Maajji 25, 2015 – Iqaluit, Nunavut – Inuit Ukiuqtaqtumiuqatigiit Katimajingit, Kanataup Gavamanga ammalu Nunavut Gavamanga katujjiqatigiivvinga katimanirmik aulatsiniq ukiuqtaqtumi isumalirinirmuungajumik katimatitsiunialaaqtumik iqalunni, Nunavut, Maajji 25 tikillugu 27. Pijjutinga ullunut−pingasunut katimaniup amiqqautiqarniarmata naammaniqpaanik aturatsanik, nunaqaqqaaqsimajut qaujimaninganit ammalu nunaliup isumagijanginnit isumaliriniup miksaanut ammalu ajurnarninganik uqausirilugu inuusirmik nangminiq kipisiqattarniq ukiuqtaqtumi nunaliujuni.
Taanna katimaniq ilagivauk anginiqsaulluni Ukiuqtaqtumi Katimajiit pigiarumajanganik Kanatami iksivautaujumut (2013-15), sivuliqtaukasiutijuq Kanatamut, Inuit Ukiuqtaqtumiuqatigiit Katimajingikkunnut, Nuaui, Kingtamngata Tiangmaak, Mialigait Nunanganniinnguuqsimajut ammalu Rasakkut Katujjiqatigiinnginnut. Nunarjuami katimaniq upattausimajuq ungataaniittunut 100 katimajaqtuqsimajut, piqasiutillugit kiggaqtuijiit Ukiuqtaqtumi Nunalijjuanut ammalu Ukiuqtaqtumi Nunaqaqqaaqsimajunut timiqutigijaujunut, inuusuttuqaurilluni, qaujisaqtiit ammalu piliriamut aulatsijiit.
Iqqagijautsiaqtuq Liuna Agluukaq, Kanatami Minista Ukiuqtaqtumi Katimajinut, Ministarijaq Ukiuqtaqtumi Katimajinut, maannaujumilu Iksivautarijaujuq, matuiqsijuminiq katimanirmik ammalu Tuan Simis, Angajuqqaaq, Inuit Ukiuqtaqtumiuqatigiit Katimajinginnut – Kanata, ammalu Tuglirijaulluni−Iksivautaunirmut Ukiuqtaqtumi Katimajiit Ikupivvilirinirmu Pivalliatitsinirmut Piliriqatugiittunut katujjiqatigiinut, matuiqsijjutiminik uqausitsaliminiq. Simis uqausiqaqtuminiq naammangittuuninganik amisuuluaqtut inuusirminnik nangminiq kipisivattut inui nunanganni asinginnillu ukiuqtaqtumi nunaliujuni, piluaqtumi inuusuttut.
“Taanna katimagutiqarniq pimmariuvuq isumalirinirmik ammalu qanuingisiariaqarniq attuivammat atunik amma iluunnatinnit, uqaqatigiigutauqattariaqarmat. Naasautituinnaunngimmata uvvaluunniit amisuuningit nalunaijaqtausimatuinnanngittut, inungnit manna pijuq ilanngautigisimajattinnik taikkualu qimattaujut kajusigiaqarmata inuusirminnik. Ilaiqattaqsimajugut, piqatittinnit iqqanaijaqatittinillu, tillivviuqattaqsimagatta sivuliqtigigunnataqtinni sivuniksavut pillugu.” Uqaqtuminiq Tuain Simis, Angajuqqaaq, Inuit Ukiuqtaqtumiuqatigiit Katimajingit Kanata.
Amisut pijjutauvammata amisuugutaujut inuusirminnik nangminiq kipisivattut Ukiuqtaqtumi, pijjutauqasiutillutik atuinnaunginnikunginnut kiinaujaliurasuarumaluni pivitsaugunnaqtut, silaup asijjiqpallianinga, ingminnik−upigigunniirniq ammalu piqqusiq, atuqtausimajut quaqsaanaqtukkuuqsimaniit, illukitsarniq, ajuqsarniq, ajulirutiqaqsimaniit, ammalu niqimik ajuqsaqattarniit. Aksururutauqasiutijuq Inungnut asinginnullu Nunaqaqqaaqsimajunut nunalimmi pijitsirarutaujunut atuinnaqanngiluarniq ammalu pijunnasiaqtunik inungnit ikajurunnaqtunik attanaqtumiiliqtunut uvvaluunniit kinnguumatsijunut ikajuqtaugutitigut.
Amiqqautiqarniq naammaniqpaanik pilirijjutaugunnaqtunik isumalirinirmut ilagivauk aaqqigiarutitsaup, ammalu 2014−ngutillugu, Inuit Ukiuqtaqtumiuqatigiit Katimajingikkut pigiaqtitsijuminiit qaritaujakkut ikiaqqivimmik nalunaijaisimajunik inungnut isumalirinirmuungajunut qanuingitsiariaqarnirmullu taakkununga sitamanut nunalirjuangujunut. www.arcticcbm.org/wellness
Inuit Ukiuqtaqtumiuqatigiit Katimajingikkut Kanatami kajusiujjiniaqput ajuinnaaqarlutik tunngavitsatsiangujunik pigiarutaugunnaqtunik taakkununga pinasuarutauniaqtunik qutsiliriittunut gavamanut nuqqaqtigumallugu inuusirminnik nangminiq kipisiniq. Amisut naammaniqpaat pilirijjutaugunnaqtunik ukiuqtaqtumi isumalirinirmut ammalu ajuinnarniq nalunaiqtausimajut qaujisarnikkut ammalu iqalunni katimanirmi. Tamakkua maannaujumi amisunnguriaqtausimajut ukiuqtaqtumi nunaliujuni, qaujivalliagutaullunilu atuqtauliqpallianinga nunaqaqqaaqsimajut qaujimaningit ammalu nunalingmi qaujimalitait tamatumunga kamagunnarningit.