ᒫᔾᔨ 30, 2017 – ᐊᓐᑯᕆᑦᔅ, ᐊᓛᔅᑲ – ᑭᒡᒐᖅᑐᐃᔩᑦ ᐃᓄᓐᓂᑦ ᓇᒻᒥᓂᖃᖅᑎᐅᔪᓂᒃ, ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᓐᓂᑦ, ᒐᕙᒪᒃᑯᓂᓪᓗ ᑲᓇᑕᒥ, ᑲᓛᖡᑦ ᓄᓈᓂ, ᐊᓛᔅᑲᒥ ᓯᑳᑦᑕᒥᓗ, ᐅᓛᓵᒥᓪᓗᐅᓪᓗ ᑲᑎᒪᔭᖅᑐᖃᓚᐅᓚᐅᖅᓯᒪᔪᑦ ᐱᕙᓪᓕᐊᓂᕐᒧᑦ ᐋᓐᑯᕆᑦᒥ ᐊᒻᒪᓗ ᐊᖏᕈᑎᓕᕆᓂᕐᒥᑦ ᐱᓕᕆᖃᑎᒌᒃᑲᓐᓂᕈᒪᓪᓗᑎᑦ ᓯᓚᕐᔪᐊᑉ ᐅᑭᐅᖅᑕᖅᑐᒥᐅᑕᖏᓐᓂ.
ᑲᑎᒪᑎᓪᓗᒋᑦ ᐊᐅᓚᑕᐅᓚᐅᖅᑐᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᐊᖏᓐᓄᑦ 2014 ᑲᑎᒐᔪᑦᑐᐃᑦ ᓇᓗᓇᐃᖅᑕᐅᓂᖏᑦ ᑕᐃᔭᐅᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᔪᓯᒍᒪᓪᓗᑎᑦ ᓯᓚᕐᔪᐊᑉ ᐅᑭᐅᖅᑕᖅᑐᖏᓐᓂ ᐃᓄᐃᑦ ᓇᒻᒥᓂᖁᑎᓕᓐᓄᑦ ᑲᑎᒪᓂᐅᔪᒥᑦ ᕿᒥᕐᕈᓂᐊᖅᑐᑎᑦ ᖃᓄᖅ ᐱᓕᕆᖃᑎᒌᒃᑲᓐᓂᕈᓐᓇᕐᒪᖔᑕ ᐃᓄᐃᑦ ᓇᒻᒥᓂᖁᑎᓖᑦ ᐊᑐᖅᓯᒪᔭᖏᓐᓂᓪᓗ ᐅᓂᒃᑳᕐᓗᑎᑦ.
ᔨᒻ ᓯᑖᑦᔅ, ᐊᖏᔪᖅᑳᖅ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᓛᔅᑲᒥ ᑲᑎᒪᑎᑦᑎᓚᐅᖅᑐᑦ, ᒪᑐᐃᖅᓯᓪᓗᑎᑦ ᐅᖃᖅᑐᑎᓪᓗ “ᐱᔪᒪᔪᖅᐹᓗᑦᑕᖃᖅᑎᓪᓗᒍ ᐱᕈᖅᐸᓪᓕᐊᓂᖏᓐᓂᓪᓗ ᐅᑭᐅᖅᑕᖅᑐᒥ ᑲᑎᖃᑦᑕᕆᐊᖃᓕᕋᑦᑕ ᐅᖃᐅᓯᖃᕐᓗᑕ ᖃᓄᖅ ᐃᓄᐃ ᓇᒻᒥᓂᖁᑎᓖᑦ ᐱᒋᐊᒃᑲᓐᓂᕈᓐᓇᕐᓂᐊᕐᒪᖔᑕ ᑕᒪᑐᒥᖓ − ᓇᒥᑐᓐᓇᖅ ᐅᑭᐅᖅᑕᖅᑑᓂᖓᓐᓂ”.
