ᑎᓯᐱᕆ 9, 2015 – ᐱᐅᕆᔅ, ᕗᕌᓐᔅ – ᓂᐱᒋᔭᐅᔪᑦ ᓄᓇᕐᔪᐊᒥ ᓂᒡᓚᓱᓐᓂᖅᐹᒥᐅᑕᓄᑦ ᐊᒻᒪᓗ ᓄᓇᖃᖅᑐᓄᑦ ᑭᐊᖃᕐᓂᖅᐹᓂᒥᐅᑕᓄᑦ ᐅᖃᐅᓯᐅᔪᒥᓃᑦ ᐊᑕᐅᓯᐅᖃᑎᒌᕝᕕᐅᓪᓗᑎᒃ ᐅᓪᓗᒥ ᑎᓕᐅᕆᔪᑦ ᐊᔪᐃᓐᓇᕈᑕᐅᖁᓪᓗᒍ ᐳᔪᕐᓘᑉ ᓯᐊᒻᒪᐸᓪᓕᐊᕕᖏᑦ ᒥᑭᓪᓕᕚᓪᓕᑎᑦᓯᒐᔭᖅᑐᑦ ᓄᓇᕐᔪᐊᒥ ᓯᓚᓐᓂᐅᑎᑎᒍᑦ ᐅᕝᕙᕆᐊᕐᓗᓂ 1.5−ᒧᑦ ᓯᓚᓐᓂᐅᑎᑎᒍᑦ. ᑐᒃᓯᕌᖑᔪᖅ ᐅᖃᐅᓯᐅᓪᓗᓂ ᓄᓇᖃᖅᑳᖅᓯᒪᔪᓂᒃ ᑭᒡᒐᖅᑐᐃᔪᓄᑦ ᐃᓄᐃᑦ ᐅᑭᐅᖅᑲᑕᖅᑐᒥᐅᖃᑎᒌᓄᑦ ᑲᑎᒪᔨᓂ, ᓵᒥᒥ ᑲᑎᒪᔨᓂ, ᑕᕆᐅᑉ ᐊᑭᐊᓂ ᐊᒻᒪᓗ ᒐᕙᒪᒃᑯᖏᓐᓂᒃ ᓯᐊᓯᐅᓪᓚᔅ ᑐᓴᖅᑎᑦᓯᒍᑕᐅᓚᐅᖅᑎᓪᓗᒍ ᑎᑎᕋᖅᑕᐅᒋᐊᕐᖓᑕᐅᓯᒪᔫ ᑭᖑᓪᓕᖅᐹᑉ ᐋᔩᖃᑎᒌᒍᑎᖃᖅᑐᒥᓃᑦ ᐱᓪᓗᒋᑦ ᑎᑎᕋᖅᓯᒪᔪᖅ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ ᐊᔩᖃᑎᒌᒍᑕᐅᕙᓪᓕᐊᑎᓪᓗᒋᑦ ᐱᐅᕆᔅᒥ.
