ᒪᓕᒐᖅ I – ᑐᑭᓯᔭᐅᓂᖏᑦ

ᐊᖏᔫᑎᓂᑦ ᑎᑎᕋᖅᓯᒪᔪᓕᒫᑦ ᑐᑭᓯᖏᓐᓂ ᑎᑎᕋᖅᓯᒪᔪᖃᕐᓂᐊᖅᑐᑦ ᑕᐃᑲᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᐱᖁᔭᖏᓐᓂ ᐅᕝᕙᓘᓐᓃᑦ ᒪᓕᒐᕋᓛᖏᓐᓂ.

ᒪᓕᒐᖅ II – ᐃᓚᒋᔭᐅᔪᑦ

ᐃᑲᔫᑎᖃᕐᓂᖏᑦ ᐃᓚᒋᔭᐅᓪᓗᓂ

ᐃᓚᒋᔭᐅᔪᑦ ᐃᒪᐃᑦᑑᒍᓐᓇᖅᑐᑦ:

ᐱᖃᑕᐅᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓄᑦ ᓂᕈᐊᖅᑕᐅᓯᒪᓗᑎᑦ ᐃᓚᒋᔭᐅᔪᓐᓇᖅᑐᑦ; ᐊᒻᒪᓗ ᑎᓕᔭᐅᓯᒪᑎᓪᓗᒋᑦ, ᓂᕈᐊᖅᑕᐅᓯᒪᑎᓪᓗᒋᑦ ᐊᕐᕌᒍᑕᒫᖅᓯᐅᑎᖏᓐᓂ ᑲᑎᒪᑎᓪᓗᒋᑦ ᐱᔾᔪᑎᖃᕐᓗᑎᑦ, ᐊᐅᓚᔾᔪᑎᖃᕐᓗᑎᑦ ᓴᓐᖏᓂᖃᕐᓗᑎᓪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ.

ᐲᖅᑕᐅᓂᖏᑦ ᐃᓚᒋᔭᐅᔾᔪᑎᖃᕐᓂᖓᓐᓂ

ᐃᓚᒋᔭᐅᔪᑦ ᓯᖁᒥᑦᑎᔪᒥᓃᑦ ᐱᔾᔪᑎᖏᓐᓂ ᒪᓕᒐᕐᓂᓪᓗ ᒪᓕᑦᑕᐅᒋᐊᓕᓐᓂᒃ, ᓈᓚᑦᑕᐅᖅᑳᕈᓐᓇᖅᑐᑦ, ᓄᖅᑲᖅᑎᑕᐅᑲᐃᓐᓇᕐᓗᑎᑦ ᐅᕝᕙᓘᓐᓃᑦ ᐲᖅᑕᐅᑦᑎᐊᒻᒪᕆᓪᓗᑎᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂᑦ ᐃᓚᒋᔭᐅᔪᒧᑦ ᓂᕈᐊᖅᑐᒥᓂᕐᓄᑦ.

ᐃᓂᖅᑎᖅᑕᐅᓐᓂᖏᑉᐸᑦ ᐃᓚᖓ ᐃᓚᒋᔭᐅᔪᖅ, ᓈᓚᑦᑕᐅᓚᐅᖅᑎᓪᓗᒋᑦ ᐊᒻᒪᓗ ᐊᑕᐅᓯᖅ ᑕᖅᑭᕐᒥᑦ ᖃᐅᔨᒃᑲᖅᑕᐅᓯᒪᓕᖅᑎᓪᓗᒋᑦ ᐃᓚᒋᔭᐅᔪᖅ ᐊᒻᒪᓗᑎᓕᔭᐅᓯᒪᔪᖅ, ᑎᓕᔭᐅᓯᒪᔪᖅ ᓄᖅᑲᖓᑲᐃᓐᓇᖅᑎᑕᐅᔪᓐᓇᖅᑐᖅ ᐅᕝᕙᓘᓐᓃᑦ ᐲᖅᑕᐅᑦᑎᐊᒻᒪᕆᓪᓗᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓕᖅᑲᑕ.

ᐊᑎᖓ ᐊᑐᖅᑕᐅᓂᖓ “ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ” ᐃᓚᒋᔭᐅᔪᓄᑦ

ᓇᓪᓕᐊᑐᐃᓐᓇᖅ ᐃᓚᒋᔭᐅᔪᖅ, ᐊᑐᓪᓚᕆᓪᓗᓂ ᐊᖅᑯᑎᖃᕐᓗᓂᓘᓐᓃᑦ ᐊᑎᖓᓐᓂ ᐊᑐᕆᐊᖃᓐᖏᑦᑐᖅ ᓇᒻᒥᓂᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᒥᑦ, ᐃᒻᒥᓄᓪᓗ ᑮᓇᐅᔭᓕᐅᕈᑎᒋᓗᓂᐅᒃ, ᓂᐅᕐᕈᑎᖃᕐᓂᒃᑯᑦ ᐅᑉᐱᓂᒃᑯᑦ, ᐅᕝᕙᓘᓐᓃᑦ ᑭᒡᒐᖅᑐᐃᓂᒃᑯᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᒥᑦ ᑭᓯᐊᓂ ᑕᐃᒫᒃ ᐱᔪᓐᓇᖅᑎᑕᐅᑐᐊᖅᑲᑦ ᑎᑎᖅᑲᑎᒍᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓃᓐᖔᖅᑐᓂᒃ ᐊᒻᒪᓗ ᒪᓕᒐᕐᓂᑦ ᒪᓕᑦᑎᐊᕐᓗᑎᑦ ᐱᔪᓐᓇᖅᑎᑕᐅᓂᖏᓐᓂ.

ᐲᖅᑕᐅᓂᖏᑦ ᐃᓚᒋᔭᐅᔪᑦ

ᐃᓚᒋᔭᐅᔪᑦ ᐲᕈᓐᓇᖅᑐᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᒥᑦ ᐱᔾᔪᑎᖃᑦᑎᐊᕐᓗᑎᑦ ᐊᖏᖅᑕᐅᓪᓗᑎᓪᓗ ᒪᓕᒐᕐᓂᑦ ᒪᓕᓪᓗᑎᑦ, ᐊᖏᖅᑕᐅᓗᑎᓪᓗ ᓯᕗᓕᖅᑎᓄᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᐊᖏᖅᑕᐅᒻᒥᓗᑎᑦ ᐊᕐᕌᒍᑕᒫᖅᓯᐅᑎᓂᒃ ᑲᑎᒪᑎᓪᓗᒋᑦ.

ᐲᖅᑐᐃᑦ ᐃᓚᒋᔭᐅᔾᔪᑎᖓᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᐲᖅᑕᐅᓂᖏᓐᓂ ᐊᒻᒪᓗ ᐲᖅᓯᔪᑦ ᒪᓕᒐᕐᓂᑦ ᐊᒻᒪᓗ ᒪᓕᒐᕋᓛᓪᓗ.

ᐃᓱᒪᓕᐅᕋᔭᖅᑐᑦ ᐃᓚᒋᔭᐅᔪᓂᒃ ᐲᖅᑕᐅᓂᐊᕐᓂᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᒥᑦ ᒪᓕᓕᕋᔭᖅᑐᑦ ᐃᓚᒋᔭᐅᔪᓂᑦ ᒪᓕᓪᓗᑎᑦ ᐊᑐᐊᕆᐊᓕᖏᓐᓂ. ᐲᖅᑕᐅᔪᑦ ᐱᒋᐊᕈᓐᓇᖅᑐᑦ ᐊᒻᒪᓗ ᐊᑐᓕᕋᔭᖅᑐᓂ ᐊᑎᓕᐅᖅᑕᐅᓚᐅᖅᑎᓪᓗᒍ ᐃᓚᒋᔭᐅᔪᒥᑦ.

ᒪᓕᒐᖅ III – ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᖅ

ᑲᑎᒪᔩᑦ

ᑲᑎᒪᔨᓕᒫᑦ ᐃᓄᓪᓚᕇᑦ.

ᑲᑎᒪᔩᑦ ᓂᕈᐊᖅᑕᐅᔪᓐᓇᖅᑐᑦ ᐊᑐᓂ ᐃᓚᒋᔭᐅᓂᐊᖅᑐᓄᑦ ᒪᓕᓪᓗᑎᑦ ᒪᓕᒐᖏᓐᓂ ᐋᖅᑭᓱᖅᑕᐅᓯᒪᔪᓂᒃ ᐊᑐᓂ ᐃᓚᒋᔭᐅᔪᓄᑦ.

