Utupiri 29, 2018 – Aatuaa, Kanata – Inuit piliriqatiqalauqtut 14−nit nunalirjuanit angisinni pivalliatittinasuaqtutit nuqqatittijjutaugajaqtumit Atuqtauqattarninginni Uqsualunni salummasaqsimanngittunit ukiuqtaqtumi, maannaujuq atuqtauqattarunniiqtulli aantaattikami Isumaliuqtauningit nuqqaqtitauninginni Silarjuami Imarmiutalirinirmut Katujjiqatigiit Paqqittinirmut Katimajiralaangita Katimaninginni (MEPC 73) Lantami Utupiriutillugu 25, 2018.
14 nunalirjuat – Aasturia, Paangilitaas, Kanata, Tanmaak, Vuraans, Juumani, Aislaan, Airilan, Natulan, Nuu Jiilan, Nuavai, Sipainv, Puulan, ammalu Kuip Nunangata Ingngalik – angiqatigiigutimit pilauqtut Katimajiralaangullutik Pilirivallianialiqtut attuiniqaqtunit aturlutit Uqsualunni salummasaqsimanngittunit Ukiuqtaqtut Imanganni, suqqatittilirlutit.
Inuit Ukiuqtaqtumiinguqatigiit Katimajinginni (Kanata) Angijuqqaap Tungilinga Liisa Qupirrualuk kiggaqtuilauqtuq Inunnit Laantammut katimajaqtuqsimalluni. Uqalauqtuq, “sanngijualummi pigiarutiqattiaqtusi atuqtauqujaunatit Uqsualuit salummasaqsimanngittut Ukiuqtaqtumi. Nunalivut piunngittualukkut attunirluqtauqunnginattigu ammalu akiliingaalirluta asijjirialittaqarniqqat atuqtauqujaunnginninginni Uqsualunni salummasaqsimanngittunit Ukiuqtaqtumi akitujualuugiirngata sunakkutaat nunalinnit. Sunakkutaat ukiuqtaqtumuuqtauvammata umiarjuakkut aujauliraimmat.” Uqsualuit Salummasaqsimanngittut, uqsualutuinnauniraqtaummijut, akikinniqpaangummata usikattaqtugit uqsualuttautikkut.
Inuit Ukiuqtaqtumiinguqatigiit Katimajinginni tigusilauqtut utkiavik nalunaiqsininganni 13−nganni Inuit Ukiuqtaqtumiinguqatigiit Katimajinginni katimanirjuamit Utkiavimmi, Alaaska Julaimi 2018−mi. Nalunaiqsillutit pijariqtauqujaullutit akuttujuutiulugit taakkuninga Uqsualulirinirmit salummaqsimanngittumit Ukiuqtaqtumi titiraqsimajuq 18−mi, imailingalluni:
“Piliriangujarialik Inuit Ukiuqtaqtumiinguqatigiit Katimajinginni nilliajiuluni ajauqtuilunilu Silarjuami Imalirinirmit Katujjiqatigiinnik Ukiuqtaqtumi, asinginnillu silarjuamiittunit ammalu avittuqsimajut piqujanginni, tuavirnaqtunillu kamaqattariaqarnirmit, ammalu akuttujuutiulugi kamagijaugiaqarningit Uqsualulirinirmit salummasaqsimanngittunit attuiniqaluaqunagit imarmiutarnit iqalunnillu ammalu pavvisattauqunagit asivarniuvattut silait malittugit, ammalu attanaqtumiigiaqannginninginni ammalu avativut paqqilutigu.”
Niriugijaugaluaq Kamagijauniarninginni Katimajiralaanut Nuqqaqtitaunasunnirmut tigujaulaaqtussaugaluaqquq 2021, siarmaallialugulu 2023−mut.