Nuvipiri 7, 2017 – Aatuaa, Kanata – Inuit Kanatami, Kalaałiit Nunaani, Alaaskami Sikaattamilu uqaqatigiilauqtut Aatuaami piqqusinginni ikupittulirinirmit, niqissaqattiarnirmit piuqsiaqtauninginnillu Katimatillugit piliriqatigiiqattarniarniralauqtut ilaliujjillutit saqqijaaqtittinirmit, piuqsuarnirmit sanngininginnillu inuit piqqusingita pijunnautingit niqissaqsiuttiarnirmit. Katimaniujuq ajjiungittut pingasut ukiuqtaqturmiut nilliaqatigiilauqtut inuit pijunnautinginni piuqsuaqattanirmit ukiuqtaqtumi inuunasuarjutigilugit sunakkutaat ammalu Silarjuap Ukiuqtaqtunganni nirjutinit aulattilutit killiqaqtitaunngittiarlutillu.
Nuan Simit, Issivautaq ammalu Iqqanaijaqtinut sivuliqti Inuppianit Avittuqsimajunik Kuapuriisakkunni ammalu Issivautaq Inuit Ukiuqtaqtumiuqatigiit Katimajingit nirjutilirinirmit aulattinirmut katimallutit nalunaiqsilaurmijuq, “Pijunnautiit asivarunnanirmit Ukiuqtaqtumi inuunasujjutauvammata ilisimattiariaqaqtut Silarjuami Katujjiqatigiinnut nalunaiqtausimajunik Pijunnautinginni Nunaqaqqaaqtuminirnut. Inuit pijunnautiqarngata saqqiqsimajut avativut asijjipalialirninganni kikkutuinnaillu isumagijangit malittugit. Inuit “Atausiummata” inuunasuaqtut tisamanik nunalirjuarnit ajjigiinngittunik atuqattaqtutit asivarningitta pijunnautinginni ikajuqturumallutigullu ilinniaqatigiillutalu”.
Jim Sitaats, Angijuqqaanga Inuit Ukiuqtaqtumiuqatigiit Katimajingit Alaaskami uqalauqtuq, “Inuit pijunnautiqaqtut niqinut tunngavigillarimmajjuk piqqusittinni uppirijattinillu ammalu tunngaviullutit inuit niqingit niqiqattiariaqarnirmuummata. Qaujimanittinnut aulatauvatkatta aulattittiaqtuta uppirijaqattiaqtutalu inuuviginasuaqtatinni milianginni arraaguuliqtunit taimaak iliqqusiqaratta ammalu taimaassainnaq kajusiniaqtuta. Uqausirituinnariaqannginattigu kisiani kamagijariaqarattigu tamanna.”
Amali Jansan, Angijuqqaarijaujuq, Minista Iqalulirijikkunnut Asivarnimullu uqalauqtuq, “Inuit piliriqatigiigiaqarngata nunaqqatigiit, timiujunik, avittuqsimajunik, silarjuap ukiuqtaqtunganni silarjuamilu atuliqtittilutit sanngatikkanirlugillu inuit asivarunnautingitta pijunnautingit uvvaluunniit inuit isirunnariaqattitaugajanngimmata inuunasuarvinginnut ukiuqtaqtuup ilulinginni pijunnangillutit sivunittinni.”
Katimaniujuq pigiaqtittikannirumalauqtuq Kitigaarjuit Nalunaiqtausimaninganni Taikannga 2014−mit Inuit Ukiuqtaqtumiuqatigiit Katimajingit katimavijjuarninginni qimirruqujillutit taakkuninga piqujanginni (silarjuami, avittuqsimajunik, nunalirjuanillu), avativut asijjirningannut, kikkutuinnaillu isumagijangit ukiuqtaqtuup nirjutilirinirmit ammalu Inuit asivaqattarningita piqqusinginni.