ᓄᕕᐱᕆ 24, 2016 – (ᐅᖃᐅᓯᔅᓴᖏᑦ) ᐅᓐᓄᓴᒃᑯᑦ, ᓇᓐᓯ ᖃᕆᑕᖅ−ᓕᓐᑎᐅᖑᔪᖓ. ᐃᓅᓚᐅᖅᓯᒪᔪᖓ ᐱᕈᔅᓴᓪᓗᖓᓗ ᐅᐊᓐᓇᖓᓐᓂ ᑲᖏᖅᓱᐊᓘᑉ ᐃᓗᐊᓂ ᐊᕐᕕᐊᓂ ᑭᕙᓪᓕᕐᒥ ᓄᓇᕗᒻᒥ. ᒪᓕᒐᓕᐅᖅᑎᕐᔪᐊᖑᓚᐅᖅᑐᖓ ᓄᓇᕗᒻᒧ 1997−ᒥᑦ 2008−ᒧᑦ ᑕᐃᒪᓐᖓᓂ ᓄᓇᑦᑎᓐᓄᑦ ᐱᔨᑦᑎᕋᐃᓐᓇᖅᑐᖓ ᐊᒥᓱᓂᑦ ᐊᓯᖏᓐᓂᓪᓗ ᓄᓇᑦᑎᓐᓄᑦ. ᑕᒪᒃᑯᓂᖓ ᐱᓕᕆᐊᕆᓯᒪᔭᕐᓂᑦ − ᓄᓇᖃᖅᑳᖅᑐᒥᓂᐅᓂᕐᓂᑦ ᖃᐅᔨᒪᓗᖓ ᓯᕗᓕᖅᑎᓐᓂ ᐅᓪᓗᒥᓕᓴᕐᓂᓪᓗ ᒐᕙᒪᐅᔪᓂᒃ − ᐊᔾᔨᐅᖏᑦᑐᒥᑦ ᐃᓱᒪᖃᕋᒪ ᐱᓕᕆᖃᑎᒌᓐᓂᕐᒥᑦ ᐅᑭᐅᖅᑕᖅᑐᒥ. ᑐᑭᓯᒃᑲᓐᓂᕋᒪ ᐱᑕᖃᕆᐊᖃᓪᓚᕆᓐᓂᖏᓐᓂ ᐱᓕᕆᖃᑎᒌᓐᓂᖅᑕᖃᕆᐊᖃᕐᓂᕐᒥᑦ ᐊᒥᓱᓂᑦ ᖁᓕᕇᓐᓂᒃ ᑎᒥᐅᔪᓂᒃ ᐊᒻᒪᓗ ᐊᖏᖅᓯᒪᓗᒋᑦ ᐊᔅᓱᕉᑕᐅᕙᑦᑐᑦ ᐱᓕᕆᖃᑎᒌᓐᓂᐊᕐᓂᕐᒧᑦ ᑐᕌᕐᓗᑎᑦ. ᐱᐅᓯᕚᓪᓕᑎᒃᑲᓐᓂᕋᓱᐊᕐᓗᒋᑦ ᐱᓕᕆᖃᑎᒌᓐᓂᐅᕙᑦᑐᑦ, ᐅᖃᖃᑎᒌᒃᑲᓐᓂᖃᑦᑕᕐᓗᑎᑦ ᑐᑭᖃᑦᑎᐊᖅᑐᓂᓪᓗ ᐱᓕᕆᖃᑎᒌᓪᓗᑎᑦ, ᑕᐃᒪᐃᓪᓗᐊᑎᑦᑎᓂᕐᒥᑦ ᓴᖅᑮᒍᓐᓇᕋᑦᑕ ᓄᓇᑦᑎᓐᓂ, ᐃᓄᑐᐃᓐᓇᕐᓄᑦ, ᓴᓇᕕᓐᓄᑦ, ᒐᕙᒪᐅᔪᓄᑦ, ᐊᓯᖏᓐᓂᓪᓗ, ᓄᓇᖃᖅᑳᖅᑐᒥᓂᕐᓄᑦ.
ᐱᒻᒪᕆᐅᓂᖏᓐᓂ ᓄᓇᖃᖅᑳᖅᑐᒥᓃᑦ ᓂᐱᖏᑦ
ᑎᒍᒥᐊᖅᑎᐅᖃᑕᐅᔪᓕᒫᑦ ᑎᑎᕋᖅᓯᒪᔪᑦ ᖁᓛᓂ, ᓂᐱᖃᖅᑎᐅᕗᑦ ᓄᓇᖃᖅᑳᖅᑐᒥᓃᑦ ᐅᖃᖃᑎᖃᖅᑎᓪᓗᐊᑕᐅᓂᐊᕐᓗᑎᓪᓗ. ᐅᑭᐅᒐᓵᓗᓐᓂᑦ ᐊᔾᔨᐅᖏᑦᑐᓕᓂᕐᒥᑦ, ᓄᓇᖃᖅᑳᖅᑐᒥᓃᑦ ᐅᑭᐅᖅᑕᖅᑐᒦᓕᕐᖓᑕ ᑲᔾᔨᖓᓐᓂ ᐊᑯᓂᕐᔪᐊᕌᓗᒃ, ᓄᓇᒥᑦ ᓂᕿᖓᖅᑐᑎᑦ ᐱᐅᖅᓱᐊᖅᑐᒋᓪᓗ ᑭᖑᕙᖏᓐᓄᑦ ᐅᕗᖔᓗᒃ. ᒫᓂᓕᕋᑦᑕ ᐊᓯᑦᑎᓐᓂ ᓯᕗᓪᓕᑐᖄᓘᓪᓗᑕ ᓯᓚᕐᔪᐊᒥ ᐋᖅᑭᔅᓱᐃᓚᐅᓐᖏᒻᒪᕆᑦᑎᓪᓗᒋᑦ ᑲᑎᒪᔨᐅᓂᕐᒧᑦ ᒪᓕᒐᔅᓴᓂᑦ.
