ᓄᕕᐱᕆ 25, 2015 – ᐋᑐᐋ, ᐋᓐᑕᕆᐅ – ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑎᓕᓯᓂᐊᖅᑐᑦ ᑲᑎᒪᔭᖅᑐᓂᐊᖅᑐᒥᒃ ᓯᕗᓕᖅᑕᐅᓗᓂ ᐅᑲᓕᖅ ᐃᔨᑦᓯᐊᒧᑦ, ᐃᒃᓯᕙᐅᑕᕆᔭᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓄᑦ ᓂᓪᓕᐊᒍᑎᖃᕆᐊᖅᑐᕐᓗᓂ ᑭᒡᒐᑐᕐᓗᒋᑦ ᐅᑭᐅᖅᑕᖅᑐᒥᐅᑦ ᐃᓄᐃᑦ ᑲᑎᒪᓂᐅᓛᖅᑐᒥ ᑲᑐᔾᔨᖃᑎᒌᑦ ᓄᓇᓕᐅᔪᑦ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ ᐋᔨᖃᑎᒌᓐᓂᐅᓛᖅᑐᒧᑦ ᐱᐅᕆᔅᒥ, ᕗᕌᓐᔅ, ᓅᕙᐃᒻᕙ 30 ᑎᑭᓪᓗᒍ ᑎᓯᐱᕆ 11, 2015. ᐃᓄᐃᑦ ᑲᑎᒪᔭᖅᑐᖅᑐᑦ ᐱᖃᑕᐅᓛᖅᑐᑦ ᓄᓇᖃᖅᑳᖅᓯᒪᔪᓄᑦ ᓄᓇᕐᔪᐊᒦᙶᖅᓯᒪᔪᓄᑦ ᐊᔾᔨᖃᙱᑦᑐᓂᒃ ᐅᓂᒃᑳᕆᐊᖅᑐᕐᓗᑕ ᓯᓚᐅᑉ ᐊᓯᔾᔨᕐᓂᖓ ᐱᓪᓗᒍ ᐱᐅᕆᔅᒥ ᓯᓚ ᐅᖃᖃᑎᒌᒍᑕᐅᑎᓪᓗᒍ.
ᐅᑲᓕᖅ ᐃᔨᑦᓯᐊᖅ ᐅᖃᖅᑐᒥᓂᖅ, “ᐃᓄᐃᑦ ᐃᓗᓯᖓᑦ ᐊᒻᒪᓗ ᖃᓄᐃᖏᑦᓯᐊᕐᓂᖓ ᐊᑦᑐᐊᖏᓐᓇᓕᒫᖅᑐᖅ ᐊᕙᑎᒧᑦ. ᐃᓄᐃᑦ ᐃᓱᒫᓗᒋᔭᖃᓪᓚᕆᑦᑐᑦ ᐊᑦᑐᐃᓂᕐᓗᒍᑕᐅᔪᓂᒃ ᓯᓚᐅᑉ ᐊᓯᔾᔨᕐᓂᖓᓄᑦ ᐱᖅᑯᓯᓂ ᐱᓪᓗᒍ, ᐃᓅᖃᑎᒌᖕᓂᖓ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᓗᓯᖅ.” ᐃᔨᑦᓯᐊᖅ ᐃᓚᓕᐅᔾᔨᓪᓗᓂ, “ᐃᓄᐃᑦ ᕆᐅᕆᔅᒦᓛᖅᑐᑦ ᐃᖅᑲᐃᑎᑦᓯᔭᖅᑐᖅᓯᒪᓗᑎᒃ ᓄᓇᕐᔪᐊᒥᐅᓂᒃ ᐅᑭᐅᖅᑕᖅᑐᖅ ᓇᓗᓇᐃᒃᑯᑕᐅᒻᒪᑦ ᐃᓗᓯᖓᓄᑦ ᓄᓇᕐᔪᐊᑉ. ᓇᓕᐊᒃ ᐃᓘᓐᓇᑎᓪᓗ ᐊᑐᖅᑕᐅᔪᑦ ᐋᖅᑭᒋᐊᕆᒍᑕᐅᓪᓗᑎᒃ ᐊᒻᒪᓗ ᐃᓕᑦᑐᕈᑕᐅᓂᕐᒧᑦ ᓇᓕᒧᒋᔭᕆᐊᖃᕐᒪᒋᑦ ᐅᖃᐅᓯᖏᑦ ᓇᓗᓇᐃᕐᓗᒋᑦ, ᐃᓕᑕᕆᓗᒋᑦ ᐊᒻᒪᓗ ᐊᑐᓕᖅᑎᓪᓗᒋᑦ ᐃᓄᒻᒧᑦ ᑎᒥᓕᒻᒧᑦ ᐱᔪᓐᓇᐅᑕᐅᔪᑦ ᑲᓇᑕᒥ ᐊᒻᒪᓗ ᓄᓇᕐᔪᐊᒥ ᐊᖏᖃᑎᒌᒍᑎᑦ. ᐅᑭᐅᖅᑕᖅᑐᒥ ᐃᓄᐃᑦ ᑲᑎᒪᒋᐊᕐᓂᐊᖅᑐᑦ ᖃᐃᖁᔨᕗᑦ ᓯᕗᓕᖅᑎᓂᑦ ᐊᒻᒪᓗ ᑎᓕᔭᐅᓗᑎᒃ ᑲᑎᒪᔭᖅᑐᖅᑐᓂᒃ ᐅᑭᐅᖅᑕᖅᑑᑉ ᐅᓪᓗᖃᖅᑎᑕᐅᓂᖓᓄᑦ ᑏᓴᕝᕙ 8−ᒥ ᖁᕕᐊᓲᑎᖃᕆᐊᖅᑐᕐᓗᑎᒃ ᐊᒻᒪᓗ ᐊᒥᖅᑲᐅᑎᖃᕐᓗᑎᒃ ᐅᖃᐅᓯᒃᑯᑦ ᐱᖅᑯᓯᑦᑎᓐᓂᑦ ᐃᓄᖕᓂᑦ ᐊᒻᒪᓗ ᓵᒥᒥᐅᓂᒃ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑲᑎᒪᔭᖅᑐᕈᒫᕐᓂᐊᓂᖓ ᐱᐅᕆᔅᒧᑦ ᐱᓕᕆᖃᑎᖃᕈᒫᕐᓂᐊᖅᑐᑦ ᐊᓯᖏᓐᓂᑦ ᐅᑭᐅᖅᑕᖅᑐᒥᐅᓂᒃ ᑲᓇᑕᒥ ᑲᑎᒪᔭᖅᑐᖅᓯᒪᖃᑕᐅᓂᐊᖅᑐᓄᑦ ᐱᖃᑕᐅᓗᑎᒃ ᒥᐊᓕᒐᐃ ᓄᓇᙵᓐᓃᙶᖅᑐᑦ, ᑭᖕᑕᒻᖓᓂᒃ ᑎᐊᓐᒫᒃᒪ ᓱᕖᑕᓐ, ᓄᐊᕗᐃ, ᕕᓐᓚᓐ ᐊᒻᒪᓗ ᕋᓴ. ICC−ᑯᑦ ᑲᓇᑕᒥ ᐊᖓᔪᖅᑳᖓᑦ, ᕼᐆᑉ ᓇᑭᒪᔭᒃ ᐱᖃᑕᐅᒐᔭᖅᑐᖅ ᓯᓚᐅᑉ ᐊᓯᔾᔨᕐᓂᖓᑕ ᒥᒃᓵᓄᑦ ᑲᑎᒪᓂᕐᓂ ᐃᓚᒋᐅᓂᓂ ᐊᖓᔪᖅᑳᖑᓂᕐᒧᑦ ᑲᓇᑕᒥ ᑲᑎᒪᔭᖅᑐᖃᑕᐅᓯᒪᓗᓂ. ᕼᐆᑉ ᓇᑭᒪᔭᒃ ᐅᖃᖅᑐᒥᓂᖅ, “ᖃᐃᖁᔭᐅᓂᖅ ᒥᓂᔅᑕ ᒪᑲᓇᒧᑦ ᐅᑭᐅᖅᑕᖅᑐᒥ ᐃᓄᐃᑦ ᐃᓱᒫᓘᑎᖏᑦ ᐱᓪᓗᒋᑦ ᓯᓚᐅᑦ ᐊᓯᔾᔨᕐᓂᖓᓄᑦ ᑕᕝᕗᖓ ᐱᒻᒪᕆᐅᔪᒧᑦ ᑲᑎᒪᓂᕐᒧᑦ ᓇᓗᓇᐃᕈᑕᐅᕗᖅ ᒐᕙᒪᒃᑯᖏᑦ ᑲᓇᑕᐅᑉ ᐃᓕᑕᖅᓯᓯᒪᓂᖓᓂᒃ ᐱᒻᒪᕆᐅᓂᖓᓂᒃ ᐅᑭᐅᖅᑕᖅᑐᒥ ᓯᓚᐅᑉ ᐊᓯᔾᔨᕐᓂᖓᓄᑦ ᐃᓱᒫᓘᑕᐅᔪᑦ ᐊᓯᔾᔩᓪᓗᓂᓗ ᐱᓕᕆᖃᑎᖃᕐᓂᑎᓐᓂᒃ ᒐᕙᒪᒃᑯᓐᓂᒃ. ᐃᓄᐃᑦ ᐱᔪᒪᓪᓗᑎᒃ ᐃᑲᔪᖅᑐᐃᒻᒪᑕ ᑲᓇᑕᒥᒃ ᐊᓂᒍᖅᑎᓯᑦᓯᐊᕐᓂᐊᕆᐊᒃᓴᖅ ᐊᑑᑎᓕᒻᒥᒃ ᐊᖏᖃᑎᒌᒍᑎᒥᒃ ᐱᐅᕋᔅᒦᓪᓗᑎᒃ”.