“ᑕᑯᕙᓪᓕᐊᑐᐃᓐᓇᕋᑦᑕ ᐊᔾᔨᒌᓐᓂᖃᐅᖅᑐᓂᒃ ᓯᓚᒧᑦ ᐊᑦᑐᓂᕐᓗᐃᒍᑕᐅᔪᓂᒃ ᐅᑭᐅᖅᑕᖅᑐᒥ ᓯᓚᓐᓂᐅᑎᑎᒍᑦ 1.5 ᓂᒡᓚᓱᓐᓂᖅ ᑐᖓᐅᑦᓯᒻᒪᑦ ᓈᒻᒪᑦᑐᒥᒃ,” ᐅᖃᖅᑐᒥᓂᖅ ᐅᑲᓕᖅ ᐃᔨᑦᓯᐊᖅ, ᐃᒃᓯᕙᐅᑕᖓᑦ ᐃᓄᐃᑦ ᐅᑭᐅᖅᑲᑕᖅᑐᒥᐅᖃᑎᒌᑦ ᑲᑎᒪᔨᖏᑕ, ᑭᒡᒐᖅᑐᐃᔪᑦ ᐅᑯᓂᖓ ᐃᓄᖕᓂᑦ ᑲᓇᑕᒥ, ᑲᓛᖡᑦ ᓄᓈᓂ, ᓱᑯᑦᑲ (ᕋᓴ) ᐊᒻᒪᓗ ᐊᓛᔅᓴ. “ᐅᑭᐅᖅᑕᖅᑐᖅ ᓂᕈᒥᑦᓯᕙᓪᓕᐊᑐᐃᓐᓇᕐᒪᑦ ᒪᕐᕈᐊᖅᑎᓗᐊᖅᑐᒥᒃ ᓱᑲᓐᓂᓕᒻᒥᒃ ᓄᓇᕐᔪᐊᒥ ᓂᕈᒥᑦᓯᕙᓪᓕᐊᔪᓂ, ᒪᕐᕉᓐᓂᒃ ᓯᓚᓐᓂᐅᑎᑎᒍᑦ ᑭᓪᓕᖃᖅᑎᑦᓯᓂᖅ ᐅᖃᖃᑎᒌᒍᑕᐅᕗᖅ ᑕᕝᕙᓂ ᐱᐅᕆᔅᓯ ᐊᑦᑐᐃᓂᕐᓗᓂᐊᖅᑐᖅ ᐅᓗᕆᐊᓇᖅᑐᑎᒍᑦ ᐊᒻᒪᓗ ᐅᑎᖅᑎᒍᓐᓇᐃᓪᓕᓗᒋᑦ ᓱᕐᕋᐃᑦᑑᕕᖓᓄᑦ ᐅᑭᐅᖅᑕᖅᑑᑉ ᓄᓇᓕᖁᑎᖏᓐᓂ.”
“ᐅᑭᐅᖅᑕᖅᑐᒥᐅᑕᐃᑦ ᕿᑭᖅᑕᒥᐅᑕᐃᓪᓗ ᐊᔾᔨᒌᒐᓚᓐᓂᒃ ᐃᓅᓯᖃᕐᒪᑕ,” ᐅᖃᖅᑐᒥᓂᖅᕌᓐᓂ ᔪᒥᐅ, ᓯᐊᓯᐅᓪᓚᔅ ᑲᑎᒪᓕᐅᖃᑎ ᓯᓚᐅᑉ ᐊᓯᔾᔨᐸᓪᓕᐊᓂᖓ ᐱᓪᓗᒍ ᐊᒻᒪᓗ ᓄᓇᓕᓪᓚᑐᒥᐅᑦ ᐱᕙᓪᓕᐊᓂᖏᑎᒍᑦ ᐃᓱᒫᓘᑕᐅᔪᓄᑦ. “ᓯᕗᓪᓕᖅᐸᐅᒐᑦᑕ ᓯᓚᐅᑉ ᐊᓯᔾᔨᕐᓂᖓᓄᑦ ᐊᑦᑐᖅᑕᐅᓂᕐᒧᑦ. ᑭᓪᓕᓯᓂᐊᕐᓂᒃᑯᑦ ᓇᓗᓇᕈᓐᓃᖅᑎᑕᐅᓯᒪᓂᖓ 2−ᒥᒃ ᓯᓚᓐᓂᐅᑎᑎᒍ ᑭᓪᓕᖃᕐᕕᐅᒋᐊᖃᕐᒪᑦ ᓯᓚᐅᑉ ᐊᓯᔾᔨᕐᓂᖓ ᐊᑦᑐᐃᓗᐊᒃᑲᓐᓂᖏᓐᓂᖓᓂ. ᐊᒡᓛᓘᓐᓃᑦ 1.5 ᓯᓚᓐᓂᐅᑎᑎᒍ ᖁᕝᕙᓯᓗᐊᒻᒪᕆᒻᒪᑦ ᑭᓯᐊᓂ ᐱᕕᖃᕐᕕᒋᓂᐊᕋᑦᑎᒍ ᑕᒪᑐᒧᖓᓕᖓᔪᓕᕆᒍᓐᓇᖅᓯᖁᓪᓗᑕ ᐃᓕᑦᑐᓂᒃᑯᑦ.