ᐃᓚᓂ ᐃᓚᒋᔭᐅᔪᑦ ᑎᓕᔭᐅᓯᒪᔪᑦ ᒪᓕᒋᐊᖃᕐᒥᔪᑦ, ᐊᔪᕐᓇᓐᖏᓂᖅᐹᖅᑎᒍᑦ, ᐊᓯᖏᓐᓂᓪᓗ ᒪᓕᒐᖅᑕᖃᖅᑲᑦ ᓯᓚᑖᓂ ᒪᓕᓪᓗᑎᑦ. ᐊᑐᓂ ᐃᓚᒋᔭᐅᔪᑦ ᑎᓕᔭᐅᓯᒪᔪᑦ ᐱᖃᓯᐅᔾᔭᐅᔪᑦ ᐃᓅᓱᑦᑐᐃᑦ ᐃᓚᒋᔭᐅᔪᑦ ᐃᓐᓇᐃᓪᓗ ᑎᓕᔭᐅᓯᒪᔪᑦ.

ᑎᓕᔭᐅᓯᒪᔪᒥᑦ ᐊᑕᐅᓯᐅᓐᖏᑦᑐᒥᑦ ᑭᒡᒐᖅᑐᐃᒋᐊᖃᓐᖏᑦᑐ ᑎᒥᐅᔪᒥᑦ.

ᑎᓕᔭᐅᓯᒪᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓄᑦ ᐃᓕᓯᒪᐃᓐᓇᕋᔭᖅᑐᑦ ᑎᓕᔭᐅᔾᔪᑎᖏᓐᓂ ᐅᓪᓗᓄᑦ 90−ᓄᑦ ᓯᕗᓂᖓᓐᓂ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓚᐅᓐᖏᓐᓂᓐᓄᑦ, ᓄᑖᕐᒥᑦ ᑎᓕᔭᐅᔪᖃᑦᑕᓕᖅᑯᖅ ᐊᒻᒪᓗ ᐊᖏᖅᑕᐅᓗᑎᑦ ᑲᑎᒪᔨᕋᓛᕐᓄᑦ ᒪᓕᒐᕋᓛᕐᓂᑦ ᒪᓕᓪᓗᑎᑦ.

ᑲᑎᒪᓂᐅᔪᑦ: ᐊᑐᓂ ᑎᓕᔭᐅᓯᒪᔪᑦ ᐊᑕᐅᓯᐊᕐᓗᑎᑦ ᓂᕈᐊᕈᓐᓇᖅᑐᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᐅᔪᒥᑦ. ᓂᕈᐊᖅᑎᑕᐅᔪᓐᓇᖏᑦᑐᑦ ᐊᓯᐊᓄᑦ. ᑭᓯᐊᓂᓕ ᒪᓕᒐᕋᓛᑦ ᑕᐃᒪᐃᓕᖓᓐᓂᖅᑲᑕ, ᐃᓱᒪᓕᐊᒥᓂᓕᒫᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᐊᖏᓂᖅᐹᓐᓄᑦ ᓂᕈᐊᖅᑕᐅᒋᐊᖃᕋᔭᖅᑐᑦ.

ᐊᒥᓲᓂᑦ ᑲᑎᒪᔩᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᒪᓕᑦᑐᑦ 2/3−ᖏᓐᓂ ᑎᓕᔭᐅᓯᒪᔪᓕᒫᑦ ᐃᓚᒋᔭᐅᔪᑦ.

ᓇᒥ ᑲᑎᒪᒋᐊᖃᕐᒪᖔᑕ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᒪᓕᑦᑐᑦ ᓇᓗᓇᐃᖅᑕᐅᑉᐸᑕ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᐊᒻᒪᓗ ᒪᓕᒻᒥᔪᑦ ᑮᓇᐅᔭᖏᓐᓂ.

ᑎᑎᕋᖅᓯᒪᒋᐊᖃᕐᒥᔪᑦ ᑲᑎᒪᔾᔪᑎᓕᐅᕐᓗᑎᑦ ᓇᐃᓈᖅᓯᒪᓗᒋᑦ ᐊᕐᕌᒍᑕᒫᖅᓯᐅᑏᑦ ᑲᑎᒪᓂᖏᓐᓂ.

ᑎᑎᕋᖅᓯᒪᒋᐊᖃᕐᒥᔪᑦ ᐱᖁᔨᕗᖔᕈᑏᑦ ᑎᒍᔭᐅᓯᒪᔪᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᑲᑎᒪᔾᔪᑎᒥᓂᕐᓄᑦ ᐃᓚᓕᐅᑎᓯᒪᓗᒋᑦ ᐊᕐᕌᒍᑕᒫᖅᓯᐅᑎᖓᑦᑕ ᑲᑎᒪᓂᖏᓐᓂ.

ᑎᑎᕋᖅᓯᒪᒋᐊᓖᑦ ᖃᐅᔨᒃᑲᐃᔾᔪᑏᑦ ᑲᑎᒪᓂᐅᓂᐊᖅᑐᒥᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᐊᖅᑎᓪᓗᒋᑦ ᐃᓚᒋᔭᐅᔪᓂᒃ, ᐃᓚᒋᔭᐅᔪᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᓪᓗ ᐃᒫᒃ:

ᑲᑎᒪᓂᑐᐃᓐᓇᕐᓄᑦ, ᐅᓪᓗᐃᑦ ᐅᖓᑖᓅᓐᖏᑦᑐᖅ 90 ᓯᕗᓂᖓᓐᓂ ᖃᐅᔨᒃᑲᐃᒋᐊᓖᑦ ᑲᑎᒪᓂᐅᓂᐊᖅᑐᒥᑦ; ᐊᒻᒪᓗ

ᒪᐅᓇᑐᐃᓐᓇᖅ ᑲᑎᒪᓂᕐᓄᑦ, ᐅᖓᑖᓅᓐᖏᑦᑐᖅ 30 ᓯᕗᓂᖓᓐᓂ ᖃᐅᔨᒃᑲᐃᒋᐊᓖᑦ ᑲᑎᒪᓂᐅᓂᐊᖅᑐᒥᑦ.

ᓂᕈᐊᕈᓐᓇᖅᑐᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᐃᓵᓪᓗᑎᑦ, ᐊᑎᖏᓪᓘᓐᓃᑦ ᑕᐃᔭᐃᓗᑎᑦ (ᓂᕈᐊᕐᓗᑎᑦ) ᑲᓐᖑᓇᖅᑐᒃᑯᓪᓘᓐᓃᑦ ᐸᐃᑉᐹᑦᑎᒍᑦ. ᓂᕈᐊᕐᓂᓕᒫᑦ ᑲᓐᖑᓇᖅᑐᒃᑯᑦ ᓂᕈᐊᕐᓇᐅᒋᐊᓖᑦ. ᐊᓯᖏᑦ ᐃᓱᒪᓕᐊᖑᒐᔭᖅᑐᑦ ᑲᓐᖑᓇᖅᑐᒃᑯᑦ ᓂᕈᐊᕐᓇᐃᑦ ᑐᔅᓯᕋᖑᑉᐸᑕ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᐅᕝᕙᓘᓐᓃᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ. ᑕᐃᔭᐅᓗᑎᑦ ᓂᕈᐊᕐᓂᖏᓐᓂ ᖃᖓᑐᐃᓐᓇᖅ ᑕᐃᒫᒃ ᐱᔪᓐᓇᖅᑐᑦ ᑎᓕᓯᓂᐊᖅᑎᓪᓗᒋᑦ. ᓯᕗᓕᖅᑏᑦ ᑲᑎᒪᔨᕋᓛᖏᑦ ᐋᖅᑮᔅᓱᐃᒍᓐᓇᖅᑐᑦ ᐱᖁᔭᕐᓂᑦ ᓂᕈᐊᕐᓂᐅᕐᒧᑦ ᓂᕈᐊᕐᓂᐅᔪᓄᓪᓗ.

ᒪᓕᒐᖅ IV – ᐃᔅᓯᕙᐅᑕᐅᑉ ᐊᓪᓚᕕᖓ

ᐊᑯᓂᐅᑎᒋᔪᖅ ᐃᓕᓯᒪᓂᖓ: ᐊᑯᓂᐅᑎᒋᔪᖅ ᐃᓕᓯᒪᓂᕆᒐᔭᖅᑕᖓ ᐃᔅᓯᕙᐅᑕᐅᓂᖓᓐᓄᑦ ᐊᕐᕌᒍᓄᑦ ᑎᓴᒪᓄᑦ ᐅᕝᕙᓘᓐᓃᑦ ᐊᕕᑦᑐᖅᓯᒪᓗᑎᑦ ᑕᐃᒫᒃ ᓇᓗᓇᐃᖅᑕᐅᒍᓐᓇᕆᓪᓗᑎᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ.