ᐃᓄᐃᑦ ᑎᓕᐅᕆᕗᑦ ᓄᓇᕐᔪᐊᒥ ᓄᓇᓕᐅᔪᑦ ᐊᒻᒪᓗ ᒐᕙᒪᓂᒃ ᐱᓗᐊᖅᑐᒥ, ᑲᑐᔾᔨᖃᑎᒌᑦᑐᑦ ᓄᓇᓕᐅᔪᑦ ᐱᔭᒃᓴᖓᓂᒃ ᐊᖏᖃᑎᒌᒍᑎᖃᕐᓂᕐᒥᒃ ᓯᓚᐅᑉ ᐊᓯᔾᔨᕐᓂᖓᓄᑦ ᑲᑎᒪᓂᕐᒥ ᐱᓕᕆᖃᑎᒌᑦᑐᓄᑦ 21, ᐋᖅᑭᒋᐊᖅᑕᐅᓯᒪᔪᓂᒃ ᐊᑐᕋᑦᓴᓂᒃ ᐱᓕᕆᓂᐊᕐᒪᑕ ᐃᑯᓪᓚᖅᑎᒍᒪᓪᓗᒍ ᐳᓪᓚᐸᓪᓕᐊᔪᑦ ᓯᓚᕐᔪᐊᒥ ᐅᖅᑰᓂᖓᓄᑦ ᓴᙱᓂᖏᑦ ᐊᑖᓃᑦᑐᑦ ~450 ᐃᓚᓕᐅᑎᔪᑦ ᒥᓕᐊᓐ ᐊᑕᐅᓯᖅ ᐊᖏᓂᖓ ᒪᓕᓪᓗᒍ, ᖃᐅᔨᓴᑦᑕᐅᑦᓯᐊᖁᓪᓗᒍ ᐃᓚᕙᓪᓕᐊᒍᑕᐅᔪᑦ ᓄᓇᕐᔪᐊᑉ ᓂᕈᒥᑦᓯᕙᓪᓕᐊᓂᖓ ᐅᕙᓃᖏᓐᓇᓂᐊᕐᒪᑦ ᓂᕈᒥᓐᓂᖓᑕ ᐊᑖᓂ 1.5°C, ᐃᑲᔪᖅᑐᕐᓗᒋᑦ ᐃᓄᐃᑦ ᐃᓕᑦᑐᓂᕐᒧᑦ ᐊᒻᒪᓗ ᐋᖅᑭᒋᐊᕆᒐᓱᐊᕐᓂᑦ, ᐊᑐᖅᑎᑕᐅᓗᓂ ᐃᓄᐃᑦ ᖃᐅᔨᒪᓂᖓ ᓇᓗᓇᐃᖅᑕᐅᓯᒪᔪᑦ ᑐᙵᕕᐅᓗᑎᒃ ᐃᓱᒪᓕᐅᕈᑕᐅᔪᓄᑦ ᑐᑭᑖᕈᑕᐅᔪᖃᓕᕋᐃᑉᐸᑦ, ᓴᖅᑭᑎᑦᓯᓗᑎᓪᓗ ᑮᓇᐅᔭᖃᖅᑎᑦᓯᒍᑕᐅᒐᔭᖅᑐᓂᒃ ᐃᑲᔪᖅᑐᐃᔪᓂᒃ ᓄᓇᖃᖅᑳᓯᒪᔪᓂᒃ ᐱᖃᑕᐅᓗᑎᒃ ᐃᓄᐃᑦ ᓇᐅᑦᓯᑐᕐᓂᕐᒥ ᐱᓕᕆᐊᕆᓗᒍᓗ ᓯᓚᐅᑉ ᐊᓯᔾᔨᕐᓂᖓ. ᐅᑲᓕᖅ ᐃᔨᑦᓯᐊᖅ ᓇᓗᓇᐃᖅᓯᔪᒥᓂᖅ, “ᐃᓄᐃᑦ ᑕᑎᖃᕐᒪᑕ ᓂᕿᑦᓴᒧᑦ ᓄᓇᒥᐅᑕᓂᒃ ᐃᒪᕐᒥᐊᑕᓂᓪᓗ. ᓯᓚᐅᑉ ᐊᓯᔾᔨᕐᓂᖓᓄᑦ ᐊᑦᑐᐃᓂᕐᓗᑦᑐᑦ ᐅᑭᐅᖅᑕᖅᑐᒥ, ᐃᓄᐃᑦ ᐱᔪᓐᓇᐅᑎᖏᑦ ᐊᖑᓇᓱᐊᕈᓐᓇᓂᕐᒧᑦ ᐊᒻᒪᓗ ᐱᖅᑯᓯᓂ ᐊᑐᕈᒪᓗᒍ ᑕᒪᒃᑯᐊ ᐊᑦᑐᓂᕐᓗᑦᑕᐅᒻᒪᑕ.”