“ᑎᓕᐅᖅᐸᕗᑦ ᓄᓇᓕᔾᔪᐊᒥᐅᑕᐃᑦ ᑕᒫᓃᑦᑐᑦ ᐱᐅᕆᔅᒥ ᒐᕙᒪᓕᕆᓂᕐᒥᑎᒍᑦ ᑐᓂᓯᒪᓂᖃᖁᓪᓗᒋᑦ ᑕᒪᑐᒧᖓ ᐱᓕᕆᐊᖑᒍᒪᔪᒧᑦ,” ᐅᖃᖅᑐᒥᓂᖅ ᐊᐃᓕ ᔭᕗ, ᐊᖓᔪᖅᑳᖅ ᓵᒥᒥ ᑲᑎᒪᔨᓄᑦ. ᓵᒥᒥᐅᑦ ᓄᓇᖃᖅᑳᖅᓯᒪᔪᓂᒃ ᐅᑭᐅᖅᑕᕐᓂᖏᓐᓃᑦᑐᑦ ᓄᐊᐅᐃ, ᓱᕖᑕᓐ, ᕕᓐᓚᓐ ᐊᒻᒪᓗ ᐅᑭᐅᖅᑕᖅᑐᒥ ᐅᐊᑉᓇᖅᐸᓯᖓᓂ ᕋᓴᐅᑉ. “ᑕᒪᓐᓇ ᓇᓗᓇᕐᓗᓂ ᐊᐱᖅᑯᑎᐅᖏᒻᒪᑦ ᖃᖓᒃᑯᑦ ᓯᓚᐅᑉ ᐊᓯᔾᔨᕐᓂᖓᓄᑦ ᐊᑐᐃᓂᖃᓕᕐᒪᖔᖅ ᓄᓇᓕᖁᑎᒋᔭᑦᑎᓐᓂᑦ. ᒪᓕᓪᓗᒍ ᑲᑐᔾᔨᖃᑎᒌᑦᑐᑦ ᓄᓇᓕᐅᖃᑎᒌᑦ ᐱᓕᕆᐊᕆᒍᒪᔭᖓ ᑲᑎᒪᓂᕐᒥ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ ᓄᓇᓕᕐᔪᐊᓕᒫᑦ ᑐᓂᓯᒪᓂᖃᖅᐳᑦ ᐊᔾᔨᒌᙱᓐᓂᕐᒥᓐᓂᒃ ᑎᒍᒥᐊᖃᑎᒌᓪᓗᑎᒃ ᑭᓯᐊᓂ ᐊᔾᔨᒌᖏᑦᑐᓂᑦ ᐱᓕᕆᐊᖅᓴᖃᐅᖅᓱᑎᒃ. ᒫᓐᓇ ᑕᑯᔭᕆᐊᖃᓕᕋᑦᑕ ᐊᐅᓚᔾᔭᑦᑐᓂᒃ ᐊᒻᒪᓗ ᐱᒋᐊᑦᓴᐅᑎᒋᓗᑎᒃ.”
“ᐱᔭᕆᐊᑐᔫᓗᑕ ᐃᓅᖏᓇᑦᑕ ᐃᓕᑦᑐᕈᓐᓇᖅᓱᑕᓗ ᐃᓅᕗᒍᑦ, ᑭᓯᐊᓂ 2 ᓯᓚᓐᓂᐅᑎᑎᒍᑦ ᑭᓪᓕᖃᕋᓱᐊᕐᓂᖅ ᐊᔪᕐᓇᕈᑕᐅᒃᑲᓂᕐᓂᐊᖅᐳᖅ ᐊᒃᓱᕈᕐᓇᕐᓗᓂ ᓄᓇᖃᖅᑳᖅᓯᒪᔪᑐᐃᓐᓇᐅᙱᑦᑐᓄᑦ. ᐅᑭᐅᖅᑕᖅᑐᖅ ᐊᐅᖃᑦᑕᓕᖅᑎᓪᓗᒍ ᑕᕆᐅᕐᓗ ᐃᑎᓪᓕᕙᓪᓕᐊᑐᐃᓐᓇᖅᓱᓂ 1 ᐱᓕᐊᓃᑦᑐᑦ ᐃᓄᐃᑦ ᐃᓅᓯᓖᑦ ᓯᔾᔭᖅᐸᓯᐅᓂᖅᓴᓃᑦᑐᑦ ᐅᓗᕆᐊᓇᖅᑐᒦᓕᖅᐳᑦ ᓄᑖᒧᑦ ᐊᕙᑎᓕᕆᓂᕐᒨᖓᔪᖃᓕᖅᐸᓪᓕᐊᑐᐃᓐᓇᑎᓪᓗᒍ,” ᐅᖃᖅᑐᒥᓂᖅ ᐃᔨᑦᓯᐊᖅ.
