ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑕᑯᓐᓇᖅᑕᐅᓂᖏᑦ ᐱᒋᐊᖅᑎᑦᑎᔾᔪᑕᐅᓚᐅᖅᓯᒪᔪᓂᒃ ᑕᐃᑲᓂ 1970−ᖏᓐᓂ ᐱᓕᕆᐊᖑᓚᐅᕐᒥᔪᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ ᐱᐅᓯᕚᓪᓕᑲᓐᓂᖁᓪᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ ᐃᓄᓐᓂᑦ ᐊᒻᒪᓗ ᐊᒥᓂᑦ ᐱᔾᔪᑎᓕᓐᓂᑦ. 1983−ᒥ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᐊᖏᖅᑕᐅᓚᐅᖅᓯᒪᔪᑦ “ᑲᑎᒪᑎᑦᑎᓂᕐᒧᑦ ᖃᓄᐃᓕᖓᓕᕐᓂᖏᑦ” ᑕᐃᑲᓂ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ ᐊᑖᓃᓪᓗᑎᑦ ᒪᑭᒪᔾᔪᑎᓕᕆᓂᕐᒥᑦ ᐃᓄᓕᕆᓂᕐᒧᓪᓗ ᑲᑎᒪᔨᖏᓐᓂ – ᖃᐅᔨᒪᔭᐅᕙᑦᑐᖅ ᐃᒫᒃ ECOSOC.

2000−ᒥ ᓯᓚᕐᔪᐊᒥ ᑲᑐᔾᔨᖃᑎᒌᑦ ᑲᑎᒪᔨᐅᖃᑕᐅᖏᓐᓇᖅᑐᑦ ᓄᓇᖃᖅᑳᖅᑐᓕᕆᓂᕐᒥᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᑦ ᑲᑎᒪᔨᐅᖏᓐᓇᖅᑐᑦ ᓄᓇᖃᖅᑳᖅᑐᓃᑦ ᒥᔅᓵᓅᖓᔪᓂᒃ ᓴᖅᑭᖅᑕᐅᓚᐅᖅᓯᒪᔪᖅ ᐊᒻᒪᓗ ᐅᑭᐅᖅᑕᖅᑐᖅ ᐃᓕᓴᕆᔭᐅᓕᖅᑐᓂ ᐊᕕᑦᑐᖅᓯᒪᓂᖏᓐᓂ ᐊᑐᐃᓐᓇᐅᑎᑦᑎᓕᖅᑐᑎᑦ ᐃᓄᓐᓂᑦ ᓵᒥᓂᓪᓗ ᐃᔅᓯᕚᖃᑕᐅᓂᐊᖅᑐᑎᑦ ᑲᑎᒪᔨᐅᓂᕐᒧᑦ. ᑲᑎᒪᔨᐅᖃᑕᐅᖏᓐᓇᕐᓂᐊᖅᑐᒥ ᐱᓕᕆᒐᔭᖅᑐᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᑎᒥᖓᓐᓂ ᑲᒪᓗᑎᑦ ᓄᓇᖃᖅᑳᖅᑐᒥᓃᑦ ᐱᔪᓐᓇᐅᑎᖏᓐᓂ. ᑲᑎᒪᔨᐅᖃᑕᐅᖏᓐᓇᕐᓂᐊᖅᑐᓂᒃ ᐱᒻᒪᕆᐅᒻᒪᑦ ᐃᓄᓐᓄᑦ ᐊᓯᖏᓐᓄᓪᓗ ᓄᓇᖃᖅᑳᖅᑐᒥᓂᕐᓄᑦ ᓯᓚᕐᔪᐊᒥ ᖁᑦᑎᓂᖅᐹᑑᒻᒪᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ ᑎᒥᐅᔪᒥᑦ ᐊᕕᑦᑐᖅᓯᒪᔪᓂᒃ ᑎᒃᑯᐊᖅᑕᐅᓯᒪᓐᖏᑦᑐᓂᑦ ᑲᑎᒪᔨᐅᔪᓂᒃ.