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᑲᑎᒪᔭᖅᑐᖅᓯᒪᔪᑦ ᑎᓕᓯᒪᔭᖏᑦ ᐅᑯᐊᖑᓗᑎᒃ ᐃᓄᐃᑦ ᓯᕗᓕᖅᑏᑦ ᐊᒻᒪᓗ ᐃᓅᓱᑦᑐᓄᑦ ᑭᒡᒐᖅᑐᐃᔩᑦ ᑖᒃᑯᓇᖓᑦ ᐱᖓᓱᓂᑦ ᓄᓇᓕᓐᓂ: ᒫᑕᓕ ᐅᑲᓕᖅ (ᐊᖓᔪᖅᑳᖅ, ᑲᓇᑕᒥ ᐃᓅᓱᑦᑐᓄᑦ ᑲᑎᒪᔨᓄᑦ, ᐃᓅᑐᑦᑐᓂᒃ ᑭᒡᒐᖅᑐᐃᔨ), ᑳᑎ ᑕᐅᑐᙱ (ᐊᖓᔪᖅᑳᖅ, ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓᓄᑦ), ᕆᐊᔾᔨᓄᑦ ᔫᓪ (ᒪᐃᔭᒋᔭᒥᓂᖅ ᓄᓇᑦᓯᐊᒥ ᐅᑭᐅᖅᑕᖅᑐᒥ ᐱᐅᕈᓪ, ᐊᓛᔅᑲ), ᓖᓐ ᑭᐅᓪᓴᓐ (ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓛᓖᑦ ᓄᓈ), ᐊᒻᒪᓗ ᐊᐃᓕ ᓖᒪᒃᑲ ᓚᐅ (ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓛᓖᑦ ᓄᓈ – ᐊᐅᓚᒃᓯᔨᓄᑦ ᑲᑎᒪᔨᓄᑦ ᑲᑎᒪᔨᐅᖃᑎ).
(ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᑦ ᖃᐅᔨᓴᖅᑎᐅᓂᕐᒥᒃ ᐱᓇᓱᐊᒐᓖᑦ ᑲᑎᒪᓂᕐᒥ ᐱᓕᕆᖃᑎᒥ. ᐃᓄᐃᑦ ᑲᑎᒪᔭᖅᑐᖅᓯᒪᔪᑦ, ᑲᑎᒪᔭᖅᑐᖅᓯᒪᔪᓂᑦᑕᐅᖅ ᓵᒥᒧᑦ ᑲᑎᒪᔨᓂᑦ, ᑭᒡᒐᖅᑐᐃᓂᐊᖅᑐᑦ ᐅᑭᐅᖅᑕᖅᑐᒥᒃ ᑕᕝᕗᖓ ᓄᓇᕐᔪᐊᒥ ᓄᓇᖃᖅᑳᖅᓯᒪᔪᓄᑦ ᑲᑎᒪᓂᕐᒥ ᓯᓚᐅᑉ ᐊᓯᔾᔨᕐᓂᖓᑕ ᒥᒃᓵᓄᑦ, ᓄᓇᕐᔪᐊᒦᙶᖅᓯᒪᓪᓗᑎᒃ ᑲᑎᒪᔩᑦ ᑭᒡᒐᖅᑐᐃᔪᑦ ᐱᔪᒪᔭᖏᑦ ᓄᓇᖃᖅᑳᖅᓯᒪᔪᑦ ᓄᓇᕐᔪᐊᒥ ᓴᑭᑐᐃᓐᓇᖅ ᑭᒡᒐᖅᑐᐃᒍᑎᒋᓪᓗᒋᑦ ᑲᑐᔾᔨᖃᑎᒌᑦᑐᑦ ᓄᓇᓕᐅᔪᑦ ᐱᔭᒃᓴᖓᓂᒃ ᐊᖏᖃᑎᒌᒍᑎᖃᕐᓂᕐᒥᒃ ᓯᓚᐅᑉ ᐊᓯᔾᔨᕐᓂᖓᓄᑦ. ᕿᒥᕐᕈᓂᐊᕐᒪᔾᔪᒃ ᐃᓂᓚᓴᖅᑕᐅᔪᖅ ᐸᐃᑉᐹᖅ ᑲᔪᓯᑎᑕᐅᔪᒃᓴᒫᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᒃᑯᓐᓄᑦ ᐱᐅᕆᔅᒥ.