“ᕿᑭᖅᑕᒥᐅᑕᐅᓪᓗᑕ ᐊᒻᒪᓗ ᑕᕆᐅᑉ ᐊᑭᐊᓂ ᓄᓇᖃᖅᑳᖅᓯᒪᔪᑦ, ᓄᓇᐃᕈᑎᒍᒪᙱᓇᑦᑕ ᐊᖏᕐᕋᖃᕐᕕᑎᓐᓂᒃ, ᑭᓇᑐᐃᓐᓇᖅ ᑕᐃᒫᒃᓴᐃᓐᓇᖅ ᐊᖏᕐᕋᐃᒍᑎᒍᒪᙱᒻᒪᑦ ᓄᓇᕐᔪᐊᒥ. ᑕᐃᒪᐃᒻᒪᑦ ᐊᐃᕙᒍᑎᒋᔭᕗᑦ ᐊᐃᒍᑎᒌᓐᓇᓯᐊᖅᓱᑎᒍᓗ, ᑎᓕᐅᕆᕗᒍᑦ ᑭᒃᑯᑐᐃᓐᓇᕐᓂᒃ ᐃᓚᓕᐅᑎᖁᓪᓗᒋᑦ ᐅᕙᑦᑎᓐᓄᑦ,” ᐅᖃᖅᑐᒥᓂᖅ ᒥᓛᓐ ᓗᐃᐊᒃ, ᓄᓇᓕᖓᓃᙴᖅᓯᒪᔪᑦ ᒫᕐᓱᓪ ᐊᐃᓚᓐᔅ ᐃᓚᒋᔭᐅᔾᔪᑎᖃᖅᓱᓂᓗ ᐊᕆᐅᑉ ᐊᑭᐊᓄᑦ ᓄᓇᖃᖅᑳᖅᓯᒪᔪᓄᑦ ᑲᑐᔾᔨᖃᑎᒌᑦᑐᓄᑦ.
ᐅᑭᐅᖅᑕᖅᑐᒥᐅᑦ ᕿᑭᖅᑕᒥᐅᓪᓗ ᑎᒃᑯᐊᖅᓱᑎᒃ ᒐᕙᒪᒃᑯᖏᓐᓄᑦ ᑲᓇᑕᐅᑉ, ᐊᑐᓕᖅᑎᑕᐅᕋᑖᓂᖓᑕ ᐃᓂᓪᓚᑦᓴᖅᑕᐅᒍᑎᒋᓯᒪᔭᖓᑕ ᑲᑐᔾᔨᖃᑎᒌᑦ ᕿᑭᖅᑕᕐᓚᑐᓃᓐᓂᖅᓴᓄᑦ ᑐᕌᖓᔪᖅ (AOSIS), ᐅᖃᐅᓯᖃᖅᑐᒥᓂᐅᓪᓗᑎᓪᓗ ᐃᑲᔪᖅᑐᐃᓂᕐᒥᓐᓂᒃ ᑎᑭᐅᑎᔭᐅᒐᓱᐊᓂᖓᑕ 1.5-ᓯᓚᓐᓂᐅᑎᑎᒍ , ᐆᑦᑑᑕᐅᖁᓪᓗᒍ ᑐᓂᓯᒪᓂᖃᕐᓂᖏᑕ ᒥᒃᓵᓄᑦ ᓄᓇᓕᕐᔪᐊᑦ ᐅᕙᓂ COP21 ᓴᖅᑭᔮᕈᑕᐅᒋᐊᖃᕐᒪᑦ ᐋᔩᖃᑎᒌᒍᑕᐅᔪᑦ ᑲᔪᓯᑎᑕᐅᑦᓯᐊᖁᓪᓗᒋᑦ.