ᐃᔅᓯᕙᐅᑕᖅ ᐱᔨᑦᑎᕈᓐᓇᖏᑦᑐᖅ ᐃᔅᓯᕙᐅᑕᐅᓗᓂ ᐊᑕᐅᓯᐊᖅ ᐅᖓᑖᓄᑦ ᐃᓕᓯᒪᓂᖓᓐᓂ.

ᓂᕈᐊᕋᔅᓴᓕᐅᕆᓃᑦ: ᐃᓚᒋᔭᐅᔪᑦ ᐃᔅᓯᕙᐅᑕᐅᒐᔭᖅᑐᒧᑦ ᑭᖑᓪᓕᕐᒥᑦ ᑐᓐᖓᓱᑦᑎᑦᑎᒐᔭᖅᑐᖅ, ᓯᕗᓂᖓᓐᓂ 180 ᐅᓪᓗᐃᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓚᐅᖅᑎᓐᓇᒋᑦ ᓂᕈᐊᕐᓇᖅᑐᖃᕐᓂᐊᖅᑎᓪᓗᒍ ᐃᔅᓯᕙᐅᑕᕐᒪᑦ ᐊᑎᕐᒥᑦ ᑐᓂᓯᒋᐊᓖᑦ ᐃᔅᓯᕙᐅᑕᕈᕈᒪᔪᒥᑦ ᒫᓐᓇᒧᑦ ᐃᔅᓯᕙᐅᑕᕐᒧᑦ ᖃᐅᔨᒃᑲᐃᓗᓂ. 120−ᐅᓪᓗᐃᑦ ᓯᕗᓂᖓᓐᓂ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᐅᓂᐊᖅᑐᒥᑦ, ᐊᑐᓂ ᐃᓚᒋᔭᐅᔪᑦ ᖃᐅᔨᒃᑲᖅᑕᐅᒋᐊᓖᑦ ᐃᔅᓯᕙᐅᑕᕐᒧᑦ ᐊᑎᖓᓐᓂ ᑭᓇᑐᐃᓐᓇᕐᒥᑦ ᐃᓐᓇᕐᒥᑦ ᐃᓄᒻᒥᑦ ᐃᓕᒍᒪᔪᒥᑦ. ᐊᓯᐊᓂ ᓂᕈᐊᕋᔅᓴᖅᑕᖃᒃᑲᓐᓂᕋᔭᓐᖏᑦᑐᖅ ᐃᔅᓯᕙᐅᑕᕐᒧᑦ ᓯᕗᓂᖓᓂ ᐊᖏᖅᑕᐅᒐᔭᓐᖏᑦᑐᑦ ᐅᕝᕙᓘᓐᓃᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓕᖅᑎᓪᓗᒋᑦ. ᐊᑐᓂ ᐃᓚᒋᔭᐅᔪᖅ ᐱᓇᓱᖁᔭᐅᕗᖅ, ᒪᓕᒐᕐᓂᑦ ᒪᓕᓪᓗᑎᑦ, ᖃᐅᔨᒃᑲᖅᑕᐅᓗᑎᑦ ᐃᓄᐃᑦ ᐊᖏᕐᕋᖏᓐᓂ ᓂᕈᐊᕋᔅᓴᖅᑕᖃᕐᓂᖓᓐᓂ ᐃᔅᓯᕙᐅᑕᕐᒧᑦ ᐊᒻᒪᓗ ᖃᐅᔨᒃᑲᐃᓗᑎᑦ ᐊᕐᕌᒍᒥᑦ ᐊᑕᐅᓯᕐᒥᑦ ᓯᕗᓂᖓᓐᓂ ᓂᕈᐊᕐᓇᐅᓛᖅᑐᒧᑦ.

ᓂᕈᐊᕐᓂᖅ: ᓂᕈᐊᕐᓇᖅ ᐃᔅᓯᕙᐅᑕᕐᒥᑦ ᑲᑎᒪᔾᔪᑎᔅᓴᓃᖃᑕᐅᒐᔭᖅᑐᖅ ᓄᑖᕐᓂᑦ ᐱᓕᕆᐊᔅᓴᓂᒃ ᑲᑎᒪᓂᑐᐃᓐᓇᕐᒥ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᕐᒥᑦ.

ᐃᓅᒍᓐᓃᖅᑐᖃᕐᓂᖅᑲᑦ ᐅᕝᕙᓘᓐᓃᑦ ᓄᖅᑲᖅᑐᒥᓂᕐᒥᑦ ᐃᔅᓯᕙᐅᑕᕐᒥᑦ ᐅᕝᕙᓘᓐᓃᑦ ᐃᔅᓯᕙᐅᑕᐅᒍᓐᓇᕈᓐᓃᖅᑐᒥᑦ ᐅᕝᕙᓘᓐᓃᑦ ᐱᓕᕆᔪᓐᓇᐃᓕᔪᒥᑦ, ᓯᕗᓕᖅᑏᑦ ᑲᑎᒪᔨᕋᓛᖏᑦ ᓂᕈᐊᕋᔭᖅᑐᑦ ᑕᐃᑲᓐᖓᑦ ᑲᑎᒪᔨᕋᓛᖏᓐᓂ ᐃᔅᓯᕙᐅᑕᐅᑲᐃᓐᓇᕐᓂᐊᖅᑐᒥᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᖓᓐᓄᑦ ᑎᑭᒐᓱᐊᕐᓂᖓᓐᓄᑦ ᐊᒻᒪᓗ ᐊᓯᖏᓐᓂ ᐱᓕᕆᐊᖑᔭᕆᐊᓕᓐᓂᒃ, ᑕᐃᒪᐃᑦᑐᓂᑦ, ᐃᓚᒋᔭᐅᔪᖅ ᐃᓕᓯᒪᑲᐃᓐᓇᕋᔭᖅᑐᖅ ᐃᔅᓯᕙᐅᑕᐅᑲᐃᓐᓇᕐᓗᓂ ᓂᕈᐊᕋᕈᖅᑎᑕᐅᔪᓐᓇᕋᔭᕐᒥᔪᖅ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ. ᑭᓯᐊᓂᓕ, ᐊᖏᖅᑐᖃᕐᓂᖏᑉᐸᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ ᐃᔅᓯᕙᐅᑕᐅᑲᐃᓐᓇᕈᓐᓇᖅᑐᒥᑦ, ᐃᔅᓯᕙᐅᑕᐅᑲᐃᓐᓇᕈᓐᓇᖅᑐᒥᑦ ᑎᒃᑯᐊᖅᓯᒐᔭᖅᑐᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐅᑯᓂᖓ ᐊᑐᐊᒐᖃᕐᓗᑎᑦ:

ᐃᓗᓐᓇᖏᓐᓄᑦ ᐊᖏᖅᑕᐅᓗᓂ ᑎᒃᑯᐊᖅᑕᐅᓂᖓ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ;

ᑎᒃᑯᐊᖅᑕᐅᔪᖃᖅᑲᑦ ᐃᓕᓯᒪᒐᔭᖅᑐᖅ ᐊᕐᕌᒍᑕᒫᖅᓯᐅᑎᖓᑦᑕ ᑲᑎᒪᓂᔅᓴᖓᓐᓄᑦ;

ᑕᐃᒪᐃᒃᑲᓗᐊᖅᑎᓪᓗᒍ ᖁᓛᓂ ᐅᖃᖅᓯᒪᔪᒥᑦ, ᑎᒃᑯᐊᖅᑕᐅᔪᖅ ᖁᔭᓈᖅᑕᐅᒍᓐᓇᕐᒥᔪᖅ ᐃᓘᓐᓇᖏᓐᓄᑦ ᓂᕈᐊᖅᑕᐅᑉᐸᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᐃᓐᓄᖃᓐᖏᑦᑐᖅ ᐃᓐᓄᑦᑕᐅᒋᐊᖃᕋᔭᕐᒥᔪᖅ ᒪᓕᓗᒋᑦ ᒪᓕᒐᐃᑦ.

