Siitiipiri 29, 2016 – Uasintan, T.S. – “Tunngaviummat taimailluatittiniq tamakkuninga kamaniaqtilluta asijjipalliajunik Ukiuqtaqtumi ikajuqtuimmat inuqutittinni nunalittinillu.” Tamanna tusarassaq Inuit Ukiuqtaqtumiuqatigiit Katimajingata Issivautangani, Ukaliq Ijitsiarmit, sivuliqtinut silarjuami nakituinnaaqsimajunut uqausirilauqtanga, ippassaq katilauqtut Uasintan, T.S.mi sivulliqpaaqtiarmi illurjuamuuqtutit qakuqtaalummut qaujisaqtimmariit ministanginnut.
Ministait takunnaniqsaulauqtut amisukallannit pijjutinginni ammalu pigiarumajuqaqqat manimavviullutik nutaarnit pigiarutissanik tukisiumattiakannirniarngata, kamalutillu ilitturlutillu asijjipaliajunik ukiuqtaqtumi. Ijitsiaq sivuliqti uqaujjilauqtuq qaujisaqtinik taimailluatittiqattaqujilluni piliriqatiqaqtillugit inunnit, qanutuinnattiaq tusaumaqattautitillugit.
“Qaujisaqtiit inuusiqasuungummata aniqsaaqtuqtunigillu qaujisarninginni qautamaat. Inuit inuunasuasuungummata aniqsaaqtuqtunigillu ukiuqtaqtuq angirranganni qautamat − uvagut tamaaniinnginnarattali arraagulimaattiaq. Piliriqatigilluta, taimailluaqtitaulutalu, sannginiqtaakannirunnaqtugut, pijarialippullu kinnguumajavut pilutigu qaujimanittigut ullumiujuq tamakkua aturlugit.”
Ijitsiaq uqaqtuni suli tamakkua sivulliqpaujjaugialiit atuqtaulutit qaujisarninginni qaujimaninginni Inunit taimailluatittinngiqattarninginnut Inuit Nunalinginni pitaqaqunagit Ukiuqtaqtumi.
Ijitsiaq uqalaurmijuq maanna tavva pigutta Ukiuqtaqtumi qaujisarnirmit qaujisarniujullu ilaqarlutit nunaqaqqaaqtuminiit qaujimaninginni, tunngaviujunnarngat tamanna aaqqissuitillugit qaujisarnirmit piliriariniaqtanginni Inuit Ukiuqtaqtumi tatigijauttiaqattarlutit qaujimaningit kajusigunnarngata taimaak Ukiuqtaqtumi
“Amisuaqtiuluaqtuq, isumaaluutiit pijaujumajullu asinginnu nalunaijaqsimajuujaariiqtunit qaujisasungummata qaujisaqtimmarillu Ukiuqtaqtumi Inullu pijunnautingit pijumajaraluangillu killiqaqtitaullutit,” Ijitsiaq uqaqtuni, “Tamanna ministauniq asijjirutaujunnaqtuq silarjuami ukiuqtaqtumi nunalinni pijunnautingit atuqtaulutit taimailluaqtitaulutit Inuit. Qujalijunga nipivut tusaqtauvalirngata. Niriugijaqaqtungallu pigiaqpalliagunnanngisuliratta tamakkuninga.”