“ᓇᓗᓇᖏᑦᑐᒥᒃ ᓇᓗᓇᐃᔭᐃᔪᖃᖅᓯᒪᓕᕐᒪᑦ ᓄᓇᖃᖅᑳᖅᓯᒪᔪᑦ ᓇᓗᓇᐃᖅᓯᒍᑎᖏᑎᒍᑦ ᐊᒥᓱᓄᑦ ᐊᕐᕌᒍᓄᑦ ᐃᖅᑲᒋᓪᓗᑎᒍ ᓄᓇᓕᖃᕐᕕᕗᑦ ᐊᖏᕐᕋᕆᓪᓗᑎᒍ ᑕᕝᕙᓂᓗ ᑲᑎᒪᓂᕐᒥ COP21 ᕿᓚᒥᐅᔪᒥᒃ, ᐃᓱᒪᑦᓴᖅᓯᐅᕈᑕᐅᓯᒪᑦᓯᐊᖅᑐᒥᒃ ᑲᑐᔾᔨᖃᑎᒌᓐᓂᒃᑯᑦ ᓄᓇᕐᔪᐊᒥᐅᑕᓄᑦ ᐅᖃᐅᓯᖃᖅᑐᓄᑦ ᑲᒪᒋᓂᐊᕐᓗᒍ ᓯᓚᐅᑉ ᐊᓯᔾᔩᓂᖓ,” ᐅᖃᖅᑐᒥᖅ ᒫᑕᓖ ᐅᑲᓕᖅ, ᐊᖓᔪᖅᑳᖅ ᑲᓇᑕᒥ ᐃᓄᖕᓄᑦ ᐃᓅᓱᑦᑐᓄᑦ ᑲᑎᒪᔨᓄᑦ ᑲᓇᑕᒥ. “ᐊᑐᖅᑕᐅᖃᑦᑕᖅᓯᒪᓂᑯᑦ ᓇᓗᓇᐃᖅᓯᒻᒪᑕ ᑲᑐᔾᔨᖃᑎᒌᑦᑐᑦ ᐱᓕᕆᖃᑎᒌᑦᓱᑎᒃ ᐊᑕᐅᓯᕐᒥᒃ ᐱᓕᕆᐊᖃᕐᕕᖃᖅᓱᑎᒃ ᑐᑭᐅᑎᒍᒪᔭᒥᑎᒍᑦ ᑕᒪᓐᓇ ᐊᑐᖅᕋᑦᓴᐅᔪᖅ. ᐃᓅᓱᑦᑐᑦ ᑎᓕᐅᕆᕗᑦ ᑐᓂᓯᒪᓂᖃᖁᔨᓪᓗᑎᒃ ᑎᑭᐅᑎᓗᒍ 1.5 ᓯᓚᓐᓂᐅᑎᑎᒍ — ᐅᑯᓄᖓ ᑭᖑᕚᖑᔪᓄᑦ ᐱᓪᓗᒍ ᐊᒥᓱᓄᓪᓗ ᐊᒡᒋᖅᑐᓄᑦ ᓯᕗᓂᒃᓴᑎᓐᓂ. ᓯᕗᓂᒃᓴᑦᑕ ᑕᒪᓐᓇ ᑕᑎᒋᒻᒪᐅᒃ.”
“ᑲᓇᑕ ᑲᑐᔾᔨᖃᑕᐅᓕᕋᑖᖅᑲᕐᒥ ᑕᒪᑐᒧᖓ ᐱᕈᖅᐸᓪᓕᐊᑐᐃᓐᓇᖅᑐᒧᑦ ᑕᒫᓂ ᐱᐅᕆᔅᒥ,” ᐅᖃᖅᑐᒥᓂᖅ ᔪᒨ. “ᑎᓕᐅᖅᐸᒃᑲ ᓯᕗᓕᖅᑎᐅᖃᑎᒃᑲ ᑎᑭᐅᑎᔭᕆᓂᐊᕐᓗᒍ 1.5 C ᓯᓚᓐᓂᐅᑎᑎᒍᑦ ᑎᑭᐅᑎᔭᕆᔭᐅᒍᒪᔪᖅ.”