ᐊᑯᓂᐊᓘᓂᖓᓐᓂ ᐱᓯᒪᑦᑎᑦᑎᐊᖃᑦᑕᕐᓂᖏᓐᓂᓪᓗ ᓯᓚᕐᔪᐊᓂᑦ ᑎᒍᓯᓯᒪᓕᕐᓂᕋᖅᑐᑎᓪᓗ ᐊᖏᔪᐊᓗᓐᓂᑦ ᓄᓇᒥᑦ ᐱᒻᒪᕆᐅᓂᕋᖅᑕᐅᓪᓗᓂᓗ ᑕᒪᓐᓇ. ᑕᒪᒃᑯᐊ ᓄᓇᓕᕐᔪᐊᑦ ᑕᒪᒃᑯᓂᖓ ᑕᑯᓐᓇᕆᐊᖃᖅᑐᑦ ᐊᑐᖅᑕᐅᒐᔪᖃᑦᑕᖅᓯᒪᔪᓂᑦ ᓯᓚᑐᒋᐊᖃᓐᖏᒻᒪᕆᑦᑐᓂᑦ ᐊᔾᔨᐅᖏᑦᑐᓂᓪᓗ ᐊᑐᖅᑕᐅᓯᒪᔪᓂᒃ; ᐊᔾᔨᐅᖏᒻᒪᑕ ᓯᓚᕐᔪᐊᒦᑦᑐᑦ ᐊᔾᔨᐅᖏᒻᒪᑕᓗ ᓴᐃᓕᓇᕐᓂᐅᔪᑦ ᓇᒥᑐᐃᓐᓇᖅ ᐃᖅᑲᓇᐃᔭᖅᑐᓂ ᐊᐅᓚᑕᐅᑦᑎᐊᕐᓗᑎᓪᓗ ᑕᒪᒃᑯᐊ ᓄᓇᒦᑦᑐᑦ. ᑕᒪᓐᓇ ᐃᓕᖅᑯᓯᐅᔪᖅ ᓴᐃᓕᓇᕐᓂᕐᒥᑦ ᐱᓕᕆᖃᑎᖃᑦᑎᐊᕐᓗᑎᑦ ᐊᑐᖅᑕᐅᔪᓐᓇᕐᒥᔪᖅ ᐊᓯᖏᓐᓄᑦ ᓯᓚᕐᔪᐊᒦᑦᑐᓂᒃ.
ᓴᓐᖏᓂᖓ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ
ᑖᒃᑯᐊᖑᓪᓗᑎᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᖏᔪᖅᑳᖅ, ᐱᔨᑦᑎᓚᐅᖅᑐᖓ ᓯᓚᕐᔪᐊᒥ ᑲᑐᔾᔨᖃᑎᒌᓐᓄᑦ ᐃᓕᓴᕆᔭᐅᓯᒪᓪᓗᑎᑦ ᐱᓕᕆᓂᖏᓐᓂ ᑲᑐᔾᔨᖃᑎᒌᓐᓂᒃ ᓯᓚᕐᔪᐊᒥ, ᐊᒻᒪᓗ ᐱᖃᑕᐅᖏᓐᓇᕐᓂᐊᖅᑐᓂᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓂᓪᓕᐊᔨᐅᒻᒪᑕ 160,000−ᓄᑦ ᐃᓄᓐᓄᑦ ᑲᓇᑕᒥᐅᑕᕐᓄᑦ ᐅᑭᐅᖅᑕᖅᑐᖓᓐᓂ, ᑲᓛᖡᑦ ᓄᓈᓂ, ᐊᓛᔅᑲᒥ ᓱᑳᑦᑕᒥᓗ − ᑎᓴᒪᓂᒃ ᐊᔾᔨᒌᓐᖏᑦᑐᓂᑦ ᑲᑎᒪᕕᐅᕕᓐᓂᒃ − ᐊᑕᐅᓯᕐᒥᑦ ᐃᓄᓐᓂᑦ. ᐃᓄᐃᑦ ᐃᓄᐃᓴᑦᑐᕈᓘᒻᒪᑕ, ᓯᓚᕐᔪᐊᒥᓖ ᑕᑯᓐᓇᕐᓗᒍ, ᑭᓯᐊᓂᓕ ᐊᖏᕐᕋᓖᑦ ᐊᖏᔪᐊᓗᒻᒥ ᓂᐱᖃᖅᑐᑎᓪᓗ ᓴᓐᖏᔪᐊᓗᒻᒥ ᐊᑕᐅᓯᕐᒥᑦ ᐅᖃᐅᓯᖃᖅᑐᑎᑦ ᐊᑕᐅᓯᕐᒥᓪᓗ ᐱᖅᑯᓯᖃᖅᑐᑎᑦ.
ᑕᒪᒃᑯᐊ ᐱᒻᒪᕆᐅᒻᒪᑕ ᐅᖃᐅᓯᕆᓗᒋᑦ ᒫᓐᓇ ᖁᔭᓐᓇᒦᕈᒪᔭᒃᑲ ᐋᖅᑭᔅᓱᐃᓚᐅᖅᑐᑦ ᑕᒪᑐᒥᖓ ᑲᑎᒪᓂᐅᔪᒥᑦ ᓈᓚᒍᓐᓇᓚᐅᕐᖓᑕ, ᐃᓕᓐᓂᐊᖅᑐᑎᑦ ᐅᖃᐅᓯᕆᔪᒪᔭᒥᓂᓪᓗ ᓂᓪᓕᐊᓪᓗᑎᒃ ᑲᓇᑕᒥᐅᑦ ᒥᔅᓵᓄᑦ ᐅᓛᓵᓪᓗ ᐱᓕᕆᖃᑎᒌᓐᓂᖏᓐᓂ ᐅᑭᐅᖅᑕᖅᑐᒥ. ᒫᓐᓇᐅᔪᖅ ᐱᒻᒪᕆᐅᔪᒦᒃᑲᖅᑕ ᐅᑭᐅᖅᑕᖅᑐᒥ. ᓄᑖᕐᒥ ᑲᑎᒪᔨᐅᓂᐅᔪᓂᓪᓗ ᓴᖅᑭᐸᓪᓕᐊᑐᐃᓐᓇᕐᖓᑕ ᖃᓄᖅ ᑕᒪᒃᑯᐊ ᓅᑉᐸᓪᓕᐊᓂᐊᕐᒪᖔᑦᑎᒍ ᑲᓇᑕᒥ – ᐅᓛᓵᒥᓗ ᐱᓕᕆᖃᑎᒌᑦᑎᓪᓗᒋᑦ ᐃᓱᒪᒋᔭᕆᐊᖃᕋᑦᑎᒍ ᐊᒻᒪᓗ ᐊᓯᖏᑦ ᓄᑖᑦ ᐱᓕᕆᖃᑕᐅᖃᑦᑕᕐᓂᐊᖅᑐᑦ ᐅᑭᐅᖅᑕᖅᑐᒥ. ᐊᒥᓱᓂᒃ ᐱᔾᔪᑎᑕᖃᕐᖓᑦ ᐃᖅᑲᓇᐃᔭᕐᓂᕐᒥᑦ. ᓯᓚᓗ ᐊᓯᔾᔨᐸᓪᓕᐊᓂᖓᓐᓂ ᑐᓴᖅᑕᐅᔪᒪᓂᖅᓴᐅᓕᖅᑐᓂᓗ ᑕᒪᓐᓇ ᐅᑭᐅᖅᑕᖅᑐᒥ ᐅᒥᐊᕐᔪᐊᖅᑕᖃᕐᓂᖅᓴᐅᖁᔨᓕᖅᑐᑎᑦ. ᓱᓇᒃᑯᑖᕐᓂᓪᓗ ᐱᔪᒪᓂᖅᓴᐅᓕᖅᑐᑎᑦ, ᒪᑯᓂᖓᓗ ᐅᖅᓱᐊᓗᓐᓂᑦ, ᓄᓇᒦᓐᖔᖅᑐᓂᒃ, ᒑᓯᓂᓪᓗ, ᐅᔭᕋᕐᓂᐊᕐᓂᕐᒥᑦ ᐊᒻᒪᓗ ᐃᖃᓗᓕᕆᓂᕐᒥᑦ.