ᓂᕈᐊᕐᓂᖏᓐᓂ ᐃᔅᓯᕙᐅᑕᕐᒥᑦ ᑲᓐᖑᓇᖅᑐᒃᑯᑦ ᐸᐃᑉᐹᑎᒍᑦ ᓂᕈᐊᕋᔭᖅᑐᑦ. ᒪᕐᕉᓐᓂᖅᑲᑎᒃ ᐅᖓᑖᓄᓪᓘᓐᓃᑦ ᓂᕈᐊᕋᔅᓴᓂᒃ, ᓂᕈᐊᖅᑕᐅᓐᖏᓂᖅᓴᖅ ᐱᒐᔭᓐᖏᑦᑐᖅ ᑭᓇᑐᐃᓐᓇᖅ ᓂᕈᐊᖅᑕᐅᑦᑎᐊᓐᖏᑦᑐᖅ ᐊᒥᓲᓂᖅᓴᓄᑦ ᐊᑐᓂ ᐃᓚᒋᔭᐅᔪᑦ ᑎᓕᔭᐅᒐᔭᖅᑐᖅ ᐊᒥᓲᓂᖅᓴᓂᑦ ᓂᕈᐊᖅᑕᐅᔪᖅ. ᐊᑕᐅᓯᑐᐊᖑᓐᓂᖅᑲᑦ ᐃᔅᓯᕙᐅᑕᕐᒨᕋᓱᐊᖅᑐᖅ, ᐃᓕᑐᐃᓐᓇᕋᔭᖅᑐᖅ ᐱᖁᔨᕗᖔᖅᑎᒍᓪᓗ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ. ᐃᔅᓯᕙᐅᑕᖅ ᐲᖅᑕᐅᔪᓐᓇᖅᑐᑦ 2/3−ᒥᑦ ᓂᕈᐊᖅᑕᐅᓗᓂ ᓂᕈᐊᕈᓐᓇᖅᑐᓄᑦ ᐅᕝᕙᓘᓐᓃᑦ ᐃᓘᓐᓇᖏᓐᓄᑦ ᐊᖏᖅᑕᐅᑉᐸᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ.

ᓇᓗᓇᐃᖅᓯᒪᔪᑦ ᐱᓕᕆᐊᕆᔭᕆᐊᓕᖏᑦ ᐃᔅᓯᕙᐅᑕᐅᓂᖓᓐᓄᑦ: ᐃᔅᓯᕙᐅᑕᖅ ᐃᒪᐃᓘᖃᑦᑕᕋᔭᖅᑐᖅ:

ᖃᐅᔨᒃᑲᐃᖃᑦᑕᕐᓗᓂ ᑲᑎᒪᓂᐅᓂᐊᖅᑐᒥᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂᑦ ᐊᒻᒪᓗ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓂᐅᓂᐊᖅᑐᒥᑦ ᒪᓕᒐᕋᓛᖏᓐᓂ ᒪᓕᓪᓗᓂ;

ᑎᑎᕋᖅᑕᐅᖏᓐᓇᕆᐊᓖᑦ ᑲᑎᒪᓂᓕᒫᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐊᒻᒪᓗ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᐱᓯᒪᔭᐅᖏᓐᓇᕐᓗᑎᓪᓗ; ᐊᒻᒪᓗ − ᑎᑎᕋᖅᓯᒪᑦᑎᐊᕐᓗᑎᑦ ᐊᑎᖏᑦ, ᑐᕌᕈᑎᖏᑦ ᐅᖄᓚᐅᑎᖓᑦᑕ ᓈᓴᐅᑎᖏᑦ ᑎᓕᔭᐅᓯᒪᔪᓕᒫᑦ, ᓯᕗᓕᖅᑏᑦ ᑲᑎᒪᔨᕋᓛᖏᑦ, ᐃᓚᒋᔭᐅᔪᑦ ᑲᑎᒪᔨᐅᔪᓄᑦ, ᑲᑎᒪᔨᕋᓛᑦ ᐸᕐᓇᑦᑏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᐊᒻᒪᓗ ᑲᑎᒪᓂᐅᔪᑦ ᐊᒻᒪᓗ ᐃᖅᑲᓇᐃᔭᖅᑏᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᒥ ᐱᓯᒪᔭᐅᖏᓐᓇᕐᓗᑎᑦ.

ᐊᓯᖏᑦ ᐱᓕᕆᐊᔅᓴᖏᑦ ᐃᔅᓯᕙᐅᑕᐅᑉ: ᐃᔅᓯᕙᐅᑕᖅ ᓇᓗᓇᐃᖅᓯᒋᐊᓕᑦ ᒪᑐᐃᕐᓂᖓᓐᓂ ᒪᑐᓂᖓᓐᓂᓪᓗ ᐊᕐᕌᒍᑕᒫᖅᓯᐅᑎ ᑲᑎᒪᓂᐅᔪᖅ. ᐅᖃᕋᔭᖅᑐᖅ ᓂᓪᓕᐊᒍᓇᓕᕐᓂᖏᓐᓂ ᖃᐅᔨᓴᑦᑕᐅᑦᑎᐊᕐᓗᑎᓪᓗ ᒪᓕᒐᕐᓂᑦ ᒪᓕᑦᑎᐊᓕᕋᓗᐊᕐᒪᖔᑕ ᐊᕐᕌᒍᑕᒫᖅᓯᐅᑎᖏᓐᓂ ᑲᑎᒪᑎᓪᓗᒋᑦ, ᓂᓪᓕᐊᒍᓐᓇᖅᑎᑕᐅᓪᓗᑎᓪᓗ, ᐊᐱᕆᔪᓐᓇᖅᑐᑎᓪᓗ ᓂᕈᐊᕐᓇᐅᓂᐊᖅᑐᓂᑦ ᐃᓱᒪᓕᐊᒥᓂᕐᓂᓪᓗ ᓂᕈᐊᕈᑕᒥᓂᕐᓂᓪᓗ. 

ᓇᓪᓕᑭᑕᐅᑎᖃᑦᑕᕐᓂᖏᑦ ᐃᔅᓯᕙᐅᑕᐃᑦ: ᐊᔪᕐᓇᓐᖏᓐᓂᓕᒫᖓᓂ ᒪᓕᑦᑎᐊᕐᓗᑎᑦ, ᓇᓪᓕᑭᑕᐅᑎᖃᑦᑕᕐᓂᐊᖅᑐᑦ ᐃᔅᓯᕙᐅᑕᐃᑦ ᑕᐃᒪᒃ ᑎᓴᒪᑦ ᐊᕐᕌᒍᑦ ᐃᓗᐊᓂ, ᐃᔅᓯᕙᐅᑕᐃᑦ ᓂᕈᐊᖅᑕᐅᖃᑦᑕᕋᔭᕐᖓᑕ ᐊᓯᖏᑦ ᐃᓚᐅᔭᐅᓂᖏᓐᓄᑦ.

ᒪᓕᒐᖅ V – ᓯᕗᓕᖅᑏᑦ ᑲᑎᔨᕋᓛᖏᑦ

ᑲᑎᒪᖃᑕᐅᓂᖏᑦ

ᓯᕗᓕᖅᑏᑦ ᑲᑎᒪᔨᕋᓛᖏᓐᓃᑦᑐᑦ ᑲᑎᒪᖃᑕᐅᔪᓐᓇᓂᓐᖏᑉᐸᑦ ᓯᕗᓂᖓᓐᓂ ᖃᐅᔨᒃᑲᐃᒋᐊᓕᒃ ᐃᔅᓯᕙᐅᑕᕐᒥᑦ ᑕᐃᒪᒃ ᐃᓇᖐᓂᐊᖅᑐᒥᑦ ᑎᒃᑯᐊᖅᓯᓂᐊᕐᖓᑕ ᐃᓐᓇᕐᒥᑦ ᐃᓄᒻᒥ ᑭᒡᒐᖅᑐᐃᓂᐊᖅᑐᒥᑦ ᐱᓗᐊᖅᑐᒥᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᑲᑎᒪᓂᐅᔪᒥᑦ. ᑕᐃᓐᓇ ᓂᕈᐊᕈᓐᓇᕐᓂᖃᕐᒥᔪᖅ ᓴᖅᑭᖅᑐᓂᑦ ᑲᑎᒪᓂᐅᔪᒥᑦ ᓯᕗᓕᖅᑏᑦ ᑲᑎᒪᔨᕌᓛᖏᓐᓄᑦ.

ᑲᑎᒪᓂᐅᔪᑦ

ᓯᕗᓕᖅᑏᑦ ᑲᑎᒪᔨᕋᓛᖏᑦ ᑲᑎᒪᒍᓐᓇᖅᑐᑦ ᓇᒥᑐᐃᓐᓇᖅ, ᓈᒻᒪᑦᑐᒋᔭᒥᓂᒃ, ᐱᓕᕆᓂᐊᖅᑎᓪᓗᒋᑦ.

ᓯᕗᓕᖅᑏᑦ ᑲᑎᒪᔨᕋᓛᖏᑦ ᒪᕐᕈᐊᖅᑎᕐᔪᐊᖑᓐᓃᑦ ᑲᑎᒪᖃᑦᑕᕆᐊᓖᑦ ᐊᕐᕌᒍᑕᒫᑦ.

