15-GILIQTANGA INUIT UKIUQTAQTUMIUTAUQATIGIIT KATIMAJINGIT KATIMAVIGJUARNIQ MATUIQPUQ IQALUNGNI

Julai 22, 2026—Iqaluit, Kanatami— Inuit katimajaqtuqsimajut nakinngaaruluujaqtut Inuit Nunangani ullumi katiqqauvut Iqalungni, Nunavummi, pigiallarininganut 15-giliqtanga Inuit Ukiuqtaqtumiutauqatigiit Katimajingit Katimavigjuarniq. Ullut tisamat aggiqtut uqalimaqatangniaqtut uqaqatigiiglutiglu ikajurniaqtunik isumaliurinirmik katujjiqatigiingujuup sivulliutijumajanginnik 2030−mut tikillugu. Katimavigjuarniup piliriariniaqtanga Inuit Tapiriit Nunarjuarmi. Katimavijjuarniq iqalunni pimmariuvuq sivulliqpaatsiami nunalipaujakkut tunngasuttitsijiummata taimannganit 1983-minit. Kanataup Inungit quviaasummarikput tunngasainirmik Inuuqatigijaminik namilimaaq nunarjuarmit Inuit nunaanit nunavuup iluanut nunaqutigijattinnut.

Arraagut tisamat aniguraangata, ICC-kut Katimavigjuarninginni quttingniqpaanguvut isumaliurijiullutik katujjiqatigiingujuni, isumaliurijiullutik namunngauniarninginni arraagunut tisamanut. Piviksaungmijuq tusaumaqatigiingnirmik, uqausiqarnirmik ajjigiinik isumagijaksanik, aivajjutaujunik, sanngiktigiaqtitsinirmiglu aktuanirijanginnik Inulimaat.

Tamaani arraagumi Katimavigjuarni katititsilauqtut 66-nik katimajaqtuqsimajunik kiggaqtuijunik Inunnik Kanatami, Kalaallit Nunaanni, Alaaskami, ammalu Sukatka, ammalu hannalanginniittunik takunnariaqtuqsimajunik, katujjiqatigijaminnik ammalu qaiqujausimajunik.

Katimavigjuarniq pigiarutiqalauqpuq qullirmik ikummaksillutik amma qilaujjaqsutik Tukummeq Qaavigaq amma HH Suersaq Poulsen, kinguniagullu tuksiarnikkut matuiqtaulluni Iksirarjuaraapik Kalaallit Nunaanni Paneeraq S. Munk. ICC-kut iksivautanga Sara Olsvig Katimavigjuarnami pigiaqtitsilauqpuq tunngasuktitsillunilu katimajaqtuqsimajunik.

“Qujalirjuaqsunga tunngasuktitsijittinnut ikpigittiaqtugilu, matuiqsillarilauqpunga 15−giliqtangani ICC Inuit Ukiuqtaqtumiutauqatigiit Katimajingit Katimavigjuarninginni. Arraaguit 8 aniguqsimaliqtut kingulliqpaamik katilauqsimanittini. Katinnganirivaktavut pilluatauvut katititsinirmik inungnik amma sanngiktigiaqtitsinirmik aktuanirijattinnik pivagiijarnirmiglu sivuniksami sivuliqtiunirmut. 2022-2026−mi katimajiuniq isulippallialiqtillugu, kingumut takugiaqpugut arraagunut tisamanut inuit saattiarmiutaqaqpalaurninginnik qassikallangnik aniguiqtigialingnik tamannalu qaujisarutaujunnalauqsuni atausiuqatigiingnittinnik piliriaqallarigumanittinniglu piliriqatigiigumanittinnik Inuit Nunangani. Imannangaarli CC-kut Inuillu takuksautittisimavut sapiliqsarainnginnirminik. Sanngijuunginnaqpugut angiqsimanittinni atausiuqatigiingnirmut, piliriqatigiitsianginnaqsuta amma piliriqatigiitsianginnaqsuta, amma tautunnguaqtavut amma piniarniraqsimajavut ICC-kut saqqitaulauqtillugit,” uqalauqpuq ICC-kut Katimatitsijinga Sara Olsvig.

Nunavut tunngavikkut Angajuqqaangat Gloria A. Uluqsi amma iqalungni Maija Solomon Awa tunngasuktitsittialauqtuuk, nalunaiqsillutik pimmariuninganik Inuit nakituinnaq Ukiuqtaqtumiinngaaqtut Iqalungni. Katimajaqtuqsimajut tusaajunnalaurmijut nipiliuqsimajumik Maligaliuqtirjuaq Mark Carney, kanataup angajuqqaarjuanga, ammalu Inuit sivuliqtingit Kanatami, Kalaallit Nunaat, Alaaska, amma Sukatka.

Matuiqtautillugu katimaniq iqqaumaniqalaurivuq Alaaskamiut Inuit Jimmy Stottsmik, nalunaiqsilluni pimmarialungmik ikajuqsimaninganik ICC−kut pilirianginnut ujjirnaqsititsinirmullu Inuit pijunnautinginnik

Sara Olsvig Iksivautangata unikkaanganik tunisilauqpuq, uqausiqaqsuni ICC-kut qanuiliuqsimaninginnik amma aniguqtisimajanginnik ukiunik tisamanik aniguqtunik. Katimajaqtuqsimajut tusaqtitaulaurivut tamainnik ICC−kut tisamanik titirarvinginnik, nalunaiqsikkanniqsutik piliriarisimajanginnik aniguqtisimajanginniglu taimanngat 14−giliqtangani Katimavigjuarniqalauqtillugit, upagutisimallutik amma qarisaujakkut 2022−mi.

“Nunarjuami asijjiqpallianginnaujaqtumi amma maannauliqtumi ajurnaqtumi ajjiqaqtittariaksaq kisutuinnarmut, ICC-kut pilirirjuaqsimavut katinngatitsillutik nipigijaullutik. Piliriqatigiingniq inuulluta pimmariuniqsauqquujivuq taimannganit, sanngijuunginnaqsutalu sivulliqpauttiutijumajattinnik sivummuaktitsisimallutalu atuagattinnik. Taimailiuqtilluta, ilauqatausimavugut isumaliurinirmut nunarjualimaami atausiulluta inuulluta: inuit”, uqaqtuq ICC-kut iksivautanga Sara Olsvig.

Ulluutillugu unikkaaqtuqalaurivuq makkuktunik katimajaqtuqsimajunik tamainnik tisamanik aviktuqsimajunik, nalunaiqsillutik qanuq pimmariutigingmangaat makkuktut sivuliqtiuningit amma piliriqatigiitsiarniq kinguvaariinut sivuniksattinnut Inuit nangminiqsurunnarninginnut amma ukiuqtaqtulimaami piliriqatigiigunnaqullugit.

Katimavigjuarniq kajusiniaqpuq Julai 25−ngurasungningani, uqausiqaqpaglutik uqausiqaqpaktutiglu qassikallangnik isumagijaksanik pimmariugijaujunik Inungnut, sivulliqpaujjausimajunik uqausiqaqpaktutik, niruaqpaktutik ICC−kut nutaamik Iksivautariniaqtanganik sivuliqtillu Katimajiksanginnik, isulittilutiglu atiliuqsinirmik Sulinirarutimik tukimuagutauniaqtumik arraagunut tisamanut pilirianguniaqtunut. Katimavigjuarniq isulippat, Iksivautarijaujuq Inuit Katimajirjuanginnut Kalaallit Nunaanit Kanatamuulaaqtuq.

Katimarjuarniq inulimaanut ikiaqqivikkut atuinnaulangajuq saqqijaaqtitaulunilu tamainnik qallunaatut, Kalaallisut, Inuktitut, Inupiaqtun, Uangnaup Inupiaqtun, Qitiata Juupiktun, Ulaasiatitullu.

Tautugunnaqtait katimavigjuarnaq takuksautitaujuq uvani: https://encoreglobal.zoom.us/j/93716388201?pwd=B7248rKHub8WrDTUTmmV7y1U6bXR0E.1

-30-

1977-mi pigiaqtitaulauqsimalluni, Inuit Ukiuqtaqtumiutauqatigiit Katimajingit (ICC) Nunarjualimaami Katujjiqatigiinguvut Nunaqaqqaaqsimajunut, kiggaqtuillutik Inungnik Alaaskami, Kanatami, Kalaallit Nunaat, amma Sukatka. ICC−kut tautugaqaqput inungnik katititsijumallutik, ujjirnaqsititsijumallutik pijunnautinginnik pijumajanginniglu nunarjualimaami, saqqititsinirmiglu avungakallak pivagiijaqtausimajunik sapujjisimajumallutik Ukiuqtaqtumi avatigijaujumik. Piliriqattarivut inuit nipiqatsiaqullugit ilauqullugillu gavamalirinirmut, kiinaujaliungnirmut pivallianirmullu Ukiuqtaqtumi.

ICC-kut pigiaqtitsiqataulauqput Ukiuqtaqtumi Katimajirjuanik Taikanilu Ilaunginnaliqsutik. Nunarjualimaami piliriaksaqarmijuq, suurlu Uqaujjigiaqtiuqataulluni II Nunarjuarmi Katujjiqatigiinut Pivalliajulirinirmut amma Inulirinirmut Katimajinut, Naalaktiuqataulluni Gavamauqatigiit Qaujisaqtinginnut Silaup Asijjiqpallianinganut, amma Uqaujjigiaqtiunginnaqsuni Nunarjualimaami Tariurjuarmi Katujjiqatigiinut, asingillu uqaujjigiaqtiullutik unuqtunik nunarjualimaami katimavigjuaqtunik.