ᑕᒪᒃᑯᐊ ᑲᑎᑦᑐᒋᑦ ᐱᕈᖅᐸᓪᓕᐊᔪᑦ ᐱᔭᐅᔪᒪᔪᑦ ᐅᑭᐅᖅᑕᖅᑐᒥ ᐳᓚᕋᖅᑐᓕᕆᓂᕐᒥᑦ ᐱᔪᒪᓂᖅᓴᐅᓂᐊᓕᖅᑐᑎᓪᓗ ᑕᒪᑐᒥᖓ ᓯᓚᕐᔪᐊᒥ. ᐱᔪᒪᓂᖅᓴᐅᓕᖅᑐᑎᓪᓗ ᐅᑭᐅᖅᑕᖅᑐᖅ ᐱᕈᖅᐸᓪᓕᐊᑎᓪᓗᒍ, ᐱᓕᕆᖃᑎᒌᓪᓚᕆᒋᐊᖃᖅᑐᒍᑦ ᑕᒪᒃᑯᐊ ᐊᑦᑕᓇᐃᖅᓯᒪᖁᓪᓗᒋᑦ ᓄᓇᕗᑦ ᓱᕋᖅᑎᖅᑕᐅᖁᓇᑎᒍ. ᐊᖏᓂᖅᓴᒥ ᐱᔭᕆᐊᖃᓕᕋᑦᑕ ᓯᓚᕐᔪᐊᒥ ᑕᑯᓐᓇᖅᑕᐅᓂᑦᑎᓂᓪᓗ, ᐃᓕᓴᕆᓗᒋᓪᓗ ᐱᒻᒪᕆᐅᔪᑦ ᐅᑭᐅᖅᑕᖅᑐᒥ ᐊᕙᑎᑦᑎᓂᑦ ᐱᔨᑦᑎᕋᐅᑎᐅᔪᑦ. ᓄᓇᖃᖅᑳᖅᑐᒥᓃᑦ ᖃᐅᔨᒪᓂᖏᓐᓂ, ᓄᐊᑕᐅᓗᑎᑦ ᑭᖑᕚᑦᑎᓄᖅᑲᖅᑕᐅᓗᑎᓪᓗ ᓄᑲᖅᑎᓄᑦ, ᐊᑐᐃᓐᓇᐅᑎᑦᑎᓗᑦ ᑮᓇᐅᔭᓂᑦ ᐱᑕᖃᕆᐊᖃᓪᓚᕆᓐᓂᖏᓐᓂ ᑕᒪᒃᑯᓂᖓ ᖁᔭᓈᖅᑕᐅᑐᐃᓐᓇᕆᐊᖃᓐᖏᑦᑐᑦ. ᐱᓕᕆᖃᑎᒌᓪᓗᑕ, ᓄᓇᖃᖅᑳᖅᑐᒥᓃᑦ ᐅᑭᐅᖅᑕᖅᑐᒥ ᐊᑦᑐᖅᑕᐅᓂᖅᓴᐅᒻᒪᑕ ᑕᒪᒃᑯᓂᖓ ᑲᑎᒪᔨᓄᑦ ᐃᓱᒪᓕᐅᖅᑕᐅᔪᓂᒃ ᓄᓇᓕᕐᔪᐊᑉ ᒐᕙᒪᒃᑯᖏᓐᓂ.
ᒫᓐᓇᐅᔪᖅ ᓇᒧᕈᓘᔭᑐᐃᓐᓈᓕᕋᑦᑕ ᐃᓱᒪᓕᐅᕆᐊᖃᓕᖅᑐᒍᑦ ᓯᕗᓂᒋᓂᐊᖅᑕᑎᓐᓄ ᐅᑭᐅᖅᑕᖅᑐᒥ ᐊᒻᒪᓗ ᐃᓄᖏᓐᓄᑦ ᑕᑯᔅᓴᐅᓂᖅᓴᐅᓗᑕᓗ ᓯᓚᕐᔪᐊᒥ. ᐅᖃᖃᑎᒌᓐᓂᒃᑯᑦ ᑕᒪᒃᑯᐊ ᑲᔪᓯᒍᓐᓇᕐᖓᑕ, ᑲᔪᓯᑦᑎᐊᕐᓗᑎᑦ ᐱᓕᕆᐊᖑᔪᑦ ᐱᒋᐊᖅᑎᓯᒪᔭᕗᑦ ᐅᐊᑦᑎᐊᕈ ᐊᒻᒪᓗ ᐊᕐᕌᒍᒋᔭᑦᑎᓐᓂ ᐊᒡᒋᖅᑐᓂᒃ − ᐃᓄᐃᓪᓗ ᓄᑖᕐᓂᑦ ᐋᖅᑭᐅᒪᔾᔪᑎᔅᓴᐅᓂᐊᖅᑐᓂᑦ ᓴᖅᑮᓗᑎᑦ, ᐱᓕᕆᖃᑎᖃᕐᓗᑎᑦ, ᑲᔪᓯᕙᓪᓕᐊᓗᑎᓪᓗ ᐱᕙᓪᓕᐊᓂᐅᔪᑦ, ᐱᐅᓯᕚᓪᓕᕐᓗᒋᓪᓗ ᐃᑯᐱᑦᑐᓕᕆᓂᖅ, ᐃᓄᐃᑦ ᐋᓐᓂᐊᖅᑕᐃᓕᒪᓂᖏᑦ ᐃᓅᓇᓱᐊᑦᑎᐊᕐᓂᖏᓐᓂᓪᓗ, ᓂᕿᔅᓴᖃᑦᑎᐊᖏᓐᓇᕈᓇᕐᓗᑎᓪᓗ, ᐊᒻᒪᓗ ᐸᖅᑭᔭᐅᓗᑎᑦ ᐃᓄᐃᑦ ᐱᔪᓐᓇᐅᑎᖏᑦ ᐅᑭᐅᖅᑕᖅᑐᒥ.
