14−giliqtangani Inuit Ukiuqtaqtumiuqatigiit Katimajingita Katimaniminingat
“Inuit – Sannginiq Ammalu Sailiniq”
Juuni 30, 2022 – Ankurij, Alaaska – Inuit Sukutkamiinngaaqsimajut, Alaaskamik, Kanatamik, ammalu Kalaallit Nunaanik katigumaarmata Julait 19−mi 21−mut, 2022, katinngangikkaluarlutik katimaniqarlutik 14−giliqtanganik Inuit Ukiuqtaqtumiuqatigiit Katimajingita (ICC) Katimajiit Katimaniriluniuk Katimajjutiqarlutik “Inuit – Sannginiq ammalu Sailiniq”.
ICC−kut Iksivautanga, Talii Sampu tuaruu, quviasuppuq uqausiqariaksaq Sivuliqtingat Kalaallit Nunaata, Mut Puarup Igiti, angiqtuminiungmat ICC−kut Katimaniqaliqpata Ikajuqtigijaugajarnirminik. Tuaruu ilasilluni, “Ajurnaraluaqtillugu katigiaksaq timikkut pijjutigillugu attuiniqaqattarninga suli Nuvagnarjuaq−19, pijuksaujaarniqaqpugut aulaniarlugu tamanna Katinngangikkaluarluta Katimaniuniaqtuq, katimaniqaqtitsiniaqtuq 66−nik Katimaqatauniaqtunit uqausiqarlutik aniguqtisimajattinnik Katimajiit Katimaniqalauqsimatillugit 2018−mi Utqiavingmi, Alaaska”.
Nunarjuami atuqtaujut sila pillugu isumaaluutaunginnarningit attuinirlupalliatuinnaqtut Ukiuqtaqtumik, niruaqsimajugut katimajjutigigumallugu sannginingat inuqutitta kajusiinnaqtumillu piliriarivattavut kamagijautsiaqullugu suliniq sailinirmilu atuqtaunginnarninga nunalitta nunalituqauniriingnaqtangatalu nunatta isuqangittumut.
Katigunnanginnitinnut timikkut, Katimajiit Katimaniriniaqtanga kigliqaqtitauniaqtuq unikkaaliurumajunut piliriatta miksaanut tusaratsaliurnirmut; isumatsaqsiurutauninga atuliqtitaumingatalu 2022 Angiqatigiigutiup timikkut katimaqatigiigumaarniarutausimajuq Illulissatmi, Kalaallit Nunaani Julai 2023−nguliqpat uqaqatigiigutaukkanirniatillugit atuagatsait tukimuagutitsaillu pivaalliqtitaukkanniqullugu iqqanaijaangat ICC−kut 2022-2026−mut piliriaqarniqsangat Kalaallit Nunaani Iksivautaqarviksanga. Ilaliutitillugu, nutaamik sivuliqtitaaqpallianiarnivut, piqasiutilugu Nunarjuaq pillugu Iksivautauniaqtumik, Kalaallit Nunaanut tunijaugumaarniarluni.
Arraagut sitamat aniguqsimaliqtuni ICC−kut ilaliutisimaliqtumik atuliqsimajut Nunaqaqqaaqsimajunut’ Timiqutigijaujumik Nunarjuami Imalirijikkut Timiqutingani, Katujjiqatigiinginni Nunaqaqqaaqsimajut Niqiqarusingit Pillugit Aulataujuni, ammalu Nautsituqtiunirmi Gavamauqatigiit Katimajinginni Silaup Asijjirninga Pillugu. ICC−kut iqqagijauniqainnaqtut iqqagijautsiaqsutik Nunarjuami Nunaqaqqaaqsimajunut’ timiqutigijaunirmik taakkunani Juunaitit Naisani, Ukiuqtaqtumi Katimajinut, asinginnullu amisunut gavamauqatigiittunut timiqutigijaujunut katimajjutiqaqpatsutik isumaaluutaujunit attuaniqaqtunik Inungnut Ukiuqtaqtumi.
“Qilanaarijaqaqpugut qaritaujatigut katimaniqalaarnitinnit piluaqtumilu, katimaniqalaarnitinnit Illulissarmi katimaniqarluta arraaguulaaqtumi quviasuutiqalaarnivut nunalittinnik, atausiuqatigiingnitinnik sannginittinnilu”, uqaqtuminiq Jamaal Taal, Tuglia Iksivautaup, Kalaallit Nunaani.
Qaujigiarviksat:
Kiali Ininguvuk Kaiti Igiti Matjuviut Kiurul Saiman
ICC (Alaaska) ICC (Kalaallit Nunaani) ICC (Kanata)
+1 907-274-9058 +299 323632
kelly@iccalaska.org kattie@inuit.org csimon@inuitcircumpolar.com
Taakkua Inuit Ukiuqtaqtumiuqatigiit Katimajingit (ICC) Nunaqaqqaaqsimajuullutik Timiujuq (IPO), pigiaqtitaminiq 1977−mi qaujijautitauluni quviasuutaulunilu atausiuqatigiingninga 180,000 Inuit Alaaskamiut (Mialigait Nunangani), Kanatami, Kalaallit Nunaani, ammalu Sukutkamiut (Rassa). ICC−kut iqqanaijaaqaqpattut atuqtauqullugit Inuit pijunsautingit, qaujisatsiarlugu nautsiturlugu Ukiuqtaqtumi avati atuqtauqullugulu Inuit inuusiqausinga. Pijjutigillugu silaup asijjirninga, sulijuqsaratta ilaujariaqallaringninginnik sivuliqtiit nunarjuami ammalu gavamaujut ilitaqsijariaqarninga, iqqagijaqatsiarlutik atangiqtumillu atuliqtitaulutik timiqaqtumut pijunnautigijaujut Inungnut asinginnullu Nunaqaqqaaqsimajunut nunarjualimaami.