ᔭᓄᐊᕆ 31, 2024 – ᓚᓐᑕᓐ, ᔪᑦᓀᑎᑦ ᑭᖕᑕᒻ — ᓄᓇᓕᑐᙯᑦ ᐱᒍᓐᓇᐅᑎᖏᑦ ᓱᓕᓕᕐᑎᑕᐅᓯᒪᓕᕐᑐᑦ ᐊᖏᖃᑎᒌᒐᓱᐊᓚᐅᔪᑎᓪᓗᒋᑦ ᐱᓇᓱᐊᕈᓯᐅᓚᐅᔪᒥ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᓂᕐᒥᒃ ᐱᓇᓱᐊᓲᑦ (IMO) ᐊᑐᕐᓂᖃᕐᓂᐊᑐᓂᒃ. ᐱᖁᔭᖅ 29, 41, 42 ᓯᓚᕐᔪᐊᓕᒫᒥ ᑲᑎᖕᖓᔩᑦ ᐅᖃᒻᒪᕆᒍᑎᖓᒍᑦ ᓄᓇᓕᑐᙯᑦ ᐱᒍᓐᓇᐅᑎᖏᓐᓂᒃ, ᐅᖃᓚᐅᔪᒻᒪᑕ ᐱᒻᒪᕆᐅᓂᖓᓂᒃ ᐊᕙᑎᐅᑉ ᓴᐳᒻᒥᔭᐅᒋᐊᖃᕐᓂᖓᓂᒃ, ᐊᖑᓇᓱᑦᑏᓗ ᐊᑐᕐᑕᐅᓗᑎᒃ, ᑲᕙᒣᓪᓗ ᑖᒃᑯᓂᖓ ᐅᖃᒻᒪᕆᒍᑎᐅᓯᒪᔪᓂᒃ ᓯᓚᕐᔪᐊᓕᒫᒥ ᑲᑎᖕᖓᔨᐅᔪᓄᑦ ᐊᑐᓕᕐᑎᓯᑦᓯᐊᓗᑎᒃ, ᐃᒪᐅᑎᑕᐅᔪᒍᑦ ᐊᐅᓚᑦᔭᕆᐊᕈᑎᑦᓴᓂ ᐸᕐᓇᐅᓯᒪᔪᓂ ᐃᒪᐅᑉ ᐃᕐᖃᖓᒍᑦ ᓱᕐᕙᓗᖃᓗᐊᕐᓂᒥᒃ ᓄᖑᑎᑦᓯᒐᓱᐊᕐᓂᒧᑦ ᐅᒥᐊᕐᔪᐊᓄᑦ ᓱᕐᕙᓗᒋᔭᐅᓲᓂᒃ. ᒪᓕᒐᑦᓭᑦ ᐃᓄᐃᑦ ᓄᓇᖓᓐᓂ Inuit Nunaat Guidelines ᓱᓕᓕᕐᑎᑕᐅᓚᐅᕐᒥᔪᑦ ᓯᓚᕐᔪᐊᓕᒫᒥᓗ ᐅᒥᐊᕐᔪᐊᓕᕆᔨᐅᕙᑦᑐᓄᑦ ᐊᖏᕐᑕᐅᓱᑎᒃ.