ᑲᓇᑕᒥ ᐅᓛᓵᓪᓗ ᑲᑐᔾᔨᓂᖅᐹᖑᒻᒪᑕ ᐅᑭᐅᖅᑕᖅᑐᒥ, ᐊᖏᓂᖅᐹᓐᓂ ᐱᓕᕆᐊᔅᓴᖃᖅᑐᑎᑦ ᐱᐅᓯᕙᓪᓕᑎᑦᑎᑲᓐᓂᕋᓱᐊᕐᓂᕐᒥᑦ ᐃᓄᓕᕆᓂᕐᒥᑦ ᓄᓇᓕᕐᔪᐊᖓᓐᓂ, ᐊᑐᐊᒐᔅᓴᖏᓪᓗ ᐅᑭᐅᖅᑕᖅᑑᑉ ᐱᕙᓪᓕᐊᓂᖓᓐᓂ ᐊᒻᒪᓗ ᑕᒪᒃᑯᐊ ᑲᔪᓯᑦᑎᐊᖁᓪᓗᒋᑦ ᐱᓕᕆᖃᑎᒌᓐᓂᒃᑯᑦ ᐊᕙᑎᑦᑎᓐᓃᑦᑐᓂᒃ. ᑲᔪᓯᑉᐸᑕ ᑕᒪᒃᑯᐊ ᐱᔪᒪᓂᖅᓴᐅᓕᖅᐸᓪᓕᐊᓐᖑᓱᒻᒪᑕ, ᑭᓯᐊᓂᓕ ᐃᑲᔪᖅᑐᖅᑕᐅᓗᑎᑦ ᐃᓄᐃᑦ ᑕᐃᒪᐃᓪᓗᐊᖅᑎᑕᐅᓗᑎᑦ ᐊᒻᒪᓗ ᑲᔪᓯᕙᓪᓕᐊᓗᑎᑦ ᓯᕗᓂᑦᑎᓐᓂ ᓄᓇᑦᑎᓐᓂ.
ᐅᖃᖅᓯᒪᒻᒪᑕ ᐅᓛᓵᑦ ᐅᓪᓗᖓᓐᓂ ᐱᒋᐊᖅᓯᒪᒻᒪᑦ ᓯᑳᑦᑲᒥ, ᐅᖃᐅᓯᐅᕙᑦᑐᓂᒃ ᐱᒻᒪᕆᐅᓪᓗᑎᑦ ᓯᑳᑦᑲᒥ ᐅᓛᓵᒃᑯᑦ ᐅᑭᐅᖅᑕᖅᑐᖓᓐᓂ … ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐊᑯᓂᐅᓂᖅᐹᖅ ᐱᐅᒋᔭᐅᓂᖅᐹᓂᓪᓗ ᐅᓛᓵᒃᑯᑦ ᐱᑕᖃᕐᖓᑕ ᐃᓚᕗᓪᓗ ᓯᑳᑦᑲᒥᐅᑕᐃᑦ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ ᐃᑲᔪᖅᑐᐃᓯᒪᔪᑦ ᑕᒪᑐᒥᖓ ᐅᐊᑦᑎᐊᕈ ᐃᓪᓗᕐᔪᐊᖅᑖᕋᓱᓐᓂᖏᓐᓄᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓯᑳᑦᑲᒥ ᐃᓄᐃᑦ ᐱᖃᑕᐅᔪᓐᓇᖅᑲᑕ ᓴᓇᕙᓪᓕᐊᓗᑎᑦ ᓯᕗᓂᑦᑎᓐᓄᑦ, ᓯᕗᓂᑦᑎᐊᕆᓐᓂᖅᓴᐅᒐᔭᖅᑐᑦ. ᐱᓕᕆᖃᑎᒌᖃᑦᑕᕐᓗᑎᑦ, ᐊᔾᔨᒌᔾᔫᒥᓗᑎᓪᓗ, ᐱᔭᕐᓂᕐᔫᒥᓗᑎᑦ ᐊᑐᐊᒐᖏᑦ ᐃᓄᓐᓄᑦ, ᐊᕕᑦᑐᖅᓯᒪᔪᓄᑦ, ᐊᒻᒪᓗ ᓄᓇᓕᕐᔪᐊᖏᓐᓄ ᐱᐅᓂᖅᓴᓂᑦ ᑲᔪᓯᒍᓐᓇᕋᔭᖅᑐᒍᑦ ᐃᑲᔫᑎᐅᔪᓂᒃ ᐊᒥᓱᓄᑦ ᑕᑯᓐᓇᖅᑕᐅᔪᓄᑦ ᐃᓄᓐᓄᑦ ᐱᑕᖃᕐᓂᖅᓴᐅᓕᕐᓗᑎᑦ.
ᐃᓱᐊᓂ 1990, ᓯᕗᓪᓕᖅᐹᒥ ᒐᕙᓄᖓ ᕉᒪᒥ ᐊᐳᕋᒧᕕᒃ ᐊᒻᒪᓗ ᒐᕙᓄᖓ ᕉᒪᓐ ᑯᐱᓐ, ᓄᓇᖃᖅᑳᖅᑐᒥᓂᑦ ᓯᑳᑦᑲᒥ ᐃᓄᐃᓪᓗ ᐱᓗᐊᖅᑐᒥᑦ, ᓱᓕ ᑲᔪᓰᓐᓇᖅᑐᑦ ᐅᓪᓗᒥᒧᑦ ᐱᓕᕆᖃᑎᖃᐃᓐᓇᖅᑐᑎᑦ ᒐᕙᒪᒃᑯᓐᓂ. ᓇᓗᓇᓚᐅᓐᖏᑦᑐᖅ ᐅᑭᐅᓂᑦ ᖁᓕᐅᔪᓂᒃ ᑲᓇᑕᒥ − ᐅᓛᓵᓗ ᐱᓕᕆᖃᑎᒌᓐᓂᖏᑦ ᒥᓂᔅᑕᐃᑦ ᐊᒻᒪᓗ ᒪᕐᕉᓕᖅᑲᖓᔪᓂᒃ ᑲᔪᓯᑎᑕᐅᓇᓱᐊᕐᓂᖏᓐᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ / CIDA ᐱᓕᕆᐊᖏᓐᓂ ᑲᓇᑕᒥ ᐃᓪᓘᔪᓂᒃ ᐅᑭᐅᖅᑕᖅᑐᒥ ᐅᓛᓵᑦ ᓄᓇᖃᖅᑳᖅᑐᒥᓂᖏᓐᓂ. ᑕᒪᓐᓇ ᐊᔾᔨᐅᖏᑦᑐᒥᑦ ᐱᓕᕆᐊᖑᔪᖅ ᐃᑲᔪᖅᑐᖅᑕᐅᔪᖅ ᐊᐅᓚᑕᐅᓪᓗᓂᓗ ᑎᓴᒪᓄᑦ ᑎᒥᐅᔪᓄᑦ: ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑲᓇᑕᒥ, ᑲᓇᑕᐅᑉ ᒐᕙᒪᒃᑯᖏᓐᓂ, ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓯᑳᒃᑲᒃᑯᑦ ᐊᒻᒪᓗ ᐅᓛᓵᒃᑯᑦ ᒐᕙᒪᒃᑯᖏᑦ.