ᓯᕗᓕᖅᑏᑦ ᑲᑎᒪᔨᕋᓛᖏᑦ ᑲᑎᒪᒐᔪᖃᑦᑕᕆᐊᓖᑦ ᖃᖓᐅᓂᖓᓐᓂ ᓇᒥᐅᓂᖓᓐᓂᓪᓗ ᓯᕗᓕᖅᑏᑦ ᑲᑎᒪᔨᕋᓛᖏᑦ ᓇᓗᓇᐃᖅᓯᑉᐸᑕ. ᓯᕗᓕᖅᑏᑦ ᑲᑎᒪᔨᕋᓛᖏᑦ ᑲᑎᒪᒐᔭᖅᑐᑦ ᑭᖑᓂᑦᑎᐊᖓᓂ ᑲᑎᒪᓂᑐᐃᓐᓇᐅᕋᑖᖅᑐᒥ ᐊᕐᕌᖑᑕᒫᖅᓯᐅᑎᖓᑦᑕ ᑲᑎᒪᓂᖓᓐᓂ.

ᖃᐅᔨᒃᑲᐃᒋᐊᓖᑦ ᖃᑦᑎᒥ ᓇᒥᓗ ᑲᑎᒪᑎᑦᑎᓂᐊᕐᒪᖔᑕ ᓯᕗᓕᖅᑏᑦ ᑲᑎᒪᔨᕋᓛᖏᑦ ᑐᔪᐃᓗᑎᑦ ᓱᒃᑲᔪᒃᑯᑦ, ᐸᐃᑉᐹᑎᒍᑦ ᐊᑎᓕᐅᕆᐊᓕᒃᑯᓪᓘᓐᓃᑦ ᑎᑎᖅᑲᓂᐊᕐᕕᒃᑯᑦ, ᐅᓪᓗᐃᑦ ᖁᓕᑦ ᓯᕗᓂᖓᓐᓂ ᑲᑎᒪᓂᐅᓂᐊᖅᑐᒥᑦ, ᑲᑎᒪᑦᑕᐅᑎᒋᔭᕆᐊᖃᕆᓪᓗᑎᓪᓗ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᓚᐅᖅᑎᓪᓗᒋᑦ ᓂᕈᐊᖅᑕᐅᕋᑖᖅᑐᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐅᓪᓗᐃᑦ ᖁᓖᑦ ᓯᕗᓂᖓᓂᐅᓐᖏᑦᑑᒐᓗᐊᖅ ᑲᑎᒪᑎᑕᐅᓗᑎᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᑭᒡᒐᖅᑐᐃᔨᖏᑦ.ᑕᐃᒪᐃᒋᐊᓕᒃ ᓂᕈᐊᖅᑕᐅᕋᑖᖅᑐᒥᓂᕐᓄᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᐊᕐᕌᒍᑕᒫᖅᓯᐅᑎᖓᓐᓂ ᑲᑎᒪᑎᓪᓗᒋᑦ ᐊᒻᒪᓗ ᑲᑎᒪᓂᑐᐃᓐᓇᐅᓂᐊᖅᑐᒥᑦ ᐊᕐᕌᒍᑕᒫᖅᓯᐅᑏᑦ ᑲᑎᒪᓂᖓᓐᓂ.

ᑲᑎᒪᑎᓪᓗᒋᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᓯᕗᓂᖓᓐᓂ ᖃᐅᔨᒃᑲᖅᑕᐅᖏᒃᑲᓗᐊᕐᓗᑎᑦ ᑭᒡᒐᖅᑐᐃᔨᓕᒫᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐅᐸᔅᓯᒪᔪᐃᓐᓇᐅᓗᑎᑦ ᐊᒻᒪᓗ ᖃᐅᔨᒃᑲᖅᑕᐅᖏᒃᑲᓗᐊᕐᓗᑎᑦ ᑲᔪᓯᒍᓐᓇᖅᑐᑦ.

ᑕᒻᒪᖅᓯᒪᔪᓂᑦ ᐃᓚᑯᓂᓪᓘᓐᓃᑦ ᑲᑎᒪᓂᐅᓂᐊᖅᑐᒥᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ ᐊᑐᓐᖏᑦᑑᔭᕆᐊᓕᒻᒥ ᐃᓱᒪᒋᔭᐅᒋᐊᓕᒃ ᑲᑎᒪᓂᐅᔪᒥᑦ ᐅᕝᕙᓘᓐᓃᑦ ᖁᔭᓐᓈᖅᓯᑐᐃᓐᓇᕆᐊᖃᓐᖏᒻᒥᔪᑦ ᑭᒡᒐᖅᑐᐃᔨᓕᒫᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐅᐸᔅᓯᒪᑎᓪᓗᒋᑦ ᑲᑎᒪᓂᐅᓂᐊᕐᓂᕋᖅᑕᒥ.

ᓇᓪᓕᐊᑐᐃᓐᓇᖅ ᑭᒡᒐᖅᑐᐃᔨ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᓯᕗᓂᖓᓂ ᑭᖑᓂᖓᓂᓗᓐᓃᑦ ᑲᑎᒪᓂᕆᔭᖓᓐᓂ, ᖁᔭᓈᖅᓯᒍᓇᖅᑐᑦ ᖃᐅᔨᒃᑲᖅᑕᐅᖏᒃᑲᓗᐊᖅᑲᑦ ᐊᒻᒪᓗ ᐊᑐᖅᑕᐅᔪᓐᓇᖅᑐᑎᑦ ᐊᒻᒪᓗ ᓈᒻᒪᒋᔭᐅᓗᑎᑦ ᑲᔪᓯᔪᓕᒫᑦ ᑲᑎᒪᓂᐅᑉ ᐃᓗᐊᓃᕋᑖᖅᑐᓂᒃ.

ᐊᒥᓲᓂᖏᑦ ᑲᑎᒪᓂᕐᒥ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐅᑯᓂᖓ ᐱᖃᓯᐅᔾᔨᒋᐊᓖᑦ ᐃᔅᓯᕙᐅᑕᖓᓐᓂ 2/3−ᓂᑦ ᐃᓚᒋᔭᐅᔪᓂᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ. ᐅᐸᔅᓯᒪᔪᖃᓐᖏᑉᐸᑦ ᑲᑎᒪᔨᓂᑦ ᓱᑳᑦᑕᒥ 2/3−ᓂᑦ ᐅᐸᔅᓯᒪᔪᖃᕆᐊᓕᒃ ᑲᓇᑕᒥ, ᐊᓛᔅᑲᒥ ᑲᓛᖡᑦ ᓄᓈᓂᖔᖅᑐᓂᓪᓗ ᐊᒥᓲᓂᖏᑦ ᓈᒻᒪᒍᓐᓇᖁᓪᓗᒋᑦ ᐊᒻᒪᓗ ᐃᔅᓯᕙᐅᑕᕐᒥᑦ ᐸᐃᑉᐹᓕᒫᑦ ᑐᓂᒋᐊᓖᑦ ᑐᓂᐅᖅᑲᖅᑕᐅᓗᑎᑦ ᑲᑎᒪᓂᐅᔪᒥᑦ ᐱᖃᑕᐅᔪᖃᕐᓂᖏᑉᐸᑦ ᓱᑳᑦᑲᒥ ᑭᖑᕙᖅᓯᒪᓐᖏᓪᓗᑎᑦ.

ᐲᖅᑕᐅᓂᖏᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ

ᐃᓚᒋᔭᐅᔪᖅ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᓯᖁᒥᑦᑎᔪᒥᓂᖅ ᒪᓕᒐᕐᓂᑦ ᒪᓕᒐᕐᔪᐊᖏᓐᓂ ᒪᓕᒐᕋᓛᖏᓐᓂᓪᓗ ᐃᒪᐃᑕᐅᒍᓐᓇᖅᑐᖅ, ᓈᓚᓐᓂᖃᕐᓗᑎᑦ, ᓄᖅᑲᖅᑎᑕᐅᑲᐃᓐᓇᕐᓗᓂ ᐅᕝᕙᓘᓐᓃᑦ ᐲᖅᑕᐅᓗᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᓇᒻᒥᓂᖅ ᐃᓚᒋᔭᐅᔪᓂᒃ ᒪᓕᓪᓗᒋᑦ ᐊᓪᓚᕕᐅᑉ ᐃᓗᐊᓂ ᒪᓕᒐᕐᓂᑦ, ᑎᑎᖅᑲᑎᒍᑦ ᖃᐅᔨᒃᑲᖅᑕᐅᓗᓂ ᓄᖅᑲᖓᑎᑕᐅᑲᐃᓐᓇᓕᕐᓂᖓᓐᓂ ᐃᔅᓯᕙᐅᑕᕐᒧᑦ.

ᐅᓂᒃᑳᓕᐊᖑᓯᒪᔪᑦ: ᓯᕗᓕᖅᑏᑦ ᑲᑎᒪᔨᕋᓛᖏᑦ ᑐᓂᓯᒍᓐᓇᖅᑐᖅ ᑎᑎᖅᑲᒥ ᐊᕐᕌᒍᑕᒫᖅᓯᐅᑎᖓᑦᑕ ᐅᓂᒃᑳᖏᓐᓄᑦ ᐊᑐᓂ ᐃᓚᒋᔭᐅᔪᓂᓐᖔᕐᓗᑎᑦ. 