ᐊᒻᒪᓗ, ᐃᓗᐊᓂ ᓯᓚᕐᔪᐊᑉ ᑲᑐᔾᔨᖃᑎᒌᖏᓐᓂ, ᐱᓕᕆᔨᒻᒪᕇᑦ ᑕᒪᒃᑯᓂᖓ ᐱᔪᓐᓇᐅᑎᓕᕆᓂᕐᒥᑦ ᓄᓇᖃᖅᑳᖅᑐᒥᓂᕐᓄᑦ ᐃᓇᖐᔪᑦ ᐸᕐᓇᑦᑎᓂ ᓄᓇᖃᖅᑳᖅᑐᒥᓂᕐᓂᑦ. ᐃᓚᒋᔭᐅᔪᖅ ᓯᓚᕐᔪᐊᒥ ᑲᑐᔾᔨᖃᑎᒌᓐᓂᒃ ᐃᓄᓐᓄᑦ ᐱᔪᓐᓇᐅᑎᖏᓐᓄᑦ ᑲᑎᒪᔨᖏᓐᓄᑦ, ᐃᓄᓐᓄᑦ ᐱᔪᓐᓇᐅᑎᓄᑦ ᑎᒥᐅᔪᖅ ᓯᓚᕐᔪᐊᒥ ᑲᑐᔾᔨᖃᑎᒌᒻᒧᑦ. ᐱᓕᕆᔨᒻᒪᕇᑦ ᐃᓱᒪᒋᔭᖏᓐᓂ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓃᑦ ᐃᓄᓐᓄᑦ ᐱᔪᓐᓇᐅᑎᖏᓐᓄᑦ ᑲᑎᒪᔨᓄᑦ ᐅᖃᐅᔾᔨᒋᐊᖅᓯᓲᑦ. ᐊᕐᕌᒍᑕᒫᑦ ᐱᓕᕆᔨᒻᒪᕇᑦ ᑕᒪᒃᑯᓂᖓ ᐱᔪᓐᓇᐅᑎᓕᕆᓂᕐᒥᑦ ᓄᓇᖃᖅᑳᖅᑐᒥᓂᕐᓄᑦ ᑲᑎᒪᑎᑦᑎᓚᐅᖅᓯᒪᒻᒥᔪᑦ ᔭᓃᕙᒥ, ᔪᓚᐃᖑᒐᔪᑦᑐᒥ.

ᐱᓕᕆᖃᑎᖃᖅᑐᑕ ᓯᓚᕐᔪᐊᒥ ᑲᑐᔾᔨᖃᑎᒌᓐᓂᒃ ᐃᓄᐃᑦ ᐃᓚᒋᔭᐅᕙᑦᑐᑦ ᐊᑯᓂ ᐋᖅᑭᒋᐊᕆᐊᓕᓐᓂᒃ ᐊᐃᕙᔾᔪᑕᐅᒋᐊᖃᖅᑐᓂᓪᓗ ᑕᒪᒃᑯᓂᖓ ᑎᒍᓯᕙᓪᓕᐊᓪᓗᑎᑦ ᓯᓚᕐᔪᐊᑉ ᑲᑐᔾᔨᖃᑎᒌᖏᑕ ᓇᓗᓇᐃᖅᑕᐅᓯᒪᓂᖏᓐᓂ ᐱᔪᓐᓇᐅᑎᖏᓐᓂ ᓄᓇᖃᖅᑳᖅᑐᒥᓂᑦ 2007−ᒥ. ᐅᐊᑦᑎᐊᕈᓕ ᑎᑎᕋᖅᓯᒪᔪᑦ ᐊᑐᖅᑕᐅᓪᓚᕆᑉᐸᔪᒻᒪᑕ ᐃᓄᓐᓄᑦ ᐊᔅᓱᕈᓇᖃᑦᑕᖅᐸᔪᒻᒪᑕ ᐸᖅᑭᒐᓱᐊᖅᑐᒋᑦ ᐃᓄᐃᑦ ᐱᔪᓐᓇᐅᑎᖏᑦ, ᐱᖅᑯᓯᖏᑦ, ᒪᑭᒪᔾᔪᑎᔅᓴᖏᑦ, ᑲᑎᒪᔨᐅᓂᕐᒧᓪᓗ ᐱᕙᓪᓕᐊᒐᓱᐊᕐᓂᕐᒧᑦ.