ᐊᒻᒪᓗ, 2001−ᒥ – ᐅᑭᐅᑦ 15 ᐊᓂᒍᖅᓯᒪᓕᖅᑐᑦ – ᒐᕙᒪᒃᑯᖏᑦ ᓯᑳᑦᑐᒃ ᐃᒻᒥᒃᑰᖅᑐᑦ ᐊᕕᑦᑐᖅᓯᒪᔪᓂᒃ. ᑲᑐᔾᔨᖃᑎᒌᑦ ᓄᓇᖃᖅᑳᖅᑐᒥᓃᑦ ᐃᓄᐃᓴᑦᑐᑦ ᓯᑳᑦᑲᑦᑐᑦ ᐅᒃᕆᒃ ᐃᒻᒥᒃᑰᖅᑐᑦ, ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᑎᓕᐅᓚᐅᖅᓯᒪᔪᑦ ᐊᖏᕈᑎᒥᑦ ᐱᓕᕆᖃᑎᒌᑦᑐᑎᑦ ᓴᓐᖏᓂᖅᑖᑲᓐᓂᖅᑐᑎᑦ ᐱᓕᕆᖃᑎᒌᑦ ᑕᒪᒃᑯᓄᖓ ᐱᕙᓪᓕᐊᑎᑦᑎᒐᓱᐊᕐᓂᕐᒥᑦ ᓄᓇᖃᖅᑳᖅᑐᒥᓂᕐᓂᑦ. ᑖᓐᓇ ᐊᖏᕈᑎᒃ ᐱᓕᕆᖃᑎᒌᓐᓂᐊᕐᓂᕐᒥᑦ ᒪᓕᒐᖃᖅᑐᖅ ᐅᑉᐱᕆᖃᑦᑕᐅᑎᓂᒃᑯᑦ, ᑲᑎᖅᓱᖅᓯᒪᔪᓂᒃ, ᐱᕚᓪᓕᕈᑎᔅᓴᓂᓪᓗ. ᑕᒪᓐᓇ ᐱᒋᐊᕈᑕᐅᓯᒪᔪᖅ ᐊᖏᕈᑎᐅᔪᖅ ᐱᓕᕆᓂᖏᓐᓂᓪᓗ ᐃᓪᓘᔪᓂᒃ ᐅᑭᐅᖅᑕᖅᑐᒥ ᐅᓛᓵᑦ ᓄᓇᖃᖅᑳᖅᑐᒥᓂᖏᓐᓂ ᐊᒻᒪᓗ ᓯᕗᒧᐊᑉᐸᓪᓕᔪᑦ ᐅᓛᓵᑦ ᐊᒻᒪᓗ ᑲᓇᑕᒥᐅᑦ ᐃᓄᐃᑦ.
ᑕᒪᒃᑯᐊ ᐱᓕᕆᖃᑎᒌᓐᓂᐅᔪᑦ ᐱᔾᔪᑎᖃᖅᑐᑎᑦ ᐅᑉᐱᕆᖃᑦᑕᐅᑎᑦᑎᐊᕐᓗᑎᑦ ᐱᓕᕆᖃᑎᒌᓐᓂᐅᔪᑦ ᐱᒻᒪᕆᐊᓘᔪᑦ ᑲᓇᑕᒥ ᐅᓛᓵᒥᓗ. ᑕᐃᒫᔅᓴᐃᓐᓇᖅ ᓴᓇᔩᑦ ᒪᓕᒐᕐᓂᑦ ᐊᑐᖃᑦᑕᕐᖓᑕ ᐃᓕᖅᑯᓯᖃᖅᑐᑎᑦ, ᐱᐅᓯᕙᓪᓕᑎᑦᑎᓇᓱᐊᖅᑐᑎᑦ ᐊᑦᑕᓇᖅᑕᐃᓕᒪᓂᕐᒥᑦ, ᐊᑭᑭᓐᓂᖅᓴᐅᔪᓂᓪᓗ ᐱᖃᑦᑕᕐᓗᑎᑦ ᐊᕙᑎᑦᑎᓂᓪᓗ ᐊᑦᑐᐃᓐᖏᓂᖅᓴᐅᒐᓱᐊᕐᓗᑎᑦ ᐱᓕᕆᓂᖏᓐᓂ ᓯᓚᕐᔪᐊᒥ − ᐱᓕᕆᖃᑎᒌᓐᓂᑦᑎᒍᑦ ᓄᓇᖃᖅᑳᖅᑐᒥᓃᑦ ᑲᔪᓯᒍᓐᓇᕐᖓᑕ ᐅᑉᐱᕆᖃᑦᑕᐅᑎᑦᑎᐊᕐᓗᑎᑦ, ᑕᐃᒪᐃᓪᓗᖃᑎᒌᓪᓗᑎᑦ ᑕᑎᒋᖃᑦᑕᐅᑎᓗᑎᓪᓗ. ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐱᓕᕆᖃᑎᖃᕈᒪᒻᒪᑕ ᒪᓕᒐᕐᓂᑦ ᐋᖅᑭᔅᓱᐃᓗᑎᑦ ᑲᔪᓯᑦᑎᐊᖁᓪᓗᒋᑦ ᐱᓕᕆᖃᑎᒌᓐᓂᒃ, ᓄᑖᕐᓂᑦ ᐱᓕᕆᐊᑦᑎᒍᑦ ᓴᓐᖓᑎᑉᐸᓪᓕᐊᓗᒋᓪᓗ ᐃᓄᐃᑦ ᐅᑭᐅᖅᑕᖅᑐᖓᓐᓂ ᓯᓚᕐᔪᐊᑉ ᐱᒻᒪᕆᐅᓂᖏᓐᓂ ᑕᒪᒃᑯᓂᖓ ᓄᓇᓕᕐᔪᐊᓂ − ᐱᕙᓪᓕᐊᖏᓐᓇᕐᓗᑎᑦ − ᓴᓐᖏᓂᖅᓴᐅᒐᖅᑕ ᑲᑐᔾᔨᖃᑎᒌᑦᑐᑕ.