ᒪᓕᒐᖅ VI – ᐅᖃᐅᓯᓕᕆᓂᖅ

ᓇᓗᓇᐃᖅᑕᐅᓯᒪᓂᖓ ᐊᒻᒪᓗ ᐊᑐᖅᑕᐅᕙᑦᑐᑦ ᐅᖃᐅᓯᑦ

ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓄᑦ ᐃᓄᐃᑦ ᐅᖃᐅᓯᖓ. ᐊᑐᖅᑕᐅᕙᑦᑐᑦ ᐅᖃᐅᓯᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᖃᓪᓗᓈᑎᑐᑦ ᐃᓄᑦᑎᑐᓪᓗ.

ᑐᓵᔨᓕᕆᓂᖅ

ᑐᓵᔨᑦᑕᖃᖃᑦᑕᕋᔭᖅᑐᖅ ᐊᑐᕆᐊᓕᓐᓂᒃ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ ᐊᑐᕐᓗᒋᑦ.

ᑎᑎᕋᖅᑕᐅᖃᑦᑕᕐᓂᖏᑦ

ᑲᑎᒪᔾᔪᑎᔅᓴᐃᑦ ᐊᓯᖏᓪᓗ ᐸᐃᑉᐹᑦ ᑲᑎᒪᔾᔪᑎᔅᓴᖏᑦ ᑲᑎᒪᑎᓪᓗᒋᑦ ᑲᑎᒪᔩᓪᓗ, ᑲᑎᒪᔨᕋᓛᓪᓗ ᐸᕐᓇᑦᑏᓪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓄᑦ ᑐᓂᔭᐅᖃᑦᑕᕋᔭᖅᑐᑦ ᐊᑕᐅᓯᕐᒥᑦ ᐅᖓᑖᓄᓪᓗᓐᓂᑦ ᐅᖃᐅᓯᕐᓂᑦ ᒪᓕᓪᓗᒋᑦ ᐱᔪᒪᔭᖏᓐᓂ. ᐅᓂᒃᑳᓕᒫᑦ, ᐱᖁᔨᕗᖔᕈᑎᓕᒫᑦ, ᐊᑐᓕᖁᔭᔪᑦ, ᐃᓱᒪᓕᐊᑦ ᑲᑎᒪᔾᔪᑎᒥᓃᓪᓗ ᑲᑎᒪᓂᐅᔪᓂᒃ ᑲᑎᒪᔨᓂᓪᓗ, ᑲᑎᒪᔨᕋᓛᓂᓪᓗ ᐸᕐᓇᑦᑎᓂᓪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᑎᑎᕋᖅᑕᐅᖃᑦᑕᕋᔭᖅᑐᑦ ᐊᑕᐅᓯᕐᒥᑦ ᐊᓯᐊᓂᓪᓘᓐᓂᑦ ᐊᑐᕐᓗᑎᑦ ᐅᖃᐅᓯᕐᒥᑦ ᐊᑐᖅᐸᑦᑕᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ.

ᒪᓕᒐᖅ VII – ᑎᓕᔭᐅᓯᒪᔪᑦ ᐱᔪᓐᓇᐅᑎᓕᕆᕙᑦᑐᓪᓗ

ᐱᔪᓐᓇᐅᑎᓕᕆᓂᕐᒧᑦ ᑲᑎᒪᔨᕋᓛᑦ

ᐱᔪᓐᓇᐅᑎᓕᕆᕙᑦᑐᓂᑦ ᑲᑎᒪᔨᕋᓛᑦᑕᖃᕐᓂᐊᖅᑐᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ ᐅᑯᐊᖑᓗᑎᑦ ᐃᔅᓯᕙᐅᑕᖅ ᐊᒻᒪᓗ ᐊᑕᐅᓯᕐᒥᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓃᓐᖔᖅᑐᓂ ᐊᑐᓂ ᐃᓚᒋᔭᐅᔪᓂᒃ. ᐱᔪᓐᓇᐅᑎᓕᕆᓂᐊᕐᓂᖅᑲᑕ ᑲᑎᒪᔨᕋᓛᑦ ᓯᕗᓕᖅᑏᑦ ᑲᑎᒪᔨᕋᓛᖓᓐᓂ ᑭᒡᒐᖅᑐᐃᔨᒥᑦ ᐃᓚᒋᔭᐅᔪᖃᕐᓂᖅᑲᑦ ᐱᔪᓐᓇᐅᑎᓕᕆᓂᕐᒧᑦ ᑲᑎᒪᔨᕋᓛᕐᒧᑦ, ᐊᓯᖏᓐᓂ ᓯᕗᓕᖅᑏᑦ ᑲᑎᒪᔨᕋᓛᖏᑦ ᐃᓚᒋᔭᔪᑦ ᐃᔅᓯᕚᖃᑕᐅᒍᓐᓇᕋᔭᖅᑐᑦ ᐱᔪᓐᓇᐅᑎᓕᕆᕙᑦᑐᓂᒃ ᑲᑎᒪᔨᕋᒫᓄᑦ. ᐱᔪᓐᓇᐅᑎᓕᕆᕙᑦᑐᓂᒃ ᑲᑎᒪᔨᕋᓛᓐᓂ ᐃᓱᒪᖃᕐᓂᖅᑲᑕ ᑎᒍᒥᐊᕈᓐᓇᕐᓂᖏᓐᓂ ᑕᒪᒃᑮᓐᓂᒃ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᑭᔨᒐᖅᑐᐃᔪᒥᑦ ᑕᕝᕙᓐᖓᑦ ᐃᓚᒋᔭᐅᔪᒥᑦ, ᑎᓕᔭᐅᓯᒪᔪᖃᕋᔭᖅᑐᑦ ᑕᐃᒪᐃᑦᑐᒧᑦ ᐱᔪᓐᓇᐅᑎᓕᕆᓂᕐᒧᑦ ᑲᑎᒪᔨᕋᓛᓄᑦ.

ᐃᓱᒪᓕᐅᕐᓂᖅ: ᐱᔪᓇᐅᑎᓕᕆᕙᑦᑐᓄᑦ ᑲᑎᒪᔨᕋᓛᑦ ᕿᒥᕐᕈᒍᓐᓇᖅᑐᑦ ᓴᖅᑭᖅᑕᐅᔪᓂᒃ ᒪᓕᓪᓗᒋᑦ ᑎᑎᕋᖅᓯᒪᔪᖅ 5 ᐊᒻᒪᓗ ᐅᓂᒃᑳᓕᐅᕐᓗᑎᑦ ᑕᒪᑐᒥᖓ ᐃᓚᒋᔭᐅᔪᓃᓐᖔᕐᓗᑎᑦ. ᐃᓚᒋᔭᐅᔪᑦ ᓂᕈᐊᕐᓂᒃᑯᑦ ᑲᑎᒪᓂᖏᓐᓂ ᑭᖑᓪᓕᖅᐹᒥ ᐃᓱᒪᓕᐅᖅᑎᐅᒐᔭᖅᑐᑦ ᑕᐃᔅᓱᒥᖓ ᐃᓱᒪᒋᔭᐅᔪᒥᑦ.

ᒪᓕᒋᐊᓕᑦ: ᐱᔪᓐᓇᐅᑎᓕᕆᓂᕐᒧᑦ ᑲᑎᒪᔨᕋᓛᑦ ᒪᓕᒐᓕᐅᕈᓐᓇᖅᑐᑦ ᑕᒪᒃᑯᓄᖓ ᐃᒻᒥᒃᑰᖅᑐᓄᑦ ᐃᓱᒪᓕᐅᖅᑕᐅᒐᔭᖅᑐᓄᑦ. ᑕᐃᒪᐃᑦᑐᓄᑦ ᒪᓕᒐᐃᑦ ᐃᒪᐃᑦᑐᓕ ᐃᓚᖃᕐᓗᑎᑦ, ᑭᓯᐊᓂ ᐅᓱᖃᓐᖏᒻᒥᔪᑦ, ᑕᐃᒪᐃᓪᓗᐊᖅᑎᑦᑎᑦᖃᑦᑕᕐᓗᑎᑦ ᐊᕕᑦᑐᖅᓯᒪᔪᓃᓐᖔᖅᑐᓂᒃ ᑭᒡᒐᖅᑐᐃᔨᓂᒃ ᑎᓕᔭᐅᓯᒪᔪᓂᒃ ᐊᑐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓄ.

