Sitipiri 30, 2021 – Aatuaa, Kanata – Ullumi, Kanata nutaamik gavamatuqakkut maligatigut qikarnaqalirmat taijaujuq Kanatalimaami Ullunga Sulijumik Kiglisiniarnirmiglu. Ulluq iqqaumajjutauvuq atuqtauqattarnikunik amma quaqsaarnaqtukkuurutauqattalauqtunik ilinniariaqtitauvalauqtunut, upigilugillut aniguisimajut, amma ilagiit, amma nunalilimaat qiksaaqainnaqtut taikkununga ilanngautaulauqtunut.
“Saqqitauninga Kanatalimaami ulluq sulijumik isumagijunnaiqatigiingnirmullu pimmariulluni alluriarutiujuq mamisarnirmut,” uqaqtuq Inuit Ukiuqtaqtumiuqatigiit Katimajingit Angajuqqaangat Maanika Iul−Kanajuq. “Mamisarniq akuniusuunguvuq, ilaannikkut inuusilimaaq piliriangusuunguvuq. Amisut Inuit mamisarnirmiimmata. Nunaliqutivut mamisariaqarmata kinguvaariit quaqsaaqsimanirilauqtangit qatanngutigiit arraagut qulit iluani. Ulluq taimaak piviqaqtitsijuq kikkulimaanit Kanatamit isumagijaqarnirmit qanuinniulauqtunit ilinniariaqtitauvalauqtunut. Tamatumani arraagumi piluannguaqtuni, qaujijautillugit 100−nginniittut nalunaiqtausimanngittut iluviit nunaqaqqaaqsimajut nutaqqat ilinniariaqtitauvalauqsimajut qanigijaani, pijjutiqaqpugut nuqqalaukagumalluta takuksautittilutalu tukittiavangmik sulijumik Kiglisiniarnirmiglu.”
Juuni 2021−mi, Kanataup Maligaliurvigjuanga tamainnut aniguqtittilauqput maligaliangujumajumik Sitipiri 30−mi Kanatami Ullurijauniaqtumik Sulijumik Kiglisiniarnirmiglu. Tikkuaqtausimajuq akiliqsuqtaulluni qikarnaq gavamatuqakkut iqqanaijaqtinginnut uqausiqarivuq ilangannik 94−nik qanuiliuqujijunik sulijumik isumagijunnaiqatigiingnirmullu kiglisiniaqtikkunnit: “Tiliuqpavut gavamatuqakkut, piliriqatiqarlutik Nunaqaqqaaqsimajunik, aaqqiksimaliqtittijumalluta piqujatigut qikarnauninganik, kanatalimaami Ullurijauniaqtumik Sulijumik Kiglisiniarnirmiglu upigijaqarnirmut aniguisimajunut, ilaminut, nunalingmiunullu, nalunngittiarumanirmullu kikkutuinnanut iqqaumajjutauvalauqtunik qanuiliuqtauvalauqtunut atuqtauvalauqtunullu ilinniariaqtitauvalauqsimajunut pimmarialuunginnaqpuq ilagijaulluni aaqqigiarutiqarnirmut kajusinirijauvaktumut.”
“Nalunngilanga takuniaqtugut amisunik inungnik atuqtunik aupajaaqtunik uvinirurnik ullumi,” uqaqtuq Maanika Iul−Kanajuq. “Nalunaikkutat pimmariujut. Aturniq aupajaaqtumik uvinirurmik, takuksautittiluniluunniit aupajaaqtumik saimmatimik, uvvaluunniit aupajaaqtumik qaqiqquarmik takuksautittijuq kamagittiarnirnik ikajurtunilu kanatalimaami mamisarnirmi pivallianirmi. Pikkugivakka kanatami ukiuqtaqtumilu aviksimanirijaujut katimajiuqatauliqtut nalunaiqsillutiglu nuqqangannauniaqtumik ullumi, tamakkua unurniqsat inuit piviksaqarunnaqullugit isumagijaqarunnaqullugit qanuinniulauqtunik tamarmittiaq atauttikkut.”
-30-
Qaujigiarvigiguk:
Sitiivan Hanturi
ICC (Kanata)
1 613 668-1923
type88@post.com