ᐊᖏᔪᖅᑲᑦ ᐃᓄᐃᑦ ᐅᑭᐅᖅᑕᖅᑐᒦᖃᑎᒌᑦ ᑲᑎᒪᔨᖏᑦ ᑲᓇᑕᒥ – ᐃᓚᖓ ᐊᖏᔪᖅᑲᖅ ᑎᓴᒪᐅᔪᓂᒃ ᓯᕗᒃᑲᖅᑕᐃᓪᓗᓂ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ – ᖃᓄᑐᐃᓐᓇᑦᑎᐊᖅ ᐱᓕᕆᖃᑎᒌᑦᑐᑎᑦ, ᐱᕙᓪᓕᐊᓂᒃᑯᑦ, ᐊᕙᑎᑦᑎᓐᓂ ᐊᑦᑕᓇᐃᖅᓯᒪᑎᑦᑎᓂᕐᒥᑦ, ᑎᒍᒥᐊᕐᓂᓪᓗ ᓄᓇᓕᕐᔪᐊᒥᑦ − ᓴᖅᑮᒍᓐᓪᓇᕐᖓᑕ ᐃᓄᓕᕆᓂᑦᑎᒍᑦ ᑕᐃᒪᐃᓪᓗᐊᑎᑦᑎᓗᑎᑦ. ᓯᕗᒧᐊᒃᑲᓐᓂᕆᐊᖃᕋᑦᑕ ᐃᓱᒪᓕᐅᕐᓗᑎᑦ ᑕᒪᒃᑯᓂᖓ ᓯᕗᓂᔅᓴᖃᑦᑎᐊᖁᔨᓗᑕ ᐃᓚᑦᑎᓐᓂ ᓂᓪᓕᐊᔨᐅᓗᑕ, ᐊᔅᓱᕉᑕᐅᔪᓪᓗ ᑕᒪᒃᑯᐊ ᑲᒪᒋᑦᑕᐅᑎᒋᓗᒋᑦ ᐅᑭᐅᖅᑕᖅᑐᒥ ᓴᖅᑭᐸᑦᑐᑦ. ᐅᑭᐅᖅᑕᖅᑐᖅ ᐊᑐᖅᑕᐅᔪᒪᓪᓚᕆᒻᒪᑦ ᓇᑭᑐᐃᓐᓈᖅᓯᒪᔪᓂᒃ − ᑕᐃᒃᑯᐊ ᐊᑐᕈᒪᔪᑦ, ᐅᒥᐊᕐᔪᐊᒃᑰᕈᒪᔪᑦ, ᕿᒥᕐᕈᒍᒪᔪᑦ, ᐅᔭᕋᕐᓂᐊᕈᒪᔪᑦ, ᖃᐅᔨᓴᕈᒪᔪᑦ ᐸᖅᑭᑦᑎᔪᒪᔪᓪᓗ. ᑕᒪᒃᑯᐊ ᐱᓕᕆᑦᑎᐊᕆᐊᖃᖅᑕᕗᑦ ᐅᖃᐅᓯᖃᑎᒌᓐᓂᒃᑯᑦ ᓄᑖᕐᓂᓪᓗ ᐱᓕᕆᖃᑎᖃᖃᑦᑕᕐᓗᑕ ᓂᓪᓕᐊᓂᒃᑯᑦ ᐊᔭᐅᖅᑐᐃᓂᒃᑯᓪᓗ. ᖃᓄᖅ ᑕᒪᒃᑯᐊ ᐱᐅᓯᕚᓪᓕᑎᒃᑲᓐᓂᕈᓐᓇᖅᑲᕗᑦ ᐱᓕᕆᖃᑎᒌᓐᓂᖏᑦ ᑲᓇᑕ − ᐅᓛᓵᓗ?
ᓯᕗᓪᓕᖅᐹᒥ, ᑲᑎᒪᖃᑎᒌᖏᓐᓇᕐᓗᑕ, ᓲᕐᓗ ᐅᓪᓗᒥᐅᔪᑎᑐᑦ ᑲᑎᒪᖃᑎᒌᓪᓗᑕ, ᑎᒍᒥᐊᖅᑎᐅᔪᓪᓗ ᐅᓂᒃᑳᖃᕐᓗᑕᓗ ᐃᓱᒪᒋᔭᑦᑎᓐᓂ ᐱᓕᕆᖃᑎᒌᒍᒪᓂᕐᒥᓪᓗ. ᐃᒻᒥᒃᑯᑦ ᐱᓕᕆᔪᒪᓂᕐᒥᑦ ᐱᑕᖃᕆᐊᖃᕐᖓᑦ ᑐᑭᓯᐅᒪᑦᑎᐊᕐᓗᑕᓗ ᐊᔾᔨᒌᓐᖏᑦᑐᓂᒃ ᑕᑯᓐᓇᕋᑦᑕ ᐊᒻᒪᓗ ᐱᔭᕆᐊᖃᕋᑦᑕ ᑕᐃᒃᑯᐊᓕᒫᑦ ᐱᖃᑕᐅᔪᑦ ᑕᐃᒫᒃ ᐱᒻᒪᑕ.
ᐊᐃᑉᐸᖓᓐᓂᓪᓕ, ᐃᓅᓐᖑᐊᑕᖅᓯᒪᖅᑐᒥᓂᐅᔪᒍᑦ ᐅᐊᔭᒨᖅᑐᓂᒃ ᐅᓪᓗᒥᐅᓕᖅᑐᖅ ᐊᑐᖅᑕᐅᔪᓐᓇᖅᑐᑦ ᑲᑎᑎᑦᑎᒍᑕᐅᕙᑦᑐᓂᒃ ᑎᒥᒃᑯᑦ ᐅᖓᓯᑦᑐᐊᓘᒐᓗᐊᖅᑎᓪᓗᒋᑦ. ᐅᐊᔭᒨᖅᑐᖅ ᑕᑯᓐᓇᖃᑦᑕᐅᑎᒍᓐᓇᕐᖓᑕ ᑏᕖᒃᑯᑦ ᓇᒥᑐᐃᓐᓈᖅᑐᑦ ᐅᑭᐅᖅᑕᖅᑐᒥ ᑐᓴᐅᒪᖃᑦᑕᐅᑎᔪᓐᓇᖅᑐᑎᑦ ᐃᓱᒪᒋᔭᒥᓂᓪᓗ ᐅᓂᒃᑳᕈᓐᓇᖅᑐᑎᑦ. ᑏᕖᒃᑰᒐᓗᐊᖅᑲᑦ ᑲᑎᒪᖃᑎᒋᓪᓗᑎᑦ, ᑐᐃᑐᒃᑯᑦ, ᑕᑯᓐᓇᖃᑦᑕᐅᑎᓗᑎᑦ ᔫᑑᑉ, ᐅᕝᕙᓘᓐᓃᑦ ᐅᖄᓚᐅᑎᑐᐃᓐᓇᒃᑯᑦ, ᐅᑭᐅᖅᑕᖅᑐᒥᐅᑕᑦ ᑕᐃᒪᒃ ᐅᖃᖃᑎᒌᒍᓐᓴᖅᑐᑦ ᑐᓴᐅᒪᖃᑦᑕᐅᑎᓗᑎᑦ ᐅᓪᓗᒥᐅᔪᖅ ᐊᓯᖏᓐᓂᓪᓗ ᖃᓄᐃᑦᑑᖃᑦᑕᖅᓯᒪᖏᓐᓂ ᑐᓴᕈᓐᓇᖅᑐᑎᑦ. ᑕᒪᑐᒥᖓ ᐊᑐᕐᓗᑕ ᐱᕙᓪᓕᐊᒍᓐᓇᑦᑎᐊᖅᑐᒍᑦ.