“ᐱᓇᓱᐊᓚᐅᕐᑕᑎᓐᓄᑦ ᐱᓇᓱᐊᕈᓯᐅᓚᐅᕐᑐᒥ ᑫᓪᓚᑐᕐᑕᐅᕗᒍᑦ”, ᐅᖃᓚᐅᕐᑐᖅ ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦᑕ (ICC) ᐊᖓᔪᕐᖄᖓᑕ ᑐᖓᓕᖓ ᐊᒻᒪᓗ ᑐᑭᒧᐊᑦᑎᓯᑦᓱᓂ ᑭᒡᒐᑐᕐᑐᓂᒃ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᔪᓂᒃ ᓖᓴ ᕿᓗᕐᕿ ᖁᐱᕐᕈᐊᓗᒃ. “ᓯᓚᕐᔪᐊᓕᒫᒥ ᐅᒥᐊᕐᒧᐊᑎᒍᑦ ᐊᐅᓚᒍᑎᓕᕆᔩᑦ ᐃᓚᐅᑎᑦᓯᓚᐅᕐᑐᑦ ᓯᓚᕐᔪᐊᓕᒫᒥ ᑲᑎᖕᖓᔩᑦ ᐅᖃᒻᒪᕆᐅᑎᖏᓐᓂᒃ ᓄᓇᓕᑐᙯᑦ ᐱᒍᓐᓇᐅᑎᖏᓐᓂᒃ ᐱᓇᓱᐊᕐᑕᒥᓄᑦ ᐃᒪᐅᑉ ᐃᕐᖃᖓᒍᑦ ᓱᕐᕙᓗᓐᓂᒃ ᐃᑭᓪᓕᑎᕆᒐᓱᐊᕐᓂᒥᒃ, ᑭᓯᐊᓂ ᑐᕌᒐᖃᓚᐅᕋᑦᑕ ᓄᓇᓕᑐᙯᑦ ᖃᐅᔨᒪᐅᓯᖏᑦ ᐃᓚᐅᑎᑕᐅᖁᑦᓱᒋᑦ ᐊᐅᓚᑦᔭᕆᐊᕈᑎᓕᐊᓄᑦ ᐸᕐᓇᑕᐅᔪᓄᑦ ᐃᓚᐅᑎᑕᐅᒻᒥᓗᑎᓪᓗ ᐸᕐᓇᓂᕐᓂ, ᐃᖏᕐᕋᑎᑦᓯᓂᕐᓂ ᓱᕐᕙᓗᓐᓂᒃ ᓄᖑᑎᑦᓯᒐᓱᐊᕐᓂᖅ ᐱᒐᓱᐊᕋᑦᑎᒍ ᐱᔭᕆᓚᐅᕐᑕᐅᕗᑦ.”
ᐱᓇᓱᐊᕐᑕᕗᑦ ᓯᕗᒧᐊᒻᒪᑦ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᔨᓂ ᓱᕐᕙᓗᖃᖕᖏᓂᕐᓴᐅᖁᑦᓱᒋᑦ ᐅᒥᐊᕐᔪᐊᑦ ᓄᓇᑦᑎᓅᕐᐸᑐᑦ ᓈᒻᒪᓈᑦᓯᐊᑐᖅ ᐃᓄᐃᑦ ᐅᑭᐅᕐᑕᑐᒥᐅᑦ ᓄᐃᑎᑦᓯᓚᐅᕐᒥᑎᓪᓗᒋᑦ ᖃᓄᐃᓕᖓᔪᒦᒍᑎᖃᕐᓂᒥᓂᒃ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᕙᑦᑐᓄᑦ IMO position paper, ᑕᒪᓐᓇ ᐱᒻᒪᕆᐅᑎᓪᓗᒍ ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦᑕ ᐊᐅᓚᑦᔭᕆᐊᕈᑎᒋᓯᒪᔭᖓ ᐱᓇᓱᐊᖃᑎᐅᒍᒪᑦᓱᑎᒃ ᓯᓚᕐᔪᐊᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᓂᐅᑉ ᐊᐅᓚᑕᐅᓂᖓᓄᑦ. “ᐱᓇᓱᐊᕈᓯᐅᓚᐅᕐᑐᒥ ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦᑕ ᐱᓇᓱᐊᕐᓂᕆᖃᑦᑕᑕᖓ ᐱᒻᒪᕆᐅᓂᖓᓂᒃ ᓄᐃᑦᓯᔪᖅ ᓂᐱᖃᖃᑦᑕᕆᐊᖃᕐᓂᑎᓐᓂᒃ ᓂᐱᖃᕐᑎᑕᐅᖃᑦᑕᓚᐅᕋᑦᑕ ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᓐᓄᑦ ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᔩᑦ ᑲᑎᒪᓂᖏᓐᓂ,” ᐅᖃᓚᐅᕐᑐᖅ ᓯᐊᔭ ᐆᓪᓯᕕᒃ, ᓯᓚᕐᔪᐊᒥ ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦᑕ ᐊᖓᔪᕐᖄᖓ. “ᐃᓚᐅᑎᑕᐅᓂᕗᑦ ᑕᕆᐅᒥ ᒪᓕᒐᓕᐅᕐᑐᓄᑦ ᐊᑐᕐᓂᖃᓪᓚᕆᑦᑐᖅ ᐅᕙᑦᑎᓄᑦ, ᑕᕆᐅᒥᒃ ᐃᓅᕕᖃᕋᑦᑕ, ᐅᒪᔪᕐᓯᐅᕕᒋᒐᑦᑎᒍ ᓂᕿᖃᕐᕕᒋᑦᓱᒍᓗ ᖃᓄᐃᖕᖏᓯᐊᕐᓂᓕᒫᑦᑎᓄᑦ ᐱᑐᑦᓯᒪᓂᖃᕐᒪᑦ.”