ᓇᓗᓇᐃᖅᑕᐅᓂᖏᑦ ᐱᔪᓐᓇᐅᑎᓕᕆᓂᕐᒧᑦ: ᐱᔪᓐᓇᕐᓂᖏᓐᓂ ᐃᓚᒋᔭᐅᔪᑦ ᓇᓗᓇᐃᖅᑕᐅᒋᐊᓖᑦ ᐃᔅᓯᕙᐅᑕᒧᑦ ᐅᓪᓗᐃᑦ 45 ᓯᕗᓂᖓᓐᓂ ᐋᖅᑭᑦᑕᐅᓚᐅᓐᖏᓐᓂᖓᓐᓂ ᑲᑎᒪᓂᐅᓂᐊᖅᑐᒥᑦ, ᐅᕝᕙᓘᓐᓃᑦ ᐊᑖᓂ ᓇᓗᓇᐃᖅᑕᐅᓯᒪᔪᒥᑦ ᐃᔅᓯᕙᐅᑕᕐᒧᑦ.

ᓈᒻᒪᓴᓐᖏᓂᐅᔪᑦ: ᑎᓕᔭᐅᓯᒪᔪᖅ ᓈᒻᒪᓴᓐᖏᑦᑐᖅ ᐃᓚᒋᔭᒥᒃ ᑕᐃᒫᓪᓗᐊᖅ ᐱᔪᓐᓇᕐᓂᖃᕋᔭᖅᑐᑦ ᐊᓯᖏᑎᑐᑦ ᑎᓕᔭᐅᓯᒪᔪᑦ ᑭᓯᐊᓂᓕ ᐱᔪᓐᓇᐅᑎᓕᓂᕐᒧᑦ ᑲᑎᒪᔨᕋᓛᑦ ᐅᖃᖅᓯᒪᓕᖅᑲᑕ ᐊᒻᒪᓗ ᑲᑎᒪᓂᐅᔪᒥᑦ ᐃᓱᒪᓕᐅᖅᑕᐅᓗᑎᑦ.

ᓂᕈᐊᕐᓃᑦ: ᐃᓱᒪᓕᐅᕋᔭᖅᑐᑦ ᐱᔪᓐᓇᐅᑎᓕᕆᓂᕐᒧᑦ ᑲᑎᒪᔨᕋᓛᑦ ᐊᒥᓲᓂᖅᓴᓄᑦ ᓂᕈᐊᖅᑕᐅᒋᐊᖃᕋᔭᖅᑐᑦ. ᓇᓪᓕᐊ ᑭᒡᒐᖅᑐᐃᔨ ᑲᑎᒪᔨᕋᓛᓂᑦ ᐃᓚᒋᔭᐅᓪᓗᓂ ᐃᔅᓯᕙᐅᑕᖅ ᓂᕈᐊᕈᓐᓇᕐᓂᖃᕋᔭᖅᑐᖅ ᐊᑕᐅᓯᐅᓐᖏᑦᑐᒥᑦ. ᑲᑎᒪᓃᑦ ᐱᔪᓐᓇᐅᑎᓕᕆᓂᕐᒧᑦ ᐱᖃᐅᓯᑎᓗᒍ ᐃᔅᓯᕙᐅᑕᖅ ᐊᑕᐅᓯᐅᓐᖏᑦᑐᒥᑦ ᓂᕈᐊᕐᓂᖃᕋᔭᖅᑐᖅ. ᑲᑎᒪᔨᓂᖏᓐᓂ ᐱᔪᓐᓇᐅᑎᓕᕆᓂᕐᒧᑦ ᑲᑎᒪᔨᕋᓛᖏᑦ ᑲᓐᖑᓇᖅᑐᒥᑦ ᑲᑎᒪᒐᔭᖅᑐᑦ ᑭᓯᐊᓂᓕ ᐊᓯᐊᒍᑦ ᐅᖃᖅᑲᐅᓂᖅᑲᑦ ᑲᑎᒪᓂᑐᐃᓐᓇᕐᒥᑦ.

ᒪᓕᒐᖅ VIII – ᑲᑎᒪᔾᔪᑎᔅᓴᑦ

ᑲᑎᒪᓂᑐᐃᓐᓇᐅᔪᑦ

ᐊᕕᑦᑐᖅᓯᒪᔪᓂᒃ ᑲᑎᒪᔾᔪᑎᔅᓴᐃᑦ ᑲᑎᒪᓂᑐᐃᓐᓇᕐᒧᑦ ᐃᒪᐃᑦᑐᓂᑦ ᐃᓗᓕᖃᕆᐊᖃᕋᔭᖅᑐᑦ:

ᑭᓱᑐᐃᓐᓇᓕᒫᑦ ᒪᑯᐊᓗ ᐱᖃᓯᐅᔾᔭᐅᒍᒪᔪᑦ ᑲᑎᒪᓂᕐᒥᑦ ᐅᕝᕙᓘᓐᓃᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ ᑲᑎᒪᓂᕆᓚᐅᖅᑕᖏᓐᓂ;

ᐃᓚᓕᐅᔾᔭᐅᖁᔭᐅᔪᑦ ᐊᕕᑦᑐᖅᓯᒪᔪᓃᓐᖔᖅᑐᑦ ᑲᑎᒪᔾᔪᑎᔅᓴᓂᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ ᖃᐅᔨᒋᐊᖅᑐᒥᓂᐅᓚᐅᖅᑎᓪᓗᒋᑦ ᐃᓚᒋᔭᐅᔪᓂᒃ ᐅᕝᕙᓘᓐᓃᑦ ᐃᔅᓯᕙᐅᑕᕐᒧᑦ;

ᐃᓚᓕᐅᔾᔭᐅᒍᒪᔪᑦ ᐃᓱᒪᒋᔭᐅᖁᔭᐅᔪᑦ ᑐᔅᓯᕋᑦ 1/3−ᖏᓐᓂ ᑎᓕᔭᐅᓯᒪᔪᓂᑦ ᑎᓕᔭᐅᓯᒪᔪᓂᒃ ᐊᑐᓂ ᐃᓚᒋᔭᐅᔪᓂ ᓂᕈᐊᕈᓐᓇᖅᑐᓂᑦ;

ᐅᓂᒃᑳᓕᐊᖏᓯᒪᔪᖅ ᐃᔅᓯᕙᐅᑕᕐᒧᑦ ᐱᓕᕆᐊᕆᓯᒪᔭᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑭᖑᓪᓕᕐᒥ ᑲᑎᒪᒻᒪᑕ; ᐊᒻᒪᓗ ᓂᕈᐊᖅᑕᐅᓚᐅᖅᑎᓪᓗᒍ ᓄᑖᖅ ᐃᔅᓯᕙᐅᑕᖅ.

ᒪᐅᓇᑐᐃᓐᓇᖅ ᑲᑎᒪᓂᐅᔪᑦ

ᐊᕕᑦᑐᖅᓯᒪᔪᓂᑦ ᑲᑎᒪᔾᔪᑎᔅᓴᓂᑦ ᒪᐅᓇᑐᐃᓐᓇᖅ ᑲᑎᒪᓂᐅᔪᒥᑦ ᐃᒪᐃᑦᑑᒍᓐᓇᖅᑐᑦ, ᐃᓱᒪᒋᒋᐊᕐᓗᒋᓪᓗ ᐱᔾᔪᑎᖏᑦ ᑲᑎᒪᓂᐅᔪᑦ ᒪᐅᓇᑐᐃᓐᓇᖅ, ᐃᓗᓕᖃᕐᓗᑎᑦ ᐃᒪᐃᑦᑐᓂᑦ:

ᐃᓚᓕᐅᑎᓗᒋᑦ ᐃᓱᒪᓕᐊᒥᓂᕐᓂᑦ ᑲᑎᒪᓂᑐᐃᓐᓇᕐᒥᑦ ᐅᕝᕙᓘᓐᓃᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ ᑲᑎᒪᓂᐅᓚᐅᖅᑐᒥ;

ᐃᓚᓕᐅᔾᔭᐅᖁᔭᐅᔪᑦ ᐊᕕᑦᑐᖅᓯᒪᔪᓃᓐᖔᖅᑐᑦ ᑲᑎᒪᔾᔪᑎᔅᓴᓂᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓂ ᖃᐅᔨᒋᐊᖅᑐᒥᓂᐅᓚᐅᖅᑎᓪᓗᒋᑦ ᐃᓚᒋᔭᐅᔪᓂᒃ ᐅᕝᕙᓘᓐᓃᑦ ᐃᔅᓯᕙᐅᑕᕐᒧᑦ; ᐊᒻᒪᓗ

ᐃᓚᓕᐅᔾᔭᐅᒍᒪᔪᑦ ᐃᓱᒪᒋᔭᐅᖁᔭᐅᔪᑦ ᑐᔅᓯᕋᑦ 1/3−ᖏᓐᓂ ᑎᓕᔭᐅᓯᒪᔪᓂᑦ ᑎᓕᔭᐅᓯᒪᔪᓂᒃ ᐊᑐᓂ ᐃᓚᒋᔭᐅᔪᓂ ᑲᑎᒪᓂᐅᔪᒥᑦ ᓂᕈᐊᕈᓐᓇᖅᑐᓂᑦ.