ᐃᓄᒋᐊᔅᓯᕙᓪᓕᐊᑐᐃᓐᓇᖅᑐᑎᓪᓗ ᐃᓅᓱᑦᑐᐃᑦ ᓄᓇᖃᖅᑳᖅᑐᒥᓃᑦ ᑕᒪᒃᑯᓂᖓ ᐱᔭᕆᐊᑭᑎᑦᑎᖃᑦᑕᕐᓂᐊᖅᑐᑦ ᐅᐊᔭᒨᖅᑐᓂᒃ ᓲᕐᓗ ᖃᐅᔨᒪᑦᑎᐊᕐᖓᑕ ᑕᐃᒪᐃᑦᑐᓂᒃ. ᐱᓕᕆᖃᑎᒌᓪᓗᑎᒃ, ᑕᐃᒪᐃᑦᑐᓂᑦ ᖃᕋᓴᐅᔭᓕᕆᓂᕐᒥᑦ ᐊᑐᕐᓗᑕ ᐃᓄᐃᑦ ᑲᓇᑕᒥ ᐅᓛᓵᒥᓗ ᐅᖃᖃᑎᒌᒍᓐᓇᖅᑐᑦ, ᓂᓪᓕᐊᖃᑎᒌᓪᓗᑎᑦ ᑕᐃᒪᐃᑦᑐᒃᑯᑦ.
ᐱᖓᔪᐊᓐᓂᓪᓕ, ᑕᒪᒃᑯᐊ ᑲᔪᓯᑎᒐᓱᐊᕐᓗᒋᑦ ᑐᓴᐅᒪᖃᑦᑕᐅᑎᓂᖅ, ᑮᓇᐅᔭᓕᕆᓂᖅ ᑲᑎᒪᔨᑦᑎᒍᓪᓗ ᐃᑲᔪᖅᑐᖅᑕᐅᓂᕐᒥᑦ ᐱᓪᓚᕆᐊᓗᒻᒪᑦ ᑲᑎᒍᓐᓇᕋᑦᑕ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ (ICC) ᑲᓇᑕᒥ ᑖᒃᑯᐊᓗ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᓯᑳᑦᑕᒥ. ᐱᓕᕆᖃᑎᒌᓪᓗᑕ ᐅᖃᐅᓯᖃᑎᒌᓪᓗᑕ, ᐃᑲᔪᖅᑐᐃᖃᑦᑕᐅᑎᓗᑕ, ᐱᕙᓪᓕᐊᑦᑎᐊᕈᓐᓇᕋᑦᑕ.
ᑎᓴᒪᖓᓐᓂᓪᓗ, ᕿᓚᓈᑦᑎᐊᖅᑎᓪᓗᑕ ᑲᔪᓯᒍᒪᔭᑦᑎᓐᓂ, ᐱᒻᒪᕆᐅᒻᒥᔪᖅ ᑕᑯᓐᓇᖅᑕᕗᑦ ᑲᔪᓯᑐᐃᓐᓇᖁᓕᕐᓗᑎᒍ ᐊᔅᓱᕉᑎᒋᑦᑎᐊᕐᓗᒋᓪᓗ. ᑖᒃᑯᐊ ᐃᓪᓘᔪᓂᒃ ᐅᑭᐅᖅᑕᖅᑐᒥ ᐅᓛᓵᑦ ᓄᓇᖃᖅᑳᖅᑐᒥᓂᖏᓐᓂ ᐱᓕᕆᐊᖑᔪᑦ ᐆᑦᑑᑎᐅᔪᖅ ᐱᓕᕆᖃᑎᒌᓪᓗᑎᑦ ᓄᓇᖃᖅᑳᖅᑐᒥᓃᑦ ᑲᑐᔾᔨᔩᑦ; ᒫᓐᓇᐅᔪᖅ ᐊᑐᓕᖅᑎᒍᓐᓇᕋᑦᑎᒍ ᐊᑐᓕᖁᔭᐅᓯᒪᔪᑦ ᐃᓕᓐᓂᐊᑎᑦᑎᖃᑦᑕᕐᓗᑎᑦ ᑕᒪᑐᒥᖓ ᒪᑭᒪᔾᔪᑎᐅᔪᓐᓇᖅᑐᒥᑦ ᐊᑐᕋᓱᐊᑦᑎᐊᓕᖅᑕ ᒫᓐᓇᐅᔪᖅ.
ᑭᖑᓪᓕᖅᐹᒥᓕ, ᑎᒍᒥᐊᖅᑏᑦ ᖁᓕᕇᒃᑲᓗᐊᖅᑲᑕ ᐱᕙᓪᓕᐊᓇᓱᐊᕐᒥᓗᑎᑦ ᓄᑖᕐᓂᑦ ᐅᑭᐅᖅᑕᖅᑐᒥ ᐱᖁᔭᕐᓂᑦ ᑲᓇᑕᒧ ᓄᑖᕐᓂᑦ ᐊᑐᖅᑕᐅᔪᓐᓇᖅᑐᓂ ᐱᓇᓱᐊᑦᑎᐊᕐᓗᑕᓗ ᑕᒪᒃᑯᓂᖓ ᐱᓕᕆᖃᑎᒌᓐᓂᕐᒥᑦ ᑲᓇᑕᒥ ᐅᑭᐅᖅᑕᖅᑐᒥᓪᓗ ᐱᓕᕆᖃᑕᐅᔪᓐᓇᖅᑐᓂᑦ. ᐱᓕᕆᖃᑎᒌᓪᓗᑕ ᐊᒻᒪᓗ ᑲᒪᒋᖃᑦᑕᐅᑎᓗᑕ ᐅᑭᐅᖅᑕᖅᑐᒥᐅᑕᐅᔪᑎᒍᑦ, ᐱᓗᐊᖅᑐᒥᑦ ᐅᓛᓵᒃᑯᑦ ᓄᑖᕐᓂᑦᑕᐅ ᐱᖁᔭᓕᐅᕐᒥᓗᑎᑦ ᐊᔾᔨᐅᖏᑦᑐᓕᓗᑎᑦ.
