Inuit Ukiuqtaqtumiuqatigiit Katimajingikkut Tiliurivut Nunalijjuanit Iqqagivaqatsiaqullugit Pijunnautinginnit Nunaqaqqaaqsimajut Piurismi Sila Pillugu Angiqatigiigutimi

Tisipiri 3, 2015 – Piuris, Vuraans – Ukaliq Ijitsiaq, Iksivautanga Inuit Ukiuqtaqtumiuqatigiit Katimajingita Katijaqtuqsimaqataujuq katujjiqatigiittut Nunaliujunut Aturumaarniaqtaminnik Katimajjutiqaqtillugit Silaup Asijjirningata miksaanut COP 21 uqausiutillugu Piurismi nipiqautigillunijjuk kiggaqtuillutik inungnit. Maannaujumi, aajiiqatigiittiit piliriqaliit saqqititsinirmut titiraqtaugianngaqtumik angiqatigiigutimik tunijaugajaqtumik sivuliqtinut Piurissiliarniujajunut pinasuarusiulaaqtumi.
Tamakkua aajiqatigiingniit sivulirniujammata ilangillu nunalijjuat ikajuqtuingittut tavvauninganik uqausiup nalunangititsijumik silaup asijjirninganik attuinirluttumik timilinnit Inungnit pijunnautilinnik Nunaqaqqaaqsimajunik. “Silaup asijjirninga avatimut isumaaluutautuinnangittuq timilinnut inungnut pijunnauti isumaalunnaqtuulluni auppallianingalu Ukiuqtaqtuup attuijuq iluunnainit inuit inuusinginnit taimaimmat kingullipaangugajaqtuq titiraqsimajuq pijunnautinginnit nunaqaqqaaqsimajut tigungusijariaqaqpuq aulatsigutigilugulu papallugulu Titiraqtausimajumi 2.2.−mi. Nunataarutimi pijunnautiqaqtugut niglasuttumiinnirmik” aivautiliminiq tamatumunga Ijitsiaq.
Nunaqaqqaaqsimajut ammalu timilinnut inungnut pijunnautiqarniit pillugit katimajaqtuqsimaqataujut tukisitainnaqput qaujillutik titiraqtausimajut ilitaqsisimajariaqarmatnunaqaqqaaqsimajut ammalu timiliit inuit pijunnautinginnik piqasiutisimalugillu pijunnautingit nunaqaqqaaqsimajut ulurianaqtumut tamatumunga. “Isumajungali angiqatigiittuinnaugunnanittinnik timiliit inuit pijunnautiqarninginnik attanangittumi avatiqarnirmik ammalu Nunaqaqqaaqsimajut sivulliqpauninginnik pilirijiit silaup asijjirningata attuinirlugutinginnit. Nunaliqutilimaavut Ukiuqtaqtumi pigiarluni uqquujumiittunut aksururnatuqsiurmata asijjipalliajumut silamut. Ilitarijautsimatsiariaqarmat tamanna,” uqaqtuminiq ijitsiaq.
“Tiliuqpavut Kanata, Nuaui, Mialigait Nunangat, Kalaałiit Nunaat, Rasa, Suviitan, Vinlan Ikajuqtuiqullugit nunaqaqqaaqsimajunit tavvauningat ammalu timiliit inuit pijunnautiqarninginnik uqausingat titiraqtasimainnaqullugu titiraqtausimajumi 2.2.−mi nunataarutimi,” uqaqtuminiq Ijitsiaq. “Kinguumagigattigut nunaliit tamakkunani nunalirjuani aulatjailutik ammalu ajuinnarvigilugit iqqagijangit gavamait tamatumunga. Ajuinnarniq amisunut nalimugijaqarmata ajuinnaqtunut nunaqaqqaaqsimajunut katimajaqtuqsimajunut atuqtaujunut aajiiqatigiitinut tavvani Piurismi.”