ᐊᐅᓚᑦᔭᕆᐊᕈᑎᑦᓭᑦ ᐸᕐᓇᑕᐅᓯᒪᔪᑦ ᐊᑑᑎᔭᐅᖃᑦᑕᓯᒪᔪᓪᓗ (EBP) ᐱᓇᓱᐊᕐᑕᐅᓂᖏᑦ ᐊᖏᖃᑎᒌᒍᑎᐅᑉ ᐊᕙᓗᓕᕐᑕᐅᒍᑎᑦᓴᖏᑦ ᐊᖏᕈᑎᐅᓯᒪᔪᑦ ᐱᓇᓱᐊᕈᓯᐅᓚᐅᕐᑐᒥ ᑲᑎᒪᓂᖃᕐᑎᓗᒋᑦ ᑲᑎᒪᔩᑦ ᐅᒥᐊᕐᔪᐊᑦ ᖃᓄᐃᑦᑐᓂᒃ ᓴᓇᒻᒪᖃᕐᑐᓴᐅᒻᒪᖔᑕ ᓴᓇᔭᐅᒍᑎᖏᓪᓗ (SDC 10) ᓯᓚᕐᔪᐊᓕᒫᒥ ᐅᒥᐊᕐᔪᐊᑎᒍᑦ ᐊᐅᓚᒍᑎᓕᕆᔩᑦ ᑲᑎᖕᖓᔨᖏᑦ ᑕᑯᒍᓐᓇᖃᑦᑕᓂᐊᓕᕐᑐᑦ ᑕᕆᐅᑉ ᐊᕙᑎᖓᑕ ᓴᐳᒻᒥᔭᐅᓂᖓᓄᑦ ᑲᑎᖕᖓᔨᓂᒃ (MEPC81) ᐊᖏᕐᑕᐅᔪᑦᓴᐅᑎᓪᓗᒋᑦ. ᐊᖏᕐᑕᐅᓂᕈᑎᒃ ᐱᕙᓪᓕᐊᒍᑎᐅᒍᓐᓇᓂᐊᕐᑐᑦ ᐊᕐᕌᒍᓂ ᐱᖓᓱᓂ ᐊᑑᑎᔭᐅᖃᑦᑕᓯᒪᔪᑦ ᑐᖕᖓᕕᒋᓗᒋᑦ ᐱᓇᓱᐊᖃᑎᐅᓗᑎᓪᓗ ᐊᑕᐅᑦᓯᑯᑦ ᓄᐃᑦᓯᒍᑎᐅᒐᔭᕐᑐᓂᒃ ᒪᓕᑦᑕᐅᒋᐊᖃᕐᓂᐊᓗᑎᒃ ᓄᓇᖕᖑᐊᖃᕐᒥᓗᑎᒃ ᒪᓕᒐᑦᓴᖏᓐᓂᒃ.
ᒪᓕᒉᑦ, ᐊᐅᓚᑦᔭᕆᐊᕐᓂᒧᑦ ᐸᕐᓇᓯᒪᒍᑏᑦ, ᐊᑑᑎᔭᐅᖃᑦᑕᓯᒪᔪᓂᓪᓗ ᑐᖕᖓᕕᖃᕐᑐᓂᒃ ᐸᕐᓇᕈᑏᑦ ᐊᑑᑎᒍᒪᔪᓄᑦ ᐊᑐᕐᑕᐅᒐᔭᕐᑐᑦ. ᖃᐅᔨᓴᕐᑕᐅᓯᒪᔪᑎᒍᑦ ᖃᐅᔨᔭᐅᓯᒪᔪᖅ ᐱᓇᓱᐊᕐᑐᖃᓪᓚᕆᑦᓯᒪᖕᖏᓂᖓᓂᒃ ᐅᒥᐊᕐᔪᐊᑦ ᓱᕐᕙᓛᓗᐊᕐᓂᕆᓲᖓᓂᒃ 2014-ᒥ ᐃᒪᐅᑉ ᐃᕐᖃᖓᒍᑦ ᓱᕐᕙᓗᓂᒃ ᓄᖑᑎᑦᓯᒋᐊᕐᓂᐊᓂᕋᕐᓯᒪᑦᓱᑎᒃ. ᑌᒣᑦᑐᓭᓐᓇᐅᒥᔪᖅ ᐅᑭᐅᕐᑕᑐᒥ ᐃᓄᐃᓪᓗ ᓄᓇᖓᓐᓂ, ᓱᕐᕙᓗᐃᑦ ᒪᕐᕈᕕᓪᓗᐊᑐᒥᒃ ᓱᕐᕙᓛᓂᕐᓴᐅᓕᕐᒪᑕ ᐊᕐᕌᒍᓂ ᐊᓂᒍᕐᑐᓂ ᐅᒥᐊᕐᔪᐊᓗ ᐊᒥᓱᖕᖑᓕᐅᒥᓯᒪᑦᓱᑎᒃ. ᒪᓕᑦᑕᐅᒋᐊᖃᓪᓚᕆᑦᑐᓂᒃ ᐱᑕᖃᕐᑎᓇᒍ, ᐃᒪᐅᑉ ᐃᕐᖃᖓᓂ ᓱᕐᕙᓛᔪᑦ ᓱᕐᕋᑕᐅᓪᓗᐊᕋᔭᖕᖏᓂᖓ. ᐃᓄᐃᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑦ ᐅᑭᐅᕐᑕᑐᒥ ᑲᕙᒪᓂᒃ, ᐅᓯᑲᑦᑕᑎᓂᒃ ᓇᒻᒥᓂᓕᓐᓂᒃ ᐅᒥᐊᕐᑐᑎᐅᕙᑦᑐᓂᓪᓗ ᐊᑕᓐᓂᐅᕕᖃᕐᑐᑦ ᐊᑐᓕᕐᑎᓯᖁᑦᓱᒋᑦ ᒪᓕᒐᕐᓂᒃ ᓴᐳᒻᒥᓗᑎᓪᓗ ᒪᓕᒐᕐᓂᒃ ᖃᒻᒥᐅᒍᓐᓇᕕᓕᒫᖓᒍᑦ ᐊᑐᓕᕐᑎᓯᖁᑦᓱᒋᑦ.
2021-ᒥ ᐅᑭᐅᕐᑕᑐᒥ ᑲᑎᖕᖓᔩᑦ ᑐᓴᕐᑎᓯᒍᑎᖏᑦ A 2021 Arctic Council report ᐅᖃᓚᐅᔪᑦ ᖃᐅᔨᓯᒪᓂᕋᕐᓱᑎᒃ ᐅᑭᐅᕐᑕᑐᒥ ᐃᒪᐅᑉ ᐃᕐᖃᖓᒍᑦ ᓱᕐᕙᓗᐃᑦ ᒪᕐᕈᕕᓪᓗᐊᓕᕐᓂᕋᕐᓱᒋᑦ ᐊᕐᕌᒍᐃᑦ ᐱᖓᓲᔪᕐᑐᑦ 2013-2019 ᐊᑯᓐᓂᖓᓂ ᐅᒥᐊᕐᔪᐊᓄᑦ ᑌᒣᑕᐅᑦᓱᑎᒃ. ᐊᓯᖏᓐᓂ ᓯᓚᕐᔪᐊᒦᑦᑐᓂ, ᐊᕐᕌᒍᓂ 30-ᓂ 40-ᓄᑦ ᑌᒫᑎᒋᒃ ᓱᕐᕙᓗᖃᕐᓂᖅ ᓄᐃᕙᓪᓕᐊᓯᒪᑎᓪᓗᒍ. ᖃᐅᔨᓴᕐᑐᑦ ᖃᐅᔨᓚᐅᔪᒻᒥᔪᑦ ᐃᒪᐅᑉ ᐃᕐᖃᖓᓂ ᓱᕐᕙᓗᐃᑦ ᐅᑭᐅᕐᑕᑐᒥ ᐳᕐᑐᔪᒻᒪᕆᐅᓂᖏᓐᓂᒃ ᐅᒥᐊᕐᔪᐊᑦ ᐊᑕᐅᑦᓯᑰᖃᑎᐅᓲᖑᒻᒪᑕ ᓂᕐᔪᑎᓄᑦ ᑕᕆᐅᕐᒥᐅᑕᓄᑦ, ᐊᓪᓚᖑᐊᑦ, ᐋᕐᓗᐃᑦ, ᕿᓚᓗᒉᑦ, ᓇᑦᓰᑦ ᐁᕖᓪᓗ.
-30-
Nivikka Witjes
ICC (Greenland)
299 34 22 25
nivikka@inuit.org
Christina Fields
ICC (Alaska)
(907) 274-9058
christina@iccalaska.org
Cassandra Elliott
ICC (Canada)
613-407-2642
celliott@inuitcircumpolar.com