ᐃᓱᓕᑦᑎᕙᓪᓕᐊᓕᕐᓗᓂ, ᓇᓗᓇᐃᖅᑕᐅᓯᒪᒐᑦᑕ ᐅᖃᒃᑲᓐᓂᕈᒪᕗᖓ ᐊᔅᓱᕈᓐᓂᑎᓐᓂ ᒫᓐᓇᐅᔪᖅ. ᖃᓄᖅ ᑕᒪᒃᑯᐊ ᐊᔅᕉᑎᒋᔭᕗᑦ ᑲᒪᒋᓂᐊᖅᑲᕗᑦ ᐅᓪᓗᒥᐅᔪᖅ ᐱᕕᔅᓴᖃᖅᑎᑕᐅᑎᓪᓗᑕ ᓄᑖᕐᓂᑦ? ᓯᕗᒧᐊᑉᐸᓪᓕᐊᒋᐊᖃᕋᑦᑕ ᐃᒻᒥᒃᑯᑦ. ᑕᒪᒃᑯᐊ ᓈᒻᒪᓴᓐᖏᑦᑐᑦ ᓵᓚᖃᖅᑎᖏᓪᓗᒋᑦ ᑲᑉᐱᐊᒋᓐᖏᓪᓗᒋᓪᓗ ᐊᐅᓚᑎᔾᔪᑎᒋᓇᓱᐊᕐᓗᒋᑦ ᓈᒻᒪᒋᓐᖏᑕᕗᑦ. ᓯᕗᓪᓕᖅᐹᖑᔭᕆᐊᖃᕋᑦᑕ − ᑕᑯᕐᕈᔾᔨᓗᑕ ᓯᓚᕐᔪᐊᒥ ᑕᒪᒃᑯᓂᐊ ᐱᑕᖃᕈᓐᓇᓂᑦᑎᓐᓂ ᑲᓇᑕᒥ ᐅᓛᓵᒥᓪᓗ ᐱᓕᕆᖃᑎᒌᒍᓐᓇᖅᑐᓂᑦ. ᐊᖏᔫᓇᓱᐊᕐᓗᑕ. ᐃᓕᓐᓂᐊᕐᓗᑎᒍ ᐅᐊᑦᑎᐊᕈ ᐊᑐᖅᑕᐅᖃᑦᑕᖅᑐᒥᓃᑦ ᑕᐃᒃᑯᐊᓗ ᐊᑐᕐᓗᒋᑦ ᐅᓪᓗᒥ ᑲᔪᓯᓇᓱᐊᓕᖅᑕ, ᐃᓕᓐᓂᐊᕈᑎᑎᒎᒐᓗᖅᑲᑦ, ᐊᐅᓚᑦᑎᔾᔪᑎᒍᑦ ᐅᕝᕙᓘᓐᓃᑦ ᐊᑦᑐᐃᓂᖃᕐᓂᒃᑯᑦ ᐱᕙᓪᓕᕈᑎᔅᓴᐅᔪᓂᒃ ᐊᖏᕈᑎᑎᒍᑦ, ᐃᓕᖅᑯᓯᐅᔪᓂᒃ ᑲᔪᓯᑦᑎᐊᕋᓱᐊᓕᖅᑕ ᐱᔪᒪᓂᖏᓐᓂᓪᓗ ᓄᓇᓖᑦ ᑲᓇᑕᒥ ᐅᓛᓵᒥᓗ.
ᒫᓇᐅᔪᖅ ᐊᔾᔨᐅᖏᑦᑐᓕᒍᓐᓇᖅᑯᒍ ᑕᑯᓐᓇᓐᖑᐊᑲᓐᓂᕐᓗᑎᒍ ᓯᕗᓂᕗᑦ ᐅᑭᐅᖅᑕᖅᑐᒥ, ᐱᕙᓪᓕᐊᔪᓂᒃ ᒪᑭᒪᔾᔪᑎᔅᓴᓂᒃ, ᑕᒪᒃᑯᐊ ᐃᑯᐱᑦᑐᓕᕆᓂᐅᔪᑦ ᑲᔪᓯᖁᓪᓗᒋᑦ, ᓴᓐᖓᑎᑉᐸᓪᓕᐊᖃᑎᖃᕐᓗᑕ ᐱᓕᕆᖃᑎᑦᑎᓐᓂ ᓄᓇᓕᑦᑎᐊᕙᐅᑎᑦᑎᓇᓱᐊᕐᓗᑕᓗ. ᐱᓕᕆᖃᑎᒌᓚᐅᖅᑕ ᐅᑭᐅᖅᑕᖅᑐᒥ ᓂᕆᑎᑦᑎᒍᓐᓇᕐᓗᑕ ᐃᓄᓐᓂᑦ, ᐆᒻᒪᖅᑯᑎᖃᖅᑎᑦᑎᓗᑕ ᐃᑲᔪᖅᑐᐃᓗᑕᓗ ᓴᓇᓐᖑᐊᒐᕐᓂᑦ ᐱᖅᑯᓯᖏᓐᓂᓪᓗ. ᐱᑕᓕᐊᓗᓐᓂᓪᓗ ᓄᓇᒦᑦᑐᓂᑦ ᐊᑭᑐᔪᓂᒃ, ᑕᒪᒃᑯᓂᖓ ᓴᓇᑦᑎᐊᕐᓗᑕ ᐱᓕᕆᓇᓱᐊᓚᐅᖅᑕ.
ᐱᓕᕆᖃᑎᒌᓪᓗᑕ ᓴᓐᖏᔫᔪᓐᓇᖅᑐᒍᑦ, ᑲᔪᓯᒍᓐᓇᖅᑕᕗᑦ ᐊᔅᓱᕉᑏᑦ ᐊᓯᔾᔨᕐᓗᒋᑦ, ᐱᓕᕆᖃᑎᒌᓪᓗᑕ ᐃᓅᔪᒍᑦ ᐱᔪᒪᓂᑦᑎᓐᓂ ᐅᑭᐅᖅᑕᖅᑐᒥ ᓯᑳᑦᑲᒧᑦ, ᐊᓛᔅᑲᒧᑦ, ᑲᓛᖡᑦ ᓄᓈᓄᑦ ᑲᓇᑕᒧᓪᓗ. ᐊᑕᐅᓯᐅᒐᑦᑕ.
ᖁᔭᓐᓇᒦᒃ.