ᐱᒻᒪᕆᐅᔪᑦ ᐱᒋᐊᕈᑎᐅᓯᒪᔪᑦ ᓯᓚᕐᔪᐊᒥ ᑲᑐᔾᔨᖃᑎᒌᑦ ᐱᕙᓪᓕᐊᓂᖏᓐᓄᑦ ᐃᑲᔫᑏᑦ ᑎᒍᔭᐅᓯᒪᔪᖅ ᑐᕌᒐᕆᔭᐅᓂᐊᖅᑐᓂ – ᖃᐅᔨᒪᔭᐅᒐᔪᑦᑐᖅ ᐃᑯᐱᑦᑐᓕᕆᓂᕐᒥᑦ ᑐᕌᒐᖏᓐᓂ. ᑐᕌᖅᐸᑦᑐᑦ ᓄᖅᑲᑎᑦᑎᒍᒪᓪᓗᑎᑦ, ᐊᔪᖅᓴᓂᕐᒥᑦ, ᐸᖅᑭᑦᑎᓂᕐᒥᑦ ᓯᓚᕐᔪᐊᒥᓪᓗ ᐊᒻᒪᓗ ᐱᐅᔪᓂᒃ ᓴᖅᑮᖁᔨᓪᓗᑎᑦ ᐃᓚᒋᓪᓗᒍ ᑕᒪᓐᓇ ᓄᑖᖅ ᐃᑯᐱᑦᑐᓕᕆᓂᕐᒧᑦ ᑲᒪᒋᔭᐅᒋᐊᓕᒃ. ᐃᓚᓕᐅᔾᔨᓯᒪᔪᖃᕐᒥᒻᒪᑦ ᑕᒪᒃᑯᓂᖓ ᓄᓇᖃᖅᑳᖅᑐᒥᓂᕐᓂᑦ ᐃᓱᒫᓘᑎᖏᓐᓂ ᐱᔾᔪᑎᖏᓐᓂᓪᓗ ᑕᒪᑐᒥᖓ ᐱᒋᐊᕈᑕᐅᓯᒪᔪᒥᑦ ᑐᔅᓯᕋᐅᑎᒥᑦ ᒫᓐᓇᕈᓗᒃ ᐊᔾᔨᐅᖏᑦᑐᒥᑦ ᐱᕙᓪᓕᐊᑎᑦᑎᓂᕐᒧᑦ ᑐᕌᒐᖏᓐᓂ.

ᓇᓗᓇᐃᖅᓯᒪᓂᖏᓐᓂ ᑲᔪᓯᑎᑦᑎᓚᐅᖅᓯᒪᔪᑦ ᐃᓄᐃᑦ ᐅᑭᐅᖅᑕᖅᑐᒥᐅᖃᑎᒌᑦ ᑲᑎᒪᔨᖏᑦ ᑎᓕᔭᐅᓯᒪᔪᑦ ᑲᑎᒪᓂᕐᔪᐊᖓᓐᓂ ᐊᕐᕌᒍᑦ ᑎᓴᒪᑦ ᐊᓂᒍᕋᐃᒪᑕ ᐊᑐᐊᖅᓯᑎᑦᑎᖃᑦᑕᕐᓗᑎᑦ ᖃᓄᖅ ᐃᓄᐃᑦ ᐱᓕᕆᕙᒻᒪᖔᑕ ᐊᔾᔨᒌᓐᖏᑦᑐᓂᒃ ᓯᓚᕐᔪᐊᒥ ᑲᑐᔾᔨᖃᑎᒌᓐᓄ ᑎᒥᐅᔪᓂᒃ ᐊᒻᒪᓗ ᑲᔪᑎᑦᑎᖃᑦᑕᓂᑦᑎᓐᓂ ᑐᕌᒐᑦᑎᓂᓪᓗ ᐃᓄᖁᑎᑦᑎᓐᓂ.