ᐱᖃᑕᐅᔪᑦ ᑐᓵᓚᐅᖅᑐᑦ ᐱᓕᕆᔨᒻᒪᕆᓐᓂ ᒪᑯᓂᖓ ᐅᖅᓱᐊᓗᓕᕆᓂᕐᒥᑦ, ᓯᓚᒥᑦ ᐃᒪᒃᑯᓪᓗ ᐃᖏᕐᕋᕙᑦᑐᓂᒃ, ᐅᔭᕋᕐᓂᐊᕐᓂᖅ, ᑐᓴᐅᒪᖃᑦᑕᐅᑎᓕᕆᓂᖅ ᐊᒻᒪᓗ ᐱᓕᕆᔪᒪᓂᖏᓐᓂ ᒫᓐᓇᓕᓴᐅᔪᓂᒃ ᓯᕗᓂᑦᑎᓂᓪᓗ ᐱᕙᓕᐊᓂᖏᓐᓂ ᐅᑭᐅᖅᑕᖅᑐᒥ. ᑲᑎᒪᖃᑕᐅᔪᑦ ᐊᑐᓂ ᓄᓇᓕᕐᔪᐊᓂᑦ ᐅᓂᒃᑳᖃᓚᐅᕐᒥᔪᑦ ᐊᒥᓱᓂᑦ ᓇᒻᒥᓂᖃᐅᖅᑐᓂᒃ ᓄᓇᓕᕐᔪᐊᖏᓐᓂ ᓇᓗᓇᐃᔭᐃᓪᓗᑎᓪᓗ ᓯᓚᕐᔪᐊᒥ ᐱᓕᕆᖃᑕᐅᔪᒪᒐᔭᕐᓂᖏᓐᓂ ᑕᒪᑐᒥᖓ. ᕘᓄ ᕼᐊᒥᑲᓐ, ᐃᖅᑲᓇᐃᔭᖅᑎᓄᑦ ᓯᕗᓕᖅᑎ ᑲᓛᖡᑦ ᓄᓈᓂ ᐊᖏᔪᖅᑲᐅᑎᓂᒃ ᐅᑭᐅᖅᑕᖅᑐᒥ ᐅᖃᕐᔫᒥᓚᐅᕐᒥᔪᖅ ᐅᑭᐅᖅᑕᖅᑐᖅ ᐊᓯᔾᔨᐸᓪᓕᐊᒻᒪᑦ, ᑕᐃᒫᑦᑕᐅ ᐅᑭᐅᖅᑕᖅᑐᖅ ᐊᓯᔾᔩᕙᓪᓕᐊᓂᐊᕐᒥᔪᖅ ᓯᓚᕐᔪᐊᒥᑦ”.
ᐃᓕᓴᕆᓪᓗᒋᑦ ᑕᒪᒃᑯᐊ ᐃᓄᐃᑦ ᓇᒻᒥᓂᖁᑎᖏᑦ ᐱᕙᓪᓕᐊᓂᖏᓐᓂ ᐅᑭᐅᖅᑕᖅᑐᒥ ᒪᑭᒪᔾᔪᑎᔅᓴᐅᓪᓗᑎᑦ ᐱᐅᔪᒃᑯᑦ ᐊᒻᒪᓗ ᑐᕌᒐᖃᖅᑐᑎᑦ ᐱᓕᕆᔪᒪᑎᐊᕐᓂᖏᓐᓂ ᐊᖏᕐᕋᒥᓂᒃ ᓯᓚᕐᔪᓪᓗ ᑭᓪᓕᖏᓐᓂ, ᑲᑎᒪᔭᖅᑐᖅᓯᒪᔪᑦ ᐊᖏᖃᑎᒌᓚᐅᖅᑐᑦ ᓯᕗᒧᐊᒃᑲᓐᓂᕈᒪᓕᕐᓂᖏᓐᓂ ᑲᑐᔨᖃᑎᒌᓪᓗᑎᑦ. ᐊᖏᖃᑎᒌᓚᐅᖅᑐᑦ ᐸᕐᓇᑦᑎᓂᑦ ᓴᖅᑮᓗᑎᑦ ᒪᕐᕉᓐᓂᒃ ᐊᑐᓂ ᓄᓇᓕᕐᔪᐊᕐᓂᑦ ᐃᓚᖃᕐᓗᑎᑦ ᐱᕙᓕᐊᓂᐊᕐᖓᑕ ᓯᓚᕐᔪᐊᒥ ᐃᓄᓐᓂᑦ ᓇᒻᒥᓂᖃᖅᑎᐅᔪ ᑲᑎᒪᔨᖏᓐᓂ ᐱᓕᕆᖃᑕᐅᖃᑦᑕᕐᓗᑎᑦ ᓯᓚᕐᔪᐊᑉ ᐅᑭᐅᖅᑕᖅᑐᖓᓐᓂ.
ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐃᔅᓯᕙᐅᑕᖓ ᐅᑲᓕᖅ ᐃᔨᑦᓯᐊᖅ ᖁᕕᐊᓚᐅᖅᑐᖅ ᐊᒥᓱᓂᒃ ᑲᑎᒪᔭᖅᑐᖅᑐᖃᕐᖓᑦ ᐅᖃᖅᑐᓂᓗ, “ᒫᓐᓇᐅᔪᖅ ᐃᓱᒪᑖᓕᖅᑭᒐᓱᒋᐊᖃᓕᕐᒥᔪᒍᑦ ᒪᑭᒪᔾᔪᑎᔅᓴᓂᑦ ᐅᑭᐅᖅᑕᖅᑐᒥ ᐃᓄᐃᑦ ᐃᓱᒪᒋᔭᖏᓐᓂ ᐃᓄᓐᓄᑦ ᐃᓄᓐᓂᑦ. ᐱᖃᓯᐅᑎᓗᒋᑦ ᑕᒪᒃᑯᐊ ᓇᒻᒥᓂᖃᕐᓂᕐᒧᑦ ᐱᕙᓪᓕᐊᓃᑦ ᐃᓄᐃᑦ ᓄᓇᖓᓐᓂ.”