩᖃᑎᒌᖕᓂᖅᑕᖃᖅᑎᓪᓗᒍ ᑲᓇᑕᒦᙶᖅᑐᓂᒃ, ᒥᐊᓕᒐᐃᑦ ᓄᓇᖓᓐᓂᒃ ᐊᒻᒪᓗ ᐊᒥᓱᓂᒃ ᐊᓯᖏᓐᓂᒃ ᓄᓇᓕᕐᔪᐊᖑᔪᓂᒃ, ᐱᖃᓯᐅᑎᑦᓱᒋᑦ ᓄᓇᓕᕐᔪᐊᑦ ᐃᐅᕈᐱᔭᖕᑯᑦ ᑲᑐᔾᔨᖃᑎᒌᖏᓐᓂ. ᓂᕆᐅᒍᑎᒋᒍᒥᓇᖅᑐᖅ ᐅᐃᕖᒃᑯᑦ ᓄᓇᓕᔾᔪᐊᖓ ᕗᕌᓐᔅ ᐊᒻᒪᓗ ᔫᓇᐃᑎᑦ ᑭᖕᑕᒻ ᑖᒃᓱᒧᖓ ᑲᔪᖏᖅᓴᖅᑕᐅᓂᐊᖅᐳᑦ ᐃᓕᑕᖅᓯᒍᓐᓇᓂᐊᕐᒪᑕ ᓄᓇᖃᖅᑳᖅᓯᒪᔪᓂᑦ ᐃᓄᖕᓂᑦ ᓯᕗᓂᒃᓴᒥ ᒪᓕᒐᖅᑎᒍᑦ−ᓇᕿᔾᔪᓯᖅᓯᒪᔪᒥᒃ ᓄᓇᕐᔪᐊᒥ ᐊᖏᖃᑎᒌᒍᑎᓕᐅᖅᑐᖃᓕᕐᒥᑉᐸᑦ.”
ᐊᑕᖏᖅᑎᓪᓗ, ᓴᕕᒃᓴᖅ ᐱᓪᓗᒍ ᐊᖏᖃᑎᒌᒍᑦ ᓂᕆᐅᒋᔭᐅᕗᖅ ᒥᑭᓪᓕᕚᓪᓕᑎᑦᓯᒍᑕᐅᓂᐊᕐᓂᖓᓂᒃ ᓴᕕᒃᓴᒥᒃ ᐊᕙᑎᑦᑎᓐᓂ ᓄᓇᕐᔪᐊᒥ, ᑭᓯᐊᓂᓕ ᐊᒥᓱᑦ ᐊᕐᕌᒍᐃᑦ ᑳᖏᕐᓂᐊᖅᐳ ᓯᕗᓪᓕᖅᐹᑦ ᐊᑐᐊᒐᓕᐊᑦ ᐊᑐᓕᖅᑎᑕᐅᒃᓴᖓᑕ. “ᐊᖏᖃᑎᒌᒍᑦ ᐊᑐᖅᑎᑦᓯᒍᒫᕐᓂᐊᖅᐳᑦ ᒥᑭᓪᓕᕚᓪᓕᑎᑦᓯᓂᕐᒥᒃ ᓯᓚᒧᑦ ᓯᐊᒻᒪᐸᑦᑐᒥᒃ ᑕᓪᓕᒪᓂᒃ ᑎᑭᓪᓗᒍ ᖁᓕᑦ ᐊᕐᕌᒍᑦ ᑭᖑᓂᖓᓂ ᓴᕕᒃᓴᖅ ᐱᓪᓗᒍ ᐊᖏᖃᑎᒌᒍᑦ ᐊᑐᓕᖅᑎᑕᐅᓯᒪᓕᖅᑎᓪᓗᒍ – ᐃᒻᒪᖄ ᑭᓯᐊᓂ 2020−ᒥᒃᓵᓂ ᓄᑖᓄᑦ ᐊᐅᒫᓗᖅᑐᖅᑐᓄᑦ−ᐆᒻᒪᖅᑯᑎᓄᑦ, ᐅᕝᕙᓘᓐᓃᑦ ᒥᑦᓯᑎᓐᓂ ᐊᕐᕌᒎ 2025 ᐊᐅᓚᓂᖃᖅᑐᓄᑦ ᐆᒻᒪᖅᑯᑎᖃᕐᕖᑦ, ᓲᕐᓗ ᐅᓇ ᐊᑕᐅᓯᖅ ᐆᑦᑑᑎᒋᓗᒍ,” ᓇᓗᓇᐃᔭᐃᔪᒥᓂᖅ ᐸᕐᓄᓇ ᐃᒋᑎ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᓐᓂ ᑲᓛᖡᑦ ᓄᓈᓂ. “ᑕᒪᓐᓇ ᑐᑭᓕᒃ ᐊᒥᓱᒐᓚᐃᑦ ᕼᐋᓐᓇᒪᖏᓐᓃᑦᑐᑦ ᐆᒻᒪᖅᑯᑎᖃᕐᕖᑦ ᓴᓇᔭᐅᒍᓐᓇᕐᓂᖏᓐᓂᒃ ᐱᑕᖃᖅᑎᓐᓇᒍ ᐊᑐᐊᒐᒃᓴᖅ ᓴᕕᒃᓴᒥᒃ−ᒥᑭᓪᓕᕚᓪᓕᑎᑦᓯᓂᕐᒧᑦ ᓴᓇᕐᕈᑎᑎᒍᑦ ᐊᑐᖅᑕᐅᒍᓐᓇᖅᑐᑎᒍᑦ ᖃᐅᔨᒪᔭᐅᔪᓄᑦ ᐊᒥᓱᓄᑦ ᐊᕐᕌᒍᓄᑦ ᐊᒡᒋᖅᑐᓄᑦ. ᐃᒻᒪᖄ ᐊᕐᕌᒍᑦ ᖁᓕᑦ ᐊᓂᒍᖅᐸᑦᑐᑦ ᓱᓕ ᐊᓂᒍᒃᑲᓐᓂᖅᓯᒪᓕᖅᑎᓪᓗᒋᑦ ᑕᒪᒃᑯᐊ ᐊᑐᐊᖅᑕᐅᖁᔭᕗᑦ ᒥᑭᓪᓕᕚᓪᓕᑎᑦᓯᒍᓐᓇᖅᑐᑦ ᓴᕕᒃᓴᒥᒃ ᐊᕙᑎᑦᑎᓐᓂ ᒪᓕᓪᓗᒋᑦ ᐱᓂᐊᕐᓂᖃᕈᑕᐅᔪᑦ ᑕᒪᑐᒧᖓ ᓴᕕᒃᓴᖅ ᐱᓪᓗᒍ ᐊᖏᖃᑎᒌᒍᑦ.”
ᑕᐃᒪᐃᒃᑲᓗᐊᖅᑎᓪᓗᒍ, ᑕᒪᓐᓇ ᓱᓕᔪᖅ ᐅᖓᑖᓃᑦᑐᑦ 140 ᓄᓇᓕᕐᔪᐊᑦ ᐊᖏᖃᑎᒌᒍᓐᓇᖅᑐᒥᓂᐅᒻᒪᑕ ᐊᑐᐊᒐᒃᓴᐃᑦ ᒥᒃᓵᓐᓄᑦ ᒥᑭᓪᓕᕚᓪᓕᖅᑎᒍᒪᓪᓗᒍ ᓴᕕᒃᓴᖅ ᐊᕙᑎᒨᖅᑲᖅᑐᖅ ᐃᓱᒪᒋᔭᐅᒋᐊᖃᕐᒪᑦ ᐊᑑᑎᖃᕐᓂᖓᓂᒃ ᑲᔪᓯᑎᑦᓯᒍᑕᐅᓗᓂ. “ᓂᕆᐅᒍᑎᒋᕙᕗᑦ ᓄᓇᓕᕐᔪᐊᑦ ᓄᓇᕐᔪᐊᒧᑦ ᐊᑑᑎᓕᓐᓂᒃ ᐊᑐᐊᒐᓕᐅᕐᓂᐊᕐᓂᖏᓐᓂᒃ ᒥᑭᓪᓕᕚᓪᓕᖁᓪᓗᒍ ᓴᕕᒃᓴᐅᑉ ᓯᐊᒻᒪᖃᑦᑕᕐᓂᖓ ᓴᕕᒃᓴᖅ ᐱᓪᓗᒍ ᐊᖏᖃᑎᒌᒍᑦ ᐊᑐᓕᕐᓂᐅᓴᖏᒃᑲᓗᐊᖅᑎᓪᓗᒍ ᒫᓐᓇᒪᒃᑯᑦ.” ᑐᐊᐃᓐ ᓯᒥᔅ ᐅᖃᖅᑐᒥᓂᖅ. “ᐊᒥᓱᒐᓚᐃᑦ ᐃᓄᐃᑦ ᓄᓇᓕᖏᑦ ᒫᓐᓇᐅᔪᒥ ᐊᑐᕐᓂᕐᒧᑦ ᐅᖃᐅᔾᔨᒋᐊᖅᑎᓖᑦ ᐅᖃᐅᔾᔨᒋᐊᖅᐸᑦᑐᑦ ᖁᕝᕙᓯᓗᐊᖅᑐᒦᓐᓂᖓ ᐱᓪᓗᒍ ᓴᕕᒃᓴᖃᕐᓂᖅ ᐃᓚᖏᓐᓂ ᓂᕿᓂ ᒥᑭᒐᖅᑐᖅᑕᐅᕙᑦᑐᓂ, ᑕᒪᓐᓇᓗ ᓴᕕᒃᓴᖃᕐᓂᖅ ᓂᕿᑦᑎᓐᓂ ᑕᐃᒪᐃᑉᐸᑦᑐᖅ ᓄᓇᕐᔪᐊᒥ ᓴᕕᒃᓴᖅ ᓯᐊᒻᒪᖃᑦᑕᕐᓂᖓᒍᑦ, ᓲᕐᓗ ᐊᐅᒫᓗᑦᑐᖅᑐᓄᑦ−ᐆᒻᒪᖅᑯᑎᖃᕐᕕᖕᓄᑦ ᐊᐃᓴᒥ. ᐊᑐᕐᓂᕐᒧᑦ ᐅᖃᐅᔾᔨᒋᐊᖅᑎᖃᕐᓂᖅ ᓈᒻᒪᖏᒻᒪᑦ ᓄᖅᑲᑎᑦᓯᒍᑕᐅᒐᓱᐊᕐᓗᓂ ᐃᓗᓯᕐᒧᑦ ᐊᑦᑐᐃᓂᕐᓗᑦᑐᓄᑦ ᓴᕕᒃᓴᒦᖔᖅᑐᒥᒃ ᐊᐃᓴᒥᑦ. ᐊᕙᑎᕗᑦ ᓱᕐᕋᐃᑦᑑᒋᖏᐊᖃᕐᒪᑦ ᖃᓄᐃᖏᑦᓯᐊᕈᒪᒍᑦᑕ ᑎᒥᑦᑎᓂ ᐃᓗᓯᑦᑎᓐᓂ.”
ᑖᓐᓇ ᒥᓇᒥᑕ ᐊᖏᖃᑎᒌᖑᑦ ᓴᕕᒃᓴᖅ ᐱᓪᓗᒍ ᒪᑐᐃᖓᓂᐊᖅᑐᖅ ᐊᑎᓕᐅᕈᓐᓇᓂᕐᒧᑦ ᒥᓂᔅᑕᐃᑦ ᑲᑎᒪᓕᖅᐸᑕ ᔮᐸᓃᓯᒃᑯᑦ ᓄᓇᖓᓂ ᐅᑐᐱᕆᐅᓕᖅᐸᑦ ᑕᕝᕙᓂ ᐊᕐᕌᒍᑦᑎᓐᓂ.