ᒪᓕᒐᖅ IX – ᑎᓕᔭᐅᓯᒪᔪᑦ, ᑲᑎᒪᔨᕋᓛᑦ ᐸᕐᓇᑦᑏᓪᓗ

ᑲᑎᒪᔨᕋᓛᓕᐅᕐᓂᖅ

ᑲᑎᒪᓂᐅᔪᑦ ᐅᕝᕙᓘᓐᓃᑦ ᓯᕗᓕᖅᑏᑦ ᑲᑎᒪᔨᓕᕋᓛᖏᑦ ᐋᖅᑮᔪᓐᓇᕐᒥᔪᑦ ᑎᓕᔭᐅᓯᒪᔪᓂᒃ, ᑲᑎᒪᔨᕋᓛᕐᓂᑦ ᐸᕐᓇᑦᑎᓂᓪᓘᓐᓃᑦ ᐅᖃᐅᔾᔨᒋᐊᕆᒍᓐᓇᖅᑐᓂᒃ ᐊᑐᖅᑕᐅᒋᐊᓕᓐᓂᒃ ᐊᑐᓕᖅᑎᑕᐅᓂᖏᓐᓂᓪᓗ ᐱᖁᔭᕐᓂᑦ ᐊᒻᒪᓗ ᖃᐅᔨᓴᕐᓗᑎᑦ ᐊᒻᒪᓗ ᐅᓂᒃᑲᓕᐅᓕᕐᓗᑎᑦ ᐱᔾᔪᑎᖏᓐᓂ ᒪᓕᓪᓗᒋᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂ. ᑎᓕᔭᐅᓯᒪᔪᑦ, ᑲᑎᒪᔨᕋᓛᑦ ᐸᕐᓇᑦᑏᓪᓗ ᐃᓕᓯᒪᑲᐃᓐᓇᑐᐃᓐᓇᕈᓐᓇᖅᑐᑦ ᐅᕝᕙᓘᓐᓃᑦ ᐃᓕᓯᒪᐃᓐᓇᓕᕐᓗᑎᑦ.

ᐃᓚᒋᔭᐅᔪᑦ: ᐃᓚᒋᔭᐅᔪᑦ ᓲᕐᓗ ᑎᓕᔭᐅᓯᒪᔪᕗᑦ, ᑲᑎᒪᔨᕋᓛᓐᓄᑦ ᐸᕐᓇᑦᑎᓄᓪᓗ ᐅᑯᐊᖑᔪᓐᓇᖅᑐᑦ ᑎᓕᔭᐅᔪᑦ ᐊᓯᖏᓪᓗ ᐃᒻᒥᒃᑰᖅᑐᑦ.

ᒪᓕᒐᖏᑦ: ᑲᑎᒪᓂᕐᔪᐊᒥ ᐅᕝᕙᓘᓐᓃᑦ ᓯᕗᓕᖅᑏᑦ ᑲᑎᒪᔨᕋᓛᖏᑦ ᓇᓗᓇᐃᖅᓯᒐᔭᖅᑐᑦ ᒪᓕᒐᕐᓂᑦ ᐅᓂᒃᑳᓕᐅᖃᑦᑕᕆᐊᖃᕐᓂᒥᓪᓗ, ᓈᒻᒪᒐᐃᑉᐸᑦ, ᑎᓕᔭᐅᓯᒪᔪᑦ, ᑲᑎᒪᔨᕋᓛᑦ ᐸᕐᓇᑦᑎᓄᓪᓗ. ᑕᐃᒪᐃᑦᑐᓂᑦ ᒪᓕᒐᕐᓂᑦ ᐅᓂᒃᑳᓕᐅᕆᐊᖃᕐᓂᖏᓐᓂᓪᓗ ᐋᖅᑭᖅᑕᐅᒐᔭᖅᑐᑦ ᐃᖅᑲᓇᐃᔭᖅᑎᓄᑦ ᓯᕗᓕᖅᑎᒧᑦ ᐊᓯᔾᔨᖅᑕᐅᒍᓐᓇᕋᔭᕆᓪᓗᑎᑦ ᑲᑎᒪᓂᕐᔪᐊᒥ.

ᒪᓕᒐᖅ X – ᑮᓇᐅᔾᔭᔅᓵᓂᖏᑦ

ᓇᓪᓕᐊᑐᐃᓐᓇᑦᑎᐊᖅ ᐊᖏᖅᑕᐅᓯᒪᓐᖏᑉᐸᓪᓕ ᐊᓯᐊᒍᑦ ᐃᔅᓯᕙᐅᑕᕐᒧᑦ ᓯᕗᓕᖅᑏᑦ ᑲᑎᒪᔨᕋᓛᖏᓐᓄᑦ, ᑎᓕᔭᐅᓯᓚᔪᖅ, ᓯᕗᓕᖅᑏᑦ ᑲᑎᒪᔨᕋᓛᖓ ᐅᕝᕙᓘᓐᓃᑦ ᑎᓕᔭᐅᓯᒪᔪᖅ, ᑲᑎᒪᔨᕋᓛᖅ ᐸᕐᓇᑦᑎᓪᓘᓐᓃᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂᑦ ᐊᑭᓕᖅᓱᖅᑕᐅᒐᔭᖅᑐᖅ ᐱᔨᑦᑎᕋᕐᓂᖓᓐᓄᑦ. ᓈᒻᒪᑦᑐᓂᑦ ᐊᑭᓕᖅᓱᖅᑕᐅᓗᓂ ᑎᓕᔭᐅᓯᒪᔪᑦ, ᓯᕗᓕᖅᑎ ᑲᑎᒪᔨᕋᓛᓄᑦ ᐊᒻᒪᓗ ᐃᓚᒋᔭᐅᔪᖅ ᑲᑎᒪᔨᓄᑦ, ᑲᑎᒪᔨᕋᓛᓄᑦ ᐸᕐᓇᑦᑎᓄᓪᓘᓐᓃᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂᑦ ᑲᒪᑎᓪᓗᒋᑦ ᐊᖏᖅᑕᐅᒐᔭᖅᑐᖅ ᐃᓚᒋᔭᐅᔪᖅ ᓇᒥᒥᐅᑕᐅᓂᖓᓐᓂᓪᓗ.

ᒪᓕᒐᖅ XI – ᑲᓐᖑᓇᖅᑐᓕᕆᓂᖅ

ᐊᓯᐊᒍᓪᓕ ᐅᖃᖅᑕᐅᓯᒪᓐᖏᑉᐸᑦ ᓯᕗᓕᖅᑎ ᑲᑎᒪᔨᕋᓛᓄᑦ ᐅᕝᕙᓘᓐᓃᑦ ᐃᔅᓯᕙᐅᑕᖅ, ᑎᓕᔭᐅᓯᒪᔪᖅ, ᐃᓚᒋᔭᐅᔪᖅ, ᑲᑎᒪᔨᕋᓛᓄᑦ ᐸᕐᓇᑦᑎᓄᓪᓗ, ᐱᓕᕆᔨᒻᒪᕆᓐᓄᑦ ᐃᖅᑲᓇᐃᔭᖅᑎᓄᓪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂᑦ ᑲᓐᖑᓇᖅᑐᓕᕇᓐᓇᕆᐊᓕᒃ ᓴᖅᑮᔭᕆᐊᖃᓐᖏᑦᑐᖅ ᐅᕝᕙᓘᓐᓃᑦ ᓂᓪᓕᐊᔾᔪᑎᖃᕆᐊᖃᓐᖏᑦᑐᖅ ᐊᒻᒪᓗ ᑎᑎᕋᖅᓯᒪᔪᓂᒃ ᓴᖅᑮᒋᐊᖃᓐᖏᑦᑐᑦ ᐱᓕᕆᐊᓂᑦ ᑲᒪᒋᔭᐅᔪᓂᓪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓂᑦ.

ᒪᓕᒐᖅ XII – ᐊᓯᔾᔩᓂᖅ

ᐊᓯᔾᔨᕆᐊᓕᑦᑕᖃᕐᓂᖅᑲᑦ ᒪᓕᒐᕋᓛᓐᓂᒃ ᐊᖏᖅᑕᐅᖅᑳᕆᐊᓖᑦ 2/3−ᓄᑦ ᑎᓕᔭᐅᓯᒪᔪᓕᒫᓄᑦ ᐃᓚᒋᔭᐅᔪᓄᑦ ᓂᕈᐊᕈᓐᓇᖅᑐᓄᑦ.